ဇန်န၀ါရီ ၆၊ ၂၀၁၈
M-Media
– နှစ်အစပိုင်းကတည်းက ဟိန္ဒူအစွန်းရောက်တွေရဲ့ ပစ်မှတ်ထားတိုက်ခိုက်ခြင်းကို ခပ်စိပ်စိပ် ခံလာခဲ့ရတာကြောင့် အိန္ဒိယက ဒါလစ်ဇာတ်နိမ့်တွေဟာ စီးပွားရေးမြို့တော် မွမ်ဘိုင်းနဲ့ မဟာရက်ရ်ှထရာ ပြည်နယ်တစ်ဝှမ်းမှာ အခုတစ်ပတ်အတွင်း အကြီးအကျယ် ဆန္ဒပြခဲ့ကြပါတယ်။
သူတို့ကို တိရစ္ဆာန်တွေလို သဘောထားတဲ့ ဇာတ်မြင့်တွေကို ဗြိတိသျှနဲ့ပေါင်းပြီး တွန်းလှန်နိုင်ခဲ့တဲ့ နှစ် ၂၀၀ ပြည့်အထိမ်းအမှတ်အဖြစ် မဟာရက်ရ်ှထရာပြည်နယ်ရဲ့ ဒုတိယမြို့တော် ပူနေးမှာ ဇန်န၀ါရီ ၁ ရက်နေ့က ချီတက်လှည့်လည်စဉ် ဟိန္ဒူအမျိုးသားရေးသမားတွေရဲ့ အုပ်စုဖွဲ့ တိုက်ခိုက်ခြင်းကို ခံခဲ့ရပြီးနောက်ပိုင်း ဒါလစ်ဇာတ်နိမ့်တွေ ဒီလို အုံကြွလာတာ ဖြစ်ပါတယ်။
ဟိန္ဒူအစွန်းရောက်တွေရဲ့ တိုက်ခိုက်မှုအတွင်း အများအပြား ဒဏ်ရာရရှိခဲ့ကာ ကားတွေ မီးရှို့ဖျက်ဆီးတာ၊ ဗုဒ္ဓသာသနာ့အလံတွေကို ဆုတ်ဖြဲတာတွေလည်း ရှိခဲ့ပါတယ်။
နောက်ဆက်တွဲအဖြစ် မွန်ဘိုင်းမြို့ ဆင်ခြေဖုံးနဲ့ မဟာရက်ရ်ှထရာပြည်နယ်က ဒါလစ်ဇာတ်နိမ့်တွေ အများစုရှိတဲ့ နေရာတွေလည်း ပစ်မှတ်ထား တိုက်ခိုက်ခံခဲ့ရပြီး ဒါလစ်တွေရဲ့ သမိုင်းအမွေအနှစ်တွေ၊ ဘုန်းကြီးကျောင်းတွေ ဖျက်ဆီးခံခဲ့ရပါတယ်။
အန်ဒါပရာဒက်ရ်ှပြည်နယ်က ဂူဂျာရက်ခရိုင်မှာလည်း ဇန်န၀ါရီ ၁ ရက်နေ့မှာ ဒါလစ်တွေကို ပစ်မှတ်ထားတဲ့ ဒီလိုတိုက်ခိုက်မှုမျိုး ဖြစ်ပွားခဲ့ပါတယ်။
ဆန္ဒပြ
ဒီအဖြစ်အပျက် ဖြစ်ပွားပြီးနောက်ပိုင်းမှာ ထောင်နဲ့ချီတဲ့ ဒါလစ်ဇာတ်နိမ့်တွေဟာ မွမ်ဘိုင်းမှာ တနင်္လာနေ့ညနေပိုင်းက စတင်ဆန္ဒပြခဲ့ကြပြီး နောက်ပိုင်းမှာ မဟာရက်ရ်ှထရာ ပြည်နယ်တစ်ဝှမ်လုံးမှာ ဒီဆန္ဒပြမှုက ပြန့်နှံ့သွားခဲ့ပါတယ်။
ဇန်ဝါရီ ၃ ရက် ဗုဒ္ဓဟူးနေ့အထိ မွမ်ဘိုင်းမှာ ဆန္ဒပြမှုတွေ ဆက်ရှိခဲ့ပြီး ပါဝင်သူတွေဟာ လမ်းတွေ၊ ရထားလိုင်းတွေကို ပိတ်ဆို့တာ၊ ဘတ်စ်ကားတွေကို တိုက်ခိုက်တာတွေ လုပ်ဆောင်ခဲ့ကြပါတယ်။
ပြည်နယ်တစ်ဝှမ်း ဒါလစ်ဇာတ်နိမ့်တွေရဲ့ ဆန္ဒပြမှုမှာ ရဲတပ်ဖွဲ့က အင်အားသုံးခဲ့တာကြောင့် ဆယ်ကျော်သက်တစ်ဦး သေဆုံးကာ ဒဏ်ရာရသူတွေလည်း ရှိခဲ့ပါတယ်။
အရေးမယူ
မွမ်ဘိုင်းအခြေစိုက် ဒါလစ်အရေး တက်ကြွလှုပ်ရှားသူ ဆာဂါ ဇန်ဒီက ဇန်န၀ါရီ ၁ ရက်နေ့ ဟိန္ဒူအစွန်းရောက်တွေရဲ့ တိုက်ခိုက်မှုအတွက် ရဲတပ်ဖွဲ့မှာ အမှုဖွင့်ထားပေမယ့် ကျူးလွန်သူတွေကို ဖမ်းဆီးတာမျိုး မလုပ်ယုံသာမကဘဲ အမှုဖွင့်တဲ့သူတွေကို ပြန်လည် ဖမ်းဆီးတာမျိုးတွေ ရှိတယ်လို့ ပြောကြားခဲ့ပါတယ်။
ပြည်တွင်းဂျာနယ်လစ်တွေအနေနဲ့ ဒါလစ်တွေရဲ့ ထိခိုက်ခံစားရမှုတွေကို မျက်ကွယ်ပြုပြီး ဟိန္ဒူဇာတ်မြင့်တွေဖက်ကို ဘက်လိုက်ရေးသားတယ်လို့ ဒါလစ်တွေဖက်က စွပ်စွဲမှုတွေလည်း ရှိနေပါတယ်။
ဒါလစ်ခေါင်းဆောင်တစ်ဦးဖြစ်တဲ့ ပရာကက်ရှ် အမ်ဘဒ်ကာက ဆန္ဒပြမှုအဆုံးသတ်ဖို့ ဗုဒ္ဓဟူးနေ့မှာ ဆော်သြခဲ့ပြီး မဟာရက်ရ်ှထရာ ပြည်နယ်ဝန်ကြီးချုပ် ဒီဗန်ဒရာ ဖဒ်နာဗစ်က တနင်္လာနေ့ အကြမ်းဖက်မှုအတွက် စုံစမ်းစစ်ဆေးမှုတွေ ပြုလုပ်ဖို့ အမိန့်ပေးခဲ့ပါတယ်။
အိန္ဒိယမှာ ဒါလစ်ဇာတ်နိမ့်အရေအတွက် သန်း ၂၀၀ လောက် ရှိနေပြီး ဇာတ်မြင့်တွေရဲ့ ခွဲခြားမှု နှိပ်စက်ညှင်းပမ်းမှုဒဏ်ကို မခံနိုင်တာကြောင့် အများစုဟာ ဟိန္ဒူဘာသာကနေ ဇာတ်ခွဲခြားမှုမရှိတဲ့ ဗုဒ္ဓဘာသာကို ကူးပြောင်းခဲ့ကြပါတယ်။
၁၉၅၀ ခုနှစ် အိန္ဒိယဖွဲ့စည်းပုံမှာ ဇာတ်ခွဲခြားမှုစနစ်ကို တရားဝင် ဖျက်သိမ်းခဲ့ပေမယ့် မြေပြင်မှာတော့ လက်ရှိအချိန်အထိ ဆက်လက်ရှိနေဆဲ ဖြစ်ပါတယ်။
Ref: The Guardian, Independent, Newsclick
