ဇွန် ၂၂၊ ၂၀၁၄
M-Media
လမင်း
ရန်ကုန် ။ ။ လူ့အဖွဲ့အစည်းအတွင်း ဖွံ့ဖြိုးတိုးတက်ရေးနှင့် အမျိုးသမီးများ၏ အခန်းကဏ္ဍများအတွက် အလုပ်ရုံဆွေးနွေးပွဲ တစ်ခုကို ဇွန်လ ၂၂ ရက်နေ့တွင် မြန်မာနိုင်ငံလုံး ဆိုင်ရာ မြန်မာမွတ်စလင် လူငယ်များ(ဘာသာရေး)အဖွဲ့ မ.မ.လ ဌာနချုပ် ရုံးခန်းမှာ နံနက် ၉ နာရီမှ ညနေ ၃ နာရီထိ ကျင်းပပြုလုပ်ခဲ့ပါသည်။
ယနေ့ ကျင်းပပြုလုပ်သော ဆွေးနွေးပွဲကို မ.မ.လ အဖွဲ့ချူပ်ရဲ့ အမျိုးသမီးရေးရာကော်မတီမှ ကြီးမှူးကျင်းပတာ ဖြစ်ပြီး အမျိုးသမီးတွေရဲ့ လိုအပ်မယ်ထင်တဲ့ အချက်များ၊ အမျိုးသမီးတွေသိသင့်တဲ့ သတင်းအချက်အလက်တွေကို သိစေရန်နှင့် အမျိုးသမီးတွေရဲ့ ရင်ထဲက ခံစားနေရတဲ့ အချက်အလက်တွေကို အဓိကထားပြီး ဆွေးနွေးခဲ့ကြကြောင်း သိရသည်။
“အမျိုးသားတွေနဲ့ ရင်ဘောင်တန်းနိုင်ဖို့ အမျိုးသမီးတွေမှာ အဓိက ပညာတွေ တတ်သိဖို့လိုပါတယ်။ တချို့အမျိုးသမီးတွေက သူတို့ကိုယ်သူတို့ ဘယ်လိုတွေးထားလဲဆိုတော့ ငါတုိ့က အိမ်ရှင်မ၊ ဒါမှမဟုတ်ရင် မိခင်လောင်းများ၊ ဒီထက်ပိုပြီး ဘာတွေသိမလဲ။ မသိရင်လဲ ဆောင်ရွက်ပေးရမယ်။ အဲ့တော့ နည်းနည်းလေးတော့ အချိန်တွေ လိုတယ်။ သူတို့မှာ မပြောရဲ မဆိုရဲတာလေး တွေရှိနေတယ်။ သူတို့ရဲ့ အဲဒီအကျင့်လေးတွေ ဖျောက်ရမယ်” ဟု မ.မ.လ အမျိုးသမီးရေးရာ ဌာနမှူး ဒေါ်ဆန်းဆန်းအေး (ခ) ဒေါ်ချို က အလုပ်ရုံဆွေးနွေးပွဲပြုလုပ်ရခြင်းနှင့် ပတ်သက်ပြီး ရှင်းလင်းပြောဆိုခဲ့သည်။
အမျိုးသမီးတွေ အနေနဲ့က အဓိက ပြောရေးဆိုရေး ရှိရမည်ဖြစ်ပြီး ပြောရေးဆိုခွင့် ရှိတဲ့အခါမှာလည်း အခွင့်ရေးဆိုသည်ကို အမျိုးသမီးအနေနှင့် နားလည်မှ ပြောဆိုနိုင်မည်ဖြစ်ကြောင်း၊ အမျိုးသမီး အခွင့်အရေးကို မသိသေးဘူးဆိုရင် အမျိုးသမီး ဥပဒေအကြောင်းကို သေချာနားလည်စွာ ရှင်းလင်းပြသပေးရန်လိုအပ်ပြီး အမျိုးသမီး ဘ၀ကို မြှင့်တင်ပေးရန် ၎င်းကဆက်လက်ပြောကြားသည်။
ယခုပြုလုပ်သော အလုပ်ရုံဆွေးနွေးပွဲသည် ပထမဆုံးအကြိမ် ကျင်းပပြုလုပ်သော အလုပ်ရုံဆွေးနွေးပွဲဖြစ်ပြီး နောင်တွင် တစ်လတစ်ကြိမ်လောက် ထိုကဲ့သို့ ဆွေးနွေးပွဲများပြုလုပ်နိုင်ရန် ကြိုးပမ်းသွားမည်ဖြစ်ကြောင်း သိရသည်။
