သြဂုတ် ၂၅၊ ၂၀၁၆
M-Medai
– ကနေဒါနိုင်ငံ၏ တော်ဝင်ရဲတပ်ဖွဲ့မှာ တာဝန်ထမ်းဆောင်နေသည့် မွတ်စလင် ရဲတပ်ဖွဲ့ဝင် အမျိုးသမီးများအား ဟီဂျဘ်ခေါင်းဆောင်ပုဝါ ၀တ်ဆင်ခွင့် ပြုလိုက်ပြီး ရဲဝတ်စုံတွင်လည်း ဟိဂျဘ်ခေါင်းဆောင်းပုဝါကို ထည့်သွင်းခဲ့သည်ဟု သိရသည်။
“ကနေဒါ တော်ဝင်ရဲတပ်ဖွဲ့ရဲ့ ရဲမင်းကြီးက ရဲတပ်ဖွဲ့ဝတ်စုံထဲမှာ ဟီဂျဘ်ခေါင်းဆောင်ပုဝါကို ထည့်သွင်းဖို့ မကြာသေးခင်ကပဲ အတည်ပြုခဲ့ပါတယ်။ ဒါဟာ ကျွန်တော်တို့ လူ့အဖွဲ့အစည်းက မတူကွဲပြားမှုကို ပိုမိုရောင်ပြန်ဟပ်စေဖို့ဖြစ်ပြီး၊ မွတ်စလင်အမျိုးသမီးတွေအနေနဲ့ ရဲတပ်ဖွဲ့ကို သူတို့ရဲ့ အသက်မွေးဝမ်းကြောင်း ရွေးချယ်မှုတစ်ခုအဖြစ် ပိုမိုစဉ်းစားလာစေရေး တိုက်တွန်းအားပေးဖို့ ဖြစ်ပါတယ်” ဟု ပြည်သူ့လုံခြုံရေးဝန်ကြီး ရာ့လ်ဖ် ဂူဒဲလ်၏ ပြောရေးဆိုခွင့်ရှိသူ စကော့ ဘာ့ဒ်စလေက ပြောကြားခဲ့သည်။
ရဲတပ်ဖွဲ့အတွင်း မည်သည့်မွတ်စလင်အမျိုးသမီးကမှ ဟိဂျဘ်ဝတ်ဆင်ခွင့်ရရန် တောင်းဆိုခြင်း မပြုသေးသော်လည်း ရဲတပ်ဖွဲ့ကမူ ယခုနှစ်အစောပိုင်းတွင် ထိုကဲ့သို့ ၀တ်စုံထပ်တိုးမှုကို အတည်ပြုခဲ့ခြင်းဖြစ်သည်။
သို့သော်လည်း လွန်ခဲ့သည့် နှစ်များအတွင်း ရဲတပ်ဖွဲ့ဝင် ၃၀ ခန့်မှာ တပ်ဖွဲ့အတွင်း ဘာသာရေးနှင့် ယဉ်ကျေးမှုဆိုင်ရာ တင်းကြပ်သည့် ဥပဒေများကို လျှော့ချပေးရန် တောင်းဆိုခဲ့ကြသည်ဟု ဂူဒဲလ်နှင့် ရဲမင်းကြီး ဘော့ဘ် ပေါလ်ဆန်တို့အကြား အဆက်အသွယ်ရှိသည့် ရင်းမြစ်တစ်ခုကို ကိုးကား၍ မွန်ထရီယဲလ်နေ့စဉ်သတင်းစာ La Presse က ပြောကြားခဲ့သည်။
ရဲဝတ်စုံတွင် ထည့်သွင်းသတ်မှတ်ခဲ့သည့် အဆိုပါ ဟီဂျဘ်မှာ လိုအပ်ပါက အလွယ်တကူနှင့် လျင်လျင်မြန်မြန် ချွတ်နိုင်သည့် ဟီဂျဘ်မျိုး ဖြစ်ရမည်ဟုလည်း အဆိုပါ စာစောင်က ထည့်သွင်းဖော်ပြခဲ့သည်။
ကနေဒါ တော်ဝင်ရဲတပ်ဖွဲ့မှာ တိုရွန်တိုနှင့် အဒ်မွန်တွန်ရဲတပ်ဖွဲ့တို့ပြီးနောက် ကနေဒါတွင် ဟိဂျဘ်ကို ယူနီဖောင်းတွင် ထည့်သွင်းသတ်မှတ်ပေးသည့် တတိယမြောက် ရဲတပ်ဖွဲ့ ဖြစ်လာခဲ့သည်။ တော်ဝင်ရဲတပ်ဖွဲ့ဝတ်စုံကို နောက်ဆုံး တပ်တိုးသတ်မှတ်ခဲ့သည့်အချိန်မှာ ၁၉၉၀ ပြည့်နှစ်တွင်ဖြစ်ပြီး ဆစ်ခ်လူမျိုးများ၏ ခေါင်းပေါင်းအား ၀တ်စုံ၏ တစ်စိတစ်ပိုင်းအဖြစ် ထည့်သွင်းခဲ့ခြင်းဖြစ်သည်။
Ref: Aljazeera
