Blog

လက်ရှိအချိန်မှာ အကောင်းဆုံးဖြစ်နေသည်ဟု ဂျရူးဆို

မတ် ၂၄၊ ၂၀၁၅
M-Media

– မိမိအနေဖြင့် အာဆင်နယ်ကစားသမား သက်တမ်းတစ်လျှောက်တွင် လက်ရှိအချိန်အ၌ အကောင်းဆုံးခြေစွမ်းဖြင့် ကစားနေပြီး ဂိုးရှေ့တွက် မတည်မငြိမ်ဖြစ်သည်ဆိုသည့် ဝေဖန်မှုများက မိမိအား သက်ရောက်မှုမရှိဟု အာဆင်နယ်တိုက်စစ်မှူး ဂျရူးက ပြောကြားလိုက်သည်။

စနေနေ့က နယူးကာဆယ်အား ၂ ဂိုး ၁ ဂိုးဖြင့် အနိုင်ရခဲ့သည့်ပွဲတွင် ဂျရူးမှာ အသင်းအတွက် အနိုင်ဂိုး ၂ ဂိုးစလုံးကို သွင်းယူပေးခဲ့ပြီး နောက်ဆုံး ၁၀ ပွဲတွင် ၉ ဂိုးအထိ သွင်းယူပေးထားနိုင်ကာ အာဆင်နယ်၏ ချန်ပီယံလိဂ်ဝင်ခွင့်နေရာအတွက် ဆက်လက်သေချာစေခဲ့သည်။

ပရီးမီးယားလိဂ်တွင်မှာ ဂျရူးသွင်းယူထားသည်ဂိုးမှာ ၁၃ ဂိုးရှိပြီး ၎င်းထက် မိနစ် ၅၀၀ ပိုကစားထားကာ ပရီးမီးယားလိဂ် ဂိုးသွင်းအများဆုံးစာရင်းကို ဦးဆောင်နေသည့် ဒီယေဂိုကော်စတာနှင့် ဟယ်ရီကိန်းတို့ထက် ၅ ဂိုးသာ ကွာဟနေသည်။

“ကျွန်တော် အာဆင်နယ်ကို စရောက်တည်းက အခုအချိန်ဟာ ကျွန်တော့်ရဲ့ အကောင်းဆုံးအချိန် ဖြစ်ကောင်းဖြစ်နိုင်ပါတယ်။ ကျွန်တော် ဒီအတိုင်းပဲ ဆက်သွားရပါမယ်။ ဒီမှာတင် ရပ်တန့်မနေချင်ပါဘူး။ ပြီးခဲ့တဲ့နှစ်က ပရီးမီးယားလိဂ်မှာ ၁၆၊ ၁၇ ဂိုးလောက် သွင်းနိုင်ခဲ့ပါတယ်။ (ဒီနှစ်မှာ) ဒီထက်ပိုသွင်းချင်ပြီး အထူးသဖြင့် အသင်းရဲ့ ရည်မှန်းချက်တွေ အောင်မြင်အောင် ကြိုးစားရာမှာ ကျွန်တော်ကူညီချင်ပါတယ်” ဟု ဂျရူးက RMC Sport သို့ ပြောကြားခဲ့သည်။

ချန်ပီယံလိဂ် ၁၆ သင်းအဆင့် ပထမအကျော့ မိုနာကိုအား ၃ ဂိုး ၁ ဂိုးဖြင့် ရှုံးနိမ့်ခဲ့သည့်ပွဲတွင် အပိုင်လုံး ၂ လုံးအား လွဲချော်ခဲ့သည့်အတွက် ဂျရူးမှာ ဝေဖန်မှုများကို ခံခဲ့ရပြီး ၎င်းကမူ ထိုအဖြစ်အပျက်မှ ရုန်းထွက်ရန် လိုအပ်သည့် စိတ်ဓာတ်ကြံ့ခိုင်မှုကို ရရှိခဲ့သည်ဟု ထပ်လောင်းပြောကြားခဲ့သည်။

“ပွင့်ပွင့်လင်းလင်းပြောရရင် အဲဒီပွဲမှာ ကျွန်တော်ဟာ စွမ်းဆောင်ရည် မပြည့်ဝခဲ့တာကြောင့် ကောင်းမွန်တဲ့ အနေအထားမှာမရှိခဲ့ပါဘူး။ ကျွန်တော် နည်းနည်း ကပျက်ကချော် ဖြစ်ခဲ့ပါတယ်။ ဒါပေမယ့် ပိုကောင်းတဲ့ ပုံစံမျိုးနဲ့ ပြန်လာနိုင်တဲ့ စိတ်ဓာတ်ကြံ့ခိုင်မှုမျိုးကို ပြသနိုင်ခဲ့ပြီး ဝေဖန်မှုတွေကို ကျွန်တော် မမှုဘူးဆိုတာကိုလည်း သက်သေပြနိုင်ခဲ့ပါတယ်”

Ref: Goal.com

March 24, 2015
ပါလက်စတိုင်းအား ကျူးကျော်သိမ်းပိုက်မှုကို အစ္စရေးက အဆုံးသတ်ရမည်ဟု အိမ်ဖြူတော်အကြီးအကဲ ပြော

မတ် ၂၄၊ ၂၀၁၅
M-Media

– ပါလက်စတိုင်းပိုင်နက်များကို နှစ်ပေါင်း ၅၀ နီးပါးကြာ ကျူးကျော်သိမ်းပိုက်လာမှုကို အစ္စရေး၏ လာမည့်အစိုးရက ရပ်တန့်ရန်နှင့် ပါလက်စတိုင်းနိုင်ငံအတွက် လင်းရှင်းပေးရန် အမေရိကန်က မျှော်လင့်သည်ဟု သမ္မတအိုဘားမား၏ အဓိက လက်ထောက်တစ်ဦးဖြစ်သူ အိမ်ဖြူတော်အကြီးအကဲ ဒန်းနစ် မက် ဒိုနက်ဖ်က ပြောကြားလိုက်သည်။

အစ္စရေးအသိပညာပေးအရေးအဖွဲ့ J Street သို့ ဒိုနက်ဖ်က ယမန်နေ့တွင် ထိုကဲ့သို့ ပြောကြားခဲ့ခြင်းဖြစ်ပြီး အစ္စရေး၏ လုံခြုံရေးအတွက် ကတိပေးခဲ့သော်လည်း အစ္စရေးရွေးကောက်ပွဲအကြို ၀န်ကြီးချုပ် နေတန်ယာဟုက ပါလက်စတိုင်း နိုင်ငံတည်ထောင်ခွင့် ပေးမည်မဟုတ်ဟု ပြောကြားမှုကို ဝေဖန်ခဲ့သည်။

ထို့ပြင် ပါလက်စတိုင်းတို့အတွက် သီးခြားနိုင်ငံကသာလျှင် အစ္စရေး၏ ရေရှည်လုံခြုံရေးအတွက် အကောင်းဆုံး အာမခံချက်ဖြစ်မည်ဟု ဒိုနက်ဖ်က ဆိုသည်။

“နှစ်ငါးဆယ်လောက်ကြာနေတဲ့ ကျူးကျော်သိမ်းပိုက်မှုကို မဖြစ်မနေ အဆုံးသတ်ရပါမယ်။ ပြီးတော့ ပါလက်စတိုင်းပြည်သူတွေဟာ သူတို့ရဲ့ အချုပ်အခြာပိုင် နိုင်ငံမှာ နေထိုင်ခွင့်၊ အုပ်ချုပ်ခွင့် ရှိရပါမယ်” ဟု ၎င်းက ထပ်လောင်းပြောကြားခဲ့သည်။

ပါလက်စတိုင်းမှာ ဂါဇာ၊ အနောက်ဘက်ကမ်းခြေနှင့် အရှေ့ဂျေရုစလင်တို့ကို စုစည်း၍ ပါလက်စတိုင်း နိုင်ငံအဖြစ် ထူထောင်ရန် ကြိုးပမ်းနေပြီး အစ္စရေးက ၁၉၆၇ ခုနှစ် ၆ ရက်စစ်ပွဲပြီးနောက်ပိုင်း အဆိုပါ နယ်မြေများကို ကျူးကျော်သိမ်းပိုက်ခဲ့သည်။

“အဆုံးမှာတော့ ငြိမ်းချမ်းရေးသဘောတူညီချက်ဟာ ဘယ်လိုဖြစ်သင့်လဲဆိုတာ ကျွန်တော်တို့ သိပါတယ်။ အပြန်အလှန် ဖလှယ်တာမျိုးနဲ့အတူ အစ္စရေးရဲ့ နယ်နမိတ်နဲ့ လွတ်လပ်တဲ့ ပါလက်စတိုင်းနိုင်ငံတို့ဟာ ၁၉၆၇ ခုနှစ်က နယ်နမိတ်လိုင်းတွေကို အခြေခံရမှာပါ” ဟု ဒိုနက်ဖ်က ဆိုသည်။

ပါလက်စတိုင်းနိုင်ငံ ထူထောင်ခွင့်မပေးဟု ပြောဆိုခဲ့သောစကားကို ရွေးကောက်ပွဲတွင် အနိုင်ရခဲ့ပြီးနောက် နေတန်ယာဟုက ပြန်လည်ဖာထေးခဲ့သော်လည်း အမေရိကန်အနေဖြင့် ကသိကအောက်ဖြစ်နေသည်ဟု ဒိုနက်ဖ်က ထည့်သွင်းပြောကြားခဲ့သည်။

“ဒီစကားမျိုး မပြောခဲ့ဘူးတဲ့ ပုံစံမျိုး ကျွန်တော်တို့ ဟန်မဆောင်နိုင်ပါဘူး”

Ref: Aljazeera

March 24, 2015
ကမ္ဘာ့ဖလားတွင် ဥရောပအသင်းအရေအတွက် ပိုပါသင့်သည်ဟု UEFA ပြော

မတ် ၂၄၊ ၂၀၁၅
M-Media

– အနာဂတ်၏ ကမ္ဘာ့ဖလားပြိုင်ပွဲများတွင် ဥရောပအသင်းများ ၀င်ရောက်ယှဉ်ပြိုင်ခွင့် နောက်ထပ်တစ်နေရာ ပိုရသင့်သည်ဟု ဥရောပဘောလုံးအဖွဲ့ချုပ် UEFA ၏ အထွေထွေအတွင်းရေးမှူး ဂီယန်နီ အင်ဖန်တီနိုက ပြောကြားလိုက်သည်။

၂၀၁၄ ခုနှစ်က ဘရာဇီးလ်တွင် ကျင်းပပြုလုပ်ခဲ့သည့် ကမ္ဘာ့ဖလားပြိုင်ပွဲတွင် ဥရောပမှ ၁၃ သင်း ၀င်ရောက်ယှဉ်ပြိုင်ခွင့်ရခဲ့ပြီး ၂၀၁၈ ခုနှစ်တွင် ရုရှားက အိမ်ရှင်အဖြစ် လက်ခံကျင်းပမည်ဖြစ်သောကြောင့် ၁၄ သင်း ဖြစ်လာမည်ဖြစ်သည်။

အင်ဖန်တီနိုကမူ ပြီးခဲ့သည့် ကမ္ဘာဖလားပြိုင်ပွဲ ၃ ခုတွင် အီတလီ၊ စပိန်နှင့် ဂျာမနီအသင်းတို့၏ အောင်မြင်မှုများကို မီးမောင်းထိုးပြခဲ့ကာ ကမ္ဘာ့ဖလားပြိုင်ပွဲများတွင် ဥရောပအသင်းများ ပိုမိုပါဝင်သင့်သည်ဟု ယမန်နေ့က ပြောကြားခဲ့သည်။

“၁၃ သင်းထက် ပိုပါဝင်ရမယ့် အခွင့်အရေးရှိတယ်လို့ ကျွန်တော်ထင်ပါတယ်။ ဘာ့ကြောင်လည်းဆိုတော့ အချက်အလက်တွေကို အခြေခံပြီး ဓမ္မဓိဌာန်ကျကျကြည့်မယ်ဆိုရင် ကမ္ဘာ့ထိပ်တန်း ၃၂ သင်းမှာ ၁၉ သင်းက ဥရောပနိုင်ငံတွေပါ” ဟု ၎င်းက ဆိုသည်။

ထို့ပြင် မိမိတို့အနေဖြင့် တစ်သင်းထက်ပို၍ ပါဝင်ရန် တောင်းခံနိုင်ကြောင်း၊ သို့သော်လည်း တစ်သင်း ပိုမိုပါဝင်နိုင်လျှင်လည်း ဘောလုံးအားကစား၏ အကျိုးအတွက် ကောင်းမွန်သည့် လက္ခဏာဖြစ်ကြောင်း အင်ဖန်တီနိုက ထပ်လောင်းပြောကြားခဲ့သည်။

လက်ရှိအချိန်တွင် စုစုပေါင်း ၃၂ သင်းပါဝင်ယှဉ်ပြိုင်ရသည့် ကမ္ဘာဖလားတွင် ဖီဖာက ဥရောပအသင်းများ၏ နေရာကို လျှော့ချရန်ရှိနေသည်ဟု သတင်းများထွက်ပေါ်နေပြီး၊ မေလ ဖီဖာဥက္ကဌရွေးကောက်ပွဲ ပြီးလျှင် ဖြစ်လာဖွယ်ရှိနေသည်။

Ref: Goal.com

March 24, 2015
အလင်း နဲ့ အမှောင်ကြားက အာဆီယံခေါင်းဆောင်တစ်ဦး

မတ် ၂၄ ၊ ၂၀၁၅
M-Media
ဆွေမွန်ရေးသည်။

.
ဗိသုကာကြီး လီကွမ်းယူ၊ စင်္ကာပူရဲ့ ပထမဆုံး ၀န်ကြီးချုပ်၊ ခေတ်မီစင်္ကာပူကို တည်ဆောက်ခဲ့သူ စသည်ဖြင့် လီကွမ်ယူအကြောင်း အကောင်းရေးကြသူများပါတယ်။ အကောင်းရေးကြရအောင်လည်း သူ့လုပ်ရပ်တွေ (အများစု)က စင်္ကာပူနိုင်ငံကို တိုးတက်စေဖို့ ကိုယ်စားပြုနိုင်ခဲ့တယ်လို့ ဆိုနိုင်ပါတယ်။
.
အခြားတဖက်ကို ကြည့်ရင် သူဟာ တရုတ်မျိုးရိုး အစစ်ပါပဲ။ စင်္ကာပူနိုင်ငံမဖြစ်သေးတဲ့ စင်္ကာပူကို ၀င်လာတာ မျိုးရိုး လေးဆက်ပဲ ရှိပါသေးတယ်။ ကွမ်းတုံသားပါ။ ၁၈၆၃ မှာ တရုတ်က သူ့ဘိုးဘွားတွေ စင်္ကာပူကို အခြေချပြောင်းဝင်လာခဲ့တယ်။ British Education ကို ဖြစ်ဖြစ်မြောက်မြောက်တတ်ကျွမ်းတာရယ်၊ PAP ပါတီကတဆင့် နိုင်ငံရေးလမ်းကြောင်းကို ပါးပါးနပ်နပ် ရွေးချယ်ခဲ့တာတွေရယ်၊ အင်္ဂလိပ်လက်အောက်ခံ၊ ဂျပန်လက်အောက်ခံ၊ မလေးရှားလက်အောက်ခံတွေ ဖြစ်ခဲ့ပြီး ၁၉၆၅ မှာ မလေးက ခွဲထွက်ကာ စင်္ကာပူကို ကမ္ဘာ့အဆင့် အာရှကျားတစ်ကောင် ဖြစ်လာစေတာတွေက သူ့ကို အသိအမှတ် မပြုလို့ မရတဲ့အကြောင်းအရာတွေပါ။ မလေးကနေ စင်္ကာပူကို ခွဲထုတ်ခဲ့တဲ့အပိုင်းဟာ စိတ်ဝင်စားဖို့ အကောင်းဆုံးပါ။ လူ ၂၀ လောက်ပဲ အသေအပျောက်ရှိတဲ့ လူမျိုးရေးအဓိကရုဏ်းတစ်ခုကို အကြောင်းပြုပြီး စင်္ကာပူခွဲထွက်ခဲ့တယ်။ ဒီနေရာကို သေချာလေ့လာကြည့်ရင် စိတ်ဝင်စားစရာ အများကြီး၊ နောက်ဆက်တွဲ တွေးစရာတွေအများကြီး ရှိနေတာကို တွေ့ကြရပါမယ်။
.
တကယ်တိုးတက်သင့်တဲ့ ပင်မနိုင်ငံ မလေးရှားက မတိုးတက်ဘဲ စင်္ကာပူက ကျော်တက်လာရတဲ အကြောင်းအရာတွေ၊ မလေးကို ယှဉ်နိုင်ဖို့ မလေးရဲ့ပြိုင်ဖက် ဆူကာနိုရဲ့ အင်ဒိုနဲ့ ပြေးကပ်ခဲ့တဲ့ အကြောင်းတွေ၊ အာဆီယံကို ထူထောင်ခဲ့တဲ့ အကြောင်းတွေအပြင် အာရှသားတွေ ကမ္ဘာကကို ရင်ဘောင်တန်းနိုင်ဖို့ သူကြိုးစားခဲ့တာတွေကို ပိုပြီး လေ့လာသင့်ကြပါတယ်။
.
သူနဲ့ခေတ်ပြိုင် မြန်မာနိုင်ငံက တစ်တိုင်းပြည်လုံးမွဲ၊ သူ့မိသားစုတစ်စုတည်း ကျိကျိတက်ချမ်းသာတဲ့ (၁၉၈၄ လောက် နယူးစ်ဝိခ်လား တိုင်းလား၊ မဂ္ဂဇင်းတစ်စောင်မှာ ထင်မိတယ်။ သေချာ မမှတ်မိတော့။ ကမ္ဘာ့အချမ်းသာဆုံးနံပတ် ၆ ၀င်အောင် တိုင်းပြည်တာဝန်ထမ်းဆောင်ခဲ့တဲ့) ဦးနေ၀င်း၊ ( ခုချိန်ထိ သူ့မြေးတွေ ဒေါ်လာကို ဘီလီယံလို်က် ချမ်းသာကြသေးတယ်။) ဖိလစ်ပိုင်ဖက်မှာဆိုရင် အတိုက်အခံခေါင်းဆောင် အကွီနိုကို အနီးကပ်သတ်ပစ်ခဲ့တဲ့အပြင် ပြည်သူ့ဘဏ္ဍာအကုန်ဘုံးခဲ့တဲ့ သမ္မတ ဖာဒီနန်မားကို့စ်နဲ့ သူ့ကတော် ဖိနပ်အရံ ၂၀၀၀ ပိုင်ရှင် အီမယ်လ်ဒါမားကို့စ်တို့ထက်စာရင် လီကွမ်းယူဟာ နိုင်ငံဘဏ္ဍာကို ဘုံးချင် ခိုးချင်တဲ့သဘော မရှိခဲ့ပေမယ့် သူ့အာဏာတည်မြဲဖို့ အတွင်းစည်းဝိုင်းကို သူ့မိသားစုကိုပဲ ရွေးခဲ့တယ်။
.
မလေးရှားက အတိုက်အခံခေါင်းဆောင် အန်န၀ါ အီဗရာဟင်လို နိုင်ငံရေးပြိုင်ဖက်တွေကို အပြတ်ဖြုတ်တတ်တဲ့ မဟာသီ၊ ထိုင်းက အာဏာသိမ်းနိုင်လွန်းပြီး ပြန်ဆင်းမပေးချင်တဲ့ စစ်တပ်အဆက်ဆက်ရဲ့ ပင်မဆရာကြီး ဗိုလ်ချုပ်ကြီးချာဗလစ်ယောင်ချိုင်ယုဒ် (ဦးနေ၀င်းက အကိုကြီးလို့ ခေါ်ဖူးသေး) တို့လိုပဲ နိုင်ငံရေးအာဏာနဲ့ပတ်သက်လာရင် ဘယ်သူ့ကိုမှ မညှာတာခဲ့ပါဘူး။ နိုင်ငံရေးလမ်းကြောင်းမှာ အတိုက်အခံဟူသမျှ နှိပ်ကွပ်ခဲ့တဲ့ အာဏာရှင်အစစ်ပါ။ သူ့ကို အတိုက်အခံလုပ်သူတွေကို အမှုမစစ်ဘဲ ထောင်ချပစ်ခဲ့တယ်လို့ သူကိုယ်တိုင်ဝန်ခံဖူးပါတယ်။
.
ဒါ့အပြင် အာဏာပိုင်ဆိုင်ခြင်းကတဆင့် ရလာတဲ့ ဆင့်ပွားအခွင့်အရေးတွေကို မိသားစုလိုက် လက်ဝါးကြီးအုပ်ခဲ့တယ်လို့ ပြောနိုင်တယ်။ သားအကြီးဆုံးဖြစ်သူ လက်ရှိဝန်ကြီးချုပ် လီရှန်လွန်းကို ၀န်ကြီးချုပ်နေရာအတွက် ကြိုလျာထားခဲ့သလို သူ့နောက်က ဂိုချောက်တောင်ကိုလည်း သူပဲ ရွေးခဲ့တယ်။ ဒါပေမယ့် ဂိုချောက်တောင်ဟာ လီကွမ်းယူအရိပ်ကို မကျော်နိုင်ခဲ့ပါဘူး။ လီကွမ်းယူရဲ့ အရုပ်သာသာအဆင့်ပဲ ဖြစ်ခဲ့တယ်။ ၀န်ကြီးချုပ်နေရာကို သားအကြီးဆုံးဖြစ်သူ လီရှန်လွန်းက ၂၀၀၄ မှာ ရယူခဲ့သလို၊ သားအငယ် လီဆင်ယန်းဟာလည်း စင်္ကာပူစစ်တပ်မှာ ဗိုလ်မှူးချုပ်အဆင့်၊ နောက်ပိုင်းမှာ Sing Tel ရဲ့ CEO နဲ့ ဥက္ကဋ္ဌ ဖြစ်ခဲ့တယ်။ ညီကိုနှစ်ဦးလုံးဟာ Cambridge တက္ကသိုလ်ဆင်းတွေ၊ စင်္ကာပူစစ်တပ်မှာ ဗိုလ်မှူးချုပ်အဆင့်တွေချည်းပါပဲ။ ညီဖြစ်သူဟာ ခုချိန်မှာ Fraser and NeaveLtd မှာ ဥက္ကဋ္ဌလုပ်နေတဲ့အပြင် the Civil Aviation Authority of Singapore (CAAF) မှာလည်း အကြီးဆုံးရာထူးယူထားပါတယ်။ လီကွမ်းယူရဲ့သမီး လီဝေလင်းဟာ the National Neuroscience Institute ကို လုပ်ပိုင်ခွင့်ရထားသလို ၀န်ကြီးချုပ်လီရှန်လွန်းရဲ့ မိန်းမ Ho Ching ဟာလည်း Temasek Holdings ရဲ့ CEO နဲ့ Executive Director တစ်ဦးပါ။
.
ဒီအကြောင်းတွေမတိုင်မီမှာလည်း လီကွမ်းယူကို ဆက်ခံခဲ့တဲ့ ဂိုချောက်တောင်နဲ့ လီရှန်လွန်းကို ဝေဖန်ခဲ့တဲ့ The New York Times ကပိုင်တဲ့ the International Herald Tribune သတင်းစာကို Philip Bowring အမည်ရ သတင်းစာဆရာတစ်ဦးရေးတဲ့ ‘All in the Family’ ဆောင်းပါးဟာ စင်္ကာပူကို ထိခိုက်စေတယ်လို့ ခေါင်းစဉ်တပ်ပြီး တရားစွဲခဲ့တဲ့အတွက် သတင်းစာတိုက်ဖက်က အမေရိကန်ဒေါ်လာ ၁၁၄၀၀၀ လောက် အလျော်ပေးခဲ့ရပါသေးတယ်။
.
သူ့ရဲ့ PAP ပါတီအကြောင်းဟာလည်း စိတ်ဝင်စားစရာပါ။ အခြားအာဆီယံခေါင်းဆောင်တွေနဲ့မတူတာက နိုင်ငံတိုးတက်လာအောင် လုပ်ပြနိုင်ခြင်းပါပဲ။ အခြားအာဆီယံခေါင်းဆောင်တွေထက်စာရင် လီဟာ အပုပ်နံ့နည်းပါတယ်။
.
နိုင်ငံ့ပုံရိပ်တိုးတက်လာတာနဲ့အမျှ သူ့ရဲ့မကောင်းကြောင်းတွေဟာ နောက်ကို ရောက်ကုန်ပါတယ်။ သူ့ရဲ့အထင်ကြီးစရာ မူဝါဒတစ်ခုက စင်္ကာပူကို multiculture ယဉ်ကျေးမှုပေါင်းစုံထွန်းကားရာ၊ လူမျိုးပေါင်းစုံ လွတ်လပ်စွာနေထိုင်နိုင်စေရာ ဂေဟာတစ်ခုအဖြစ်ကို ကျင့်သုံးနိုင်ခဲ့ခြင်းပါပဲ။ ဒါကြောင့် နိုင်ငံတကာက လူမျိုးပေါင်းစုံဟာ စင်္ကာပူမှာ နေထိုင်ခွင့်၊ ပညာသင်ယူခွင့်၊ လူနဲ့တူတန်စွာ ကိုယ်ကြိုးစားရင် ကြိုးစားသလောက် တိုးတက်ခွင့်တွေ ရလာစေတယ်။ ဘာသာရေးကို လုံးဝ မပိတ်ပင်ဘူး။ ချပ်ခ်ျ၊ ဘုန်းကြီးကျောင်း၊ ဗလီ၊ ဟိန္ဒူဘုရားကျောင်းတွေအားလုံးဟာ တားဆီးမှု တစ်စုံတစ်ခုမရှိဘဲ လွတ်လပ်ခွင့် အပြည့်ပေးခဲ့တယ်။ ဒီအချက်ဟာ အာဆီယံဘယ်နိုင်ငံထက်မဆို အနောက်နိုင်ငံတွေကို သည်းခြေကြိုက်ဖြစ်စေတဲ့ အချက်ပါပဲ။ စည်းကမ်းနဲ့ပတ်သက်ရင် အလျှော့မပေးဘူး။ အနောက်နိုင်ငံသားတွေကိုတောင် ကြိမ်ဒဏ်ပေးခဲ့တဲ့ သာဓကတွေ အများကြီးပါ။ ကားဆေးမှုတ်မိလို့ ကြိမ်ဒဏ်မိတဲ့ မိုက်ကယ်ဖေးကိစ္စဆိုရင် ကမ္ဘာကျော်ခဲ့တယ်။
.
ဖတ်စရာတွေ ကျန်ဦးမှာပါ။ ကောင်းတာတွေရဲ့ တဖက်က အမှောင်ရိပ်သန်းတဲ့ လီကွမ်းယူအကြောင်းတွေဟာ အများကြီးရှိနေဦးမှာပါ။ ဒါပေမယ့် အလင်းအများကြီးထွက်တဲ့ မီးရောင်လိုမျိုး အမှောင်အများအပြားကို ဖယ်ရှားကာ သူ့နိုင်ငံသားတွေရဲ့ ကောင်းကျိုးတွေကို အများဆုံး လုပ်နိုင်ခဲ့လို့သာ သေဆုံးချိန်မှာ အမည်ကောင်းလေး ရခဲ့တယ်လို့ပဲ ဆိုချင်ပါတယ်။
.
ဆွေမွန်
၂၃ မတ်လ ၂၀၁၅

March 24, 2015
ဗိုလ်ချုပ်အောင်ဆန်း သူငယ်ချင်းတစ်ဦးဖြစ်သည့် တောင်ကြီးသားဦးခန်း အသက်၁၀၀ ပြည့်ပြီ

7 Days မှ ကူးယူဖော်ပြပါသည်။

ပင်လုံစာချုပ်ချုပ်ဆို မှုကို ကိုယ်တိုင်မျက်မြင် ကြုံတွေ့ ခဲ့သူ၊ စာချုပ်ချုပ်ဆိုရန် ဗိုလ်ချုပ် အောင်ဆန်းကို ကားမောင်းပို့ပေး ခဲ့သူ၊ ဗိုလ်ချုပ်၏ သူငယ်ချင်းတစ် ဦးဖြစ်သူ တောင်ကြီးသား ဦးခန်း သည် ပြီးခဲ့သည့် ဖေဖော်ဝါရီ ၁၆ ရက်က အသက် (၁၀၀) ပြည့်ခဲ့ ပြီဖြစ်ကြောင်း သတင်းရရှိသည်။

ဦးခန်းသည် ဗိုလ်ချုပ်အောင် ဆန်း ပင်လုံစာချုပ် လက်မှတ်ထိုး ရန် တောင်ကြီးမှ ပင်လုံသို့အသွား ကိုယ်တိုင် ကားမောင်းကာ လိုက် လံပို့ဆောင်ပေးခဲ့သူတစ်ဦးဖြစ်ပြီး ပင်လုံစာချုပ်ချုပ်ဆိုမှုကို ကိုယ်တိုင် မျက်မြင်ကြုံခဲ့သူတစ်ဦး ဖြစ် သည်။

တောင်တန်း၊ ပြည်မ မခွဲဘဲ လွတ်လပ်ရေးရယူရန် အရေးပါ သည့် ပင်လုံစာချုပ်ချုပ်ဆိုခဲ့မှုနှင့် ပတ်သက်၍ ဦးခန်းက ‘‘ပင်လုံမှာ အစည်းအဝေးတွေ၊ ဆွေးနွေးပွဲ တွေ လုပ်တယ်။ အဲဒီမှာ နိုင်ငံရေး သမားပေါင်းစုံရယ်၊ ဗိုလ်ချုပ် အောင်ဆန်းတို့၊ ဦးနုတို့၊ ဦးစော တို့ပါတယ်။ နှစ်ပေါင်း ၆၀ ဆိုတော့အကုန်လုံးတော့ မမှတ်မိတော့ဘူး။ ဗိုလ်ချုပ်အောင်ဆန်းနဲ့ အတူတူ ရှမ်းစော်ဘွားတွေလည်း တက်တယ်။ ဗိုလ်ချုပ်အောင်ဆန်းကအတူ လက်တွဲပြီး လွတ်လပ်ရေး ယူဖို့ပဲ ပြောတယ်’’ ဟု ၎င်းတွေ့ကြုံခဲ့ရပုံကို ပြောပြသည်။

လွတ်လပ်ရေးရမည်ဆို သည်မှာ   သေချာပြီဖြစ်သော ကြောင့် ပြည်နယ်များအနေဖြင့် လည်း နောက်မကျန်အောင်အတူ လက်တွဲပြီး လွတ်လပ်ရေးယူဟု ဗိုလ်ချုပ်အောင်ဆန်းက ပြောခဲ့ကြောင်း ဦးခန်းက ဆိုသည်။ ထိုအချိန်က ဗိုလ်ချုပ်အောင်ဆန်းသည်   လွတ်လပ်ရေးရယူရန် အချိန်ဆွဲသည့် ရှမ်းစော်ဘွားအချို့ကိုလည်း စည်းရုံးခဲ့ကြောင်း ၎င်းကပြောသည်။

‘‘မြန်မာပြည်မှာ ဗိုလ်ချုပ် အောင်ဆန်းနဲ့ တန်းတူတဲ့သူတစ် ယောက်မှ မရှိဘူး’’ဟု ဦးခန်းက ၎င်း၏အမြင်ကို ပြောသည်။ ဗိုလ် ချုပ်အောင်ဆန်းသည် အမျိုးသား ခေါင်းဆောင်ကြီးတစ်ဦးဖြစ်သကဲ့ သို့ ဖြောင့်မတ်ခြင်း၊ သတ္တိရှိခြင်း နှင့် နိုင်ငံအတွက် မြင့်မြတ်သော အလုပ်လုပ်ဆောင်ခဲ့သူတစ်ဦး ဖြစ်သည်ဟုလည်း ပြောကြား သည်။

ဦးခန်းသည် အသက်(၁၀၀) ပြည့်ပြီးသည်အထိ ကျန်းမာရေး ကောင်းမွန်လျက်ရှိပြီး လက်ရှိအ ချိန်တွင် တောင်ကြီးမြို့ ရေအေး ကွင်း ရပ်ကွက်၌ သားသမီးများ နှင့်အတူ နေထိုင်၍ ကားကိုပင် ကိုယ်တိုင်   မောင်းနေဆဲဖြစ် သည်။

၂၀၁၅ သည် ဗိုလ်ချုပ် အောင်ဆန်း နှစ်(၁၀၀)ပြည့် မွေး နေ့နှစ်ဖြစ်ပြီး ဗိုလ်ချုပ်မွေးရပ်ဇာတိ နတ်မောက်မြို့ အပါအ၀င် တစ်နိုင်ငံလုံးရှိ မြို့များတွင် ဗိုလ် ချုပ်ရာပြည့် အထိမ်းအမှတ်ပွဲများ ကျင်းပခဲ့သည်။

(ဓာတ်ပုံ – ဂျွန်ချစ်ငြိမ်း)
http://www.7daydaily.com/story/34194

** ဖြည့်စွက်ဖော်ပြချက်- ဦးဖရွတ်ခန်းခေါ် ဦးခန်း သည် အစ္စလာမ်ဘာသာဝင်တစ်ဦးဖြစ်ပြီး   ၁၉၅၀ ပြည့်နှစ်မှ ၁၉၆၀ ပြည့်နှစ်အထိ ဆယ်နှစ်နှစ် တိုင်တိုင် နှစ်ကြိမ်ဆက် တောင်ကြီးမြို့ မြူနီစပယ်အဖွဲ့ ဥက္ကဋ္ဌမြို့တော်ဝန်အဖြစ် တာဝန်ယူဆောင်ရွက်ခဲ့ပြီး ၁၉၆၂ ခုနှစ် တော်လှန်ရေးအစိုးရ တက်လာချိန်တွင် ဦးခန်းအား ရှမ်းစော်ဘွားများနှင့် အတူ ဖက်ဒရယ်အရေး ဆောင်ရွက်သည်ဟုဆိုကာ ၎င်းကို ဆယ်နှစ်ခန့် ထိန်းသိမ်းခဲ့သည်။

ဦးဖရွတ်ခန်းခေါ် ဦးခန်း (သို့) သက်ရှိပင်လုံမှတ်တမ်း ဖတ်လိုလျှင်
http://www.m-mediagroup.com/news/32147

March 24, 2015