Blog

မတ် ၂၉၊ ၂၀၂၂

M-Media 

-သီရိလင်္ကာမြောက်ပိုင်းက ကျွန်းတွေမှာ ဖက်စပ် ဓာတ်အားပေးစက်ရုံတွေ တည်ဆောက်ရေး သဘောတူညီချက်တစ်ခုကို အိန္ဒိယက လက်မှတ်ရေးထိုးလိုက်ပြီး ဒါဟာ တရုတ်အပေါ် မဟာဗျူဟာမြောက် အောင်ပွဲတစ်ခု ရလိုက်တာလည်း ဖြစ်ပါတယ်။ 

အိန္ဒိယနိုင်ငံခြားရေး၀န်ကြီး သီရိလင်္ကာကို ရောက်ရှိနေတဲ့အချိန် ဒီသဘောတူညီချက် ရခဲ့တာ ဖြစ်ပါတယ်။ ရေကြောင်း ကယ်ဆယ်ရေးဆိုင်ရာ ပူးပေါင်းဆောင်ရွက်ဖို့၊ သီရိလင်္ကာမှာ ငါးလုပ်ငန်းဆိပ်ကမ်းတွေ တည်ဆောက်ဖို့လည်း နှစ်နိုင်ငံ သဘောတူညီခဲ့ကြပါတယ်။ 

သီရိလင်္ကာက ကျွန်းတွေမှာ ဓာတ်အားပေးစက်ရုံတွေ တည်ဆောက်ဖို့ သဘောတူညီချက် ရခဲ့တယ်လို့ တရုတ်က ပြီးခဲ့တဲ့နှစ် ဒီဇင်ဘာမှာ ထုတ်ပြန်ခဲ့ပါတယ်။ ဒါပေမယ့် လုံခြုံရေးဆိုင်ရာ စိုးရိမ်မှုတွေကြောင့် ဒီအစီအစဥ်ကို နောက်ပိုင်းမှာ ရပ်ဆိုင်းခဲ့ပါတယ်။ 

အိန္ဒိယက အခုရရှိခဲ့တဲ့ သဘောတူညီချက်ဟာ တရုတ်နဲ့ပျက်သွားတဲ့ စီမံကိန်းမှာ အစားထိုးမှာလား၊ သီးခြားစီမံကိန်းလားဆိုတာ အတိအကျ မသိရပါဘူး။ 

ဘဏ္ဍာရေးအကြပ်အတည်းကို အကြီးအကျယ်ရင်ဆိုင်နေရတဲ့ သီရိလင်္ကာဟာ တရုတ်နဲ့ အိန္ဒိယတို့ရဲ့ သြဇာလွှမ်းမိုးမှု ယှဥ်ပြိုင်ရာ ဒေသဖြစ်ပါတယ်။ 

တရုတ်ရဲ့ Belt and Road (BRI) စီမံကိန်းနောက်ဆက်တွဲ အကြွေးနွံ နစ်လာတာကြောင့် သီရိလင်္ကာဟာ ဆိပ်ကမ်းတစ်ခုကို တရုတ်ဆီ ထိုးအပ်ခဲ့ရပါတယ်။ 

Ref: South China Morning Post 

မတ် ၂၈၊ ၂၀၂၂

M-Media 

-လွတ်လပ်ရေးရပြီး နှစ် ၇၀ အတွင်း စီးပွားရေးကြပ်တည်းမှု ဒဏ် အဆိုးရွားဆုံး ခံစားနေရတဲ့ သီရိလင်္ကာနိုင်ငံဟာ အိန္ဒိယနိုင်ငံကနေ ကန်ဒေါ်လာ ၁ ဘီလီယံ ထပ်ချေးခဲ့တယ်လို့ ရိုက်တာ သတင်းဌာနက ဖော်ပြပါတယ်။ 

ကိုဗစ်ကပ်ရောဂါ၊ စီးပွားရေးကျဆင်းမှု၊ ငွေကြေးတန်ဖိုးကျမှုတွေကြောင့် သီရိလင်္ကာနိုင်ငံဟာ နိုင်ငံခြားအရန်ငွေ သိသိသာသာ ကျဆင်းကာ လောင်စာဆီ၊ ဆန်၊ ဂျုံ၊ ပြောင်း၊ သကြား၊ ဆေး၀ါး စတဲ့ အခြေခံကုန်ပစ္စည်းတွေ နိုင်ငံခြားက မတင်သွင်းနိုင် ဖြစ်နေပါတယ်။ 

အမည်မဖော်လိုတဲ့ ရင်းမြစ်နှစ်ခုက ဒီအခက်အခဲကို ကုစားဖို့အတွက် သီရိလင်္ကာဟာ အိန္ဒိယနိုင်ငံကနေ ကန်ဒေါ်လာ ၁ ဘီလီယံ ချေးယူဖို့ တောင်းဆိုထားတယ်လို့ ရိုက်တာသတင်းဌာနကို ပြောပါတယ်။ 

နှစ်နိုင်ငံစလုံးကတော့ ဒီကိစ္စနဲ့ပတ်သက်ပြီး ထုတ်ပြန်ပြောဆိုတာ မရှိသေးပါဘူး။ အိန္ဒိယနိုင်ငံခြားရေး၀န်ကြီး ဆူဘရာမန်ယန် ဂျိုင်ရှန်ကာဟာ လက်ရှိမှာ သီရိလင်္ကာကို ရောက်ရှိနေပါတယ်။ 

သီရိလင်္ကာအစိုးရဟာ နိုင်ငံတကာ ငွေကြေးရန်ပုံငွေအဖွဲ့ကနေလည်း ငွေကြေးအကူအညီရယူဖို့ လုပ်ဆောင်နေပါတယ်။ 

Ref: Aljazeera