အောက်တိုဘာ ၁၅၊ ၂၀၂၀
M-Media

ဒုတိယအကြိမ် ကိုဗစ်ကူးစက်မှုက ပို၍ အန္တရာယ်ရှိ

Covid-19 ဒုတိယအကြိမ်ကူးစက်မှုဟာ ပထမတစ်ကြိမ်ထက် ပိုပြီး အန္တရာယ်ရှိတယ်လို့ အမေရိကန် ဆရာဝန်တွေက ဆေးပညာဂျာနယ် Lancet Infectious Diseases မှာ ရေးသားခဲ့ပါတယ်။

ကျန်းမာရေးကောင်းမွန်တဲ့ အသက် ၂၅ နှစ်အရွယ် အမျိုးသားတစ်ဦး ၂ ကြိမ်မြောက် ကိုဗစ်ကူးစက်မှုကို လေ့လာကာ ဒီလို ထုတ်ပြန်ခဲ့တာပါ။

၂ ခါပြန်ကူးစက်မှုဟာ အဖြစ်နည်းပေမယ့် ပထမအကြိမ်ကူးစက်ပြီးရတဲ့ ကိုယ်ခံအားက နောက်တစ်ကြိမ်မကူးအောင် မကာကွယ်နိုင်ကြောင်း၊ ဒါ့ကြောင့် ကူးစက်ပြီးသားလူတွေအနေနဲ့ ကိုဗစ်ဆိုင်ရာ ကျန်းမာရေးလမ်းညွှန်မှုတွေကို လိုက်နာဖို့လိုကြောင်း ပညာရှင်တွေက တိုက်တွန်းခဲ့ပါတယ်။

Covid-19 ကူးစက်မှု၊ ကိုယ်ခံစွမ်းအား၊ ရောဂါလက္ခဏာ စတာတွေနဲ့ပတ်သက်ပြီး ပညာရှင်တွေ မဖြေရှင်းနိုင်တဲ့ ပြဿနာ အမြောက်အများ ရှိနေပြီး ဒါဟာ ကာကွယ်ဆေးထုတ်လုပ်မှု၊ ရောဂါတိုက်ဖျက်ရေး ရေရှည်အစီအမံတွေပေါ်မှာ သက်ရောက်မှု ရှိမှာဖြစ်ပါတယ်။

ကိုဗစ်ကိစ္စနှင့်ဆက်စပ်၍ ပြင်သစ်ဝန်ကြီးများ၏အိမ်ကို ရဲတပ်ဖွဲ့က ဝင်ရှာ

နိုင်ငံအတွင်း ကိုဗစ်တိုက်ဖျက်ရေးလုပ်ငန်း ကိုင်တွယ်မှုနဲ့ပတ်သက်ပြီး ပြည်သူက ​ဝေဖန်တဲ့အတွက် ပြင်သစ်အစိုးရ ထိပ်တန်းပုဂ္ဂိုလ်တွရဲ့နေအိမ်ကို ရဲတွေက ဒီနေ့မှာ ဝင်ရောက်စီးနင်း ရှာဖွေခဲ့ပါတယ်။

ဆေးပစ္စည်းတွေ ပြတ်လပ်မှု၊ တုန့်ပြန်မှု နှေးကွေးတာတွေကြောင့် ပြင်သစ်အစိုးရဟာ ဝေဖန်ခံနေရပြီး တရားရေးက အခုနှစ်အစောပိုင်းကစတင်ကာ စုံစမ်းစစ်ဆေးမှု လုပ်ခဲ့ပါတယ်။

နေအိမ် စီးနင်းရှာဖွေခံရတဲ့ အစိုးရထိပ်တန်း အရာရှိတွေထဲမှာ ကျန်းမာရေးဝန်ကြီး အိုလီဗာ ဗီရန်၊ ညွှန်ချုပ် ဂျယ်ရိုမီ ဆိုလာမွန်တို့လည်း ပါဝင်ပါတယ်။ လက်ရှိဝန်ကြီးချုပ် ဂျီယန် ကက်စ်တက်နဲ့ အရင်ဝန်ကြီးချုပ်ဟောင်းတွေလည်း ဒီကိစ္စမှာ စုံစမ်းစစ်ဆေးခံနေရပါတယ်။

အမေရိကန်ဆေးကုမ္ပဏီက ကိုဗစ်ကာကွယ်ဆေး စမ်းသပ်မှုကို ရပ်ဆိုင်း

အစမ်းသပ်ခံ စေတနာ့ဝန်ထမ်းတစ်ဦး ရုတ်တရက် နေမကောင်းဖြစ်လာတဲ့အတွက် ကိုဗစ်ကာကွယ်ဆေး စမ်းသပ်မှုကို ရပ်ဆိုင်းလိုက်တယ်လို့ အမေရိကန် ဆေးကုမ္ပဏီ Johnson & Johnson က ပြောကြားလိုက်ပါတယ်။

အခုရပ်ဆိုင်းလိုက်တဲ့ဆေးဟာ အလားအလာကောင်းတယ်လို့ သတ်မှတ်ခံထားရပြီး အမေရိကန်၊ တောင်အ​မေရိကနဲ့ တောင်အာဖရိက လူသောင်းချီပါဝင်တဲ့ စမ်းသပ်မှု တတိယအဆင့်ကို ရောက်ရှိနေတာဖြစ်ပါတယ်။

ကိုဗစ်ကာကွယ်ဆေးအတွက် အလားအလာကောင်းတယ်လို့ သတ်မှတ်ခံထားရတဲ့ အောက်စဖို့ဒ်တက္ကသိုလ်ထုတ် ဆေးတစ်ခုကို ဩဂုတ်လမှာ စမ်းသပ်မှု ခေတ္တရပ်ဆိုင်းခဲ့ရပြီး နောက်ပိုင်းမှာ ပြန်လည်စမ်းသပ်ခဲ့ပါတယ်။

လက်ရှိ ကမ္ဘာတစ်ဝှမ်း ကိုဗစ်ကုနိုင်ဖွယ်ရှိတဲ့ ကာကွယ်ဆေး ၁၈၀ လောက်ကို စမ်းသပ်နေပမယ့် တစ်ခုမှ အဆင့် ၃ ဆင့်ရှိတဲ့ စမ်းသပ်မှုလုပ်ငန်းစဉ်ကို အောင်မြင်စွာ မကျော်ဖြတ်နိုင်သေးပါဘူး။

Ref: BBC

mmHelthNews

စက်တင်ဘာ ၂၇၊ ၂၀၂၀
M-Media

-ကာကွယ်ဆေး ကျယ်ကျယ်ပြန့်​ပြန့် အသုံးမပြုနိုင်ခင်မှာ Covid-19 ကြောင့် ကမ္ဘာတစ်ဝှမ်း သေဆုံးသူအရေအတွက်ဟာ ၂ သန်းအထိ ရှိလာနိုင်တယ်လို့ ကမ္ဘာ့ကျန်းမာရေးအဖွဲ့ WHO အရေးပေါ်ဆိုင်ရာအကြီးအကဲ မိုက်ရိုင်ယန်က ပြောကြားလိုက်ပါတယ်။

လက်ရှိ ကမ္ဘာတစ်ဝှမ်း သေဆုံးမှုဟာ တစ်သန်းနီးနီးရှိလာပြီဖြစ်ပါတယ်။ ရိုင်ယန်က ထိရောက်တဲ့ ကာကွယ်ဆေးကို ကျယ်ကျယ်ပြန့်ပြန့် အသုံးပြုနိုင်ဖို့ ထိရောက်တဲ့ ကြိုးပမ်းမှုမျိုး မလုပ်နိုင်ဘူးဆိုရင် သေဆုံးသူအရေအတွက်ဟာ မြန်မြန်ဆန်ဆန် တိုးလာမယ်လို့ သောကြာနေ့ သတင်းစာရှင်းလင်းပွဲမှာ ပြောကြားခဲ့ပါတယ်။

“ကျွန်တော်တို့ မလုပ်နိုင်ဘူးဆိုရင် သေဆုံးသူ ၂ သန်းဆိုတာ ခန့်မှန်းချက်မျိုးမဟုတ်ဘဲ စိတ်မကောင်းစွာနဲ့ အမှန်တကယ်ဖြစ်လာမယ့် ပမာဏပါ”

နိုင်ငံတော်တော်များများ ကိုဗစ်ကန့်သတ်ချက်တွေ လျှော့ချပြီးခဲ့တဲ့ ပြီးခဲ့တဲ့ သီတင်းပတ်အနည်းငယ်အတွင်း ကူးစက်မှုတွေ ပြန်လည်မြင့်တက်လာတာကိုလည်း ရိုင်ယန်က သတိပေးခဲ့ပါတယ်။

ဥရောပမှာ ကိုဗစ်ကူးစက်မှုဟာ လတ်တလောမှာ အလွန်အမင်း မြင့်တက်လာနေပြီး အဖျားရာသီ မရောက်ခင်က ဒီကူးစက်မှုကို ထိန်းသိမ်းနိုင်အောင် ဆောင်ရွက်ဖို့လည်း WHO တာဝန်ရှိသူတွေက အာဏာပိုင်တွေကို တိုက်တွန်းခဲ့ပါတယ်။

Ref: RT