Blog

မန်ယူမှာ ဘောလုံးမရသည့်အချိန်တွင် ပိုကောင်းသည်ဟု ဗန်ဂါးလ်ပြော

သြဂုတ် ၂၆၊ ၂၀၁၅
M-Media

– မိမိအသင်း၏ ခံစစ်နှင့် တိုက်စစ်မှာ ဘောလုံးမရှိသည့်အချိန်တွင် ပို၍ ကောင်းမွန်သည်ဟု မန်ယူနည်းပြ ဗန်ဂါးလ်က ပြောကြားလိုက်ပြီး ချန်ပီယံလိဂ် အုပ်စုအဆင့်သို့ ရောက်ရေးမှာလည်း အလွန် အရေးကြီးသည်ဟု ဆိုသည်။

မန်ယူမှာ ယခုနှစ်ရာသီအစတွင် ကစားခဲ့သည့် လေးပွဲစလုံး၌ ရှုံးပွဲမရှိသေးသော်လည်း တိုက်စစ်ပိုင်းတွင် ပြဿနာရှိနေပြီး ဂိုးရရန်ခက်ခဲနေကာ ပရီးမီးယားလိဂ်တွင် ၂ ဂိုးသာ သွင်းယူထားနိုင်သည်။ ထို့ကြောင့် အဓိက တိုက်စစ်မှူးဖြစ်သူ ၀ိန်းရူနီမှာ ဝေဖန်မှုများကို ကျယ်ကျယ်ပြန့်ပြန့် ခံနေရသည်။ ဗန်ဂါးလ်ကလည်း အသင်း၏ ခံစစ်ကစားသမားများမှာ ချီးကျူးမှုနှင့် ပိုထိုက်တန်သည်ဟု ဆိုသည်။

ယခုနှစ် အသင်းအခြေအနေနှင့်ပတ်သက်၍ စိတ်ကျေနပ်မှုရှိလားဟု မေးမြန်းရာ ဗန်ဂါးလ်က

“အခုအချိန်အထိတော့ ကျွန်တော်တို့ ခံစစ်အုပ်စုကိုပဲ ကြိုက်ပါသေးတယ်။ ဘောလုံးကို အဓိကကာလ လေးခုခွဲပြီး၊ ကျွန်တော်တို့မှာ ၂ ခုရှိပါတယ်။ အဲဒါကတော့ ပြိုင်ဘက်က ဘောလုံးရနေချိန်မှာ ကျွန်တော်တို့က ပိုကောင်းတယ်လို့ ထင်ပါတယ်။ ပြီးခဲ့တဲ့နှစ်က ဒါကို ကျွန်တော်တို့ သက်သေပြခဲ့ပြီး အခုနှစ်မှာလည်း Clean Sheet တော်တော်များများနဲ့ ကျွန်တော်တို့ ဆက်လက် သက်သေပြနေပါတယ်။ ဒါက သိပ်အရေးကြီးပါတယ်။ ဒါပေမယ့် ဘောလုံးရတဲ့အချိန် တိုးတက်လာအောင် ကျွန်တော်တို့ လုပ်ရပါမယ်” ဟု သတင်းထောက်များအား ပြောကြားခဲ့သည်

မန်ယူမှာ ယနေ့ညတွင် ချန်ပီယံလိဂ် ခြေစစ်ပွဲ ဒုတိယအကျော့အဖြစ် ဘရုဂျက်အသင်းနှင့် ကစားရမည်ဖြစ်သည်။ ပထမအကျော့တွင် ၃ ဂိုး ၁ ဂိုးဖြင့်နိုင်ထားပြီး အခြေအနေ ကောင်းနေသော်လည်း ဗန်ဂါးလ်မူ ထိုပွဲမှာ အသင်းအတွက် အရေးပါဆုံးပွဲဖြစ်သည်ဟု ပြောကြားခဲ့သည်။

“ဟုတ်ပါတယ်။ ဒါက ယူနိုက်တက်အတွက် အရေးပါဆုံးပွဲပါ။ တစ်နှစ်ကျော်ပြီးတဲ့အချိန် ချန်ပီယံလိဂ်မှာ ၀င်ခွင့်ရဖို့ဆိုတာဟာ ကျွန်တော်တို့ရဲ့ ရည်ရွယ်ချက်ပါ။ ပြီးတော့ ကျွန်တော်တို့ ပါဝင်ခွင့် မရသေးပါဘူး။ သိပ်အရေးပါပါတယ်။ ပြိုက်ဘက်ထက် ဂိုးပိုများများနဲ့ အဆုံးသတ်အောင် ကျွန်တော်တို့ ကစားရပါမယ်။ အဲဒီနောက်မှသာ ကျွန်တော်တို့ (ချန်ပီယံလိဂ်ကို) ၀င်ကစားရမှာပါ”

Ref: Goal

August 26, 2015
ယူကရိန်း ရုပ်ရှင်ဒါရိုက်တာကို အကြမ်းဖက်မှုဖြင့် ရုရှားက ထောင်ဒဏ် နှစ် ၂၀ ချ

သြဂုတ် ၂၆၊ ၂၀၁၅
M-Media

– ခရိုင်းမီးယားကျွန်းဆွယ်တွင် အကြမ်းဖက်တိုက်ခိုက်မှုများအတွက် ယူကရိန်း ရုပ်ရှင်ဒါရိုက်တာဖြစ်သူ အိုလက်ဂ် ဆန့်ဆော့ဗ်ကို ရုရှားတရားရုံးက ယမန်နေ့တွင် ထောင်ဒဏ် နှစ် ၂၀ ချမှတ်လိုက်သည်ဟု RIA သတင်းဌာနက ဖော်ပြခဲ့သည်။

နိုင်ငံအနောက်တောင်ပိုင်း ရို့စ်တော့ဗ်မြို့ရှိ စစ်ခုံရုံးတွင် တရားစွဲဆိုကြားနာကာ အမိန့်ချမှတ်ခဲ့ခြင်းဖြစ်ပြီး အခြားတစ်ဦးဖြစ်သူ အလက်ဇန်ဒါ ကိုလ်ရှန်ကို ကိုလည်း ၁၀ နှစ် ချမှတ်ခဲ့သည်။ အစိုးရရှေ့နေများကမူ ဆန့်ဆော့ဗ်အား ထောင်ဒဏ် ၂၃ နှစ်နှင့် ကိုလ်ရှန်ကိုအား ၁၂ နှစ်ချမှတ်ရန် တောင်းဆိုခဲ့ခြင်းဖြစ်သည်။

ခရိုင်းမီးယားဇာတိဖြစ်သူ ဆန့်ဆော့ဗ်ကမူ အပြစ်မရှိကြောင်း လျှောက်လဲခဲ့ပြီး ယူကရိန်းပြဿနာအတွက် ရုရှားနှင့် အနောက်နိုင်ငံများအကြား တင်းမာမှုများ မြင့်တက်လာသည့်အချိန်တွင် နိုင်ငံရေးအရ ထိုတရားစွဲဆိုမှုကို ပြုလုပ်ခြင်းဖြစ်သည်ဟုဆိုကာ ရှုတ်ချခဲ့သည်။

ရုရှားက ခရိုင်းမီးယားကျွန်းဆွယ်အား သိမ်းပိုက်ပြီးနောက်ပိုင်း ထိုသိမ်းပိုက်မှုမှ လွတ်မြောက်ရေးအတွက် ခရိုင်းမီးယားတွင် အကြမ်းဖက်အဖွဲ့ ဖွဲ့စည်းမှုဖြင့် ရုရှား၏ အစိုးရရှေ့နေများက ဆန့်ဆော့ဗ်အား တရားစွဲဆိုခဲ့ခြင်းဖြစ်သည်။

ရုရှားစုံစမ်းစစ်ဆေးသူများကမူ ၎င်းတို့နှစ်ဦးမှာ ၂၀၁၄ ခုနှစ် ဧပြီနှင့် မေကြားတွင် ခရိုးမီးယားရှိ ရုံးနှစ်ရုံးကို မီးရှို့ခဲ့ပြီး တစ်ခုမှာ ရုရှားအာဏာရပါတီ၏ ယူနိုက်တက်ရုရှား၏ ရုံးခန်းတစ်ခုဖြစ်သည်ဟု ပြောကြားခဲ့သည်။

ယူကရိန်းသမ္မတ ပီထရို ပိုရိုရှန်ကိုကမူ ဆန့်ဆော့ဗ်တို့နှစ်ဦးအား ရုရှားက တရားစွဲဆိုခြင်းမှာ မည်သည့်အဓိပ္ပါယ်မှမရှိဟု ပြောကြားခဲ့သည်။

“တောင့်ထားပါ အိုလက်ဂ်။ ဒီတရားစွဲဆိုမှုကို စီစဉ်ခဲ့တဲ့သူတွေ ကိုယ်တိုင် (တရားရုံးက) သံသယရှိသူ ခုံတန်းမှာ ထိုင်ရတဲ့အချိန်ဆိုတာ ရောက်လာဦးမှာပါ” ဟု ပိုရိုရှန်ကိုက ၎င်း၏ Facebook စာမျက်နှာမှတစ်ဆင့် ရေးသားခဲ့သည်။

နိုင်ငံတကာလူ့အခွင့်အရေးအဖွဲ့ဖြစ်သော Amnesty International ကလည်း အဆိုပါ တရားစွဲဆိုမှုအား ရှုတ်ချခဲ့သည်။

“ဒီလူတွေဟာ ခရိုင်းမီးယားကို ရုရှားက ကျူးကျော်သိမ်းပိုက်တာကို ဆန့်ကျင်မှုနဲ့ ပတ်သက်ပြီး “အကြမ်းဖက်” စွဲချက်တွေနဲ့ တရားမဲ့စွာ စွဲဆိုခံရတာပါ။ စစ်ဘက်ကြားနားမှုဟာ ပုံမှန်မဟုတ်တာတွေ များပြားပါတယ်။ ငြှင်းပန်းနှိပ်စက်မှု၊ သက်သေထွက်ဖို့ အခြား ဆိုးရွားတဲ့ဆက်ဆံမှုတွေကို အသုံးပြုတယ်ဆိုတဲ့ တုန်လှုပ်စရာ ဖော်ထုတ်မှုတွေလည်း ရှိနေပါတယ်” ဟု Amnesty International က ပြောကြားခဲ့သည်။

Ref: Reuters

August 26, 2015
နိုင်ငံတကာသတင်းတို (သြဂုတ် ၂၅၊ ၂၀၁၅)

သြဂုတ် ၂၅၊ ၂၀၁၅
M-Media

တရုတ်စတော့ဈေးကွက် နှစ် ၂၀ အတွင်း အနိမ့်ဆုံးသို့ ကျဆင်း
………………………………………..
ယမန်နေ့က ၈ ရာခိုင်နှုန်းအထိ ကျခဲ့သည့် တရုတ်စတော့ဈေးကွက်မှာ ယနေ့တွင်လည်း ၇.၆၃ ရာခိုင်နှုန်း ထပ်မံကျဆင်းခဲ့ပြီး နှစ်ပေါင်း ၂၀ နီးပါးအတွင်း အနိမ့်ဆုံးအထိကို ရောက်ရှိသွားခဲ့သည်။ သြဂုတ်လ ၁၉ ရက်နေ့မှ စကြည့်လျှင် စတော့ဈေးကွက်မှာ ၂၂ ရာခိုင်နှုန်း လျော့ကျသွားခြင်းလည်းဖြစ်သည်။ ဈေးကွက်ကျဆင်းမှုကို ထိန်းသိမ်းရန် တရုတ်အစိုးရက ကြိုးပမ်းဆောင်ရွက်နေသော်လည်း ပြန်တက်လာခြင်း မရှိခဲ့ပေ။ တနင်္လာနေ့က တရုတ်ဈေးကွက်ကျဆင်းမှုကြောင့် အာရှနိုင်ငံအချို့ရှိ ဈေးကွက်များမှာ ကျဆင်းခဲ့သော်လည်း ယနေ့တွင် ဂျပန်မှလွဲ၍ အခြားဈေးကွက်များမှာ အနည်းငယ် ပြန်တက်လာခဲ့သည်။

ရာနှင့်ချီသော တရားမ၀င် ကိုလံဘီယာနိုင်ငံသားများကို ဗင်နီဇွဲလား နှင်ထုတ်
………………………………..
ကိုလံဘီယာနယ်စပ်အနီးတွင် ပြုလုပ်ခဲ့သည့် လုံခြုံရေးဆိုင်ရာ စစ်ဆင်ရေးအတွင်း ဗင်နီဇွဲလားမှာ ရာနှင့်ချီသော ကိုလံဘီယာနိုင်ငံသားများကို နှင်ထုတ်ခဲ့သည်။ ပြီးခဲ့သည့် သီတင်းပတ်အတွင်း ကိုလံဘီယာတွင် လှုပ်ရှားနေသော လက်နက်ကိုင်ဂိုဏ်းများက ပြုလုပ်သည်ဟု ယူဆရသော တိုက်ခိုက်မှုအတွင်း ဗင်နီဇွဲလားစစ်တပ်မှ အရာရှိ ၃ ဦး ထိခိုက်ဒဏ်ရာရခဲ့ပြီးနောက် သမ္မတ မာဒူရိုမှာ နိုင်ငံအနောက်ပိုင်းရှိ မြို့အများအပြားတွင် အရေးပေါ်အခြေအနေ ကြေညာခဲ့ပြီး နယ်စပ်တစ်လျှောက်ရှိ မှောင်ခိုသမားများနှင့် ရာဇ၀တ်ဂိုဏ်းများကို နှိမ်နှင်းမှုများ ဆက်တိုက်ပြုလုပ်ခဲ့သည်။ ထို့ပြင် နိုင်ငံအတွင်း
တရားမ၀င်နေထိုင်သည့် ကိုလံဘီယာနိုင်ငံသားများကိုလည်း နှင်ထုတ်ခဲ့သည်။

ဥရောပသို့ဝင်ရောက်သည့် ဒုက္ခသည်များ တိုးလာမည်
……………………………………..
အီရတ်နှင့် ဆီးရီးယားတွင် တိုက်ခိုက်မှုများ ဖြစ်နေခြင်း၊ တူရကီ၊ ဂျော်ဒန်နှင့် လက်ဘနွန်နိုင်ငံများရှိ ဒုက္ခသည်စခန်းများတွင် အခြေအနေများ ဆိုးရွားနေခြင်းကြောင့် ဥရောပသို့ ၀င်ရောက်လာကြသည့် ဒုက္ခသည်အရေအတွက်မှာ လာမည့်ရက်များတွင်လည်း ဆက်လက်တိုးနေမည်ဟု UNHCR က ပြောကြားခဲ့သည်။ ထို့ပြင် ဥရောပနိုင်ငံများအနေဖြင့် မှန်ကန်သည့် စီမံဆောင်ရွက်မှုများကို ပြုလုပ်ပါက ထိုကိစ္စကို ကိုင်တွယ်နိုင်မည်ဟု UNHCR ၏ ပြောရေးဆိုခွင့်ရှိသူ မီလီဆာ ဖလီးမင်းက ပြောကြားခဲ့သည်။

Ref: News Agencies

August 25, 2015
တရုတ်စတော့ဈေးကွက် ကျဆင်းမှု အာရှ အချမ်းသာဆုံးသူဌေး ဒေါ်လာ ၃.၆ ဘီလီယံ ဆုံးရှုံး

သြဂုတ် ၂၅၊ ၂၀၁၅
M-Media

– တရုတ်စတော့ဈေးကွက်မှာ ၂၀၀၇ နှစ်နောက်ပိုင်း အဆိုးရွားဆုံး ကျဆင်းမှုနှင့် ရင်ဆိုင်ရသည့် ယမန်နေ့တွင် အာရှ၏ အချမ်းသာဆုံးပုဂ္ဂိုလ်ဖြစ်သူ တရုတ်သူဌေးတစ်ဦးမှာ ကန်ဒေါ်လာ ၃.၆ ဘီလီယံ ဆုံးရှုံးခဲ့သည်ဟု သိရသည်။

ဝမ်လီယန်လင်းဆိုသူဖြစ်ပြီး ရှယ်ယာဈေး ၁၇ ရာခိုင်နှုန်းအထိ ကျဆင်းခဲ့သည့် Dalian Wanda Commercial Properties ကုမ္ပဏီတစ်ခုတည်းမှ ၎င်းမှာ ကန်ဒေါ်လာ ၂ ဘီလီယံ ဆုံးရှုံးခဲ့သည်ဟု Bloomberg Billionaires Index ၏ စာရင်းတွင် ဖော်ပြထားသည်။ ထို့ပြင် Wanda Cinema Line ကုမ္ပဏီလီမိတက်၏ ရှယ်ယာဈေးနှုန်းမှာ ၁၀ ရာခိုင်နှုန်း ကျဆင်းခဲ့ပြီး ၀မ်မှာ ထိုကုမ္ပဏီတွင် ကန်ဒေါ်လာ ၁ ဘီလီယံ ထပ်မံဆုံးရှုံးခဲ့သည်။ ကျန်ရှိသည့် သန်း ၆၀၀ မှာ အခြားသော ပုဂ္ဂလိကကုမ္ပဏီများတွင် ဆုံးရှုံးခဲ့ခြင်းဖြစ်သည်။

တရုတ်အစိုးရ၏ ဆောင်ရွက်ချက်များမှာ နိုင်ငံ၏ စီးပွားရေးကျဆင်းမှုအတွင်း ရင်းနှီးမြှုပ်နှံသူများ၏ ယုံကြည်မှုကို ပြန်လည်ရရှိရန် မစွမ်းဆောင်နိုင်ခဲ့ပြီးနောက် တရုတ်နိုင်ငံ၏ ရှယ်ယာဈေးကွက်မှာ တနင်္လာနေ့တွင် အလွန်အမင်း ကျဆင်းခဲ့သည်။ ထိုအရှိန်ကြောင့် အာရှတစ်ဝှမ်းနှင့် နိုင်ငံတကာမှ ရှယ်ယာဈေးကွက်များပါ အနည်းနှင့်အများ ထိခိုက်ခဲ့သည်။

ထိုကဲ့သို့ ရှယ်ယာဈေးကျဆင်းမှုကြောင့် ကမ္ဘာ့အချမ်းသာဆုံး လူ ၄၀၀ တွင် ဆုံးရှုံးမှုများမှာ ကန်ဒေါ်လာ ၁၂၄ ဘီလီယံအထိ ရှိခဲ့သည်။ တရုတ် စတော့ဈေးကွက်များမှာ ယနေ့တွင်လည်း ထပ်မံကျဆင်းခဲ့ပြီး အာရှရှိ ချမ်းသာသူများတွင် ဆုံးရှုံးမှုများ ပိုမိုများပြားခဲ့သည်။

တနင်္လာနေ့ တရုတ်စတော့ဈေးကွက် ကျဆင်းမှုအတွင်း ကမ္ဘာ့ဘီလီယံနာ ၂၄ ဦးမှာ ကန်ဒေါ်လာ ၁ ဘီယီယံကျော်စီ ဆုံးရှုံးခဲ့ကြပြီး ထိုအထဲတွင် ကမ္ဘာ့အချမ်းသာဆုံးပုဂ္ဂိုလ် ဘီလ်ဂိတ်လည်း ပါဝင်ခဲ့ကာ ကန်ဒေါ်လာ ၃.၂ ဘီလီယံ ဆုံးရှုံးခဲ့သည်။

စတော့ဈေးကွက် မတည်ငြိမ်မှုကြောင့် အာရှဘီလီယံနာများမှာ ပြီးခဲ့သည့် ၃ လအတွင်း ၎င်းတို့၏ ပိုင်ဆိုင်မှုများမှ ၅ ပုံ ၁ ပုံ ဆုံးရှုံးခဲ့ပြီး၊ သောကြာနေ့ ဈေးကွက်ဖွင့်ချိန်မှစ၍ ယမန်နေ့ ဈေးကွက်ပိတ်ချိန်အထိ ဆုံးရှုံးမှုမှာ ကန်ဒေါ်လာ ၅၄ ဘီလီယံရှိနေသည်။

Ref: Arabnews

August 25, 2015
ဟဂ်ျပြုရန်လာကြသူများအတွက် ပြည့်ဝသည့် ကျန်းမာရေးစောင့်ရှောက်မှုစနစ်ကို ဆော်ဒီ စီစဉ်ထား

သြဂုတ် ၂၅၊ ၂၀၁၅
M-Media

– ယခုနှစ် ဟဂ်ျရာသီအတွင်း လာရောက်ကြသည့် ခရီးသည်များအနေဖြင့် ကျန်းမာရေးနှင်ညီညွတ်ပြီး ရောဂါဘယကင်းစင်သော ၀န်းကျင်တွင် ၎င်းတို့၏ ဘာသာရေးတာဝန်ဝန်တ္တရားများကို ကျေပွန်စေနိုင်ရန်အတွက် ပြည့်စုံသော ကျန်းမာရေးအစီအစဉ်များကို ဆောင်ရွက်ထားသည်ဟု မဒီနာရှိ ကျန်းမာရေးဆိုင်ရာ အထွေထွေဒါရိုက်တာဖြစ်သူ ခါလစ် အလ်-မီရ်ဂါလာနီက ပြောကြားလိုက်သည်။

“ဟဂ်ျဘုရားဖူး လာရောက်ကြသူတွေ၊ အလုပ်သမားတွေနဲ့ ကျန်းမာရေးတာဝန်ရှိသူတွေအတွက် အရည်အသွေးပြည့်ဝတဲ့ ကျန်းမာရေး ၀န်ဆောင်မှု အကောင်းဆုံးအဆင့်ရရှိဖို့၊ ကုသမှု၊ ကာကွယ်မှုနဲ့ လူနာသယ်ယူပို့ဆောင်ရေး အစီအစဉ်တွေကနေ တစ်ဆင့် ပြီးပြည့်စုံတဲ့ ကျန်းမာရေး ၀န်ဆောင်မှု အစီအစဉ်တွေကို ကျွန်တော်တို့ အပြည့်အ၀ စီစဉ်ထားပါတယ်” ဟု အလ်-မီရ်ဂါလာနီက Arab News သို့
တနင်္လာနေ့တွင် ပြောကြားခဲ့သည်။

ထိုကဲ့သို့ ၀န်ဆောင်မှုများကို မက္ကာဟ်မြို့တွင်လည်း စီစဉ်ထားပြီး မက္ကာနှင့် မဒီနာမြို့ရှိ အခြားသော အရေးပါသည့် နေရာများဖြစ်သော မီနာ၊ အာရာဖတ်နှင့် မွဇ်ဒါလီဖာဒေသများတွင်လည်း စီမံထားသည်ဟု ၎င်းက ထပ်လောင်းပြောကြားခဲ့သည်။

ယခုနှစ်တွင် ဆော်ဒီအာရေဗျသို့ ဟဂ်ျဘုရားဖူးခရီးစဉ် လာရောက်ကြမည့်သူများနှင့် မြင့်မြတ်ရာနေရာများတွင် တာဝန်ထမ်းဆောင်ကြမည့်သူများအတွက် ဦးနှောက်အမှေးရောင်ကာကွယ်ဆေးကို မဖြစ်မနေ ထိုးရမည်ဟု အလ်-မီရ်ဂါလာနီက ဆိုသည်။

“ဘုရားဖူးတွေအတွက် လိုအပ်တဲ့ တုပ်ကွေးပျောက်ဆေးတွေလည်း ကျွန်တော်တို့မှာ အလုံအလောက် ရှိပါတယ်”

ကျန်းမာရေးဝန်ဆောင်မှုများနှင့် ကာကွယ်ရေး၊ ကုသရေး ၀န်ဆောင်မှုများကို ဆော်ဒီနိုင်ငံအတွင်းသို့ ရေလမ်း၊ လေကြောင်းလမ်းနှင့် ကုန်းလမ်းတို့မှ ၀င်ရောက်လာသည့် ဟဂ်ျခရီးသွားများနှင့် အခြားခရီးသည်များအတွက် ဆော်ဒီအစိုးရက အပြည့်အ၀ စီစဉ်ထားသည်။

ဟဂ်ျဘုရားဖူးလာရောက်ကြသော ခရီးသည်များကို ကျန်းမာရေးဝန်ဆောင်မှုပေးရန်အတွက် မက္ကာနှင့် မဒီနာမြို့များတွင် ကုတင်တစ်ထောင်ဆန့်ဆေးရုံ ၇ ရုံရှိပြီး အထူးကြပ်မတ်ကုသဆောင်နှင့် အရေးပေါ်ကုသဆောင်များမှာ ၁၃၅ ခု ရှိနေသည်။

မဒီနာရှိ Prince Mohammed bin Abdul Aziz လေဆိပ်၊ ယန်ဘူရှိ Prince Abdul Mohsen Bin Abdul Aziz Airport လေဆိပ်နှင့် ယန်ဘူ သင်္ဘောဆိပ်တို့တွင် ကပ်ရောဂါ စောင့်ကြည့်ရေးစင်တာ ၃ ခုရှိပြီး နေမကောင်းသူများနှင့် ဒဏ်ရာရရှိသူများကို အနီးဆုံးရှိ ဆေးရုံများသို့ အရေးပေါ် ပို့ဆောင်ရေးအတွက် လူနာတင်ယာဉ်အုပ်စု ၂၅ စု ရှိနေသည်။

ဟဂ်ျဘုရားဖူး ခရီးသည်များအတွက် ကျန်းမာရေးစောင့်ရှောက်မှုများကို အစိုးရ ကျန်းမာရေးဝန်ထမ်းများနှင့်အတူ ဆော်ဒီ လခြမ်းနီအဖွဲ့၊ လူမှုကာကွယ်ရေးအဖွဲ့များက ပူးပေါင်း ဆောင်ရွက်သွားမည်ဖြစ်သည်။

Ref: Arabnews

August 25, 2015