ဇူလိုင် ၁၈၊ ၂၀၂၃
M-Media
-ပင်လယ်ထဲမှာ သင်္ဘောပျက်ပြီး ခွေးတစ်ကောင်နဲ့ ၃ လကြာ မျောနေတဲ့ သြစတေးလျ နိုင်ငံသားတစ်ဦးကို မက္ကဆီကို ငါးဖမ်းလှေတစ်စီးက ကယ်တင်လိုက်နိုင်ပါတယ်။
အသက် ၅၄ နှစ်အရွယ် လင်ဆေး တီမိုသီ ရှက်ဒေ့ါဆိုသူ ဖြစ်ပါတယ်။ ရှက်ဒေ့ါဟာ မက္ကဆီကို လာပက်ဇ်မြို့ကနေ ဧပြီလမှာ သင်္ဘောငယ်တစ်စီးနဲ့ ထွက်သွားခဲ့တာပါ။
ပြင်သစ်ပိုင် ပိုလီနီးရှားကို သွားဖို့ဖြစ်ပြီး သီတင်းပတ်အနည်းငယ်အကြာမှာပဲ မုန်တိုင်းမိကာ အင်ဂျင်နဲ့ စက်သွယ်ရေးစက်တွေ ပျက်ဆီးပြီး ပင်လယ်ပြင်မှာ မျောနေခဲ့ပါတယ်။
တနင်္လာနေ့မှာတော့ မက္ကဆီကို ငါးဖမ်းသင်္ဘောတစ်စီးဟာ ကမ်းနဲ့ မိုင်ပေါင်း ၁၂၀၀ အကွာမှာ မျောနေတဲ့ ရှက်ဒေ့ါရဲ့လှေကို တွေ့ရှိ ကယ်တင်နိုင်ခဲ့ပါတယ်။
ရှက်ဒေ့ါနဲ့ သူ့ရဲ့ခွေးတို့ဟာ အစာရေစာပြတ်လပ်ကာ အားပြတ်နေတဲ့ အနေအထားဖြစ်နေပြီး ငါးဖမ်းသင်္ဘောက အရေးပေါ် ဆေးကုသမှုတွေ လုပ်ပေးခဲ့ရပါတယ်။
စက်ပျက်ပြီး ပင်လယ်ထဲ မျောနေတဲ့အချိန်မှာ ငါးအစိမ်းတွေစား၊ မိုးရေသောက်ပြီးအသက်ဆက်ခဲ့ရတယ်လို့ ရှက်ဒေ့ါက သြစတေးလျ သတင်းဌာနတစ်ခုကို ပြောကြားခဲ့ပါတယ်။
“ပင်လယ်ထဲမှာ ခက်ခဲဆိုးရွားတဲ့ အခြေအနေတစ်ခုကို ဖြတ်သန်းခဲ့ရပါတယ်။ တစ်ယောက်တည်း မျောနေတာ ကြာတဲ့အတွက် အဟာရပြည့်ပြည့်စားဖို့၊ ကောင်းကောင်းအနားယူဖို့ပဲ လိုအပ်တာပါ။ ကျန်းမာရေးကတော့ ကောင်းပါတယ်”
Ref : Aljazeera
