ဒီဇင်ဘာ ၅၊ ၂၀၁၅
M-Media
– ကာဘွန်ထုတ်လွှတ်မှု စမ်းသပ်သည့်လုပ်ငန်းစဉ်တွင် လိမ်ညာမှုများရှိခဲ့သည်ဟု မကြာသေးမီက သတင်းထွက်ပေါ်ခဲ့သည့် ဗောက်စ်ဝဂွန်ကားများ ရောင်းချမှုမှာ ပြီးခဲ့သည့်နှစ်ကထက် နှိုင်းယှဉ်ပါက ယူကေ၌ ယခုနှစ် နိုဝင်ဘာလတွင် ၂၀ ရာခိုင်နှုန်း ကျဆင်းခဲ့သည်ဟု သိရသည်။
ယူကေတွင် ၂၀၁၄ နိုဝင်ဘာလ၌ ဗောက်စ်ဝဂွန်ကားများ ရောင်းချရမှုမှာ ၁၆၁၉၆ စီးခန့် ရှိခဲ့သော်လည်း ပြီးခဲ့သည့်လတွင် ၁၂၉၅၈ စီးခန့်သာ ရှိတော့ကြောင်း မော်တော်ကားထုတ်လုပ်ရောင်းချသူများအဖွဲ့ ပြောကြားခဲ့သည်။
ဗြိတိန်ရှိ ကားဈေးကွက်မှာ ၃.၈ ရာခိုင်နှုန်းတိုးတက်လာခဲ့သော်လည်း ဗောက်ဝက်ဂွန်၏ ဈေးကွက်ဝေစုသည် ပြီးခဲ့သည့်နှစ်က ၉.၄ ရာခိုင်နှုန်းရှိရာမှ ယခုနှစ်တွင် ၇.၂ ရာခိုင်နှုန်းသို့ ထိုးကျသွားကြောင်း တွေ့ရသည်။ ဗောက်စ်ဝဂွန်ထုတ် အခြားသောကားများဖြစ်သည့် SEAT၊ Skoda နှင့် Porsche ကားများမှာလည်း ယူကေတွင် အရောင်းကျဆင်းခဲ့သည်။
ကမ္ဘာ့အကြီးဆုံး ကားဈေးကွက်ကို ပိုင်ဆိုင်ထားသော တိုယိုတာနှင့် ပြိုင်ဘက်ဖြစ်သည့် ဗောက်စ်ဝဂွန်မှာ ၎င်း၏ ဒီဇယ်ကားများတွင် အမေရိကန်၏ ဓာတ်ငွေ့ထုတ်လွှတ်မှုဆိုင်ရာ စမ်းသပ်မှုများကို ဆော့ဖ်ဝဲတပ်ဆင်ကာ လိမ်ညာလှည့်ဖြားခဲ့သည်ဟု စက်တင်ဘာလက ၀န်ခံခဲ့သည်။
ဥရောပတွင် အဆိုပါ ဒီဇယ်ကား ၈ သန်းခွဲခန့်ရှိပြီး ၎င်းကားများတွင် လိမ်ညာမှုများ ပြုလုပ်ခဲ့ခြင်း ရှိ၊ မရှိကို ဗောက်စ်ဝဂွန်က အတည်ပြုပြောကြားထားခြင်း မရှိပေ။
Ref: Arabnews
