ဇန်နဝါရီ ၂၁၊ ၂၀၂၀
M-Media
-ယဉ်ကျေးမှု၊ ဘာသာရေးနဲ့ ဘာသာစကားဆိုင်ကာ ဖလှယ်မှု၊ ပူးပေါင်ဆောင်ရွက်မှုတွေ ပိုမိုပြုလုပ်နိုင်ဖို့အတွက် ကမ္ဘာ့မွတ်စလင်လိဂ် (MWL) က ကမ္ဘာ့အကြီးဆုံး ခရစ်ယာန်ကက်သလစ်တက္ကသိုလ် (UCSC) နဲ့ သဘောတူညီချက်တစ်ရပ်ကို လက်မှတ်ရေးထိုးခဲ့ပါတယ်။
MWL အဖွဲ့ရဲ့ အတွင်းရေးမှူး ဒေါက်တာ မိုဟာမက် ဘင် အလ်ဒူလ်ကရင်မ် အလ်-အီဆာဟာ UCSC ရဲ့ ဖိတ်ကြားမှုကြောင့် ရောမမြို့ကို ရောက်ရှိနေစဉ် ဒီသဘောတူညီချက် ရရှိခဲ့တာဖြစ်ပါတယ်။
သဘောတူညီချက်မှာ UCSC တက္ကသိုလ်က အာရဘီဘာသာစကားသင်ကြားမှုအစီအစဉ် တိုးတက်စေရေး၊ အာရပ်နဲ့ အစ္စလာမ့်ယဉ်ကျေးမှုဆိုင်ရာ သုတေသနလုပ်ငန်းတွေ တိုးတက်စေရေး နှစ်ဖက် ပူးပေါင်းဆောင်ရွက်သွားဖို့ ပါဝင်ပါတယ်။ UCSC တက္ကသိုလ်ဟာ ပြီးခဲ့တဲ့နှစ်အနည်းငယ်အတွင်း အာရဘီဘာသာစကားနဲ့ ယဉ်ကျေးမှုဆိုင်ရာ သင်ကြားမှုတွေကို ပိုမို လုပ်ဆောင်လာခဲ့တာပါ။
ဒေါက်တာ အလ်-အီဆာက ခရစ်ယာန်နဲ့ အစ္စလာမ်ကမ္ဘာတို့အကြား အပြုသဘောဆောင်တဲ့ ဆက်ဆံရေးတွေ အမြောက်များရှိခဲ့ပြီး ဒီဆက်ဆံရေးပိုမိုခိုင်မာအောင် MWL နဲ့ ဗာတီကန်တို့ပူးပေါင်းဆောင်ရွက်မှုကို တိုးမြှင့်ခဲ့ကြောင်း၊ အပြန်အလှန်လေးစားမှုကို အခြေပြီး ပူးပေါင်းဆောင်ရွက်မှု ထပ်မံမြှင့်တင်ဖို့ အရေးကြီးကြောင်း ပြောကြားခဲ့ပါတယ်။
MWL အနေနဲ့ အခြားဘာသာရေးအဖွဲ့အစည်းတွေ၊ လူ့အဖွဲ့အစည်းတွေနဲ့ ပိုမိုပူးပေါင်းဆောင်ရွက်မယ့် အစီအစဉ်တစ်ခုကို စတင်ထားတယ်လို့လည်း အလ်-အီဆာက ထည့်သွင်းပြောဆိုခဲ့ပါတယ်။
UCSC ဟာ ဥရောပက အကြီးဆုံး ပုဂ္ဂလိကတက္ကသိုလ်တစ်ခု ဖြစ်ပြီး ကမ္ဘာပေါ်မှာ အကြီးဆုံး ခရစ်ယာန်ကက်သလစ်တက္ကသိုလ်လည်း ဖြစ်ပါတယ်။
Ref: Arab News
