Blog

သြဂုတ် ၂၁၊ ၂၀၂၂
M-Media

မတ်လကစပြီး ရုရှားရဲ့ ထိုးစစ်ကို ခုခံနေရတဲ့ ယူကရိန်းဟာ လက်ရှိအချိန်မှာတော့ ရုရှား အခြေစိုက်စခန်းတွေကို တိုက်ခိုက်လာနိုင်ပြီ ဖြစ်ပါတယ်။
အထူးသဖြင့် ၂၀၁၄ ခုနှစ်မှာ ရုရှားက သိမ်းလိုက်တဲ့ ယူကရိန်းပိုင် ခရိုင်းမီယားကျွန်းဆွယ်မှာ ဖြစ်ပါတယ်။
ပထမဆုံး တိုက်ခိုက်မှုဟာ ဇူလိုင်လ ၃၁ ရက်နေ့မှာ ဖြစ်တာပါ။ ရုရှားရဲ့ ရေတပ်နေ့မှာ ခရိုင်းမီးယားအခြေစိုက် ပင်လယ်နက် ရေတပ်အုပ်စုကို ဒရုန်းနဲ့ တိုက်ခိုက်ခဲ့တာဖြစ်ပြီး ရုရှားစစ်သား ၅ ဦး ဒဏ်ရာရခဲ့ပါတယ်။
အဲဒီနောက်ပိုင်း ပင်လယ်နက် ရေတပ်ဌာနချုပ် အပါအ၀င် ခရိုင်းမီးယားက ရုရှားရဲ့ စစ်ဖက်ပစ်မှတ်တွေကို မကြာခဏ တိုက်ခိုက်မှုတွေ ပြုလုပ်လာခဲ့ပြီး ရုရှားဖက်က စစ်လေယာဥ်၊ စစ်သင်္ဘော ထိခိုက်ပျက်ဆီးမှုတွေ ရှိလာပါတယ်။ ရုရှားဖက်ကလည်း ယူကရိန်းရဲ့ တိုက်ခိုက်မှုတွေအကြောင်း ထုတ်ပြန်လာပါတယ်။
ယူကရိန်းသမ္မတ ဇယ်လင်စကီးက ဆိုဗီယက်ပြည်ထောင်စုက လွတ်လပ်ရေးရတဲ့ နှစ်ပတ်လည်နေ့ သြဂုတ် ၃၁ ရက်နေ့မတိုင်ခင် ရုရှားရဲ့ စစ်စခန်းတွေကို တိုက်ခိုက်မှု တိုးမြှင့်ပြုလုပ်သွားမယ်လို့ ပြီးခဲ့တဲ့ တစ်ပတ်မှာ ကြေငြာခဲ့ပါတယ်။
ယူကရိန်းဟာ အနောက်နိုင်ငံတွေက စစ်ရေးအကူအညီ အများအပြား ဆက်လက်ရရှိနေပြီး အမေရိကန်က ScanEagle အဆင့်မြင့် ထောက်လှမ်းရေးဒရုန်း အပါအ၀င် ခေတ်မီ စစ်လက်နက်ပစ္စည်း ကန်ဒေါ်လာ ၇၇၅ သန်းဖိုး ထပ်မံ ထောက်ပံ့ပေးသွားမယ်လို့ ပြီးခဲ့တဲ့ သောကြာနေ့မှာ ထုတ်ပြန်ကြေငြာခဲ့ပါတယ်။
Ref: Aljazeera

သြဂုတ် ၂၁၊ ၂၀၂၂
M-Media

• တရုတ်ရန်ကို ကာကွယ်ဖို့အတွက် တရုတ်နဲ့ ကပ်နေတဲ့ ဒေသတွေမှာ တာ၀ေးပစ် ခရုဇ်ဒုံးကျည် အလုံး ၁၀၀၀ ချသွားဖို့ ဂျပန်က စီစဥ်နေပါတယ်။
  ဒုံးကျည်တွေဟာ သင်္ဘောတွေ၊ လေယာဥ်တွေကနေ ပစ်လွှတ်နိုင်မှာဖြစ်ပြီး ကီလိုမီတာ ၁၀၀ ကနေ ၁၀၀၀ အထိ ရောက်ရှိနိုင်မှာ ဖြစ်ပါတယ်။ နိုင်ငံတောင်ပိုင်း နန်စီကျွန်းတစ်၀ိုက်မှာ ချထားမှာ ဖြစ်တဲ့အတွက် မြောက်ကိုရီးယားနဲ့ တရုတ်နိုင်ငံ ကမ်းရိုးတန်းအထိ ပစ်ခတ်နိုင်မှာပါ။
  ဒီသတင်းကို ဂျပန်ပြည်တွင်းသတင်းဌာန Yomiuri က ဖော်ပြခဲ့တာဖြစ်ပြီး ဂျပန်နိုင်ငံခြားရေး၀န်ကြီးဌာနကတော့ မှတ်ချက်ပေးဖို့ ငြင်းဆိုပါတယ်။
  ဒုတိယကမ္ဘာစစ်နောက်ပိုင်း ပြဌာန်းထားတဲ့ ဂျပန်ရဲ့ ဖွဲ့စည်းပုံ အခြေခံဥပဒေမှာ စစ်အင်အားကို နိုင်ငံကာကွယ်ရေးအတွက်သာ သုံးရမယ်လို့ ဖော်ပြထားပေမယ် အခုနောက်ပိုင်း နှစ်တွေမှာ စစ်အင်အားကို သိသိသာသာ မြှင့်လာပါတယ်။
  နိုင်ငံခြားတိုင်းပြည်တွေအထိ ရောက်နိုင်မယ့် တာ၀ေးပစ်ဒုံးကျည်တွေ ချထားမှုကို အရင်က ရှောင်ကျဥ်ခဲ့ပေမယ့် အခုအစီအစဥ်က အစဥ်အလာဟောင်းကို ဖျက်ပစ်မယ့် ခြေလှမ်းလည်း ဖြစ်ပါတယ်။

သြဂုတ် ၆၊ ၂၀၂၂
M-Media

-အစ္စရေးဟာ ပါလက်စတိုင်းပိုင် ဂါဇာကမ်းမြှောင်ကို မနေ့ကစတင်ကာ လေကြောင်းကတိုက်ခိုက်မှုတွေ ပြုလုပ်ခဲ့ပြီး အနည်းဆုံး လူ ၁၅ ဦး သေဆုံးခဲ့ပါတယ်။

ပါလက်စတိုင်း တော်လှန်ရေးအဖွဲ့ Islamic Jihad ကို လက်ဦးမှု ရယူတိုက်ခိုက်တာလို့ အစ္စရေးက ထုတ်ပြန်ထားပေမယ့် လူနေထူထပ်တဲ့နေရာတွေကို တိုက်ခိုက်ဖျက်ဆီးနေတာပါ။

ဒီစစ်ဆင်ရေးဟာ တစ်ပတ်လောက်ကြာမယ်လို့လည်း အစ္စရေးက ပြောပါတယ်။

၂ ရက်တာကြာမြင့်နေပြီးဖြစ်တဲ့ အစ္စရေးရဲ့တိုက်ခိုက်မှုအတွင်း အထပ်မြင့်အဆောက်အဦးအပါအ၀င် လူနေအိမ် ဒါဇင်နဲ့ချီ ပျက်ဆီးခဲ့ပြီး သေဆုံးသူတွေထဲမှာ ကလေးငယ်တွေနဲ့ သက်ကြီးရွယ်အိုတွေ ပါ၀င်ပါတယ်။

အစ္စရေးရဲ့တိုက်ခိုက်မှုကို လက်တုန့်ပြန်တဲ့အနေနဲ့ Islamic Jihad အဖွဲ့က အစ္စရေးဖက်ကို ဒုံးကျည်ရာချီ ပစ်လွှတ်ခဲ့ပါတယ်။

ပါလက်စတိုင်းပြည်သူ ၂ သန်းလောက်နေထိုင်တဲ့ ဂါဇာကမ်းမြှောင်ကို အစ္စရေးက ဘက်စုံ ပိတ်ဆို့ထားတာကြောင့် ကမ္ဘာ့အကြီးဆုံး လဟာပြင်ထောင်လို့ အမည်တွင်ပါတယ်။

အစ္စရေးဟာ ပါလက်စတိုင်းတော်လှန်ရေးအဖွဲ့တွေကို ခေါင်းစဥ်တပ်ပြီး ဂါဇာက လူနေအိမ်တွေ၊ စာသင်ကျောင်းတွေ၊ ဆေးရုံတွေ၊ အခြားအဆောက်အဦးတွေကို မကြခဏ တိုက်ခိုက်ဖျက်ဆီးနေတာ ဖြစ်ပါတယ်။

Ref: Aljazeera