ဇန်န၀ါရီ ၁၄၊ ၂၀၁၈
M-Media
– အမေရိကန်ပြည်ထောင်စု ဟာဝိုင်ယီကျွန်းတွင် ဒုံးကျည်အန္တရာယ်ရှိသည် မှားယွင်းစွာ သတိပေးကြေငြာမှုကြောင့် ပြည်သူများမှာ ၀ရုန်းသုန်းကား ဖြစ်သွားခဲ့သည်ဟု သိရသည်။
“ဟာဝိုင်ယီကို ပစ်မှတ်ထားတဲ့ ဒုံးကျည်တိုက်ခိုက်မှု ရှိနေကြောင်း အရေးပေါ် အသိပေးပါတယ်။ ဘေးလွတ်ရာနေရာကို ချက်ချင်းပုန်းရှောင်ကြပါ။ ဒါဟာ လေ့ကျင့်မှုမဟုတ်ပါဘူး” ဆိုသည့် စာတိုတစ်စောကို ပြည်နယ် အရေးပေါ်စီမံခန့်ခွဲရေးဌာနက ယမန်နေ့ မနက်ပိုင်းတွင် ဟာဝိုင်ယီပြည်သူများ၏ ဖုန်းများသို့ ပေးပို့ခဲ့သည်။
ထိုသတိပေးချက်အား ရုပ်သံဌာနများ၊ ရေဒီယိုများကလည်း တစ်ဆင့် ပြန်လည်၍ ဖော်ပြခဲ့ကြသည်။
ထို့ကြောင့် ပြည်သူများမှာ ၀ရုန်းသုန်းကား ဖြစ်ခဲ့ကြပြီး နာရီဝက်အကျော်တွင် ထိုသတိပေးချက်မှာ မှားယွင်းမှုဖြစ်သည်ဟု စီမံခန့်ခွဲမှုဌာနက ပြန်လည်ကြေငြာခဲ့သည်။ အမေရိကန် ပစိဖိတ်စစ်ဌာနချုပ်ကလည်း မည်သည့် အန္တရာယ်မှ မရှိဟု အတည်ပြုခဲ့သည်။
ပြည်နယ်အုပ်ချုပ်ရေးမှူး ဒေးဗစ် အိုင်ဂီက အဆိုပါမှားယွင်းမှုအတွက် ရုပ်သံမှတစ်ဆင့် တောင်းပန်ခဲ့ပြီး ဟာဝိုင်ယီ အရေးပေါ် စီမံခန့်ခွဲမှုဌာန၌ ၀န်ထန်းများ တာဝန်ချိန် အပြောင်းအလဲတွင် ခလုပ်မှားနှိပ်မိခဲ့ခြင်းဖြစ်သည်ဟု ပြောကြားခဲ့သည်။
“တာဝန်ချိန်အပြောင်းအလဲမှာ စနစ် အလုပ် လုပ်၊ မလုပ် သေသေချာချာ စစ်ဆေးစဉ်အတွင်း ဖြစ်ပွားခဲ့တာပါ။ ၀န်ထမ်းတစ်ဦးက ခလုပ်မှားနှိပ်ခဲ့တာဖြစ်ပါတယ်”
အရေးပေါ်ဌာန၌ တစ်နေ့လျှင် တာဝန်ချိန် ၃ ကြိမ် အပြောင်းအလဲရှိသည်ဟုလည်း အုပ်ချုပ်ရေးမှူးက ပြောကြားခဲ့သည်။
နျူလက်နက်ကိစ္စနှင့်ပတ်သက်၍ အမေရိကန်နှင့် မြောက်ကိုရီးယားတို့အကြား တင်းမာမှု မြင့်တက်နေချိန်တွင် ယခုကဲ့သို့ မှားယွင်းမှု ဖြစ်ပေါ်လာခဲ့ခြင်းဖြစ်သည်။ မြောက်ကိုရီးယားက ၎င်းတို့တွင် အမေရိကန်၏ မည်သည့်နေရာကိုမဆို ပစ်ခတ်နိုင်သည့် ဒုံးကျည်မျိုး ပိုင်ဆိုင်ထားသည်ဟု ပြီးခဲ့သည့်နှစ်က ကြေငြာထားသည်။
အရေးပေါ် အချက်ပေးမှုစနစ်ကို ကိုင်တွယ်သည့် အမေရိကန် ဖက်ဒရယ် ဆက်သွယ်ရေး ကော်မရှင်က ၎င်းတို့အနေဖြင့် ထိုကိစ္စအတွက် စုံစမ်းစစ်ဆေးမှုတစ်ခု ပြုလုပ်နေသည်ဟု ပြောကြားခဲ့သည်။
Ref: CNA
