မေ ၂၈၊ ၂၀၁၅
M-Media
– နိုင်ငံမြောက်ပိုင်း တောထဲတွင် လူကုန်ကူးစခန်းများကို တွေ့ရှိခဲ့ပြီးနောက် လူကုန်ကူးမှုအတွင်း ပါဝင်ပတ်သက်သည့် ရဲအရာရှိ ၂ ဦးကို ဖမ်းဆီးလိုက်ပြီး ကြံရာပါ ၀န်ထမ်းများအတွက် ဆက်လက်စုံစမ်းမှုများ ပြုလုပ်နေသည်ဟု မလေးရှားအာဏာပိုင်များက ယနေ့တွင်
ပြောကြားလိုက်သည်။
ပြီးခဲ့သည့် သီတင်းပတ်က ထိုင်းနယ်စပ်ရှိ တောထဲတွင် လူကုန်ကူးစခန်း ၂၈ ခုကို မလေးရှား အာဏာပိုင်များက တွေ့ရှိခဲ့ပြီး သေဆုံးသူများ မြှုပ်နှံထားမှုများကိုလည်း တွေ့ရှိခဲ့သည်။ ထို့ကြောင့် တူးဖော်မှုများ ပြုလုပ်ခဲ့ရာ အလောင်း ၁၃၉ လောင်းကို ရရှိခဲ့ပြီး ကျင်းတစ်ကျင်းတွင် လူတစ်ဦးသာ မြှုပ်နှံထားကာ အစုလိုက်အပြုံလိုက် မြှုပ်နှံထားခြင်းမရှိဟု ဆိုသည်။
“မြန်မာနိုင်ငံကလူတွေကို ပို့ဆောင်မှုမှာ ပါဝင်တယ်လို့ သံသယရှိတဲ့ ရဲအရာရှိ ၂ ဦးကို ဖမ်းလိုက်ပါတယ်” ဟု လူကုန်းစခန်းများအနီးရှိ နယ်စပ်မြို့ ၀မ်ကီလီယန်၌ ယနေ့တွင်ပြုလုပ်သည့် သတင်းစာရှင်းလင်းပွဲတွင် မလေးရှား ဒုတိယပြည်ထဲရေးဝန်ကြီး ၀မ် ဂျူနိုက်ဒီ တူအန်ကူ ဂျာဖာရ်က ပြောကြားခဲ့သည်။
သို့သော်လည်း ရဲတပ်ဖွဲ့ဝင်များ ပိုမိုပါဝင်နေလားဆိုသည့် အမေးအတွက် မှတ်ချက်ပေးရန် ငြင်းဆိုခဲ့ပြီး ထိုကိစ္စနှင့်ပတ်သက်၍ မည်သူ့ကိုမဆို စုံစမ်းစစ်ဆေးသွားမည်ဟု ပြောကြားခဲ့သည်။ ထို့ပြင် ပြောင်းရွှေ့လာသူများအား နိုင်ငံအတွင်းသို့ ၀င်ရောက်ရန် ကူညီမှုအတွက် မလေးရှာတွင် ရှိနေပြီးဖြစ်သည့် ရိုဟင်ဂျာအများအပြားကိုလည်း ဖမ်းဆီးထားသည်ဟု ဆိုသည်။
အဆိုပါ လူကုန်ကူးစခန်းများကို တွေ့ရှိခဲ့ရပြီးနောက် မလေးရှားအာဏာပိုင်များမှာ ဝေဖန်မှုနှင့် ရင်ဆိုင်ခဲ့ရပြီး အဆိုပါ စခန်းများကို စောစောစီးစီး အဘယ့်ကြောင့် မတွေ့ခဲ့သနည်းဆိုသည်နှင့် ရဲတပ်ဖွဲ့ဝင်များ ပူးပေါင်းကြံစည်မှု ရှိနေသလားဆိုသည့် မေးခွန်းများလည်း ထွက်ပေါ်လာခဲ့သည်။
ဝမ်ကီလီယန်တွင် နေထိုင်သူများက ရွှေ့ပြောင်းလာသူများ တောထဲမှ ထွက်လာခြင်းမှာ လွန်ခဲ့သည့် ၂ နှစ်ခန့်ကတည်းက ဖြစ်ပွားနေခြင်းဖြစ်သည်ဟု ပြောကြားခဲ့သည်။
Ref: Guardian
