ဧပြီ ၂၇၊ ၂၀၁၅
M-Media
– တောင်အာဖရိကနိုင်ငံအတွင်း နိုင်ငံခြားသားများအား ဆန့်ကျင်တိုက်ခိုက်မှုကြောင့် နိုက်ဂျီးရီးယားက ၎င်းတို့၏ သံအဖွဲ့အား ပြန်လည်ခေါ်ယူခဲ့ခြင်းကို ရှုတ်ချကြောင်း တောင်အာဖရိက က ယမန်နေ့တွင် ပြောကြားလိုက်သည်။
ပြီးခဲ့သည့် သီတင်းပတ်များအတွင်း တောင်အာဖရိကနိုင်ငံ မြို့တော် ဂျိုဟန်နစ္စဘတ်နှင့် ကမ်းရိုးတမ်းမြို့ ဒါဘန်တို့တွင် နိုင်ငံခြားသားများအား ပစ်မှတ်ထားသည့် ဆန့်ကျင်တိုက်ခိုက်မှုများ ဖြစ်ပွားခဲ့ပြီးနောက် နိုက်ဂျီးရီးယားက တောင်အာဖရိကဆိုင်ရာ ၎င်းတို့၏ သံအမတ်အပါအ၀င် သံအဖွဲ့ကို စနေနေ့က ပြန်လည်ခေါ်ယူခဲ့သည်။
သို့သော်လည်း တောင်အာဖရိက အစိုးရက နိုက်ဂျီးရီးယား၏ ထိုလုပ်ရပ်မှာ အကြောင်းမလှသည့်၊ နောက်တရဖွယ်ရှိနိုင်သည့် ခြေလှမ်းဖြစ်သည်ဟု ယမန်နေ့တွင် ထုတ်ပြန်သော ကြေညာချက်တွင် ဖော်ပြထားသည်။ ထို့ပြင် တိုင်းပြည်အတွင်းရှိ နိုင်ငံခြားသားများကို တိုက်ခိုက်ခြင်းအား အစိုးရနှင့် ပြည်သူ့အဖွဲ့အစည်းများအားလုံးမှ ပြတ်ပြတ်သားသားနှင့် အတိအလင်း ဆန့်ကျင်ရှုတ်ချသည်ဟုလည်း အဆိုပါ ကြေညာချက်၌ ဖော်ပြခဲ့သည်။
တောင်အာဖရိက အပြည်ပြည်ဆိုင်ရာ ပူးပေါင်းဆောင်ရွက်ရေးဌာနမှ ထုတ်ပြန်သော အဆိုပါ ကြေညာချက်တွင် ၂၀၁၄ ခုနှစ်က နိုက်ဂျီးရီးယားရှိ ခရစ်ယာန်ဘုရားကျောင်းတစ်ခု ပြိုကျမှုအတွင်း တောင်အာဖရိကနိုင်ငံသား ၈၄ ဦးသေဆုံးခဲ့မှုတွင် မိမိတို့ဘက်မှ အပြစ်မတင်ခဲ့ဟုလည်း ဖော်ပြခဲ့သည်။
Africa Report မဂ္ဂဇင်းမှ အနောက်အာဖရိကရေးရာ အယ်ဒီတာဖြစ်သူ တိုလူ အွန်လီစီကမူ ထိုကြေညာချက်၏ ရည်ရွယ်ချက်ကို ဝေဖန်ခဲ့ပြီး နိုက်ဂျီးရီးယားရှိ ခရစ်ယာန်ဘုရားကျောင်း ပြိုကျခြင်းနှင့် တောင်အာဖရိကတွင် လက်ရှိ ဖြစ်ပွားနေသည့် နိုင်ငံခြားသားများအား တိုက်ခိုက်မှုမှာ မတူညီကြောင်း၊ ထိုသို့ ရည်ညွှန်းခြင်းမှာ သံတမန်ရေးအရ ကိုင်တွယ်မှု မှားယွင်းခြင်းဖြစ်ကြောင်း ပြောကြားခဲ့သည်။
နိုက်ဂျီးရီးယားနှင့် တောင်အာဖရိကတို့မှာ လွန်ခဲ့သည့်ဆယ်စုနှစ်အတွင်း နီးကပ်သောဆက်ဆံရေးရှိခဲ့ပြီး ယခုပြဿနာကြောင့် ၎င်းတို့နှစ်နိုင်ငံအကြား ဆက်ဆံရေးမှာ ဆိုးဝါးလာနိုင်သည်ဟု လေ့လာဆန်းစစ်သူများက ပြောကြားခဲ့သည်။
Ref: Aljazeera
