ဇန်န၀ါရီ ၂၄၊ ၂၀၁၈
M-Media
– ငါးဖမ်းလုပ်ငန်းတွေမှာ ရွှေ့ပြောင်းလုပ်သားတွေ အထူးသဖြင့် မြန်မာနဲ့ ကမ္ဘောဒီးယားတို့က လုပ်သားတွေ လူကုန်ကူးခံရတာ၊ အဓမ္မခိုင်းစေခံနေရတာတွေ ဖြေရှင်းပေးမယ်ဆိုတဲ့ ကတိက၀တ်ကို ထိုင်းနိုင်ငံက ကျေပွန်အောင် ဆောင်ရွက်နိုင်ခြင်းမရှိဘူးလို့ နိုင်ငံတကာ လူ့အခွင့်အရေး စောင့်ကြည့်အဖွဲ့ HRW က မနေ့မှာ ပြာကြားလိုက်ပါတယ်။
Hidden Chains: Forced Labor and Rights Abuses in Thailand’s Fishing Industry ခေါင်းစဉ်နဲ့ ၁၃၄ မျက်နှာ ပါဝင်တဲ့ HRW ရဲ့ အစီရင်ခံစာမှာ အိမ်နီးချင်းနိုင်ငံတွေက ရွှေ့ပြောင်းလုပ်သားတွေ လူကုန်ကူးခံရမှုနဲ့အတူ ထိုင်းငါးဖမ်းလုပ်ငန်းမှာ အဓမ္မ လုပ်အားခိုင်းစေမှု ကျယ်ကျယ်ပြန့်ပြန့် ရှိနေတုန်းပဲလို့ ဖော်ပြထားပါတယ်။
ထိုင်းငါးဖမ်းလုပ်ငန်းတွေမှာ ရွှေ့ပြောင်းလုပ်သားတွေ ကျွန်ပြုခံရမှုရှိနေတဲ့ အခြေအနေကို ၂၀၁၄ ခုနှစ်မှာ မီဒီယာတွေက အကျယ်တ၀င့် ဖော်ပြခဲ့ပြီးတဲ့နောက် ထိုင်းအာဏာပိုင်တွေက ဒီကိစ္စကို အရေးယူဖို့အတွက် ပြုပြင်ပြောင်းလဲမှုတွေ တော်တော်များများ လုပ်ခဲ့ပါတယ်။
HRW ကတော့ ဒီလုပ်ဆောင်ချက်တွေဟာ အလုပ်သမားတွေ ညှင်းပမ်းနှိပ်စက်ခံရမှုကို ထိထိရောက်ရောက် မတားဆီးနိုင်ဘူးလို့ ဆိုပါတယ်။
အလုပ်သမား ဥပေဒကို ထိထိရောက် အသုံးမချတာ၊ အဓမ္မ လုပ်အားခိုင်းစေမှုကို ရာဇ၀တ်မှုအဖြစ် သတ်မှတ်တဲ့ သီးသန့်ဥပဒေမရှိတာ အပါအ၀င် ဥပဒေပိုင်းဆိုင်ရာ လစ်ဟာမှုတွေ၊ ငါးဖမ်းလုပ်သားတွေ ညှမ်းပမ်းခံရမှုကို ကာကွယ်ပေးမယ့် အဖွဲ့အစည်းကောင်းကောင်း မရှိတဲ့အချိန် ရွှေ့ပြောင်းလုပ်သားတွေအတွက် အလုပ်သမားသမဂ္ဂ တည်ထောင်ခွင့်မပေးတာတွေကိုလည်း HRW က ထောက်ပြပါတယ်။
အစီရင်ခံစာအတွက် HRW ဟာ ထိုင်းအစိုးရ တာဝန်ရှိသူတွေ၊ ငါးဖမ်းစက်လှေပိုင်ရှင်တွေ၊ မာလိန်မှူးတွေ၊ တက်ကြွလှုပ်ရှားသူတွေ၊ ငါးဖမ်းအသင်း တာဝန်ရှိသူတွေ၊ ကုလ၀န်ထမ်းတွေနဲ့ တွေ့ဆုံခဲ့ပြီး မြန်မာနဲ့ ကမ္ဘောဒီယားတို့က အလုပ်သမားအများစုပါဝင်တဲ့ ငါးဖမ်းလုပ်သား ၂၅၀ နီးပါးနဲ့လည်း စကားပြောခဲ့ပါတယ်။
ငါးဖမ်းလုပ်သားတွေက စက်လှေပိုင်ရှင်တွေဟာ သူတို့ရဲ့ အသိအမှတ်ပြုကတ်ပြားတွေကို သိမ်းထားပြီး တစ်နေ့ကို ၁၄ နာရီကျော် ဆက်တိုက် အလုပ်လုပ်ရကြောင်း၊ လုပ်ခလစာကလည်း အနိမ့်ဆုံးသတ်မှတ်ချက်ထက် နည်းကြောင်း၊ လစာကို လစဉ်မပေးဘဲ ၆ လတစ်ကြိမ်သာပေးကြောင်း၊ အလုပ်ပြောင်းခွင့်မပေးကြောင်း၊ ညစ်ပတ်ပြီး အန္တရာယ်ရှိတဲ့ အခြေအနေမျိုးမှာပါ အဓမ္မ အလုပ်ခိုင်းကြောင်း ပြောကြားခဲ့ပါတယ်။
တွေ့ဆုံမှုတွေကို ထိုင်းနိုင်ငံရဲ့ အဓိက ငါးဖမ်းလုပ်ငန်းရှိရာ ဆိပ်ကမ်းတွေမှာ ၂၀၁၅ ခုနှစ် ကနေ ၂၀၁၇ ခုနှစ်အကြားမှာ ပြုလုပ်ခဲ့တာဖြစ်ပြီး အရင်က လူကုန်ကူးခံရတဲ့သူ ၁၀၀ ၀န်းကျင်ပါဝင်ကာ ကျန်တဲ့သူတွေကတော့ လက်ရှိမှာ ငါးဖမ်းလုပ်သားအဖြစ် လုပ်ကိုင်နေကြတာ ဖြစ်ပါတယ်။
အလုပ်လုပ်ကိုင်ရာမှာ လုပ်ခလစာ၊ လုပ်ကိုင်ရမယ့် အခြေအနေတွေကို ဖော်ပြထားတဲ့ ဘောင်ဝင်တဲ့ စာချုပ်စာတမ်းတွေနဲ့ လုပ်ရတာမျိုးမဟုတ်ဘူးလို့ ရွှေ့ပြောင်း ငါးဖမ်းလုပ်သား တော်တော်များများက ပြာကြားခဲ့ပြီး တစ်ချို့ဆိုရင် ဒီလို စာချုပ်ချုပ်ဖို့ လိုအပ်တယ်ဆိုတာကို မသိရှိကြဘူးလို့လည်း HRW က ပြောပါတယ်။
ထိုင်းငါးဖမ်းလုပ်ငန်းတွေမှာ ညှင်းပမ်းနှိပ်စက်မှုတွေဟာ ဆက်လက်ရှိနေဆဲဖြစ်ပြီး ထိုင်းအစိုးရက နိုင်ငံတကာမှာ အမြင်ကောင်းအောင် ဟန်ပြအနေနဲ့ပဲ အရေးယူဆောင်ရွက်မှုတွေလုပ်တယ်လို့ HRW ရဲ့ အစီရင်ခံစာမှာ ဖော်ပြထားပါတယ်။
အလုပ်သမားတွေ ကျွန်ပြုခံရတဲ့သတင်း ၂၀၁၄ ခုနှစ်က ထွက်လာပြီးတဲ့နောက် အမေရိကန်နဲ့ ဥရောပတို့က ထိုင်းနိုင်ငံက တင်သွင်းတဲ့ ပင်လယ်စာတွေကို ပိတ်ပင်မယ်လို့ သတိပေးခဲ့တာပါ။
HRW ကတော့ ထိုင်းအစိုးရအနေနဲ့ လူကုန်ကူးမှု၊ ကျွန်ပြုခံရမှုကို တားဆီးဖို့အတွက် ဥပဒေတင်းကြပ်မှုတွေ၊ စီမံကိန်းတွေကို လုံလောက်အောင် ဆောင်ရွက်ခြင်းမရှိကြောင်း၊ ငါးဖမ်းလုပ်သားတွေကို အသိအမှတ်ပြုတဲ့ ပန်းရောင်ကဒ် ထုတ်ပေးမှုကလည်း ‘ခေါင်းပုံဖြတ်’ မှု အခြေအနေကိုသာ ဖြစ်စေကြောင်း ထည့်သွင်းပြောကြားခဲ့ပါတယ်။
တရားမ၀င် ငါးဖမ်းမှုတိုက်ဖျက်ရေး ထိန်းချုပ်မှုစင်တာရဲ့ ဒုတိယဥက္ကဌ Wanaphol Klomkaew က HRW ရဲ့ ဒီအစီရင်ခံစာဟာ တစ်ဖက်သတ်အချက်အလက်ကို အခြေခံထားတာဖြစ်ပြီး မယုံကြည်ရကြောင်း၊ မိမိတို့ကို သိက္ခာချတယ်လို့သာ မှတ်ယူကြောင်း ပြောကြားခဲ့ပါတယ်။
Ref: RFA
