News @ M-Media

Blog

  • နေရပ်မြန်မာနိုင်ငံကို ပြန်သည့်အချိန်အထိ ရိုဟင်ဂျာဒုက္ခသည်များကို တူရကီ ကူညီမည်

    နေရပ်မြန်မာနိုင်ငံကို ပြန်သည့်အချိန်အထိ ရိုဟင်ဂျာဒုက္ခသည်များကို တူရကီ ကူညီမည်

    နိုဝင်ဘာ ၁၄၊ ၂၀၂၁
    M-Media

    -ဘင်္ဂလားဒေ့ရှ်က ရိုဟင်ဂျာဒုက္ခသည်တွေ နေရပ် မြန်မာနိုင်ငံကို ပြန်နိုင်တဲ့အချိန်အထိ လူသားချင်း စာနာထောက်ထားမှုဆိုင်ရာ အကူအညီတွေ တူရကီက ပေးသွားမယ်လို့ ဘင်္ဂလားဒေ့ရှ်ဆိုင်ရာ တူရကီသံအမတ် မွတ်စ်တာဖာ အိုစမန် သူရန်က ပြောကြားလိုက်ပါတယ်။

    သူရန်ဟာ ဘင်္ဂလားဒေ့ရှ်နိုင်ငံတောင်ပိုင်း ကော့ဆက်ဘဇားဒေသက ရိုဟင်ဂျာဒုက္ခသည်စခန်းကို ဒီကနေ့စတင်ကာ ၂ ရက်ကြာ သွားရောက်ပြီး တူရကီအစိုးရနဲ့ ပြင်ပ အကူအညီပေးရေးအဖွဲ့တွေရဲ့ လုပ်ဆောင်မှုတွေကို ကြည့်ရှုမှာ ဖြစ်ပါတယ်။

    မြန်မာ့စစ်တပ်ရဲ့ ခေတ်အဆက်ဆက် ဖိနှိပ်အကြမ်းဖက်မှုကြောင့် ရခိုင်ပြည်နယ်က ရိုဟင်ဂျာတွေဟာ ဘင်္ဂလားဒေ့ရှ်ဖက် ထွက်ပြေးလာရပြီး လက်ရှိမှာ ၁.၂ သန်းလောက် ဒုက္ခသည်အဖြစ် ခိုလှုံနေရပါတယ်။ ၂၀၁၇ ခုနှစ် မြန်မာစစ်တပ်ရဲ့ အကြမ်းဖက်သတ်ဖြတ်မှုတွေကြောင့် ကမ္ဘာကြီးဟာ ရိုဟင်ဂျာတွေအပေါ် ပိုမို အာရုံစိုက်လာကြပါတယ်။

    ရိုဟင်ဂျာတွေ ဒုက္ခစရောက်တည်းက တူရကီနိုင်ငံဟာ အကူအညီတွေပေးခဲ့ပြီး ရိုဟင်ဂျာတွေ ငြိမ်းငြိမ်းချမ်းချမ်းနဲ့ သိက္ခာရှိရှိ နေရပ် မြန်မာနိုင်ငံကို ပြန်နိုင်ရေး ကုလသမဂ္ဂ၊ သက်ဆိုင်ရာအဖွဲ့အစည်းတွေနဲ့ ပူးပေါင်းဆောင်ရွက်နေတယ်လို့ ဒုက္ခသည်စခန်းကို ရောက်လာတဲ့ သူရန်က ပြောကြားခဲ့ပါတယ်။

    တူရကီအခြေစိုက် အကူအညီပေးရေးအဖွဲ့တွေဖြစ်တဲ့ တူရကီ ပူးပေါင်းဆောင်ရွက်ရေးအဖွဲ့ (TIKA)၊ သဘာ၀ဘေးစီမံခန့်ခွဲရေး အာဏာပိုင်အဖွဲ့ (AFAD), Diyanet ဖောင်ဒေးရှင်း၊ တူရကီလခြမ်းနီအဖွဲ့တို့ဟာ ရိုဟင်ဂျာဒုက္ခသည်စခန်းမှာ ပညာရေး၊ စားဝတ်နေရေး၊ ကျန်းမာရေး၊ အသက်မွေးဝမ်းကြောင်းပညာ စသဖြင့် နယ်ပယ်စုံ ကူညီပေးနေတာ ဖြစ်ပါတယ်။

    တူရကီဟာ ရိုဟင်ဂျာ ဒုက္ခသည်စခန်းမှာ ဆေးရုံတစ်ခုကိုလည်း ဇွန်လ ၁ ရက်နေ့က စတင်ဖွင့်လှစ်ခဲ့ပါတယ်။ အဆင့်မြင့် ကုသရေးပစ္စည်းတွေ တပ်ဆင်ထားတဲ့ အဲဒီဆေးရုံမှာ တစ်ပြိုင်နက်တည်း လူပေါင်း ၃၀ တက်ရောက်နိုင်ပြီး၊ အရေးပေါ်အခြေအနေတွေမှာ လူ ၅၀ အထိ ကုသပေးနိုင်မှာဖြစ်ပါတယ်။

    စတင်ဖွင့်လှစ်ပြီးခဲ့ကတည်းက အဲဒီဒီဆေးရုံမှာ ရိုဟင်ဂျာ ၂ သောင်းလောက်ကို ကုသပေးနိုင်ခဲ့ပြီး နေ့စဉ် လူနာတွေကို လက်ခံ ကုသပေးနေပါတယ်။

    Ref : Anadolu Agency

  • စစ်ကောင်စီက မီဒီယာအပေါ် ဖိနှိပ်မှုကို ကုလ လူ့အခွင့်အရေးအကြီးအကဲ ဝေဖန်

    စစ်ကောင်စီက မီဒီယာအပေါ် ဖိနှိပ်မှုကို ကုလ လူ့အခွင့်အရေးအကြီးအကဲ ဝေဖန်

    နိုဝင်ဘာ ၁၃၊ ၂၀၂၁
    M-Media

    -အမေရိကန် ဂျာနယ်လစ်ကို နှစ်ရှည်ထောင်ဒဏ်ချလိုက်တာဟာ စစ်ကောင်စီက မြန်မာနိုင်ငံမှာ မီဒီယာလွတ်လပ်ခွင့် ဖိနှိပ်နေမှုရဲ့ ပြယုဂ်တစ်ခုဖြစ်တယ်လို့ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး မီရှယ် ဘာချလက်က ပြောပါတယ်။

    Frontier Myanmar သတင်းဌာနရဲ့ အယ်ဒီတာ အမေရိကန်နိုင်ငံသား ဒန်နီဖန်စတာကို စစ်ကောင်စီက လူဝင်မှုကြီးကြပ်ရေး ဥပဒေ၊ တရားမဝင်အသင်းအဖွဲ့ ဆက်သွယ်မှုဥပဒေတွေနဲ့ မနေ့က ထောင်ဒဏ် ၁၁ နှစ် ချလိုက်ပါတယ်။ ဖန်စတာဟာ အကြမ်းဖက်မှု၊ နိုင်ငံတော်အကြည်ညိုပျက်စေမှု ပုဒ်မတွေနဲ့ ထပ်မံ တရားရင်ဆိုင်ရအုံးမှာပါ။

    ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း စစ်ကောင်စီဟာ မီဒီယာလွတ်လပ်ခွင့်ကို အကြီးအကျယ် ချိုးဖောက်ခဲ့ပြီး လွတ်လပ်တဲ့ သတင်းဌာနတွေကို ပိတ်သိမ်းတာ၊ ရာနဲ့ချီတဲ့ မီဒီယာသမားတွေ၊ သတင်းထောက်တွေကို ဖမ်းဆီးနှိပ်စက်တာတွေ လုပ်ဆောင်နေပါတယ်။

    ကုလသမဂ္ဂ လူ့အခွင့်အရေးအကြီးအကဲ ဘာချလက်က ဖက်ဆီးထားတဲ့ ဂျာနယ်လစ်တွေကို ချက်ခြင်း ပြန်လွှတ်ပေးဖို့ မနေ့က တောင်းဆိုခဲ့ပါတယ်။

    “ဖေ​ဖော်ဝါရီ ၁ ရက်နေ့ကတည်းက စတင်ပြီး ဂျာနယ်လစ်တွေ တိုက်ခိုက်ခံရတယ်။ မြန်မာနိုင်ငံတစ်ဝှမ်း ဖြစ်ပွားနေတဲ့ လူ့အခွင့်အရေး ချိုးဖောက်မှုတွေ၊ စစ်အာဏာရှင် တွန်းလှန်မှုတွေ ဖော်ထုတ်တင်ပြဖို့ ဂျာနယ်လစ်တွေရဲ့ ကြိုးပမ်းမှုကို စစ်ခေါင်းဆောင်တွေဟာ ပေါ်ပေါ်ထင်ထင်ပဲ ဖိနှိပ်လာပါတယ်။ အရင် စစ်အာဏာရှင်တွေလက်ထက်က မြင်ခဲ့ရတဲ့ သတင်းထိန်းချုပ်မှု၊ ဆင်ဆာဖြတ်မှုနဲ့ ဝါဒဖြန့်မှု ပုံစံကိုအလျင်အမြန်ပဲ ပြန်ရောက်သွားပါတယ်”

    စစ်ကောင်စီက အခုအချိန်အထိ ဖမ်းဆီးထားတဲ့ ဂျာနယ်လစ်ပေါင်း ၄၇ ဦးရှိပြီး၊ ၂၀ က ရာဇဝတ်မှုတွေနဲ့ တရားစွဲဆိုခံထားရပါတယ်။

    ဖန်စတာကို တံခါးပိတ် ကြားနာစစ်ဆေးတာမျိုးဟာ မျှတတဲ့ တရားစီရင်မှု မဟုတ်သလို၊ မီဒီယာဖိနှိပ်မှုကြောင့် လွတ်လပ်ပြီး တိကျတဲ့ သတင်းအချက်အလက်ပေါ် မှီခိုနေရတဲ့ လူ့အဖွဲ့အစည်းမှာ မလုံခြုံမှု တိုးလာစေတယ်လို့လည်း ဘာချလက်က ထည့်သွင်းပြောဆိုခဲ့ပါတယ်။

    “ဂျာနယ်လစ်တွေကို ဖိနှိပ်ညှင်းပမ်းတာ၊ အင်တာနက်ပိတ်တာ၊ လွတ်လပ်စွာ အွန်လိုင်းသုံးစွဲမှုနဲ့ အချက်အလက်ရယူနိုင်မှုကို ကန့်သတ်တာတွေကြောင့် အသက်ရှင်သန်ဖို့အတွက် လိုအပ်တဲ့ သတင်းအချက်အလက်တွေကို ပြည်သူတွေ ရရှိဖို့ ခက်ခဲလာပါတယ် ”

    Ref: Reuters

  • တရုတ်တိုင်းရင်းဆေးကြောင့် အာဖရိက ရှားပါးတိရစ္ဆာန်များ မျိုးတုန်းမည့် အန္တရာယ်ရှိလာ

    တရုတ်တိုင်းရင်းဆေးကြောင့် အာဖရိက ရှားပါးတိရစ္ဆာန်များ မျိုးတုန်းမည့် အန္တရာယ်ရှိလာ

    နိုဝင်ဘာ ၁၃၊ ၂၀၂၁
    M-Media

    -အာဖရိကတိုက်မှာ တရုတ်က သူတို့ရဲ့ တိုင်းရင်းဆေးဝါးကို မိတ်ဆက်မြှင့်တင်မှု နောက်ဆက်တွဲအဖြစ် တရားမဝင် သားရိုင်းတိရစ္ဆာန် ကုန်ကူးမှု မြင့်တက်လာပြီး ရှားပါးတိရစ္ဆာန်တွေ မျိုးတုန်းမယ့် အန္တရာယ်နဲ့ ရင်ဆိုင်လာရပါတယ်။

    တရုတ်ဟာ ခါးပတ်တစ်ကွင်း လမ်းတစ်စင်း ဖွံ့ဖြိုးရေး စီမံကိန်း (Belt and Road) နဲ့အတူ အာဖရိကတိုက်မှာ တရုတ်တိုင်းရင်းဆေးကိုပါ မိတ်ဆက်တင်သွင်းလာတာ ဖြစ်ပါတယ်။ တရုတ်တိုင်းရင်းဆေး အများစုဟာ အပင်တွေကို အခြေခံပေမယ့် တစ်ချို့ဆေးတွေက သင်းခွေချပ်နဲ့ ကြံ့လို ရှားပါးတိရစ္ဆာန်တွေနဲ့ ဖော်စပ်ရတာပါ။

    လန်ဒန်အခြေစိုက် သဘာ၀ပတ်ဝန်းကျင်နဲ့ သားရိုင်တိရစ္ဆာန် ရာဇဝတ်မှု စောင့်ကြည့်အဖွဲ့ EIA ရဲ့ ဗုဒ္ဓဟူးနေ့က ထုတ်ပြန်တဲ့ အစီရင်ခံစာမှာ အာဖရိကနိုင်ငံတွေအတွင်း တရုတ်တိုင်းရင်းဆေး ကျယ်ပြန့်လာတာ၊ အဲဒီတိုင်းရင်းဆေးမှာ အသုံးပြုတဲ့ ပစ္စည်းတွေ ရနိုင်တဲ့ရင်းမြစ်အဖြစ် ရှုမြင်ခံလာရတာကြောင့် ကျားသစ်၊ သင်းခွေချပ်နဲ့ ကြံ့တို့လို ရှားပါး တိရစ္ဆာန်တွေအတွက် ဘေးအန္တရာယ်ဖြစ်လာတာကို တွေ့ရတယ်လို့ ဖော်ပြထားပါတယ်။

    “တရုတ်တိုင်းရင်းဆေး အထိန်းအကွပ်မရှိ ကျယ်ပြန့်လာတာဟာ အာဖရိကတိုင်းပြည် တော်တော်များများမှာ တွေ့ရတဲ့ ဇီ၀ညီညွတ်မှုအတွက် ဆိုးရွားတဲ့ ခြိမ်းခြောက်မှု ဖြစ်​စေတာကတော့ အသေအချာပါပဲ။ ရှားပါး တိရစ္ဆာန်တွေကို တရုတ်တိုင်းရင်းဆေးမှာ အသုံးပြုမှုကြောင့် ဒီတိရစ္ဆာန်တွေရဲ့ ဝယ်လိုအား တက်လာတာ၊ သားရိုင်းတိရစ္ဆာန်တွေနဲ့ပတ်သက်တဲ့ ရာဇဝတ်မှုတွေကို တွန်းအားပေးတာကနေ အမြတ်ထုတ်တဲ့အထိ ဖြစ်လာစေနိုင်ပါတယ်”

    ကိုဗစ်ကပ်ရောဂါ တွန်းလှန်ရေး တရုတ်က ဆောင်ရွက်မှုနဲ့အတူ အာဖရိကမှာ ​တရုတ်တိုင်းရင်းဆေး ကုမ္ပဏီတွေ၊ ဆေးခန်းတွေဟာ အရင်တုန်းက မရှိခဲ့ဘူးတဲ့ အနေအထားမျိုးအထိရောက်အောင် များပြားလာကြောင်း၊ တစ်ချို့ ကုမ္ပဏီတွေဟာ ကုန်ကြမ်းရှာတာကနေ၊ ကုန်ချောထုတ်ရောင်းတဲ့အထိ လုပ်ငန်းအားလုံး တစ်ဦးတည်း လုပ်ဆောင်နိုင်အောင် ဆောင်ရွက်လာကြကြောင်း အစီရင်ခံစာမှာ ဖော်ပြထားပါတယ်။

    တရုတ်တိုင်းရင်းဆေးလုပ်ငန်းကို ကြပ်ကြပ်မတ်မတ်စောင့်ကြည့်ဖို့ ဒီလုပ်ငန်းကြောင့် ရှားပါးတိရစ္ဆာန် မျိုးတုန်းတာတွေမဖြစ်အောင် ဥပဒေ၊ စည်းမျဉ်းစည်းကမ်းတွေနဲ့ တားဆီးဖို့လည်း အာဖရိက နိုင်ငံတွေကို EIA က တိုက်တွန်းခဲ့ပါတယ်။

    တိုင်းရင်းဆေးတွေမှာ ရှားပါးတိရစ္ဆာန်ထွက် ပစ္စည်းတွေ အသုံးပြုတာကို တရုတ်အစိုးရက တားမြစ်ထားပေမယ့် ကာမအားတိုးဆေး၊ ကင်ဆာကုဆေးကနေ အရေပြားရောဂါ ပျောက်ဆေးအထိ တရုတ်တိုင်းရင်းဆေးတွေမှာ သားရိုင်းတိရစ္ဆာန်ထွက်ပစ္စည်းတွေကို ဆက်လက် အသုံးပြုနေဆဲဖြစ်ပါတယ်။

    တရုတ်တိုင်းရင်းဆေးဝါး ထွန်းကားရေး ဆောင်ရွက်ဖို့ တောင်အာဖရိက၊ ကင်မရွန်း၊ တန်ဇန်းနီးယားနဲ့ တိုဂိုတို့ အပါအဝင် အာဖရိကနိုင်ငံတစ်ချို့က တရုတ်နဲ့ လက်မှတ်ရေးထိုးထားပြီး၊ တောင်အာဖရိကနဲ့ နမီးဘီးယားတို့က တရုတ်တိုင်းရင်းဆေးကို အစိုးရ ကျန်းမာရေးစနစ်မှာ ထည့်သွင်းအသုံးပြုနေပါတယ်။

    တရုတ်ဟာ အမေရိကန်ကိုကျော်ပြီး ၂၀၀၉ ခုနှစ်ကတည်း အာဖရိကရဲ့ အကြီးဆုံး ကုန်သွယ်ဖက်နိုင်ငံ ဖြစ်လာတာ ဖြစ်ပါတယ်။

    Ref: Aljazeera

  • ကျွမ်းကျင် နိုင်ငံခြားသားများကို ဆော်ဒီအာရေဗျက နိုင်ငံသားပေးမည်

    ကျွမ်းကျင် နိုင်ငံခြားသားများကို ဆော်ဒီအာရေဗျက နိုင်ငံသားပေးမည်

    နိုဝင်ဘာ ၁၃၊ ၂၀၂၁
    M-Media

    ဆော်ဒီဘုရင် ဆလ်မန်

    -ပညာရပ်ပိုင်းဆိုင်ရာမှာ ကျွမ်းကျင်တဲ့ နိုင်ငံခြားသားတွေကို နိုင်ငံသားပေးမယ့် အမိန့်တစ်ခုကို ဆော်ဒီဘုရင် ဆလ်မန်က ကြာသာပတေးနေ့မှာ ထုတ်ပြန်လိုက်ပါတယ်။

    ဆော်ဒီအစိုးရရဲ့ ‘၂၀၃၀ ရည်မှန်းချက်’ (Vision 2030) အရ နိုင်ငံတကာ ပရော်ဖက်ရှင်နယ်တွေ မျက်စိကျစေမယ့် စီးပွားရေး နယ်ပယ်တစ်ခု ဖန်တီးရေး စီမံချက်ကို အကောင်အထည်ဖော်ဖို့ ဒီဥပဒေကို ပြဌာန်းလိုက်တာပါ။ ကျွမ်းကျင်နိုင်ငံခြားသားတွေကို နိုင်ငံသားပေးဖို့ စီစဉ်နေတာကို ဆော်ဒီက ၂၀၁၉ ခုနှစ်ကတည်းက ထုတ်ပြန်ထားပါတယ်။

    ဥပဒေ၊ ဆေးဘက်ဆိုင်ရာ၊ သိပ္ပံနယ်ပယ်၊ ယဉ်ကျေးမှု၊ အနုပညာ၊ အားကစား၊ နည်းပညာ၊ မှုခင်းဗေဒ၊ စိုက်ပျိုးရေး၊ နျူကလီးယားနဲ့ ပြည့်ဖြိုးမြဲစွမ်းအင်၊ ရေနံနဲ့ သဘာ၀ဓာတ်ငွေ့၊ ဉာဏ်ရည်တုနည်းပညာ စတဲ့ကဏ္ဍတွေမှာ ကျွမ်းကျင်သူ နိုင်ငံခြားသား ပညာရှင်တွေဟာ ဆော်ဒီနိုင်ငံသား လျှောက်လို့ရမှာ ဖြစ်ပါတယ်။

    ​ဘုရင် ဆလ်မန်နဲ့ အိမ်ရှေ့မင်းသား မိုဟာမက်ဘင် ဆလ်မန်တို့ ဦးဆောင်တဲ့ ဆော်ဒီအစိုးရဟာ တိုင်းပြည်စီးပွားရေး ရေနံအပေါ် မှီခိုနေရမှုကို လျှော့ချနိုင်ရေး ဘက်စုံ စီးပွားရေး ဖွံ့ဖြိုးတိုးတက်ဖို့အတွက် လုပ်ဆောင်နေတာ ဖြစ်ပါတယ်။

    ကမ္ဘာတစ်ဝှမ်းက သိပ္ပံပညာရှင်၊ တတ်သိပညာရှင်၊ တီထွင်စွန့်စားသူတွေကို ဆွဲဆောင်နိုင်တဲ့ အာရပ်ကမ္ဘာက ဂုဏ်ယူဖွယ်ရာ အချက်အခြာနိုင်ငံတစ်ခု ဖြစ်လာရေး ဆော်ဒီအာရေဗျက ရည်မှန်းထားတယ်လို့ ဒီအမိန့် ထွက်လာပြီးနောက်ပိုင်း ဆော်ဒီအစိုးရ အဖွဲ့အစည်းတစ်ခုဖြစ်တဲ့ Saudi Project က သူတို့ရဲ့ Twitter စာမျက်နှာမှာ ရေးသားထားပါတယ်။

    နိုင်ငံအတွင်းမှာ လက်ရှိ ရှိနေတဲ့ နိုင်ငံခြားသားတွေ၊ နိုင်ငံခြားက မျိုးနွယ်စုတွေလည်း ပညာရပ်ပိုင်းဆိုင်ရာ ကျွမ်းကျင်မှုရှိရင် နိုင်ငံသား လျှောက်ထားနိုင်တယ်လို့ ဆော်ဒီအစိုးရက ပြောပါတယ်။

    Ref: Arab News

  • ယူအေအီးနိုင်ငံ အဘူဒါဘီမြို့မှ ဟိန္ဒူဘုရားကျောင်း ဌာပနာတည်ပွဲကို စည်ကားသိုက်မြိုက်စွာ ကျင်းပ

    ယူအေအီးနိုင်ငံ အဘူဒါဘီမြို့မှ ဟိန္ဒူဘုရားကျောင်း ဌာပနာတည်ပွဲကို စည်ကားသိုက်မြိုက်စွာ ကျင်းပ

    နိုဝင်ဘာ ၁၂၊ ၂၀၂၁
    M-Media

    -အာရပ်စော်ဘွားများပြည်ထောင်စု (ယူအေအီး) နိုင်ငံ မြို့တော် အဘူဒါဘီက ပထမဆုံး ဟိန္ဒူဘုရားကျောင်းအတွက် ဌာပနာတည်ပွဲ အခမ်းအနားကို အခုတစ်ပတ်အစောပိုင်းက စတင်ပြီး ကျင်းပနေပါတယ်။

    Pratham Shila Sthaapan Saptah လို့ အမည်ရတဲ့ အဲဒီ ဌာပနာတည်ပွဲကို နိုဝင်ဘာ ၉ ရက်နေ့က ၁၆ ရက်နေ့အထိ တစ်ပတ်တာ ကျင်းပသွားမှာ ဖြစ်ပါတယ်။

    အင်္ဂါနေ့က ဘုရားကျောင်း အုတ်မြစ်မှာ ဌာပနာမြှုပ်နှံပွဲအခမ်းအနားကို ကျောင်းထိုင်မယ့် ဟိန္ဒူဘုန်းကြီး Pujya Brahmvihari Swami၊ အခြားဟိန္ဒူဘုန်းတော်ကြီးတွေ၊ ယူအေအီးအစိုးရ တာဝန်ရှိသူတွေ၊ ဟိန္ဒူဘာသာဝင်တွေ စုစုပေါင်း ၃၀၀ ကျော် တက်ရောက်ခဲ့ကြပါတယ်။

    “ဒီဘုရားကျောင်းနဲ့ပတ်သက်ပြီး ၂၀၁၈ ခုနှစ်က စတင်ကာ တိုးတက်မှုတွေကို ဘုန်းကြီးတို့ မြင်ခဲ့ရတယ်။ သမိုင်းဝင်မယ့်၊ အမှတ်တရဖြစ်စေမယ့် အခမ်းအနားတွေ အများကြီးကိုလည်း ဆင်နွှဲနိုင်ခဲ့ပါတယ်။ အခုအခမ်းအနားကတော့ ဘုရားကျောင်း တည်ထားကိုးကွယ်ရေးမှာ အလွန်အရေးပါတဲ့ သမိုင်းမှတ်တိုင်တစ်ခု ဖြစ်လာမှာပါ။ ကြီးကျယ်ခမ်းနားတဲ့ ဘုရားကျောင်းကြီး အသက်ဝင်လာမယ့် ပထမဆုံး ပုံရိပ်ကို မြင်ရတာလည်း ဖြစ်ပါတယ်” လို့ ကျောင်းထိုင်မယ့် ဟိန္ဒူဘုန်းကြီး Pujya Brahmvihari Swami က အခမ်းအနားမှာ မိန့်ကြားခဲ့ပါတယ်။

    BAPS Hindu Mandir လို့ အမည်ရမယ့် အဲဒီဘုရားကျောင်းကို အိန္ဒိယကနေ ပေးပို့လိုက်တဲ့ ကျောက်ဆိုင်၊ ကျောက်သားကြီးတွေကို ပေါင်းစပ်ကာ တည်ဆောက်မှာဖြစ်ပါတယ်။ အဲဒီ ကျောက်ဆိုင်ကျောက်သားကြီးတွေမှာ ဟိန္ဒူနတ်ဘုရားတွေရဲ့ ပုံတော်တွေ၊ ဖြစ်တော်စဉ်တွေကို ပန်းချီ၊ ပန်းပု ပညာရှင်ပေါင်း ၂၀၀၀ ကျော်က လက်ရာမြောက်စွာ ထွင်းထုပူဇော်ထားပါတယ်။

    ဒီကျောက်ဆိုင်ကျောက်သားကြီးတွေကို ပေါင်းစပ်ကာ ဘုရားကျောင်းတည်ဆောက်ဖို့အတွက် အိန္ဒိယနိုင်ငံက ပညာရှင် ၁၇ ဦးလည်း ယူအေအီးကို ရောက်နေပါတယ်။ ဘုရားကျောင်းမှာ စတီး၊ သံ စတာတွေကို လုံး၀သုံးမှာမဟုတ်ဘဲ ဟိန္ဒူရှေးဟောင်း ဗိသုကာလက်ရာအတိုင်း ကျောက်သားစစ်စစ်ကိုသာ အသုံးပြုမှာ ဖြစ်ပါတယ်။ အရှေ့အလယ်ပိုင်းက ကျောက်သားစစ်စစ်နဲ့ တည်ဆောက်တဲ့ ပထမဆုံး ဟိန္ဒူဘုရား​ကျောင်းအဖြစ် မှတ်တမ်းဝင်မှာပါ။

    ဘုရားကျောင်းမှာ ကျောက်တုံးရဲ့ အနေအထား၊ ဖိအား၊ အပူချိန်၊ ငလျင်ဒဏ်ခံနိုင်မှု စတဲ့ အခြေအနေ​တွေကို စောင့်ကြည့်နိုင်မယ့် နည်းပညာမြင့် ဆင်ဆာပေါင်း ၃၀၀ လောက် တပ်ဆင်ထားမှာ ဖြစ်ပါတယ်။ ဒီဆင်ဆာတွေဟာ နောက်ထပ် နှစ်ပေါင်း ၅၀ လောက်အတွက် စောင့်ကြည့်နိုင်မှာပါ။

    BAPS Hindu Mandir ဘုရားကျောင်းမှာ ခေါင်ချွန်း ၇ ခု၊ အမိုးခုံး ၅ ခု ပါဝင်မှာဖြစ်ပါတယ်။ ဘုရားရှိခိုးဆောင်တွေ၊ ဧည့်ဆောင်၊ စာကြည့်တိုက်၊ စာသင်ခန်း၊ အများသုံးဟောခန်း၊ ကလေးကစားကွင်း၊ ပန်းခြံ၊ စာအုပ်နဲ့ လက်ဆောင်ပစ္စည်းအရောင်းဆိုင်၊ စားသောက်ဆိုင်နဲ့ အခြား အများပြည်သူသုံး နေရာတွေကို ထည့်သွင်းဆောက်မှာဖြစ်ပါတယ်။ ဘုရားကျောင်းကို ၂၀၂၃ ခုနှစ်မှာ ဖွင့်လှစ်နိုင်ဖို့ ရည်ရွယ်ထားပါတယ်။

    ဘုရားကျောင်းဆောက်လုပ်ဖို့အတွက် ယူအေအီးအစိုးရက မြေပေးခဲ့တာဖြစ်ပြီး အိန္ဒိယဝန်ကြီးချုပ် နရန်ဒရာမိုဒီရဲ့ ၂၀၁၉ ခုနှစ် ယူအေအီးခရီးစဉ်မှာ ဘုရားကျောင်းဒီဇိုင်းကို ထုတ်ပြန်ခဲ့ပါတယ်။

    Ref: Gulf News