Blog

ဇန်နဝါရီ ၂၉၊ ၂၀၂၂
M-Media

-မြန်မာနိုင်ငံက စစ်အာဏာသိမ်းမှုနဲ့ အကြမ်းဖက်မှုတွေကို နိုင်ငံတကာအသိုင်းအ၀ိုင်းက ထိထိရောက်ရောက် တုန့်ပြန်မှုမရှိဘူးလို့ ကုလသမဂ္ဂ လူ့အခွင့်အရေးဆိုင်ရာ အကြီးအကဲ မီရှဲလ် ဘာချလက်က သောကြာနေ့မှာ ဝေဖန်လိုက်ပါတယ်။

ရွေးကောက်ခံအစိုးရကို ဖြုတ်ချပြီး စစ်တပ်က အာဏာသိမ်းတာ ၁ နှစ်ရှိပါပြီ။ ဘာချလက်က မြန်မာပြည်သူတွေဟာ လွတ်လပ်မှုဆုံးရှုံးတာ၊ အသက်ဆုံးရှုံးတာတွေလို ကြီးကြီးမားမား ပေးဆပ်ခဲ့ရတယ်လို့ ထည့်သွင်းပြောဆိုခဲ့ပါတယ်။

စစ်အာဏာသိမ်းမှုနဲ့ နောက်ဆက်တွဲအကြမ်းဖက်မှုတွေကို တစ်ကမ္ဘာလုံးနီးပါးက ရှုတ်ချခဲ့ပေမယ့် တုန့်ပြန်မှုတွေဟာ ထိရောက်မှုမရှိဘဲ၊ ပြဿနာ မြန်မြန်ဆန်ဆန် ပြေလည်သွားအောင် လုပ်ဆောင်လိုတဲ့ စိတ်ဆန္ဒမျိုး မရှိဘူးလို့လည်း သူက ဝေဖန်ခဲ့ပါတယ်။

“မြန်မာနိုင်ငံမှာ လူ့အခွင့်အရေးနဲ့ ဒီမိုကရေစီ ပြန်လည်ထွန်းကားရေး၊ လူ့အခွင့်အရေး စနစ်တကျ ချိုးဖောက်မှု၊ ညှင်းပမ်းနှိပ်စက်မှု ကျူးလွန်သူတွေကို အရေးယူနိုင်ရေး နည်းလမ်းသစ်နဲ့ မြန်မြန်ဆန်ဆန် ဆောင်ရွက်ရမယ့် အချိန်ပါ”

မြန်မာနိုင်ငံအတွင်း လူသားချင်း စာနာထောက်ထားမှုဆိုင်ရာ အကူအညီ ဝင်ခွင့်ပေးရေး အာဏာသိမ်းစစ်ကောင်စီကို ဖျောင်းဖြဖို့ ကုလ လုံခြုံရေးကောင်စီနဲ့ အာဆီယံအဖွဲ့တို့ကို ဘာချလက်က တိုက်တွန်းခဲ့ပါတယ်။

Ref: Reuters

ဇန်နဝါရီ ၂၇၊ ၂၀၂၂
M-Media

-ပြီးခဲ့တဲ့နှစ်က ရရှိခဲ့တဲ့ အာဆီယံ သဘောတူညီချက် ၅ ချက်ကို တိတိကျကျ၊ ခိုင်ခိုင်မာမာ အကောင်အထည်ဖော်ဖို့ ကမ္ဘောဒီးယားဝန်ကြီးချုပ် ဟွန်ဆန်က မြန်မာစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို တိုက်တွန်းလိုက်ပါတယ်။

ဟွန်ဆန်နဲ့ စစ်ခေါင်းဆောင်တို့ဟာ မနေ့က အွန်လိုင်းကနေ တွေ့ဆုံဆွေးနွေးခဲ့ကြတာပါ။ ကမ္ဘောဒီးယား နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ မြန်မာနိုင်ငံအတွင်း အကြမ်းဖက်မှုတွေ ဆက်လက်ဖြစ်ပွားနေတာနဲ့ ပတ်သက်ပြီး အလွန်အမင်းစိုးရိမ်ကြောင်း ဟွန်ဆန်က ပြောကြားခဲ့သလို၊ အာဆီယံ သဘောတူညီချက်ကို အကောင်အထည်ဖော်ဖို့လည်း စစ်ခေါင်းဆောင်ကို တိုက်တွန်းခဲ့တယ်လို့ ဖော်ပြထားပါတယ်။

၂၀၂၁ ခုနှစ် ဧပြီလ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ရောက်သဘောတူခဲ့တဲ့ အာဆီယံ သဘောတူညီချက် ၅ ချက်မှာ စစ်ကောင်စီရဲ့ အကြမ်းဖက်မှုတွေ ချက်ခြင်းရပ်တန့်ဖို့၊ ဖမ်းဆီးထားသူတွေကို ပြန်လွှတ်ပေးဖို့၊ အာဆီယံအထူးကိုယ်စားလှယ်က မြန်မာ့နိုင်ငံရေးနယ်ပယ်က သက်ဆိုင်သူအားလုံးကို တွေ့ဆုံကာ ကြားဝင်ညှိနှိုင်းခွင့်ပေးဖို့ စတာတွေ ပါဝင်ပါတယ်။

စစ်ကောင်စီဟာ သဘောတူညီချက်ကို အကောင်အထည်ဖော်ခြင်း မရှိပါဘူး။

ဇန်နဝါရီလ အစောပိုင်း ဟွန်ဆန် မြန်မာနိုင်ငံကို လာရောက်ပြီး စစ်ကောင်စီတာဝန်ရှိသူတွေနဲ့ တွေ့ဆုံမှုကို အာဆီယံအဖွဲ့ဝင်နိုင်ငံတွေက လူသိရှင်ကြား ကန့်ကွက်မှုတွေ ပြုလုပ်ပြီးတဲ့နောက် ဟွန်ဆန်ဟာ အခုလို လေသံပြောင်းသွားတာ ဖြစ်ပါတယ်။

စစ်ကောင်စီခန့်နိုင်ငံခြားရေးဝန်ကြီး အာဆီယံနိုင်ငံခြားရေးဝန်ကြီးများအစည်းအဝေးကို တက်ရောက်ဖို့ ဟွန်ဆန်က ဖိတ်ကြားခဲ့တဲ့အတွက် အဖွဲ့ဝင်နိုင်ငံတွေက မတက်ရောက်နိုင်ကြောင်း အကြောင်းကြားခဲ့ပြီး ပြီးခဲ့တဲ့တစ်ပတ်ကလုပ်ဖို့ရှိတဲ့ ဒီအစည်းအဝေးကို ရက်အကန့်အသတ်မရှိ ရွှေ့ဆိုင်းခဲ့ရပါတယ်။

မလေးရှား၊ စင်ကာပူနဲ့ အင်ဒိုနီးရှားခေါင်းဆောင်တွေက မြန်မာပြဿနာကို ဖြေရှင်းရာမှာ အာဆီယံ သဘောတူညီချက် ၅ ချက်ကိုပဲ အခြေခံရမယ်ဆိုတာနဲ့ ဒါကို အကောင်အထည်မဖော်ရင် မြန်မာစစ်ခေါင်းဆောင်ကို ဘယ်အာဆီယံအစည်းအဝေးမှ တက်ခွင့်မပေးဘူးဆိုတဲ့ မူဝါဒကိုသာ ဆက်လက်ကျင့်သုံးမယ်လို့ ပြီးခဲ့တဲ့တစ်ပတ် ဟွန်ဆန်နဲ့ သီးခြားဆွေးနွေးမှုမှာ အလေးထား ပြောကြားခဲ့ကြပါတယ်။

မနေ့က မလေးရှားဝန်ကြီးချုပ်နဲ့ ဆွေးနွေးမှုအပြီးမှာ ဟွန်ဆန်က အာဆီယံသဘောတူညီချက်ကို အကောင်အထည်ဖော်ရင် အခုနှစ် ထိပ်သီးအစည်းအဝေး တက်ခွင့်ပေးမယ်ဆိုပြီး မြန်မာစစ်ခေါင်းဆောင်ကို ပြောထားကြောင်း သူ့ရဲ့ Facebook စာမျက်နှာမှာ ရေးသားခဲ့ပါတယ်။

Ref: The Diplomat

ဇန်န၀ါရီ ၂၅၊ ၂၀၂၂
M-Media

-ပြီးခဲ့နှစ်က ရရှိထားတဲ့ အာဆီယံ သဘောတူညီချက်ကို အကောင်အထည်မဖော်ဘဲ မြန်မာစစ်ခေါင်းဆောင်တွေ အာဆီယံ အစည်းအ၀ေးတက်တာကို လက်ခံမှာ မဟုတ်ဘူးလို့ မလေးရှား၀န်ကြီးချုပ် အစ္စမာအီလ် ဆာဘရီ ယာကွဘ်က ဒီကနေ့မှာ ပြောကြားလိုက်ပါတယ်။

မလေးရှား၀န်ကြီးချုပ်ဟာ အခုနှစ် အာဆီယံဥက္ကဌတာ၀န် ထမ်းဆောင်မယ့် ကမ္ဘောဒီးယား၀န်ကြီးချုပ် ဟွန်ဆန်နဲ့ ဒီကနေ့ အွန်လိုင်းကနေ ဆွေးနွေးခဲ့ပါတယ်။

မလေးရှား နိုင်ငံခြားရေး၀န်ကြီးဌာနက ထုတ်ပြန်တဲ့ ကြေငြာချက်မှာ အာဆီယံ သဘောတူညီချက် ၅ ချက်ကို မြန်မာအာဏာသိမ်းစစ်ကောင်စီက အကောင်အထည်မဖော်မချင်း စစ်ခေါင်းဆောင်ကို ထပ်သီးအစည်းအ၀ေး မဖိတ်ဖို့ဆိုတဲ့ မူအတိုင်း ဆက်လက်ရပ်တည်သွားမယ်လို့ ၀န်ကြီးချုပ်က ပြောခဲ့ကြောင်း ဖော်ပြထားပါတယ်။

အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ပြီးခဲ့တဲ့နှစ် ဧပြီလမှာ တက်ရောက်သဘောတူခဲ့တဲ့ အာဆီယံသဘောတူညီချက်မှာ အကြမ်းဖက်မှု ချက်ချင်းရပ်တန့်ရေး၊ ဖမ်းဆီးထားသူတွေကို ပြန်လွှတ်ပေးရေး၊ အာဆီယံ အထူးကိုယ်စားလှယ်တစ်ဦး ခန့်အပ်ကာ နိုင်ငံရေနယ်ပယ်က သက်ဆိုင်သူတွေအကြား ကြား၀င်ညှိနှိုင်းပေးရေး စတာတွေ ပါ၀င်ပါတယ်။

သဘောတူညီချက်ပါ အချက်အလက်တွေကို စစ်ကောင်စီဖက်က အကောင်အထည်မဖော်တဲ့အတွက် ပြီးခဲ့တဲ့နှစ် အာဆီယံထိပ်သီးအစည်းအ၀ေး အနည်းဆုံး ၃ ခုမှာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို တက်ခွင့်မပေးပါဘူး။

အခုလအစောပိုင်း ကမ္ဘောဒီးယား၀န်ကြီးချုပ် ဟွန်ဆန်ရဲ့ မြန်မာနိုင်ငံ ခရီးစဥ်နဲ့ အဲဒီခရီးစဥ်အတွင်း စစ်ကောင်စီခန့် နိုင်ငံခြားရေး၀န်ကြီးကို အာဆီယံ နိုင်ငံခြားရေး၀န်ကြီးများ အစည်းအ၀ေး ဖိတ်ကြားခဲ့မှုနဲ့ ပတ်သက်ပြီး အာဆီယံအဖွဲ့၀င်နိုင်ငံတွေက လူသိရှင်ကြား ၀ေဖန်ခဲ့ကြပါတယ်။

ဟွန်ဆန်ရဲ့ မြန်မာအာဏာသိမ်းစစ်ကောင်စီအပေါ် သဘောထားကို လက်မခံနိုင်တာကြောင့် အာဆီယံအဖွဲ့၀င်နိုင်ငံတွေဟာ ဇန်န၀ါရီလကုန်ပိုင်းမှာ ကျင်းပဖို့ရှိနေတဲ့ အာဆီယံနိုင်ငံခြားရေး၀န်ကြီးများအစည်းအ၀ေးကို အကြောင်းအမျိုးမျိုးပြကာ မတက်ဘူးလို့ ပြောခဲ့ပြီး အစည်းအ၀ေးကို အကန့်အသတ်မရှိ ရွှေ့ဆိုင်းခဲ့ရပါတယ်။

ကမ္ဘောဒီယား၀န်ကြီးချုပ် ဟွန်ဆန်က အာဆီယံသဘောတူညီချက်ကို အကောင်အထည်ဖော်ရင် ထိပ်သီးအစည်းအ၀ေး တက်ခွင့်ပေးမယ်ဆိုတဲ့ ခြွင်းချက်နဲ့ စစ်ကောင်စီကို ဖိတ်ကြားထားကြောင်း ဒီကနေ့ ဆိုရှယ်မီဒီယာမှာ ရေးသားခဲ့ပါတယ်။

ဟွန်ဆန်ဟာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့လည်း မနက်ဖြန်နဲ့ ဖုန်းဆက်ဆွေးနွေးဖို့ ရှိနေပါတယ်။

Ref: Nikkei Asia