ဧပြီ ၁၂၊ ၂၀၁၇
M-Media
– ဆီးရီးယားအစိုးရက ဓာတုလက်နက်အသုံးပြုမှုကို ပမာပေးရာတွင် ဟစ်တလာက ဂျူးလူမျိုးများအား သတ်ဖြတ်မှုထက် ပိုမိုဆိုးရွားသည့်ပုံစံ ပြောဆိုခဲ့သည့် အိမ်ဖြူတော် ပြန်ကြာရေးတာဝန်ရှိသူ ရှောင် စပိုက်ဆာက ဂျူးလူမျိုးများကို ပြန်လည်တောင်းပန်လိုက်သည်။
ယမန်နေ့က သတင်းစာရှင်းလင်းပွဲတွင် စပိုက်စာက ဟစ်တလာမှာ ‘ဓာတုလက်နက်ကို အသုံပြုရန် မဆောင်ရွက်ခဲ့’ ဟု ပြောကြားခဲ့ခြင်းဖြစ်သည်။ ထိုစကားမှာ ဟစ်တလာက ဂျူးများအား ဓာတ်ငွေ့ခန်းများ၌ သတ်ဖြတ်မှုကို လစ်လျူရှုကာ ဂျူးများ၏ ခံစားရမှုကို ပေါ့သွားအောင် ပြုလုပ်ခြင်းမျိုး ဖြစ်သည်ဟု နိုင်ငံတကာက ဝေဖန်ခဲ့ကြသည်။
“Holocaust (ဂျူးများအား အစုလိုက်အပြုံလိုက် သတ်ဖြတ်မှု) ရဲ့ ကြောက်မက်ဖွယ်ရာ သဘာဝကို ပေါ့ပျက်ပျက်ဖြစ်အောင် လုပ်တာမျိုး မဟုတ်ပါဘူး။ လူနေထူထပ်တဲ့နေရာတွေမှာ လေယာဉ်နဲ့ ဓာတုဗုံးချတဲ့ လုပ်ရပ်မျိုးကို ကွဲကွဲပြားပြားဖြစ်သွားအောင် ပြောကြားခဲ့တာပါ။ အပြစ်မဲ့တဲ့သူတွေကိုအပေါ် ဘယ်လို တိုက်ခိုက်မှုမှ လက်ခံနိုင်စရာမဟုတ်သလို၊ ဆင်ခြေပေးလို့လည်း မရပါဘူး” ဟု စပိုက်ဆာက အင်္ဂါနေ့တွင် ထုတ်ပြန်သော ကြေငြာချက်၌ ဖော်ပြထားသည်။
အိမ်ဖြူတော်မှာ ယခုနှစ်အစပိုင်းကလည်း နိုင်ငံတကာ Holocaust အောက်မေ့ဖွယ်နေ့အတွက် ကြေငြာချက် ထုတ်ပြန်ရာတွင် ဂျူးလူမျိုးများကို ရည်ညွှန်းဖော်ပြထားခြင်း မရှိသည့်အတွက် ဝေဖန်ခံခဲ့ရသည်။
Ref: Aljazeera
