နိုဝင်ဘာ ၁၁ ၊ ၂၀၁၅
M-Media
အမျိုးသား ပြန်လည်သင့်မြတ်ရေးအတွက် ဆွေးနွေးလိုကြောင်း အမျိုးသား ဒီမိုကရေစီအဖွဲ့ချုပ် ဥက္ကဌဒေါ်အောင်ဆန်းစုကြည် က နိုင်ငံတော် သမ္မတ၊ ပြည်ထောင်စု လွှတ်တော် နာယကနှင့် တပ်မတော် ကာကွယ်ရေး ဦးစီးချုပ်ထံသို့ အသီးသီးစာပေးပို့ခဲ့ကြောင်း NLD ပါတီရဲ့ တရားဝင် FB စာမျက်နှာမှာ ထုတ်ပြန်ချက်များအရသိရပါတယ်။
ဒေါ်အောင်ဆန်းစုကြည်ရဲ့ မေတ္တာရပ်ခံ တောင်းဆိုချက်ကို ပြည်ထောင်စု လွှတ်တော် နာယက သူရဦးရွှေမန်းမှ လက်ခံ ကြောင်း ချက်ခြင်း အကြောင်းပြန်ကြားတာလည်း တွေ့ရပါတယ်။
သူရ ဦးရွှေမန်းက သူရဲ့ FB စာမျက်နှာမှာ အောက်ပါ အတိုင်းရေးသားဖော်ပြ ခဲ့တာ ကိုလည်း တွေ့ရှိရပါတယ်။
❧❧ ပြည်သူများသို့ ❧❧
—————————
❖ အမျိုးသားပြန်လည်သင့်မြတ်ရေးသဘောထားကို အခြေခံ၍ ပြည်ထောင်စု လွှတ်တော် နာယကနှင့် တွေ့ဆုံဆွေးနွေးလိုပါကြောင်း အမျိုးသားဒီမိုကရေစီ အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်မှ ကိုယ်တိုင်လက်မှတ်ရေးထိုးကာ ဖိတ်ကြားသည့် ၁၀-၁၁-၂၀၁၅ ရက်နေ့ ရက်စွဲပါ စာတစ်စောင်အား လက်ခံရရှိခဲ့ပါသည်။
❖ ယင်းကိစ္စနှင့်ပတ်သက်၍ လာမည့်အပတ်အတွင်း အဆင်ပြေမည့် အချိန်တွင် အမျိုးသားသင့်မြတ်ရေးကိုအခြေခံပြီး အခြားအရေး ကိစ္စများရှိပါကလည်း ဆွေးနွေးနိုင်ရန် စီစဉ်ဆောင်ရွက်သွားမည်ဖြစ်ပါသည်။
❖ ငြိမ်းချမ်းသာယာပြီး ဖွံ့ဖြိုးတိုးတက်သော နိုင်ငံတည်ဆောက်မှုတွင် ပူးပေါင်းပါဝင် ဆောင်ရွက်နိုင်ကြပါစေ။
သူရဦးရွှေမန်း
နာယက
ပြည်ထောင်စုလွှတ်တော်
အလားတူ သမ္မတ ဦးသိန်းစိန်ရဲ့ တာဝန်ပေးချက်အရ သမ္မတပြောရေးဆိုခွင့်ရှိသူ ဦးရဲထွဋ်ရဲ့ ပြန်ကြားချက်ကို NLD က ကြေညာချက်ထုတ်ခဲ့ပါတယ်။ ကြေညာချက်မှာ ရွေးကောက်ပွဲ ကော်မရှင်ရဲ့ လုပ်ငန်းများပြီးဆုံးတဲ့ အချိန် သမ္မတအနေနဲ့ တွေ့ဆုံမှုများ ပြုလုပ်သွားမယ့်အကြောင်း ဖော်ပြထားပါတယ်။
အလားတူ ကာကွယ်ရေးဦးစီးချူပ် ဗိုလ်ချူပ်ကြီးမင်းအောင်လှိုင်မှ မကြာခင် ဒေါ်အောင်ဆန်းစုကြည် စာပို့တာကို အကြောင်းပြန်သွားမယ်ဆိုတဲ့ အကြောင်း သမ္မတရုံး အကြီးတန်းအရာရှိ ရဲ့ ပြောကြားချက်ကို ကိုးကားပြီး ပြည်တွင်းမီဒီယာတွေမှာ ဖော်ပြထားပါတယ်။
