Blog

ဖေဖော်၀ါရီ ၃၊ ၂၀၂၃

M-Media 

-မြန်မာနိုင်ငံကပြဿနာကို ဖြေရှင်းရာမှာ ပြည်တွင်းက အဖွဲ့စုံပါ၀င်တဲ့ ဆွေးနွေးညှိနှိုင်းရေးက အရေးပါတယ်ဆိုတာ အာဆီယံ နိုင်ငံခြားရေး၀န်ကြီးတွေ သဘောတူခဲ့တယ်လို့ အင်ဒိုနီးရှား နိုင်ငံခြားရေး၀န်ကြီး ရက်တနို မာဆူဒီက ပြောကြားလိုက်ပါတယ်။  

အာဆီယံ နိုင်ငံခြားရေး၀န်ကြီးတွေဟာ ဒီကနေ့ ဂျကာတာမှာ ၃၂ ကြိမ်မြောက် ညှိနှိုင်းအစည်းအ၀ေး ပြုလုပ်ခဲ့ကြတာပါ။ 

မာဆူဒီက အစည်းအ၀ေးအတွင်း အာဆီယံ ဘုံသဘောတူညီချက် ၅ ချက်ကို အကောင်အထည်ဖော်ကာ အားလုံးပါ၀င်နိုင်မယ့် ဆွေးနွေးပွဲတစ်ခု မြန်မာနိုင်ငံမှာ ပေါ်လာရေး ဆောင်ရွက်ဖို့ ဆွေးနွေး သဘောတူခဲ့ကြတယ်လို့ သတင်းထောက်တွေကို ပြောကြားခဲ့ပါတယ်။ 

“အားလုံးပါ၀င်တဲ့ ဆွေးနွေးပွဲဟာ မြန်မာနိုင်ငံက ပြဿနာကို ငြိမ်းချမ်းစွာဖြေရှင်းနိုင်ရေးအတွက် သော့ချက်တစ်ခုဖြစ်ပါတယ်။ အကြမ်းဖက်မှုလျှော့ချတာ၊ လူသားချင်း စာနာထောက်ထားမှု အကူအညီတွေကို လျင်လျင်မြန်မြန် အဟန့်အတားမရှိပေးနိုင်အောင် ကြိုးပမ်းတာတွေကနေလည်း ဒီလိုဆွေးနွေးပွဲဖြစ်လာနိုင်မယ့် ၀န်းကျင်မျိုး ဖန်တီးပေးရပါမယ်”

အခုနှစ်အာဆီယံအလှည့်ကျဥက္ကဌအဖြစ် အင်ဒိုနီးရှားနိုင်ငံက ဆောင်ရွက်မှာဖြစ်ပါတယ်။ မြန်မာပြဿနာ ဖြေရှင်းရေးမှာ အာဆီယံအဖွဲ့ဟာ ဘုံသဘောတူညီချက် ၅ ချက်ကို စွဲကိုင်ထားတာ ဖြစ်ပါတယ်။ 

မာဆူဒီက အင်ဒိုနီးရှားဟာ မြန်မာပြဿနာဖြေရှင်းရေး နည်းလမ်း ၃ ခုနဲ့ ချဥ်းကပ်ဆောင်ရွက်သွားမယ်လို့ ပြောပါတယ်။ 

“အားလုံးပါ၀င်မယ့် နိုင်ငံတော်အဆင့် ဆွေးနွေးပွဲ ဖြစ်လာဖို့ သက်ဆိုင်သူတွေအားလုံး စေ့စပ်ဆွေးနွေးရမှာက ပထမအဆင့် ဖြစ်ပါတယ်။ ကနဦး စေ့စပ်ဆွေးနွေးရမယ့် ကိစ္စကို သက်ဆိုသူတွေအားလုံးထံ မျှ၀ေထားပြီ ဖြစ်ပါတယ်”

ဒုတိယအဆင့်က နိုင်ငံတော်အဆင့် ဆွေးနွေးမှုလုပ်ဆောင်ရေး လမ်းဖွင့်ပေးဖို့ဖြစ်ပြီး၊ တတိယအဆင့်က အာဆီယံအိမ်နီးချင်းနိုင်ငံတွေ၊ ကုလ၊ နိုင်ငံတာအသိုင်းတို့နဲ့ ပူးပေါင်းကာ ပြဿနာဖြေရှင်းရေး ဖြစ်တယ်လို့လည်း မာဆူဒီက ထည့်သွင်းပြောဆိုခဲ့ပါတယ်။ 

Ref: CNA 

ဖေဖော်၀ါရီ ၁၊ ၂၀၂၃

M-Media 

-မြန်မာစစ်တပ် လက်နက်ရရှိအောင်၊ လေယာဥ်ဆီရရှိအောင်၊ ငွေကြေးအကျိုးအမြတ်ရရှိအောင် လုပ်ဆောင်ပေးနေတဲ့ လူပုဂ္ဂိုလ် ၆ ဦးနဲ့ အဖွဲ့အစည်း ၃ ခုကို အမေရိကန်နဲ့ အနောက်နိုင်ငံတွေက ပိတ်ဆို့အရေးယူမှုအသစ်တွေ ပြုလုပ်လိုက်ပါတယ်။ 

စစ်ခေါင်းဆောင်တွေ အုပ်စီးထားတဲ့ မြန်မာ့ရေနံနဲ့ သဘာ၀ဓာတ်ငွေ့လုပ်ငန်း၊ သတ္ထုတွင်းလုပ်ငန်းနှစ်ခုနဲ့ လေတပ်က တာ၀န်ရှိသူတွေ ပိတ်ဆို့အရေးယူခံရတဲ့ စာရင်းထဲမှာ ပါ၀င်ပါတယ်။ 

မြန်မာနိုင်ငံက လေယာဥ်စက်သုံးဆီလုပ်ငန်းကို လွှမ်းမိုးထားတဲ့ Asia Sun Group ကုမ္ပဏီကို ယူကေက ပစ်မှတ်ထား ပိတ်ဆို့ခဲ့ပြီး၊ ကနေဒါကလည်း မြန်မာစစ်တပ်က လေယာဥ်ဆီကို တိုက်ရိုက် ဒါမှမဟုတ် သွယ်၀ိုက်ရရှိနိုင်မယ့် လမ်းကြောင်းတွေကို ပစ်မှတ်ထားကာ ပိတ်ဆို့အရေးယူမှုတွေ ပြုလုပ်ခဲ့ပါတယ်။ 

အာဏာသိမ်း မြန်မာစစ်တပ်ဟာ အခုနောက်ပိုင်း တော်လှန်ရေးအဖွဲ့တွေကို လေကြောင်းကနေ တိုက်ခိုက်မှု တိုးမြှင့်ပြုလုပ်လာခဲ့ပြီး အရပ်သား ထိခိုက်သေဆုံးမှုတွေလည်း မြင့်တက်လာပါတယ်။ 

မြန်မာစစ်တပ်အပေါ် အခုထပ်လုပ်တဲ့ ပိတ်ဆို့မှုအသစ်တွေမှာ သြစတေးလျနိုင်ငံလည်း ပါ၀င်ပါတယ်။ 

လူ့အခွင့်အရေးအဖွဲ့ Amnesty International က စီးပွားရေးနဲ့ လူ့အခွင့်အရးဆိုင်ရာ သုတေသနပညာရှင် မွန့်ဆီ ဖာရီက လေယာဥ်ဆီရရှိမှုကို ပစ်မှတ်ထားတဲ့ အခုပိတ်ဆို့မှုအသစ်ကို ကြိုဆိုပြီး အခြားနိုင်ငံတွေလည်း ဒီလိုခြေလှမ်းမျိုး လှမ်းသင့်တယ်လို့ ပြောကြားခဲ့ပါတယ်။ 

Ref: Reuters