Blog

ဇူလိုင် ၁၉၊ ၂၀၂၄
M-Media

-ဇူလိုင်လ ၁၉ ရက်နေ့ မနက်ပိုင်းက ကမ္ဘာတစ်၀ှမ်း ကွန်ပျူတာတွေမှာ အသုံးပြုနေတဲ့ Windows စနစ်မှာ အမှားအယွင်းတစ်ခု ဖြစ်ခဲ့တာကြောင့် ကွန်ပျူတာစနစ်ကြီးတစ်ခုလုံး ရပ်ဆိုင်းသွားခဲ့ပါတယ်။

ဒီလိုရပ်ဆိုင်းမှုကြောင့် ကွန်ပျူတာစနစ်နဲ့ ချိတ်ဆက်ဆောင်ရွက်နေတဲ့ လေကြောင်းလိုင်းတွေ၊ ဘဏ်လုပ်ငန်းတွေ၊ အရေးပေါ် တုန့်ပြန်မှုစနစ်တွေ၊ စီးပွားရေးလုပ်ငန်းတွေ၊ ကွန်ပြူတာ၊ ဖုန်းဆော့ဖ်၀ဲတွေ အားလုံး အလုပ်မလုပ်တော့ဘဲ ကမ္ဘာ့ယန္တရားကြီးတစ်ခုလုံး ကမောက်ကမ ဖြစ်ခဲ့ပါတယ်။

ဒီလို ဆုံးရှုံးမှု ကြီးမားခဲ့တဲ့ ပြဿနာကို စတင်ခဲ့သူက အမေရိကန် အိုင်တီကုမ္ပဏီတစ်ခုဖြစ်တဲ့ CrowdStrike ပါ။ Windows စနစ်ကို ထုတ်လုပ်ရောင်းချတဲ့ မိုက်ခရိုဆော့ဖ် ကုမ္ပဏီအပါအ၀င် နိုင်ငံတကာ နည်းပညာကုမ္ပဏီ တော်တော်များများကို ဆိုက်ဘာလုံခြုံရေး ၀န်ဆောင်မှုပေးနေတဲ့ လုပ်ငန်းတစ်ခုဖြစ်ပါတယ်။

CrowdStrike က ထုတ်လုပ်တဲ့ ကွန်ပျူတာဗိုင်းရပ်စ် တိုက်ဖျက်ရေး ဆော့ဖ်၀ဲကို ဇူလိုင်လ ၁၉ ရက်နေ့ မနက်ပိုင်းက Update လုပ်ရာမှာ ဖိုင်တစ်ခု မှားယွင်းသွားတဲ့အတွက် ဒီဆော့ဖ်၀ဲကို အသုံးပြုတဲ့ Windows စနစ်ကိုပါ ထိခိုက်ခဲ့ပြီး ကမ္ဘာတစ်၀ှမ်းက ကွန်ပျူတာစနစ်တွေ ရပ်ဆိုင်းသွားခဲ့ပါတယ်။

CrowdStrike စီအီးအို ဂျော့ဂျ်ကာ့ဇ်က ဒီပြဿနာဟာ ဆိုက်ဘာတိုက်ခိုက်ခံရမှုကြောင့် ဖြစ်တာမဟုတ်ဘဲ သူတို့ဖက်က အမှားအယွင်းသာဖြစ်တယ်လို့ ထုတ်ပြန်ပြောကြားခဲ့ပါတယ်။ တစ်ကမ္ဘာလုံး ဒုက္ခရောက်ခဲ့ကြအတွက် တောင်းပန်တယ်လို့လည်း ကာ့ဇ်က ပြောပါတယ်။

လက်ရှိမှာ ဒီအမှားအယွင်းကို အင်ဂျင်နီယာတွေက Update ပေးကာ ပြုပြင်နေပြီး တစ်ချို့နေရာတွေမှာ Windows စနစ် ပြန်လည်အသုံးပြုလို့ ရနေပြီလို့ CrowdStrike က ထုတ်ပြန်ထားပါတယ်။

Ref: CNN