“မြန်မာနိုင်ငံက အခြေအနေဟာ ပြည်သူတွေအတွက်တော့ အဆုံးမသတ်နိုင်တဲ့ အိပ်မက်ဆိုးပါပဲ။ ဒေသတွင်း လုံခြုံရေးနဲ့ ငြိမ်းချမ်းရေးကိုလည်း ခြိမ်းခြောက်နေပါတယ်။ ပြည်သူတွေရဲ့ အသံကို နားထောင်ဖို့၊ နိုင်ငံရေးအကျဥ်းသားတွေ လွှတ်ပေးဖို့၊ ဒီမိုကရေစီလမ်းကြောင်းပေါ် ချက်ခြင်း ပြန်လျှောက်လှမ်းဖို့ အာဏာပိုင်တွေကို ကျွန်တော် တိုက်တွန်းပါတယ်။ ဒါဟာ ငြိမ်းချမ်းရေးနဲ့ တည်ငြိမ်အေးချမ်းရေးရဖို့ တစ်ခုတည်းသော နည်းလမ်းပါပဲ”
(အန်တိုနီယို ဂူတာရက်စ် – ကုလသမဂ္ဂ အထွေထွေအတွင်းရေးမှူး)
နို၀င်ဘာ ၈၊ ၂၀၂၂
M-Media
– ချမ်းသာတဲ့ နိုင်ငံခြားသားတွေကို မြေအကန့်အသတ်နဲ့ရောင်းဖို့ စီစဥ်မှုကို ထိုင်းအစိုးရက ဆိုင်းငံ့တော့မှာ ဖြစ်ပါတယ်။
ထိုင်းပြည်သူလူထုက ဆန့်ကျင်ကန့်ကွက်မှုတွေ ကျယ်ကျယ်ပြန့်ပြန့် လုပ်ဆောင်လာခဲ့ပြီးတဲ့နောက် အခုလိုဆုံးဖြတ်ချက် ထွက်ပေါ်လာတာပါ။
ကန်ဒေါ်လာ ၁.၇ သန်းဖိုးနဲ့ ညီမျှတဲ့ ထိုင်းဘတ် သန်း ၄၀ အနည်းဆုံး ၃ နှစ် ရင်းနှီးမြှုပ်နှံတဲ့ နိုင်ငံခြားသားတွေကို မြေ ၀.၁၆ ဟက်တာ ရောင်းပေးမယ့်အစီအစဥ် စတင်ဖို့ စဥ်းစားနေတယ်လို့ အခုနှစ် ဇန်န၀ါရီမှာ ထိုင်းအစိုးရက ထုတ်ပြန်ခဲ့ပါတယ်။
နိုင်ငံခြားရင်းနှီးမြှုပ်နှံမှု ပိုမိုအားကောင်းလာအောင် ဆောင်ရွက်တာလို့လည်း ဆိုပါတယ်။
လေ့လာစောင့်ကြည့်သူတွေက ရင်းနှီးမြှုပ်နှံဖို့ သတ်မှတ်ထားတဲ့ ပမာဏဟာ နည်းလွန်းနေပြီး ဒီအစီအစဥ်ကြောင့် အိမ်ခြံမြေစျေးတွေတက်တာ၊ နိုင်ငံသားတွေ မြေပိုင်ဆိုင်မှု နည်းလာတာမျိုး ဖြစ်နိုင်တယ်လို့ ထောက်ပြခဲ့ပါတယ်။
ထိုင်းအစိုးရ ပြောရေးဆိုခွင့်ရှိသူ Anucha Burapachaisri က အဖွဲ့အစည်းအားလုံးရဲ့ စကားသံတွေကို နားထောင်ပြီးတဲ့နောက်ပိုင်း အစီအစဥ်ကို ဆိုင်းငံ့ဖို့ ဆုံးဖြတ်လိုက်တယ်လို့ ဒီကနေ့ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။
ဒီအစီအစဥ်ရဲ့ ကောင်းကျိုးဆိုးပြစ်တွေကို ပြန်လည်သုံးသပ်သွားမယ်လို့လည်း ပြည်ထဲရေး၀န်ကြီး Anupong Paochinda က ပြောပါတယ်။
Ref: CNA
နို၀င်ဘာ ၈၊ ၂၀၂၂
M-Media
-ဘင်္ဂလားဒေ့ရှ်၀န်ကြီးချုပ် ရှိခ်ဟာဆီနာဟာ မနေ့က တံတားအစင်းပေါင်း ၁၀၀ ကို အွန်လိုင်းကနေ ဖွင့်လှစ်ပေးခဲ့ပြီး ဒါဟာ နိုင်ငံရဲ့ သမိုင်း၀င်အခမ်းအနားတစ်ခုလည်း ဖြစ်ပါတယ်။
ခရိုင်ပေါင်း ၂၅ ခုက အဲဒီ တံတား ၁၀၀ ဟာ နိုင်ငံဖွံ့ဖြိုးရေးကို ပိုမို မြန်ဆန်လာစေလိမ့်မယ်လို့ ဟာဆီနာက ဖွင့်ပွဲအခမ်းအနားမှာ ပြောကြားခဲ့ပါတယ်။
တံတားတွေကြောင့် အရင်က ရေလမ်းကနေ သွားရတဲ့ ခရီးလမ်းကြောင်း ၃၃ ခုဟာ အခုဆိုရင် ကုန်လမ်းကနေ အလွယ်တကူ အချိန်တိုတို အန္တရာယ်ကင်းကင်း သွားလို့ရပြီဖြစ်ပါတယ်။ တံတားတွေဟာ ခရိုင်တွေကို မြို့တော်ဒါကာနဲ့ ဆက်သွယ်ရာမှာလည်း အထောက်အကူဖြစ်စေမှာ ဖြစ်ပါတယ်။
၀န်ကြီးချုပ် ရှိခ်ဟာဆီနာက တံတားတွေကြောင့် တရားဥပဒေစိုးမိုးရေးကို ပိုမိုအားကောင်းအောင် ဆောင်ရွက်လာနိုင်မှာဖြစ်သလို၊ သဘာ၀ဘေးတွေ ကြုံတွေ့ချိန်မှာလည်း လျင်လျင်မြန်မြန်နဲ့ အန္တရာယ်ကင်းတဲ့နေရာကို သွားရောက်နိုင်လိမ့်မယ်လို့ ထည့်သွင်းပြောဆိုခဲ့ပါတယ်။
ကမ္ဘာကြီးက စွမ်းအင်အကြပ်အတည်း ကြုံတွေ့နေတဲ့အချိန် လျှပ်စစ်နဲ့ သဘာ၀ဓာတ်ငွေ့တွေကို ချွေတာအသုံးပြုကြဖို့ ဟာဆီနာက တိုက်တွန်းခဲ့ပါတယ်။
Ref: The Siasat Daily
နို၀င်ဘာ ၈၊ ၂၀၂၂
M-Media
-၁၀ နှစ်တာကြာမြင့်မယ့် အရှေ့အလယ်ပိုင်း စိမ်းလန်းရေး စီမံကိန်းမှာ ဆော်ဒီက ကန်ဒေါ်လာ ၂.၅ ဘီလီယံ ထည့်၀င်ကူညီသွားမယ်လို့ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က ပြောပါတယ်။
အရှေ့အလယ်ပိုင်း စိမ်းလန်းရေး ဒုတိယအကြိမ်မြောက် ထိပ်သီးညီလာခံ Green Initiative Summit ကို အီဂျစ်နိုင်ငံ ရှမ် အလ် ရှိခ်မြို့မှာ မနေ့က ကျင်းပခဲ့ပါတယ်။
၂၀၂၁ ခုနှစ် ပထမအကြိမ် အစည်းအ၀ေးနောက်ပိုင်း ဒေသတွင်း ဖြစ်ပေါ်တိုးတက်မှုတွေနဲ့ ရှေ့ဆက် ကြုံတွေ့ရမယ့် စိန်ခေါ်မှုတွေကို ခေါင်းဆောင်တွေက ဆွေးနွေးခဲ့ကြပါတယ်။
အရှေ့အလယ်ပိုင်း စိမ်းလန်းရေး စီမံကိန်းမှာ ဒေသတွင်း ကာဘွန်ထုတ်လွှတ်မှုကို ၆၀ ရာခိုင်နှုန်းအထိ လျော့ချရေး၊ အပင်ပေါင်း ဘီလီယံ ၅၀ စိုက်ပျိုးရေး၊ မြေဧရိယာ ဟက်တာ သန်း ၂၀၀ ကို မြေရိုင်းကနေ စိုက်ပျိုးမြေဖြစ်အောင် ပြုပြင်ရေး၊ ကမ္ဘာ့ ကာဘွန်ထုတ်လုပ်မှုကို ၂.၅ ရာခိုင်နှုန်း လျော့ချရေး စတဲ့ ရည်မှန်းချက်တွေ ပါ၀င်ပါတယ်။
ဆော်ဒီဟာ ၂၀၅၀ ခုနှစ်ရောက်ရင် ကာဘွန်ထုတ်လွှတ်မှု လုံး၀ မရှိဖို့ ရည်မှန်းထားပြီး၊ လျှပ်စစ်ဓာတ်အားရဲ့ ၅၀ ရာခိုင်နှုန်းကို ၂၀၃၀ ရောက်ရင် ပြည့်ဖြိုးမြဲ စွမ်းအင်ကနေ ထုတ်လုပ်နိုင်ရေး ဆောင်ရွက်နေပါတယ်။
၂၀၃၅ ခုနှစ်အရောက်မှာ ကာဘွန်ထုတ်လုပ်မှု ၄၄ သန်းလောက်ကို ဆော်ဒီက လျော့ချနိုင်မှာပါ။
Ref: Arab News
နို၀င်ဘာ ၅၊ ၂၀၂၂
M-Media
အိန္ဒိယနိုင်ငံတောင်ပိုင်း ကီရာလာပြည်နယ်က အသက် ၃၂ နှစ်အရွယ် အနုဘီဟာ ပြီးခဲ့တဲ့ စက်တင်ဘာက ရူပီး သန်း ၂၅၀ (ဒေါ်လာ ၃ သန်း) ရမယ့် သန်းထီကြီးတစ်ခု ပေါက်ခဲ့ပါတယ်။
ကိုယ်၀န် ၈ လရှိနေတဲ့ ဇနီး၊ လမ်းလျှောက်တတ်စ သားငယ်လေးနဲ့ အနုဘီတို့ မိသားစုဟာ ထီပေါက်ပေမယ့် လက်တွေ့မှာ အေးအေးချမ်းချမ်း မနေရပါဘူး။
ပြန်အမ်းငွေ မယူနဲ့တော့
—————-
“ကျွန်တော့်သားအတွက် အိတ်လေးတစ်လုံး သွား၀ယ်ပါတယ်ဗျာ။ ပြန်အမ်းငွေ မယူနဲ့တော့ ဆိုတာကြီးပဲ။ ကျွန်တော် ပိုက်ဆံ ထပ်မလိုဘူးလို့ ထင်နေလားမသိဘူး”
မစွန့်ကြဲလို့ မကြည်
—————-
“အရင်တုန်းက လည်ပင်းဖက်ပေါင်းတဲ့သူတွေ တော်တော်များများက ခုဆို စကားတောင်မပြောတော့ဘူး”
“လူတွေရဲ့ အပြုအမူက တစ်မဟုတ်ချင်း ပြောင်းလဲသွားတာ”
“ဘယ်လိုအခြေအနေလဲဆိုတာ ကြုံဖူးမှ သိမှာဗျ။ ရုပ်ရှင်ထဲကလိုပဲ။ အသိတွေ၊ အမျိုးတွေအားလုံး အိမ်ရောက်လာတာ”
“အိမ်ရာနိုးတာနဲ့ ကြည့်လိုက်ရင် အိမ်ရှေ့မှာ လူတစ်အုပ်။ မနက် ၅ နာရီလောက်ကနေ မိုးစုန်းစုန်းချုပ်မှ ပြန်ကြတာ”
“မိတ်ဆွေတွေက ရန်သူတွေဖြစ်ကုန်ရော။ မစွန့်လို့၊ မကြဲလို့ဆိုပြီး မကျေနပ်တဲ့လူတွေကလည်း မနည်းဘူး”
လုကြပြေးကြ၊ အလှူခံကြ
————–
“ဘဏ်တွေ၊ အာမခံလုပ်ငန်းတွေက ဖုန်းခေါ်ကြတာလည်း မနည်းဘူး။ အဖွဲ့တစ်ဖွဲ့ဆို ချန်နိုင်းကနေလာပြီး ရုပ်ရှင်ရိုက်ဖို့ အလှူလာခံတယ်”
“တစ်ယောက်ဆို အိမ်မှာ တစ်နေ့လုံး ပေကပ်နေတာ။ Royal Enfield ဆိုင်ကယ် ၀ယ်ပေးလိုက်တော့မှ ပြန်သွားတယ်”
“ဘာအလုပ်မှမလုပ်ဘဲ ဒီပိုက်ဆံတွေ အချောင်ရတယ်လို့ လူတိုင်းက ထင်ကြတာ။ ဘာဖြစ်လို့ ကပ်စေးကုပ်နေတာလဲဆိုပြီး သူတို့က ပြောသေးတာဗျ”
“တကယ်အကူအညီလိုနေတာလား၊ ပိုက်ဆံအချောင်လိုချင်တာလား ကျွန်တော်တို့လည်း မခွဲတတ်တော့ဘူး”
ကောလဟာလ/ခြိမ်းခြောက်မှူ
—————–
“ကျွန်တော် ထီပေါက်တယ်ဆိုတာ လိမ်တာဆိုပြီး ဆိုရှယ်မီဒီယာမှာ ပို့စ်တင်ကြသေးတယ်။ ကျွန်တော့်မှာ ငွေမည်းတွေအများကြီး ရှိတယ်ပေါ့။ အဲဒါကို ငွေဖြူပြောင်းတယ်ဆိုပြီး ပြောကြတာ”
“ကျွန်တော့်အကြောင်း သတင်းတွေကတင်ကြတော့ လူတိုင်းက ကျွန်တော့်ကို သိနေရာ”
“ထီပေါက်တာနဲ့ပဲ ငွေမလိုတော့ဘူး ပြည့်စုံပြီလို့ လူတွေက ထင်ကြတာ။ တကယ်က ဘာမှ ပြောလို့မရသေးဘူး။ အခွန်ဖြတ်ပြီး ဘယ်လောက်ကျန်မလဲဆိုတာ မသိသေးဘူး”
အနာဂတ်အတွက် စဥ်စား
————–
“ဘုရားပေးလို့ ရတာပါ။ သူများကို မကူညီခင် ကိုယ့်ဟာကိုယ့် သေသေချာချာ အစီစဥ် ချရအုံးမယ်။ မိသားစုရဲ့ အနာဂတ် စိတ်ချရဖို့ ပေ့ါ”
ပိုက်ဆံမပေးလို့ သတ်မယ်ဖြတ်မယ်၊ သတိထားနေဆိုတဲ့ ခြိမ်းခြောက်စာတွေရတာကြောင့် အနုဘီတို့မိသားစုဟာ ရဲကို တိုင်ထားရပြီး အိမ်မှာလည်း စောင့်ကြည့်ကင်မရာတွေတပ်ကာ နေထိုင်နေရပါတယ်။
Ref: BBC