မတ် ၅၊ ၂၀၂၂
M-Media
– -သမ္မတ ဗလာဒီမီရ်ပူတင်က နိုင်ငံအတွင်း ကန့်သတ်ထိန်းချုပ်မှုတွေ ထပ်တိုးလုပ်ဆောင်လာမှာကို စိုးရိမ်တဲ့အတွက် ရုရှားနိုင်ငံသားတွေဟာ ဖင်လန်နိုင်ငံကို ထွက်ခွာနေကြပါတယ်။
ဖေဖော်၀ါရီလနှောင်းပိုင်း ယူကရိန်းကို ကျူးကျော်တိုက်ခိုက်ကတည်းက ရုရှားနိုင်ငံတစ်၀ှမ်း စစ်ဆန့်ကျင်ရေး ဆန္ဒပြမှုတွေ ဖြစ်ပွားခဲ့ပြီး ရာနဲ့ချီ ဖမ်းဆီးထိန်းသိမ်းခံခဲ့ရပါတယ်။ လက်ရှိမှာ ပူတင်အစိုးရဟာ ထောင်ဒဏ် ၁၅ နှစ်အထိ ချမှတ်နိုင်မယ့် ဥပဒေ ပြဌာန်းတာ အပါအ၀င် စစ်ဆန့်ကျင်ရေး လှုပ်ရှားသူတွေအပေါ် ဖိနှိပ်မှုတွေ တိုးမြှင့် လုပ်ဆောင်လာပါတယ်။
ရုရှားမှာမှာ လွတ်လပ်တဲ့ သတင်းဌာနအားလုံးနီးပါး ပိတ်ပစ်လိုက်ရပြီး၊ ဆိုရှယ်မီဒီယာတွေကိုလည်း အစိုးရက ပိတ်ပင်ထားပါတယ်။ ပူတင်ဟာ နိုင်ငံတစ်၀ှမ်း စစ်အုပ်ချုပ်ရေးစနစ် (မာရှယ်လော) ထုတ်ပြန်တော့မယ်ဆိုတဲ့ သတင်းတွေလည်း ပြန့်နှံ့နေပါတယ်။
ရုရှားပြည်သူတွေက ပူတင်အစိုးရရဲ့ ဖိနှိပ်မှုတွေ ပိုဆိုးမလာခင် တိုင်းပြည်ကနေထွက်ခွာဖို့ ကြိုးစားလာကြပါတယ်။
ဖင်လန်နယ်စပ် ရုရှားမြို့တစ်ခုဖြစ်တဲ့ ဗာလီမာမှာ အခုတစ်ပတ်အတွင်း နိုင်ငံကထွက်ခွာဖို့ ရောက်ရှိလာကြသူတွေ ပိုများလာပါတယ်။ ဥရောပနိုင်ငံတွေ အားလုံးနီးပါးက ရုရှားကနေလာမယ့် လေယာဥ်တွေကို ပိတ်ပစ်လိုက်ကြတာကြောင့် ကုန်လမ်းကြောင်းကနေ ထွက်ခွာဖို့ ပြင်ဆင်လာကြတာပါ။
ရုရှားနိုင်ငံ စိန့်ပီတာစဘတ်မြို့ကနေ ဖင်လန်နိုင်ငံ ဟယ်လင်စကီးမြို့ကို ပြေးဆွဲတဲ့ ရထားမှာလည်း ဘိုကင်တွေပြည့်နေပြီး လက်မှတ်စျေးနှုန်းတွေလည်း အဆမတန် မြင့်တက်နေပါတယ်။
“ယူကရိန်းပြည်သူတွေက ကျွန်တော်တို့ မိသားစု၀င်တွေပါ။ ကျွန်မတို့ သူတို့ကို သတ်နေလို့ မရပါဘူး” လို့ ဖင်လန်ကို ရောက်လာတဲ့ ရုရှားအမျိုးသမီးတစ်ဦးက ပြောပါတယ်။ ရုရှားပြည်သူအများစုဟာ စစ်ကို မလိုချင်ကြပေမယ့် ပူတင်အစိုးရရဲ့ရန်ကို ကြောက်ရွံ့တဲ့အတွက် ထုတ်မပြောကြတာလို့လည်း သူမက ဆိုပါတယ်။
စစ်ပွဲစတင်ပြီးနောက်ပိုင်း နိုင်ငံတကာရဲ့ ပိတ်ဆို့မှုကြောင့် ရုရှားရူဘဲလ်ငွေ အကြီးအကျယ် ကျဆင်းနေပြီး၊ ရုရှားစီးပွားရေးကလည်း အလျင်အမြန်ကို အားနည်းလာပါတယ်။
တူရကီနိုင်ငံ အစ္စတန်ဘူလ်မြို့ကို ထွက်ခွာသွားတဲ့ ရုရှားအမျိုးသမီးတစ်ဦးကလည်း ဆိုဗီယက်ပြည်ထောင်စုလက်ထက် ဖိနှိပ်ညှင်းပမ်းမှုတွေဆီ ပြန်မသွားချင်ဘူးလို့ ပြောကြားခဲ့ပါတယ်။
“ကျွန်မ အသက် ၃၀ ရှိပါပြီ။ ဖိနှိပ်မှုတွေ၊ ထောက်လှမ်းရေးရန် စတဲ့ အဆိုးဆုံးကို ကျွန်မ မကြုံဖူးခဲ့ဘူး။ အခုအချိန် ကျွန်မ ထွက်မပြေးခဲ့ဘူးဆိုရင် နောက်ပိုင်းကျ ထွက်ပြေးလို့ မရမှာကို ကျွန်မ စိုးရိမ်ပါတယ်။ အခုအချိန်ဟာ ထွက်သွားရတော့မယ့် အချိန်ပါ။ ချစ်ရခင်ရသူတွေ၊ မိသားစု မိတ်ဆွေသူငယ်ချင်းတွေကို နောက်ထပ် ဘယ်တော့များမှ တွေ့ရမလဲ၊ တစ်သက်လုံး မတွေ့ရတော့ဘူးလား စသဖြင့် စိုးရိမ်မယ်ဆို စိုးရိမ်ရမယ့် အနေအထားမျိုးပါ”
Ref: BBC
