ဒီဇင်ဘာ ၇၊ ၂၀၁၅
M-Media
– ဆီးရီးယားနိုင်ငံအရှေ့ပိုင်း ဒီအက်ဇိုရ်ပြည်နယ် အေယက်ရ်ှမြို့၌ ယနေ့တွင် လေကြောင်းမှ တိုက်ခိုက်မှုများကြောင့် ဆီးရီးယားစစ်သား ၃ ဦး သေဆုံးခဲ့ပြီး ဆီးရီးယားအစိုးရကမူ အမေရိကန်ဦးဆောင်သည့် မဟာမိတ်များက တိုက်ခိုက်ခြင်းဖြစ်သည်ဟု ပြောကြားခဲ့သည်။
ယူကေအခြေစိုက် ဆီးရီးယားလူ့အခွင့်အရေး စောင့်ကြည့်အဖွဲ့က တိုက်ခိုက်မှုမှာ စစ်စခန်းတစ်ခုအနီးတွင် ဖြစ်ပွားခဲ့ခြင်းဖြစ်ပြီး နိုင်ငံပေါင်းစုံမှ လေကြောင်းတိုက်ခိုက်မှုများ ပြုလုပ်နေသည့် ဆီးရီးယားတွင် ထိုတိုက်ခိုက်မှုအား မည်သူက ပြုလုပ်သည်ဆိုသည်ကို အတည်ပြုနိုင်ခြင်းမရှိဟု ပြောကြားခဲ့သည်။ အမေရိကန်ကမူ ထိုတိုက်ခိုက်မှုတွင် ၎င်းပါဝင်မှုကို ငြင်းဆိုခဲ့သည်။
ဒီအက်ဇိုရ်ပြည်နယ်မှာ IS အဖွဲ့၏ အဓိကထိန်းချုပ်ရာဒေသဖြစ်ပြီး အမေရိကန်ဦးဆောင်သည့် မဟာမိတ်တပ်ဖွဲ့များ မကြာခဏ ပစ်မှတ်ထားတိုက်ခိုက်သည့် ဒေသလည်း ဖြစ်နေသည်။ ဆီးရီးယားအစိုးရ၏ လေတပ်ကလည်း ထိုဒေသတွင် စစ်ဆင်ရေးဆောင်ရွက်မှုများ ရှိပြီး ၎င်းတို့၏ မဟာမိတ်ဖြစ်သော ရုရှားလေတပ်မှာလည်း ပြီးခဲ့သည့် စက်တင်ဘာလ နှောင်းပိုင်းမှ စတင်ကာ ဒီအက်ဇိုရ်ပြည်နယ်၌ တိုက်ခိုက်မှုများကို ပြုလုပ်ခဲ့သည်။
ဆီးရီးယား နိုင်ငံခြားရေးဝန်ကြီးဌာနက အမေရိကန်ဦးဆောင်သည့် မဟာမိတ်တပ်ဖွဲ့မှ တိုက်လေယာဉ် ၄ စင်းမှာ ဆီးရီးယား စစ်စခန်းသို့ ဒုံးကျည် ၉ စင်းနှင့် ပစ်ခတ်ခဲ့ပြီး စစ်သား ၃ ဦးသေဆုံးကာ ၁၃ ဦး ဒဏ်ရာရရှိခဲ့သည်ဟု ထုတ်ပြန်ခဲ့သည်။ ကုလသို့လည်း ၀န်ကြီးဌာနက စာပို့ခဲ့ပြီး ထိုတိုက်ခိုက်မှုကို ရှုတ်ချခဲ့သည်။
Ref: Aljazeera
