ဒီဇင်ဘာ ၂၆၊ ၂၀၁၇
M-Media
– ကိုရီးယားကျွန်းဆွယ်မှာ အင်အားအပြည့်နဲ့ စစ်ပွဲဖြစ်ရင် တောင်ကိုရီးယားနိုင်ငံမှာ နေထိုင်နေတဲ့ အမေရိကန်နိုင်ငံသား သိန်းချီ သေဆုံးနိုင်တယ်လို့ ရုရှား လုံခြုံရေးကောင်စီ အကြီးအကဲ နီကိုလိုင်း ပက်ထရူရှက်ဗ်က သတိပေးလိုက်ပါတယ်။
မြောက်ကိုရီးယားက တိုက်လာရင် သူ့နိုင်ငံသား ၂၅၀၀၀၀ လောက် သေမယ်ဆိုတာ အမေရိကန်ကလည်း သိရှိထားပြီး ဒီအရေအတွက်ဟာ စစ်ရေးဗျူဟာအရ လက်မခံနိုင်လောက်တဲ့ သေဆုံးမှုမျိုးဖြစ်တယ်လို့ ပက်ထရူရှက်ဗ်က ပြောပါတယ်။
မြောက်ကိုရီးယားရဲ့ အမြောက်တွေ၊ ဒုံးကျည်ပစ်စင်တွေကို တောင်ကိုရီးယားက လူ ၁၀ သန်းလောက်နေထိုင်တဲ့ မြို့တော်ဆိုးလ်နဲ့ ကီလိုမီတာ ၅၀ အကွာလောက်မှာ ထားရှိတာဖြစ်တယ်လို့ သူက ထောက်ပြခဲ့ပြီး ကိုရီးယားကျွန်းဆွယ်မှာ တင်းမာမှုတွေ မြင့်တက်လာရာမှာ အမေရိကန်ရဲ့ မဆင်ခြင်မှုကြောင့်လည်း ပါတယ်လို့ ဆိုပါတယ်။
“ဒီကနေ့ အမေရိကန်ဟာ မြောက်ကိုရီးယားခေါင်းဆောင်ပိုင်းနဲ့ ပြည်သူတစ်ရပ်လုံးအပေါ် ရန်လိုတဲ့စကားတွေ ပြောနေပြီး၊၊ တောင်ကိုရီးယားနဲ့အတူ ကြီးမားတဲ့ လေကြောင်း၊ ရေကြောင်း လေ့ကျင်မှုတွလည်း လုပ်နေပါတယ်”
ပြီးခဲ့တစ်ပတ်မှာ ကုလဟာ မြောက်ကိုရီးယားအပေါ် ပိတ်ဆို့မှုအသစ် ထပ်မံပြုလုပ်ခဲ့ပြီး ကင်ဂျုံအန်ကတော့ ဒါဟာ သူ့နိုင်ငံအပေါ်မှာ စစ်ကြေငြာတာပဲလို့ ပြောကြားခဲ့ပါတယ်။
ပက်ထရူရှက်က ဒီလိုတင်းမာမှုတွေ ပျောက်ဖို့ဆိုရင် နိုင်ငံရေး၊ သံတမန်ရေးအရသာ ဆောင်ရွက်ရမှာဖြစ်ကြောင်း၊ ရုရှားနဲ့ တရုတ်တို့ဟာ မြောက်ကိုရီးယား ဒုံးကျည်နဲ့ နျူကလီးယား စမ်းသပ်မှုတွေ ရပ်တန့်ရေး၊ အမေရိကန်က စစ်ရေးလေ့ကျင့်မှုတွေ မလုပ်ရေးတွေ ပါဝင်တဲ့ လမ်းပြမြေပုံတစ်ခုကို ဖော်ဆောင်ဖို့ ကြိုးစားနေကြောင်း ထည့်သွင်း ပြောကြားခဲ့ပါတယ်။
Ref: RT
