ဇူလိုင် ၁၉၊ ၂၀၁၆
M-Media
– အကြမ်းဖက်သမားများနှင့် အစွန်းရောက်များမှာ ၎င်းတို့၏ အကျိုးအတွက် ဘာသာတရားကို အသုံးချနေကြခြင်း ဖြစ်သည်ဟု အီဂျစ်နိုင်ငံ၏ မွဖ်သီချုပ် ရှော်ကီ အာလမ်က ပြောကြားလိုက်သည်။
“အကြမ်းဖက်ဝါဒဟာ အစ္စလာမ်မှာ အခြေမခံပါဘူး။ ဘာသာတရားဆိုတာ အကြမ်းဖက်မှုလုပ်ရပ်တွေကို အားမပေးပါဘူး။ အကြမ်းဖက်သမားတွေဟာ ဘာသာတရားကို ကိုယ်ကြိုက်တဲ့ပုံစံမျိုး စွဲယူကျင့်သုံးတာဖြစ်ပြီး ဒါတွေဟာ တကယ့်အနှစ်သာရနဲ့ ဘာမှကို မဆိုင်ပါဘူး” ဟု မွဖ်သီကြီးက ပြီးခဲ့သည့်ရက်ပိုင်း ဂျာမနီနိုင်ငံ Bonn တက္ကသိုလ်ရှိ အခမ်းအနားတစ်ခုတွင် ပင်တိုင်ဆွေးနွေးသူအဖြစ် ဆောင်ရွက်စဉ် ပြောကြားခဲ့သည်။
ထို့ပြင် မိမိနှင့် လုပ်ဖော်ကိုင်ဖက်များမှာ အစွန်းရောက်များ၏ ရေးသားမှုများကို လေ့လာဆန်းစစ်မှုများ ပြုလုပ်ခဲ့ပြီး ဘာသာရေးအရ ယုတ္တိယုတ္တာမရှိသော ရေးသားမှုများဖြစ်သည်ကို တွေ့ရှိခဲ့ရကြောင်း မွဖ်သီကြီးက ထည့်သွင်းပြောကြားခဲ့သည်။
အကြမ်းဖက်သမားများမှာ အစ္စလာမ်သာသနာအား ပုံဖျက်ကာ ကိုယ်ကျိူးအတွက် ဆောင်ရွက်နေမှုများနှင့် ပတ်သက်၍ ကမ္ဘာတစ်ဝှမ်းမှ အစ္စလာမ့်ရေးရာခေါင်းဆောင်များ၊ အသင်းအဖွဲ့များမှာ ပြီးခဲ့သည့်နှစ်များအတွင်း ဖသ်ဝါဓမ္မသတ်ပေါင်းများစွာကို ထုတ်ပြန်ခဲ့သည်။
၂၀၁၄ ခုနှစ်ကလည်း IS အကြမ်းဖက်အဖွဲ့နှင့် ထိုအဖွဲ့က ကျူးလွန်သော ရာဇ၀တ်မှုများကို ဆန့်ကျင်ရှုတ်ချသည့် အိတ်ဖွင့်ပေးစာတစ်စောင်တွင် ရှော်ကီအာလမ် အပါအ၀င် ကမ္ဘာတစ်ဝှမ်းမှ အစ္စလာမ့်ပညာရှင်ပေါင်း ၁၂၀ ကျော်က လက်မှတ်ရေးထိုးခဲ့ကြသည်။
မွဖ်သီချုပ်ရာထူးမှာ အီဂျစ်နိုင်ငံတွင် အစ္စလာမ့်ရေးရာ အာဏာပိုင်အဖွဲ့၏ အမြင့်ဆုံး ရာထူးဖြစ်ပြီး ၂၀၁၃ ခုနှစ် ရွေးကောက်တင်မြှောက်ခံရစဉ်ကတည်းက အာလမ်မှာ အစ္စလာမ်သာသနာအား အလွဲသုံးစားလုပ်ကာ ကိုယ်ကျိုးရှာနေသည့် အကြမ်းဖက်အဖွဲ့အစည်းများကို ဝေဖန်ရှုတ်ချခဲ့သူ ဖြစ်သည်။
ယခု Bonn တက္ကသိုလ်၌ ပြောကြားမှုတွင်လည်း အာလမ်က ကမ္ဘာပေါ်ရှိ လူသားတိုင်းမှာ အခြားသောယဉ်ကျေးမှုများနှင့် ဘာသာတရားများကို လေးစားရမည်ဖြစ်ကြောင်း၊ တစ်ဦးနှင့်တစ်ဦး မယုံကြည်မှုများ ပပျောက်ရေးအတွက် ဆွေးနွေးညှိနှိုင်းမှုပြုလုပ်ရန် တိုက်တွန်းကြောင်း ထည့်သွင်းပြောဆိုခဲ့သည်။
“လူသားတွေထဲမှာ အကောင်းဆုံးသောသူက ကျန်လူသားအားလုံးကို အကျိုးပြုသူဖြစ်ပါတယ်” ဟု တမန်တော်မုဟမ္မသခင်၏ သြ၀ါဒတော်ကိုလည်း ၎င်းက ကိုးကားခဲ့သည်။
Ref : IINA
