ဇွန် ၂၊ ၂၀၁၅
M-Media
– အီဂျစ်သမ္မဟောင်း မိုဟာမက်မော်စီအပေါ် သတ်မှတ်ထားသည့် သေဒဏ်နှင့်ပတ်သက်၍ အမိန့်ချမှတ်မှုကို ကိုင်ရိုတရားရုံးက ယနေ့တွင် ရွှေ့ဆိုင်းခဲ့သည်ဟု သိရသည်။
အီဂျစ်နိုင်ငံသမိုင်းတွင် ပထမဆုံး လူထုဆန္ဒဖြင့် သမ္မတဖြစ်ခဲ့သည့် သမ္မတမော်စီမှာ စစ်တပ်၏ ဖြုတ်ချခြင်းကို ခံခဲ့ရပြီး ထောင်သွင်းအကျဉ်းချခြင်း ခံခဲ့ရသည်။ ထို့ပြင် ၂၀၁၁ ခုနှစ် မတည်မငြိမ်ဖြစ်မှုအတွင်း ထောင်ဖောက်မှု၌ တာဝန်ရှိသည်ဟုဆိုကာ မေလ ၁၇ ရက်နေ့က သေဒဏ်ချမှတ်ခြင်း ခံခဲ့ရသည်။
အဆိုပါသေဒဏ်ကို လူ့အခွင့်အရေးအဖွဲ့များနှင့် ကမ္ဘာ့ခေါင်းဆောင်များက ရှုတ်ချခဲ့ကြသည်။ မော်စီအပါအ၀င် သေဒဏ်ချမှတ်ခံခဲ့ရသော လူ ၁၀၀ ကျော်အတွက် သေဒဏ်အား အတည်ပြုရေး နိုင်ငံ၏ အမြင့်ဆုံး ဘာသာရေးတာဝန်ရှိသူဖြစ်သော မွဖ်သီကြီးသို့ လွှဲပြောင်းပေးအပ်ရန် တရားရုံးက အမိန့်ချမှတ်ခဲ့သည်။
ထိုအတည်ပြုချက်နှင့်ပတ်သက်၍ ယနေ့တွင် ကြားနာကာ အမိန့်ချရန် စီစဉ်ခဲ့သော်လည်း ရွှေ့ဆိုင်းခဲ့ပြီး ဇွန်လ ၁၆ ရက်နေ့မှ ပြန်လည်အမိန့်ချရန် တရားရုံးက သတ်မှတ်ခဲ့သည်။
ယနေ့တရားခွင်သို့ မော်စီဝင်ရောက်လာသည့်အချိန်တွင် ၎င်းနှင့်အတူ တရားစွဲဆိုခံရသူများက “စစ်တပ်ကိုဖြုတ်ချပစ်၊ စစ်တပ်ကိုဖြုတ်ချပစ်” ဟူ၍ ကြွေးကြောခဲ့ကြသည်။
Ref: Aljazeera
