News @ M-Media

Blog

  • မလေးရှား နာမည်ကျော်အပန်းဖြေစခန်းအနီး မြေပြိုမှုကြောင့် လူ ၂၀ နီးပါး သေဆုံး

    မလေးရှား နာမည်ကျော်အပန်းဖြေစခန်းအနီး မြေပြိုမှုကြောင့် လူ ၂၀ နီးပါး သေဆုံး

    ဒီဇင်ဘာ ၁၆၊ ၂၀၂၂

    M-Media 


    – မလေးရှားက နာမည်ကျော် Genting Highlands တောင်ပေါ်အပန်းဖြေစခန်းအနီး ဒီကနေ့မနက်ပိုင်း မြေပြိုမှုကြောင့် အနည်းဆုံး ၁၈ ဦး သေဆုံးပြီး ပျောက်ဆုံးနေသူတွေလည်း ရှိနေပါတယ်။ 

    မြေပြိုတဲ့နေရာဟာ Genting Highland နဲ့ ၄ ကီလိုမီတာ၀ေးတဲ့ Father’s Organic Farm အပန်းဖြေစခန်းပါ။ မနက်အစောပိုင်းမှာ ဖြစ်ပွားတာကြောင့် တဲထိုးပြီး စခန်းချအပန်းဖြေကြတဲ့ မိသားစုတစ်ချို့ မြေပိတဲ့အထဲမှာ ပါ၀င်သွားပါတယ်။

    သောကြောန့ နေ့လည်ပိုင်းအထိ သေဆုံး ၁၈ ဦး ရှိလာပြီး အနည်းဆုံး ကလေးငယ် ၃ ဦး ပါ၀င်ပါတယ်။ မလေးရှားမီးသတ်၊ လခြမ်းနီနဲ့ အကူအညီပေးရေးအဖွဲ့တွေက ရှာဖွေကယ်ဆယ်ရေးလုပ်ငန်းတွေ လုပ်ဆောင်နေပြီး ပျောက်ဆုံနေသူတွေလည်း ရှိနေပါတယ်။

    ဒေသအစိုးရက မြေပြိုမှုဖြစ်တဲ့နေရာတစ်၀ိုက် တောင်ပေါ်  အပန်းဖြေစခန်းတွေဟာ ဘေးအန္တရာယ်ကင်းရေး စည်းမျဥ်းတွေနဲ့ ညီညွတ်မှုမရှိဘူးလို့ ပြောကြားထားပါတယ်။ 

    Ref: CNA

  • မွတ်စလင်အမျိုးသမီးများအား စော်ကားအရှက်ခွဲသူကို အိန္ဒိယက တရားစွဲမည်

    မွတ်စလင်အမျိုးသမီးများအား စော်ကားအရှက်ခွဲသူကို အိန္ဒိယက တရားစွဲမည်

    ဒီဇင်ဘာ ၁၄၊ ၂၀၂၂

    M-Media 


    -မွတ်စလင်အမျိုးသမီးတွေကို ရောင်းစရာတစ်ခုအဖြစ် အွန်လိုင်းတင်အရှက်ခွဲတဲ့ အမျိုးသားတစ်ဦးကို တရာစွဲဆိုသွားမယ်လို့ အိန္ဒိယရဲတပ်ဖွဲ့က သတင်းထုတ်ပြန်ပါတယ်။  

    အသက် ၂၅ နှစ်အရွယ် Aumkareshwar Thakur ဆိုသူဟာ ၂၀၂၁ ခုနှစ်က Sulli Deals ဆိုတဲ့ အက်ပလီကေးရှင်းတစ်ခုကို ဖန်တီးပြီး အိန္ဒိယမှာ ထင်ရှားတဲ့ မွတ်စလင်အမျိုးသမီးတွေရဲ့ ကိုယ်ရေးအချက်အလက်တွေကိုတင်ကာ ရောင်းချခဲ့တာ ဖြစ်ပါတယ်။ အမှန်တကယ်ရောင်းတာမျိုး မဟုတ်ဘဲ တမင် အရှက်ခွဲကာ နာမည်ပျက်အောင် လုပ်တာပါ။ 

    သူ့ကို ၂၀၂၂ ခုနှစ် ဇန်န၀ါရီမှာ ဖမ်းဆီးနိုင်ခဲ့ပေမယ့် မတ်လမှာ အာမခံနဲ့ ပြန်လွှတ်ပေးခဲ့ပါတယ်။ ရာဇ၀တ်မှုဥပဒေ၊ ဆက်သွယ်ရေးဥပဒေတွေနဲ့ စွဲချက်တင်ထားပြီး ပြီးခဲ့တဲ့တစ်ပတ်မှာ တရားစွဲဆိုဖို့ ခွင့်ပြုချက်ရခဲ့တာဖြစ်ပါတယ်။  

    အိန္ဒိယ အွန်လိုင်းသုံးစွဲသူတွေကြားမှာ မွတ်စလင်အမျိုးသမီးတွေကို စော်ကားအရှက်ခွဲမှုဟာ ပြီးခဲ့တဲ့နှစ်တွေအတွင်း သိသိသာသာ မြင့်တက်လာခဲ့ပါတယ်။ အထူးသဖြင့် တက်ကြွလှုပ်ရှားသူ၊ ထက်မြက်သူ မွတ်စလင်အမျိုးသမီးတွေကို ပစ်မှတ်ထားတာဖြစ်ပါတယ်။

    မွတ်စလင်အမျိုးသမီးတွေရဲ့ ပုံနဲ့ ကိုယ်ရေးအချက်အလက်ကိုတင်ကာ လေလံတင်ရောင်းတဲ့ နောက်ထပ် အက်ပလီကေးရှင်းတစ်ခုရှိပြီး Bulli Bai လို့ အမည်ပေးထားပါတယ်။ 

    Bulli Bai ကိုဖန်တီးသူဟာ အသက် ၂၀ အရွယ် Neeraj Bishnoi ဆိုသူဖြစ်ပြီး Thakur နဲ့ အတူ ဖမ်းဆီးခံခဲ့ရတာပါ။ Bishnoi ကို တရားစွဲထားလားဆိုတာ တိတိကျကျ မသိရပါဘူး။

    Ref: BBC

  • မော်ရိုကိုနဲ့အတူ နာမည်ကြီးလာသည့် လက်ဘနွန်က ဗေဒင်ဆရာမ

    မော်ရိုကိုနဲ့အတူ နာမည်ကြီးလာသည့် လက်ဘနွန်က ဗေဒင်ဆရာမ

    ဒီဇင်ဘာ ၁၂၊ ၂၀၂၂

    M-Media 


    -စနေနေ့က မော်ရိုကိုအသင်း ပေါ်တူဂီကိုနိုင်ကာ ကမ္ဘာ့ဖလား ဆီမီးဖိုင်နယ်ကို တက်ရောက်သွားမှုနဲ့အတူ လက်ဘနွန်က လက္ခဏာဆရာမတစ်ယောက် နာမည်ကြီးလာပါတယ်။ 

    မော်ရိုကိုဟာ ကမ္ဘာ့ဖလားဆီမီးဖိုင်နယ်ကို ပထမဆုံးရောက်ရှိခဲ့တဲ့ အာဖရိကအသင်းအဖြစ် မှတ်တမ်း၀င်ခဲ့ပါတယ်။ 

    လက်ဘနွန် ဗေဒင်ဆရာမ လိုက်လာ အဘ်ဒူလတစ််ဖ်ဟာ ဗုဒ္ဓဟူးနေ့က သူ့ရဲ့ Instagram မှာ ကမ္ဘာ့ဖလား ခန့်မှန်းချက်ဗီဒီယိုကို လွှင့်တင်ခဲ့ပြီး အဲဒီအထဲမှာ အာရပ်အသင်းတစ်ခု ဆီမီးဖိုင်နယ်တက်မယ်လို့ တွက်ချက် ပြောကြားခဲ့ပါတယ်။ 

    ဒီဗီဒီယိုကို ဆိုရှယ်မီဒီယာသုံးစွဲသူတွေ အပြိုင်အဆိုင် မျှ၀ေခဲ့ကြပြီး စနေနေ့မှာတော့ ဒီခန့်မှန်းချက်ဟာ အမှန်တကယ် ဖြစ်လာပါတယ်။ 

    မော်ရိုကိုဟာ အာဖရိကတိုက်က အာရပ်နွယ်ဖွားတွေရဲ့နိုင်ငံ ဖြစ်ပါတယ်။ 

    ဆရာမလိုက်လာဟာ ကမ္ဘာ့ဖလား အုပ်စုပွဲစဥ် မစခင် ဆော်ဒီအာရေဗျက အာဂျင်တီးနားကို နိုင်လိမ့်မယ်လို့ တွက်ချက်ပြောကြားခဲ့ပါတယ်။

    လိုက်လာရဲ့ အထင်ရှားဆုံးတွက်ချက်မှုက လက်ဘနွန်၀န်ကြီးချုပ် ရာဖစ် ဟာရီရီ လုပ်ကြံသတ်ဖြတ်ခံရမယ်ဆိုတဲ့ ပြောကြားချက်ပါ။ ဟာရီရီဟာ ၂၀၀၅ ခုနှစ် ဖေဖော်ရီလမှာ တကယ်ပဲ ကားဗုံးခွဲ လုပ်ကြံခံခဲ့ရပါတယ်။ 

    ဆရာမလိုက်လာက သူမဟာ အနာဂတ်ကို ကြိုပြောတာမဟုတ်ဘဲ သူမတွက်ချက်ပြီး ထွက်ပေါ်လာတဲ့ ရလဒ်ကိုသာ ပြောကြားတာလို့ ဆိုပါတယ်။ 

    မော်ရိုကိုအသင်းကမ္ဘာ့ဖလားရနိုင်မယ့် ဇာတာပါလားလို့ မေးမြန်းရာမှာတော့ ဖိုင်နယ်အတွက် သူမ တွက်ချက်မှာမဟုတ်ဘဲ မော်ရိုကိုအသင်း ဖလားရအောင် ဆန္ဒပြုတယ်လို့ ဖြေကြားခဲ့ပါတယ်။

    အစ္စလာမ်ဘာသာမှာ ဗေဒင်ယတြာ လက္ခဏာကိန်းခန်းတွေကို သမ္မာဒိဌိမကျတဲ့အရာတွေအဖြစ် သတ်မှတ်ထားပြီး လေ့လာလိုက်စားခြင်းမပြုဖို့ တားမြစ်ထားပါတယ်။ 

    လက်ဘနွန်အပါအ၀င် အာရပ်ကမ္ဘာမှာ လူများစုက အစ္စလာမ်ဘာသာ၀င်ဖြစ်ပေမယ့် အခြားဘာသာ၀င်တွေလည်း အများအပြား ရှိနေတာဖြစ်ပါတယ်။ 

    Ref: Arab News

  • နိုင်ငံအသင်းအတွက် ကစားပေးဖို့ မသေချာတော့ပါဘူး

    နိုင်ငံအသင်းအတွက် ကစားပေးဖို့ မသေချာတော့ပါဘူး

    နိုင်ငံအသင်းအတွက် ကစားပေးဖို့ ကျွန်တော် တံခါးဖွင့်ထားဆဲပါ။ ဒါပေမယ့် ရာနှုန်းပြည့် မသေချာပါဘူး။ ကျွန်တော့်အတွက်၊ နိုင်ငံအသင်းအတွက် မှန်ကန်တဲ့ဆုံးဖြတ်ချက်ချဖို့ ကျွန်တော် စဥ်းစားရပါတော့မယ်။ 

    (နေးမာ – ဘရာဇီးလ်တိုက်စစ်မှူး)

    ဘရာဇီးလ်အသင်းဟာ မနေ့ကခ ကမ္ဘာ့ဖလား ကွာတားဖိုင်နယ်မှာ ခရိုအေးရှားအသင်းကို ပင်နယ်တီနဲ့ ရှုံးနိမ့်ပြီး နောက်ဆုံး ကမ္ဘာ့ဖလားပွဲ ၅ ကြိမ်မှာ ၄ ကြိမ်မြောက် ကွာတားဖိုင်နယ်က ထွက်ခဲ့ရတာ ဖြစ်ပါတယ်။

  • အာဏာသိမ်းရန်ကြံစည်နေသည့် လက်ယာစွန်းရောက်များကို ဂျာမနီ ဖမ်းဆီး

    အာဏာသိမ်းရန်ကြံစည်နေသည့် လက်ယာစွန်းရောက်များကို ဂျာမနီ ဖမ်းဆီး

    ဒီဇင်ဘာ ၇၊ ၂၀၂၂

    M-Media 


    -လက်နက်ကိုင်ပြီး လက်ရှိအစိုးရကို ဖြုတ်ချအာဏာသိမ်းဖို့ ကြံစည်နေတဲ့ လက်ယာစွန်းရောက်အဖွဲ့၀င် ၂၅ ဦးကို ဖမ်းဆီးလိုက်တယ်လို့ ဂျာမနီရဲတပ်ဖွဲ့က သတင်းထုတ်ပြန်ပါတယ်။ 

    ပြည်နယ် ၁၁ ခုက နေရာပေါင်း ၁၃၀ မှာ ရဲတပ်ဖွဲ့၀င် ၃၀၀ လောက်က ဒီကနေ့မနက်အစောပိုင်းမှာ စီးနင်းဖမ်းဆီးခဲ့တာဖြစ်ပါတယ်။ ဖမ်းဆီးခံရသူတွေဟာ လက်ယာစွန်းရောက်အဖွဲ့ Reichsbuerger က အဖွဲ့၀င်တွေပါ။ 

    ဒီအဖွဲ့ဟာ ဒုတိယကမ္ဘာစစ်ပြီးနောက်ပိုင်း ပေါ်ပေါက်လာတဲ့ ဂျာမနီ အခြေခံဥပဒေကို လက်မခံပါဘူး။ လက်နက်ကိုင်ပြီး လွှတ်တော်ကို၀င်စီးကာ အစိုးရကိုဖြုတ်ချဖို့ ကြံစည်နေတယ်လို့ အစိုးရရှေ့နေတွေက ပြောပါတယ်။ 

    အကြမ်းဖက်အဖွဲ့အစည်းက အဖွဲ့၀င်ဖြစ်တယ်ဆိုတဲ့ စွဲချက်နဲ့ ဖမ်းဆီးခဲ့တဲ့ ၂၅ ဦးထဲမှာ ရုရှားနိုင်ငံသားတစ်ဦး ပါ၀င်ပါတယ်။

    ရုရှားအစိုးရ ပြောရေးဆိုခွင့်ရှိသူ ဒီမီထရီ ပက်စ်ကော့ဗ်က ဒီကိစ္စဟာ ဂျာမနီရဲ့ ပြည်တွင်းရေးပြဿနာဖြစ်ပြီး ရုရှားက ပါ၀င်ပတ်သက်မှုရှိလားဆိုတာကို မေးခွန်းထုတ်စရာမလိုဘူးလို့ တုန့်ပြန်ခဲ့ပါတယ်။ 

    Ref: Reuters