ဇူလိုင် ၂၉၊ ၂၀၂၂
M-Media
-နိုင်ငံတကာရဲ့ ဆယ်စုနှစ်ချီ ပိတ်ဆို့မှုတွေကြားထဲက ကာကွယ်ရေးစွမ်းအား ကောင်းမွန်အောင် ကြိုးစားနေတဲ့ အီရန်နိုင်ငံဟာ အခုအချိန်မှာတော့ နည်းပညာမြင့် ဒရုန်းတွေကို တင်ပို့ရောင်းချနိုင်တဲ့ အခြေအနေတစ်ခုကို ရောက်ရှိလာပြီလို့ ပညာရှင်တွေက သုံးသပ်ပါတယ်။
အီရန်ဒရုန်းတွေကို များသောအားဖြင့် ပဋိပက္ခဖြစ်နေတဲ့ အရှေ့အလယ်ပိုင်းက လက်နက်ကိုင်တွေဆီမှာ တွေ့ရလေ့ရှိပေမယ့်၊ တစ်ခြားနိုင်ငံတွေကို တင်ပို့ရောင်းချမှုတွေ ရှိနေတာပါ။
အထူးသဖြင့် နိုင်ငံတကာရဲ့ ပိတ်ဆို့မှုဒဏ် ခံနေရတဲ့ ဗင်နီဇွဲလား၊ ဆူဒန်လို နိုင်ငံမျိုး၊ အီသီယိုးပီးယား၊ ယီမင်နဲ့ တာဂျစ်ကစ္စတန် နိုင်ငံတွေကို တင်ပို့နေသလို့ ရုရှားကလည်း ဒရုန်းရာချီ ၀ယ်ယူမယ်လို့ သိပ်မကြာခင်က သတင်းထွက်ခဲ့ပါတယ်။
“ဒရုန်းတွေကို တင်ပို့ရောင်းချတဲ့နေရာမှာ အီရန်ဟာ အဓိကနိုင်ငံတစ်ခု ဖြစ်လာနေပါတယ်။ Mohajer-6 လို ဒရုန်းအသစ်တွေကို အာဖရိကဒေသမှာ တွေ့လာရတာကိုကြည့်ရင် နိုင်ငံတွေက ဒီဒရုန်းတွေကို ပွဲအဖြေပြောင်းလဲနိုင်မယ့် လက်နက်တွေအဖြစ် ယူဆနေတာကို တွေ့ရပါတယ်” လို့ ပါလက်စတိုင်းအခြေစိုက် ကာကွယ်ရေးနဲ့ ဒရုန်းရေးရာကျွမ်းကျင်သူ ဆက်သ် ဖရန့်ဇ်မန်က ပြောပါတယ်။
အီရန်ဟာ ၁၉၈၀ ပြည့်နှစ်တွေကဖြစ်ပွားခဲ့တဲ့ အီရန်-အီရတ်စစ်ပွဲကနေ စတင်ပြီး ဒရုန်းတွေကို ထုတ်လုပ်လာတာ ဖြစ်ပါတယ်။ နျူကိစ္စ၊ ဒုံးကျည်ထုတ်လုပ်မှု ကိစ္စတွေကြောင့် နိုင်ငံတကာရဲ့ ပိတ်ဆို့မှုတွေ ခံခဲ့ရပေမယ့် စစ်တပ်သုံးနဲ့ အရပ်ဖက်သုံး ဒရုန်းတွေကို ပုံမှန် ထုတ်လုပ်လာနိုင်ပါတယ်။
အမေရိကန်က အီရန်ရဲ့ ဒရုန်းထုတ်လုပ်မှုကဏ္ဍကို နည်းမျိုးစုံနဲ့ ဟန့်တားဖို့ ကြိုးစားနေသလို၊ အစ္စရေးကလည်း အီရန်က ဒရုန်းထုတ်လုပ်မှုနဲ့ သက်ဆိုင်တဲ့ နေရာတွေကို ခိုးကြောင်ခိုး၀ှက် တိုက်ခိုက်မှုတွေ ပြုလုပ်လေ့ရှိပါတယ်။
အီရန်ဟာ ဒီလိုအခက်အခဲတွေကြားကနေ ဒရုန်းထုတ်လုပ်မှုကို အရှိန်မြှင့်လာနိုင်ခဲ့တာပါ။ နိုင်ငံခြားကို တင်ပို့တဲ့ အီရန်ထုတ် ဒရုန်းတွေက Mohajer-2 (M2-N)၊ Mohajer-6 (M6) နဲ့ Ababil (AB-2) ဖြစ်ပြီး ဒုံးကျည်တွေ တပ်ဆင်နိုင်ကာ တိုက်ခိုက်ရေးနဲ့ ထောက်လှမ်းရေး ၂ မျိုးစလုံးမှာ အသုံးပြုနိုင်ပါတယ်။
ရုရှားကို ဒရုန်းရောင်းမယ်ဆိုတဲ့သတင်းအတွက် အီရန်က အတည်မပြုသလို၊ ငြင်းဆိုခြင်းလည်း မပြုပါဘူ။ အီရန်နိုင်ငံခြားရေး၀န်ကြီးဌာနက ထုတ်ပြန်တဲ့ ကြောငြာချက်မှာ ရုရှားနဲ့ စစ်ရေး ပူးပေါင်းဆောင်ရွက်မှုဟာ ယူကရိန်းကို တိုက်ခိုက်မှုမတိုင်ခင်ကတည်းက ရှိခဲ့တာလို့ ဖော်ပြထားပါတယ်။
အီရန်ကြည်းတပ်တပ်မှူး ဗိုလ်မှူးချုပ် ကီယိုမာရ် ဟေဒါရီက အီရန်ဟာ မိတ်ဖက်နိုင်ငံတွေထံ စစ်လက်နက်ပစ္စည်းတွေ တင်ပို့ရောင်းချဖို့ အဆင်သင့်ဖြစ်နေတယ်လို့ ပြီးခဲ့တဲ့တစ်ပတ်မှာ ပြောကြားခဲ့ပါတယ်။
အီရန်ဟာ တာဂျစ်ကစ္စတန်မှာ ဒရုန်းထုတ်လုပ်ရေးစက်ရုံကို တည်ဆောက်ထားပြီး ဒါဟာ အီရန်ရဲ့ ပြည်ပ ပထမဆုံး ဒရုန်းစက်ရုံလည်း ဖြစ်ပါတယ်။
Ref: New York Time
