News @ M-Media

Blog

  • ရေလွှမ်းမိုးမှုကို ကာကွယ်နိုင်ရေး အဓိကအ၀ေးပြေးလမ်းမကို ပါကစ္စတန်က ဖြိုချမည်

    ရေလွှမ်းမိုးမှုကို ကာကွယ်နိုင်ရေး အဓိကအ၀ေးပြေးလမ်းမကို ပါကစ္စတန်က ဖြိုချမည်

    စက်တင်ဘာ ၁၂၊ ၂၀၂၂
    M-Media

    -နိုင်ငံတောင်ပိုင်းက လူတစ်သန်းခွဲလောက်နေထိုင်တဲ့ ဒေသတစ်ခုမှာ ရေကြီးရေလျှံမှုကို ကာကွယ်ဖို့အတွက် အဓိက အ၀ေးပြေးလမ်းမကြီးကို ဖောက်ချဖို့ ပါကစ္စတန် အာဏာပိုင်တွေက စီစဥ်နေပါတယ်။

    အခုနှစ်မိုးရာသီအတွင်း မိုးသည်းထန်စွာ ရွာသွန်းပြီး ရေကြီးရေလျှံမှု အကြီးအကျယ် ဖြစ်ပေါ်ခဲ့တာကြောင့် ပါကစ္စတန်မြောက်ပိုင်းမှာ လူ ၃၃ သန်းလောက် အတိဒုက္ခရောက်ခဲ့ရပြီး အနည်းဆုံး ၁၄၀၀ နီးပါး သေဆုံးခဲ့ပါတယ်။

    လက်ရှိမှာ ပါကစ္စတန်အစိုးရဟာ ပြန်လည်တည်ဆောက်ရေးလုပ်ငန်းအပြင်၊ နောက်ထပ် ရေကြီးမှုမဖြစ်အောင်လည်း ဆောင်ရွက်နေရပါတယ်။

    နိုင်ငံတောင်ပိုင်း ဆင်းပြည်နယ်မှာ အခုနှစ်မိုးရေချိန်ဟာ ပုံမှန်ထက် ၄၆၆ ရာခိုင်နှုန်း ပိုများနေပြီး ဒီရေတွေဟာ လူ ၁.၅ သန်းလောက် နေထိုင်တဲ့ ဒါဒူခရိုင်ကို ဖြတ်ပြီး စီးဆင်းသွားမယ့်အန္တရာယ် ရှိနေပါတယ်။

    ဒီရေလမ်းကြောင်းကို လွှဲဖို့အတွက် အဓိက Indus အ၀ေးပြေးလမ်းမကြီးရဲ့ တစ်စိတ်တစ်ပိုင်း ပါကစ္စတန်အာဏာပိုင်တွေက ဖောက်ချမှာဖြစ်ပါတယ်။ ဒါ့အပြင် ခရိုင်ပတ်ပတ်လည်မှာ တမံတွေ တည်ဆောက်ဖို့လည်း စီစဥ်နေပါတယ်။

    ကမ္ဘာကြီးပူနွေးလာမှုရဲ့ နောက်ဆက်တွဲ ရာသီဥတုဖောက်ပြန်မှုကို အဓိက ခံစားနေရတဲ့ တောင်အာရှနိုင်ငံတွေထဲမှာ ပါကစ္စတန်လည်း ပါ၀င်ပါတယ်။

    Ref: CNA

  • အရေးနိမ့်လာသည့် ရုရှားတပ်များကို ပူတင်၏ မဟာမိတ်က လူသိရှင်ကြား ၀ေဖန်

    အရေးနိမ့်လာသည့် ရုရှားတပ်များကို ပူတင်၏ မဟာမိတ်က လူသိရှင်ကြား ၀ေဖန်

    စက်တင်ဘာ ၁၂၊ ၂၀၂၂
    M-Media

    -ယူကရိန်းက ရုရှားတပ်တွေရဲ့ လတ်တလော ရှုံးနိမ့်မှုနဲ့ပတ်သက်ပြီး သမ္မတပူတင်ရဲ့ အနီးကပ်မဟာမိတ်ဖြစ်သူ ချေချင်းညာခေါင်းဆောင် ရမ်ဇာန် ကာဒီရော့ဗ်က ၀ေဖန်လိုက်ပါတယ်။

    အခုလအစောပိုင်းက စတင်ခဲ့တဲ့ တန်ပြန်ထိုးစစ်အတွင်း ယူကရိန်းတပ်တွေဟာ နိုင်ငံအရှေ့ပိုင်းက ရုရှားတပ်တွေသိမ်းထားတဲ့ နယ်မြေတစ်ချို့ကို ပြန်လည်သိမ်းယူနိုင်ခဲ့ပြီး၊ အခုတစ်ပတ်အတွင်း အဓိကမြို့ အနည်းဆုံး ၃ ခုလောက်ကို ပြန်ရခဲ့ပါတယ်။

    ရုရှားနိုင်ငံက လူမျိုးစုဒေသတစ်ခုဖြစ်တဲ့ ချေချင်းညာရဲ့ ခေါင်းဆောင်ဖြစ်ပြီး ယူကရိန်းကျူးကျော်စစ်မှာ သူ့ရဲ့တပ်တွေကို စေလွှတ်ထားတဲ့ ကာဒီရော့ဗ်က ရုရှားတပ်တွေရဲ့ စွမ်းဆောင်ရည်ကို စနေနေ့က ၀ေဖန်ခဲ့ပါတယ်။

    “မနေ့တနေ့က ဖြစ်ပျက်ခဲ့တာတွေဟာ အထူးစစ်ဆင်ရေးတစ်ရပ်မှာ ဖြစ်လာရမယ့် ကိစ္စမျိုးတွေ မဟုတ်ဘူး။ မြေပြင်မှာဖြစ်ပျက်နေတဲ့ အခြေအနေတွေနဲ့ပတ်သက်ပြီး ခေါင်းဆောင်ပိုင်းကို မဖြစ်မနေ ကျွန်တော် သွားပြောမှာပါ” လို့ Telegram မှာ လွှင့်တင်တဲ့ ၁၁ မိနစ်ကြာ ဗီဒီယိုမှာ ပြောဆိုခဲ့ပါတယ်။

    ကာဒီရော့ဗ်က သူဟာ စစ်ရေးဗျူဟာရှင်တစ်ယောက်မဟုတ်ပေမယ့် အခုလို နယ်မြေ ပြန်လည်ဆုံးရှုံးရမှုဟာ ရုရှားတပ်တွေရဲ့ အမှားအယွင်းကြောင့်ဆိုတာ သိသာကြောင်း၊ တိုက်ခိုက်ရေးသမားပေါင်း တစ်သောင်းလောက် အဆင်သင့်ရှိနေပြီး အိုဒက်ဆာမြို့ကို သိပ်မကြာခင်မှာ သိမ်းပိုက်သွားမှာ ဖြစ်ကြောင်း သူက ထည့်သွင်းပြောဆိုခဲ့ပါတယ်။

    ပူတင်တပ်တွေ အခုလို ရှုံးနိမ့်မှုနဲ့ပတ်သက်ပြီး ရုရှားနိုင်ငံအတွင်းမှာလည်း အကြီးအကျယ် ၀ေဖန်နေကြပါတယ်။ ရုရှားအမျိုးသားရေးသမားတွေဆိုရင် စစ်တပ်ကို ချက်ခြင်း ပြုပြင်ပြောင်းလဲမှုတွေလုပ်ဖို့ ပူတင်ကို တိုက်တွန်းလာကြပါတယ်။

    Ref: Reuters

  • စစ်လက်နက်ပစ္စည်း တင်ပို့ရောင်းချမှု အမြင့်ဆုံးရောက်လာတဲ့ တူရကီ

    စစ်လက်နက်ပစ္စည်း တင်ပို့ရောင်းချမှု အမြင့်ဆုံးရောက်လာတဲ့ တူရကီ

    စက်တင်ဘာ ၁၁၊ ၂၀၂၂
    M-Media

    -တူရကီရဲ့ အဆင့်မြင့်ကာကွယ်ရေးဆိုင်ရာ စစ်လက်နက်ပစ္စည်း ထုတ်လုပ်ရောင်းချနိုင်မှု ပမာဏဟာ ပြီးခဲ့တဲ့ နှစ် ၂၀ အတွင်း ၁၀ ဆလောက် မြင့်တက်လာပါတယ်။

    ၂၀၀၂ ခုနှစ်က စစ်လက်နက်ပစ္စည်း ထုတ်လုပ်ရောင်းချမှု စုစုပေါင်း တန်ဖိုး ကန်ဒေါ်လာ ၁ ဘီလီယံရှိခဲ့ပြီး အဲဒီအထဲက ၂၄၈ သန်းဖို့ဟာ ပြည်ပနိုင်ငံတွေကို တင်ပို့တာပါ။

    ၂၀၂၂ ခုနှစ်မှာတော့ စုစုပေါင်း ရောင်းချမှုဟာ ၁၀.၁ ဘီလီယံအထိ ရှိလာပြီး ၃.၂ ဘီလီယံဖိုးက ပြည်ကို တင်ပို့ရောင်းချတာဖြစ်ပါတယ်။ ဒါဟာ တူရကီက ပြည်ပကနေ စစ်လက်နက်ပစ္စည်း တင်သွင်းမှုတန်ဖိုး ၂.၆ ဘီလီယံထက် ပိုမို များပြားသွားတာပါ။

    ပြီးခဲ့တဲ့နှစ် ၂၀ အတွင်း တူရကီနိုင်ငံရဲ့ အင်ဂျင်နီယာနယ်ပယ်ဟာ ပိုမို တိုးတက်ထွန်းကားလာပြီး သုတေသနတွေကနေတစ်ဆင့် အဆင့်မြင့် လက်နက်တွေ ထုတ်လုပ်လာနိုင်တာ ဖြစ်ပါတယ်။

    လေကြောင်းနဲ့ပတ်သက်တဲ့ ကာကွယ်ရေး စစ်လက်နက်တွေ အဓိက ရောင်းချလာရတာ ဖြစ်ပါတယ်။ အထူးသဖြင့် နာမည်ကျော် Bayraktar TB2 ဒရုန်းပါ။

    နိုင်ငံအတွင်းက ဒရုန်းထုတ်လုပ်ရေးကုမ္ပဏီတွေဟာ ၂၀၁၉ ခုနှစ်က ပူးပေါင်းပြီး ဒရုန်းနည်းပညာ တိုးတက်ရေး သုတေသနတွေ လုပ်ဆောင်လာရာကနေ အခုတော့ အသီးအပွင့်တွေ ခံစားနေရပြီ ဖြစ်ပါတယ်။

    Bayraktar TB2 ဒရုန်းကို ရုရှားရဲ့ ကျူးကျော်မှုကို ခံနေရတဲ့ ယူကရိန်းအပါအ၀င် ကမ္ဘာတစ်၀ှမ်းက နိုင်ငံတော်တော်များများကို တူရကီက ရောင်းချထားသလို၊ ယူကေနဲ့ အခြား ဥရောပနိုင်ငံတွေပါ ၀ယ်ယူဖို့ စိတ်၀င်စားလာပါတယ်။

    တူရကီဟာ အာရှက အနည်းဆုံး ၅ နိုင်ငံလောက်နဲ့ Bayraktar TB2 ထုတ်လုပ်ရေး သဘောတူညီချက် ရထားပါတယ်။

    Gidran၊ Yoruk နဲ့ Ejder Yalcin တို့လို စစ်တပ်သုံး ကျည်ကာကားတွေ၊ တင့်ကားတွေ၊ T129 တိုက်ခိုက်ရေး ရဟတ်ယာဥ်၊ Hurkus HYEU လေ့ကျင့်ရေး တိုက်လေယာဥ်တွေ၊ ရေတပ်အတွက် ကမ်းခြေစောင့် သင်္ဘောတွေအပါအ၀င် ကျည်း၊ ရေ၊ လေ ကာကွယ်ရေး စစ်လက်နက်ပစ္စည်း မျိုးစုံကို တူရကီက တင်ပို့ရောင်းချနေပါတယ်။

    ဒီလို စစ်လက်နက်တွေကို တင်ပို့ယုံသာမက ပူးတွဲထုတ်လုပ်ဖို့အတွက်လည်း နိုင်ငံတော်တော်များများနဲ့ လက်မှတ်ရေးထိုးထားပါတယ်။

    Ref: Defense News

  • ရုရှားလက်ထဲမှ နယ်မြေများကို ယူကရိန်းက ပြန်သိမ်းလာနိုင်ပြီ

    ရုရှားလက်ထဲမှ နယ်မြေများကို ယူကရိန်းက ပြန်သိမ်းလာနိုင်ပြီ

    စက်တင်ဘာ ၁၁၊ ၂၀၂၂
    M-Media

    -ရုရှားရဲ့ ကျူးကျော်မှုကို တန်ပြန်ထိုးစစ်ဖွင့်လာတဲ့ ယူကရိန်းဟာ နိုင်ငံအရှေ့ပိုင်းက ရုရှားလက်ထဲရောက်နေတဲ့ အဓိကနယ်မြေတစ်ချို့ကို ပြန်လည်သိမ်းပိုက်လာနိုင်ခဲ့ပါတယ်။

    ရုရှားက ပစ်မှတ်ထား သိမ်းပိုက်တဲ့ နိုင်ငံအရှေ့ပိုင်း Kharkiv ပြည်နယ်မှာရှိပြီး ရထားပို့ဆောင်ရေး အချက်အခြာဖြစ်ကာ ရုရှားတပ်ရဲ့ ထောက်ပို့လမ်းကြောင်းမှာ အဓိကကျတဲ့ Kupiansk မြို့၊ အဲဒီအနားက Izyum မြို့၊ နောက်ထပ် အဓိမြို့ဖြစ်တဲ့ Balaklyia တို့ အပါအ၀င် နယ်မြေတော်တော်များများကို အခုတစ်ပတ်အတွင်း ယူကရိန်းတပ်တွေက ပြန်သိမ်းနိုင်ခဲ့ပါတယ်။

    ရုရှားကာကွယ်ရေး၀န်ကြီးဌာနကလည်း ဒီမြို့တွေက တပ်ပြန်ဆုပ်ရကြောင်း အတည်ပြုပါတယ်။

    မနေ့ညက တိုင်းပြည်ကိုပြောတဲ့ ဗီဒီယိုမိန့်ခွန်းမှာ သမ္မတ ဇဲလင်စကီးက အခုလအစောပိုင်းက စတင်ခဲ့တဲ့ တန်ပြန်ထိုးစစ်မှာ စကွဲယားမိုင် ၇၇၀ လောက်ရှိတဲ့ နယ်မြေတွေကို ရုရှားရဲ့သိမ်းပိုက်မှုကနေ လွတ်မြောက်စေခဲ့တယ်လို့ ဆိုပါတယ်။

    အဲဒီပမာဏရဲ့ ထက်၀က်လောက်ကို ၄၈ နာရီအတွင်းမှာ ယူကရိန်းတပ်တွေက ပြန်သိမ်းနိုင်ခဲ့တာပါ။

    ယူကရိန်းနိုင်ငံခြားရေး၀န်ကြီး ဒီမီထရို ကူလီဘာက အနောက်နိုင်ငံတွေရဲ့ လက်နက်အကူအညီနဲ့မိမိတို့တပ်တွေဟာ ရုရှားကို မျှော်လင့်ထားတာထက် ပိုစောပြီး တိုက်ထုတ်နိုင်လိမ့်မယ်ဆိုတာ အခုအောင်မြင်မှုက သက်သေပြနေတယ်လို့ ပြောကြားခဲ့ပါတယ်။

    Ref: BBC

  • မြန်မာပြည်သူများအပေါ် စစ်တပ်၏ ကျူးလွန်မှုကို တရားစွဲဆိုနိုင်ရေး အင်ဒိုနီးရှားပြည်သူများ ကြိုးပမ်းလာ

    မြန်မာပြည်သူများအပေါ် စစ်တပ်၏ ကျူးလွန်မှုကို တရားစွဲဆိုနိုင်ရေး အင်ဒိုနီးရှားပြည်သူများ ကြိုးပမ်းလာ

    စက်တင်ဘာ ၁၀၊ ၂၀၂၂
    M-Media

    -မြန်မာစစ်တပ်က ပြည်သူလူထုအပေါ် ကျူးလွန်နေတဲ့ လူ့အခွင့်အရေး ချိုးဖောက်မှုတွေ၊ စစ်ရာဇ၀တ်မှုတွေကို တရားစွဲဆိုနိုင်ရေး လမ်းဖွင့်ပေးဖို့အတွက် အင်ဒိုနီးရှား တက်ကြွလှုပ်ရှားသူတွေက အင်ဒိုနီးရှား အခြေခံဥပဒေခုံရုံးကို အသနားခံစာ တင်လိုက်ပါတယ်။

    အင်ဒိုနီးရှားအခြေခံဥပဒေမှာ နိုင်ငံတကာ လူ့အခွင့်အရေး ပြဌာန်းချက်တွေကို အသိအမှတ်ပြုထားပြီး၊ ဘယ်သူမဆို ဥပဒေရဲ့ ကာကွယ်မှု အပြည့်အ၀ ရရှိစေရမယ်လို့ ဖော်ပြထားပါတယ်။

    ဒါပေမယ့် အင်ဒိုနီးရှား လူ့အခွင့်အရေးခုံရုံးဆိုင်ရာ ဥပဒေမှာတော့ လူ့အခွင့်အရေးချိုးဖောက်တဲ့ နိုင်ငံသားတွေကိုသာ တရားစွဲဆိုနိုင်တယ်လို့ ဖော်ပြထားပါတယ်။

    စက်တင်ဘာ ၇ ရက်နေ့က ပေးပို့တဲ့ အသနားခံစာမှာ လူ့အခွင့်အရေးခုံရုံးဆိုင်ရာဥပဒေရဲ့ ပြဌာန်းချက်ဟာ အခြေခံဥပဒေနဲ့ ဆန့်ကျင်တဲ့အတွက် လူ့အခွင့်အရေးချိုးဖောက်တဲ့ မည်သူ့ကိုမဆို တရားစွဲဆိုနိုင်တယ်ဆိုတဲ့အချက် ပြင်ဆင်ထည့်သွင်းပေးဖို့ တောင်းဆိုထားပါတယ်။

    အသနားခံစာ လက်မှတ်ရေးထိုးတဲ့သူတွေထဲမှာ ပါ၀င်တဲ့ အင်ဒိုနီးရှား ရှေ့နေချုပ်ဟောင်း မာဇူကီ ဒါရုစ်မန်က ဒီလိုပြောင်းလဲခြင်းအားဖြင့် ဥပဒေရဲ့ ကာကွယ်ပေးနိုင်စွမ်းကို ပိုမိုကျယ်ပြန့်စေမှာဖြစ်ပြီး မြန်မာစစ်အာဏာရှင်တွေကို တရားစွဲဆိုနိုင်လိမ့်မယ်လို့ မှတ်ချက်ပေးပါတယ်။

    မြန်မာစစ်တပ်ဟာ ရိုဟင်ဂျာတွေပေါ် ညှင်းပမ်းသတ်ဖြတ်မှုနဲ့ပတ်သက်ပြီး နိုင်ငံတကာ ခုံသမာဓိရုံး (ICJ) မှာ အမှုရင်ဆိုင်နေရပါတယ်။

    အခြားရှေ့နေတစ်ဦးဖြစ်သူ ဖာရီ အမ်ဆာရီ အခုလို အသနားခံစာတင်သွင်း တောင်းဆိုရတာဟာ မြန်မာစစ်တပ်က ပြည်သူလူထုအပေါ် လူ့အခွင့်အရေး ချိုးဖောက်မှုတွေကို တုန့်ပြန်ဖို့ဖြစ်တယ်လို့ ပြောကြားခဲ့ပါတယ်။

    “မြန်မာနိုင်ငံရဲ့ အခြေအနေဟာ တော်တော်ထူးခြားတဲ့ အခြေအနေပါ။ လူ ၂၀၀၀ အသတ်ခံရတယ်။ ၁၅၀၀၀ လောက် ပျောက်ဆုံးနေတယ်။ ၁.၂ သန်းလောက် လူသားချင်းစာနာထောက်ထားမှုဆိုင်ရာ အကူအညီတွေလိုအပ်နေတယ်။ အာဆီယံနိုင်ငံတွေကတော့ ရေငုံနှုတ်ပိတ်နေကြတယ်”

    Ref: UCA News