မေ ၂၉၊ ၂၀၂၃
M-Media
– “ကျွန်တော်တို့ရဲ့ အနာဂတ်အစီအစဥ်ဟာ ရုရှားက ပစ်မှတ်သစ်တွေကို တိုက်ခိုက်သွားဖို့ဖြစ်ပါတယ်။ ရုရှားထဲကို ကျွန်တော်တို့ အသေအချာ၀င်မယ်။ စိတ်ရှည်ရှည်ထားပြီး ရက်နည်းနည်းလောက်သာ စောင့်ကြည့်လိုက်ပါ”
ရုရှားအပျော်တမ်းတပ်ဖွဲ့ (RVC) ရဲ့ တပ်မှူး ဒန်းနစ် ကာပူစတင်ရဲ့ မီဒီယာတွေကို ပြောကြားချက်ဖြစ်ပါတယ်။
RVC နဲ့ Freedom of Russia Legion တပ်ဖွဲ့တို့ပေါင်းကာ ယူကရိန်းနယ်စပ်ကနေ ရုရှားဖက် ဘဲလ်ဂိုရော့ဒ် ဒေသထဲ၀င်ပြီး တနင်္လာနေ့နဲ့ အင်္ဂါနေ့တွေမှာ တိုက်ခိုက်မှုတွေ ပြုလုပ်ခဲ့ပါတယ်။
၂၄ နာရီကြာမြင့်တဲ့ ဒီတိုက်ခိုက်မှုကို အောင်မြင်စွာ တွန်းလှန်နိုင်ခဲ့တယ်လို့ ရုရှားက ထုတ်ပြန်ပြီး တိုက်ခိုက်မှုအတွက် ယူကရိန်းကို စွပ်စွဲခဲ့ပါတယ်။
ယူကရိန်းကတော့ ပူတင်ကိုဆန့်ကျင်တဲ့ ရုရှားလူမျိုးတွေ စုစည်းကာ တိုက်ခိုက်တာဖြစ်ပြီး သူတို့မပါဘူးလို့ ဆိုပါတယ်။
ကာပူစတင်ဟာ မော်စကိုမှာမွေးဖွားတဲ့ ရုရှားလူမျိုးပါ။ ပူတင်လက်ထက် မတရားမှုတွေ၊ ဖိနှိပ်မှုတွေကို တွန်းလှန်ဖို့ RVC ကို ဖွဲ့စည်းထားတာလို့ သူက ပြောပါတယ်။
“အာဏာရှင်ကို တိုက်ထုတ်လို့ရတယ်။ ပူတင်ရဲ့အာဏာ အမြဲမတည်နိုင်ဘူးဆိုတာ ရုရှားပြည်သူတွေကို ကျွန်တော် သက်သေပြချင်ပါတယ်”
ယူကရိန်းအာဏာပိုင်တွေက သူတို့ကို တိုက်တွန်းအားပေးပေမယ့် လက်နက်ထောက်ပံ့တာ၊ စီမံကွပ်ကဲတာမျိုး မရှိဘူးလို့လည်း ကာပူစတင်က ပြောပါတယ်။
RVC အဖွဲ့ဟာ ရှေ့ဆက်ပြီး ရုရှားနယ်မြေထဲ ၀င်ရောက်တိုက်ခိုက်မှုတွေ လုပ်ဆောင်ဖို့လည်း စီစဥ်ထားပါတယ်။
ကာပူစတင်ဟာ တစ်ကယ်တော့ နာဇီ၀ါဒထောက်ခံသူ ရုရှားအစွန်းရောက်တစ်ဦးပါ။ သူကလည်း သူ့အဖွဲ့ဟာ လက်ယာစွန်းအဖွဲ့ဆိုတာ ၀န်ခံပါတယ်။
နာဇီအလံလွှင့်တာမျိုး၊ နာဇီလို အလေးပြုတာမျိုး မရှိတဲ့အတွက် သူ့ကို နာဇီလို့ခေါ်တာ မကြိုက်ဘူးလို့ ကာပူစတင်က ပြောပါတယ်။
ဘဲလ်ဂိုရော့ဒ်က တိုက်ခိုက်မှုမှာ အမေရိကန်စစ်လက်နက်ပစ္စည်းတွေ အသုံးပြုခဲ့တယ်လို့ ရုရှားဖက်က ထုတ်ပြန်ပြီး၊ အမေရိကန်ကလည်း ဒီကိစ္စကို စုံစမ်းစစ်ဆေးနေပါတယ်။
ကာပူစတင်က ဒီကိစ္စကို တိတိကျကျ အဖြေမပေးခဲ့ပါဘူး။ ယူကရိန်းကို ရုရှားရဲ့ ကျူးကျော်တိုက်ခိုက်မှုမှာ အမေရိကန် စစ်လက်နက်ပစ္စည်း အမြောက်အများ သိမ်းယူရရှိခဲ့ပြီး ဒါတွေကို မှောင်ခိုစျေးကွက်ကနေ ပြန်၀ယ်သုံးနိုင်တယ်လို့သာ ထောက်ပြပြောဆိုခဲ့ပါတယ်။
RVC မှာ အင်အားဘယ်လောက်ရှိလဲ ဆိုတာကို ကာပူစတင်က မပြောပါဘူး။
ယူကရိန်းက ရုရှားဖက်ကို တန်ပြန်ထိုးစစ်စဖို့ ပြင်ဆင်နေတဲ့အချိန်၊ RVC နဲ့ ပူတင်ကိုဆန့်ကျင်တဲ့ အဖွဲ့တွေက ရုရှားနယ်မြေထဲအထိ ၀င်ရောက်တိုက်ခိုက်တာတွေ လုပ်ဆောင်လာတာပါ။
ကျွမ်းကျင်သူတွေကတော့ ယူကရိန်းစစ်ပွဲရဲ့နောက်ဆက်တွဲ ရုရှားမှာ ပြည်တွင်းလက်နက်ကိုင်ပုန်ကန်မှု ပေါ်လာမယ့် အခြေအနေတွေ ရှိနေပြီလို့ သုံးသပ်နေကြပါတယ်။
Ref: Reuters
