ဒီဇင်ဘာ ၆၊ ၂၀၁၅
M-Media
– ဓားဖြင့်တိုက်ခိုက်သည်ဟု စွပ်စွဲသော ကိစ္စများတွင် ပါဝင်ပတ်သက်သည်ဆိုသော ပါလက်စတိုင်းပြည်သူများကို တရားလက်လွတ် သတ်ဖြတ်ခြင်းများအတွက် အစ္စရေးအား ဆွီဒင်နိုင်ငံက ပြင်းထန်စွာ ဝေဖန်ရှုတ်ချလိုက်သည်။
ဆွီဒင်နိုင်ငံခြားရေးဝန်ကြီး မာဂေါ့ ဝေါလ်စထရုမ်းကမူ အစ္စရေးစစ်တပ်မှာ ပါလက်စတိုင်းဆန္ဒပြသူများနှင့် ထိပ်တိုက်တွေ့မှုတွင် တရားလက်လွတ်သတ်ဖြတ်ခြင်း သို့မဟုတ် မတန်တဆ အင်အားသုံးခြင်းတို့ကို ဆောင်ရွက်နေပြီး အစ္စရေးမှ သေဆုံးသူများနှင့် ပါလက်စတိုင်းမှ သေဆုံးသူများကို နှိုင်းယှဉ်လျှင် ထိုအချက်ကို ရှင်းရှင်းလင်းလင်း တွေ့ရှိနိုင်သည်ဟု ပြောကြားခဲ့သည်။
‘အစ္စရေးရဲ့ တုန့်ပြန်မှုမှာ တရားလက်လွတ် သတ်တာဖြတ်တာတွေ ပါဝင်ပြီး၊ သင့်လျော်မှုလည်း မရှိပါဘူး။ ဒါ့ကြောင့် တစ်ဖက်မှာ (ပါလက်စတိုင်းဖက်မှာ) သေဆုံးတဲ့သူတွေက အဆမတန် များပြားနေပါတယ်’ ဟု သူမက ဆိုသည်။
ဝေါလ်စထရုမ်း၏ မှတ်ချက်များကို အစ္စရေးအာဏာပိုင်များက လက်မခံခဲ့ဘဲ အစ္စရေးနိုင်ငံခြားရေးဝန်ကြီးဌာနက ကြေငြာချက်ထုတ်ကာ ရှုတ်ချခဲ့သည်။
ပါလက်စတိုင်းနှင့် အစ္စရေးများအကြား အောက်တိုဘာကတည်းက စတင်ဖြစ်ပွားခဲ့သော ထိပ်တိုက်တွေ့ဆုံမှုများကြောင့် ပါလက်စတိုင်း ၁၁၀ ကျော်နှင့် အစ္စရေး အယောက် ၂၀ နီးပါး သေဆုံးခဲ့သည်။ ထို့ပြင် အနောက်ဘက်ကမ်းခြေနှင့် ဂါဇာကမ်းမြှောင်တို့တွင် ပါလက်စတိုင်းဆန္ဒပြသူများနှင့် အစ္စရေးတပ်ဖွဲ့များအကြား တင်းမာမှုများ ဆက်လက်ဖြစ်ပေါ်လျက်ရှိသည်။
ထိုမတည်ငြိမ်မှုများမှာ သြဂုတ်လအတွင်းက ပါလက်စတိုင်းပိုင် အနောက်ဖက်ကမ်းရှိ အလ်-အက်ဆွာ ဗလီဝတ်ကျောင်းတော်အား အစ္စရေးတပ်ဖွဲ့များနှင့် တရားမ၀င်အိမ်ယာများ၌ နေထိုင်ကြသည့် ဂျူးအစွန်းရောက်များက ၀င်ရောက်စီးနင်းကာ ပါလက်စတိုင်း ၀တ်ပြုသူများအား တိုက်ခိုက်ခဲ့ပြီးနောက် စတင်လာခဲ့ခြင်းဖြစ်သည်။
ပါလက်စတိုင်းပိုင်နက်များကို တစ်စတစ်စ သိမ်းယူနေသည့် အစ္စရေးမှာ မကြာသေးမီကလည်း အနောက်ဖက်ကမ်းရှိ Area C ဟုခေါ်သော နယ်မြေမှ ပါလက်စတိုင်းပိုင် အိမ်များကို ဖြိုချဖျက်ဆီးခဲ့ပြီး ဥရောပသမဂ္ဂက ထိုလုပ်ရပ်အား ရှုတ်ချခဲ့သည်။
နိုင်ငံတကာအဖွဲ့အစည်းများက ပါလက်စတိုင်းပိုင်နက်များတွင် အစ္စရေးက အခြေချအိမ်ယာများ တည်ဆောက်ခြင်းမှာ တရားမ၀င်ဟု သတ်မှတ်ထားသည်။ ၁၉၆၇ ကတည်းကစ၍ အစ္စရေးမှာ ပါလက်စတိုင်းပိုင်နက်များအတွင်း တရားမ၀င် အခြေချအိမ်ယာ ၁၂၀ ကျော်ကို ဆောက်လုပ်ခဲ့ပြီး ထိုအိမ်ယာများတွင် ဂျူးသန်းဝက်ကျော် နေထိုင်နေကြသည်။
Ref: Press TV
