ဖေဖော်ဝါရီ ၁၃၊ ၂၀၁၈
M-Media
– အာရပ်စော်ဘွားများပြည်ထောင်စု (ယူအေအီး) နိုင်ငံက ပထမဆုံး အာကာသယာဉ်မှူး စီမံကိန်းကို စတင်လိုက်ပြီး လျှောက်ထားသူ ၃၀၀၀ ကျော်လောက်ရှိတယ်လို့ သိရပါတယ်။
မိုဟာမက် ဘင် ရာရှစ် အာကာသစင်တာက စီစဉ်တဲ့ ဒီစီမံကိန်းမှာ လျှောက်ထားသူတွေရဲ့ ၄ ပုံ ၁ ပုံဟာ အမျိုးသမီးတွေ ဖြစ်ပါတယ်။
စီမံကိန်းမန်နေဂျာ စလင်း ဟူမိုက် အလ်-မာရီက ယူအေအီးလို နိုင်ငံသေးသေးလေးမှာ ဒီအရေအတွက်ဟာ တော်တော်များတဲ့ ပမာဏဖြစ်တယ်လို့ တနင်္ဂနွေနေ့က ဒူဘိုင်းမှာကျင်းပတဲ့ ကမ္ဘာ့အစိုးရများ ထိပ်သီးညီလာခံမှာ ပြောကြားခဲ့ပါတယ်။
“ဒါဟာ အမျိုးသမီးတွေကို စွမ်းအားမြှင့်တင်ပေးရေး အစိုးရရဲ့ ပေါ်လစီတွေ အလုပ်ဖြစ်တယ်ဆိုတာကို ပြသနေတာပါ” လို့ စလင်းက ဆိုပါတယ်။
ဘင်ရာရှစ် အာကာသစင်တာဟာ အာကာသယာဉ်မှူးတွေကို လေ့ကျင့်ပေးဖို့အတွက် နာဆာအပါအ၀င် ရုရှား၊ ဥရောပတို့က အာကာသစင်တာတွေနဲ့ ဆွေးနွေးမှုတွေ ပြုလုပ်နေပါတယ်။
လျှောက်ထားသူ ၃၀၀၀ ကျော်ကနေ ဒီနှစ်နှောင်းပိုင်းမှာ ၄ ဦး ရွေးထုတ်မှာဖြစ်ပြီး သူတို့တွေဟာ နိုင်ငံတကာ အာကာသစခန်းကို သွားရောက် လေ့ကျင့်ရမှာပါ။
ယူအေအီးဟာ ပထမဆုံး ကမ္ဘာဂြိုဟ်စူးစမ်းရေးဂြိုဟ်တု KhalifaSat ကို ဆောက်လုပ်နေပြီး ၂၀၁၈ ခုနှစ် နှစ်ကုန်ပုိုင်းမှာ ဂျပန်ကနေတစ်ဆင့် အာကာသထဲကို လွှတ်တင်မှာ ဖြစ်ပါတယ်။
Ref: Alarabiya
