မတ် ၂၀၊ ၂၀၁၅
M-Media
– နိုင်ငံမြောက်ပိုင်းမှ သူပုန်များကို ရှင်းလင်းရေး ကြိုးပမ်းမှုအတွင်း အာဖရိကနိုင်ငံများ၏ တိုးမြှင့်ဆောင်ရွက်မှုများကို ပူးပေါင်းခြင်းအဖြစ် နိုက်ဂျီးရီးယားရှိ မွတ်စလင်အဖွဲ့တစ်ခုဖြစ်သည့် အကြမ်ဖက်ဆန့်ကျင်ရေး မွတ်စလင်များအဖွဲ့ (Muslims Against Terror) က ဘိုကိုဟရမ်နှင့် IS အဖွဲ့အပါအ၀င် စစ်သွေးကြွအဖွဲ့မျာအား စစ်ကြေညာလိုက်သည်ဟု သိရသည်။
“(IS နှင့် ဘိုကိုဟရမ်တို့လို) အစွန်းရောက်အဖွဲ့တွေဟာ နိုက်ဂျီးရီးယား၊ အီရတ်၊ ဆီးရီးယား စတဲ့နိုင်ငံတွေမှာ အပြစ်မဲ့ပြည်သူတွေကို သတ်ဖြတ်နေတဲ့၊ အစိုးရကို တိုက်ခိုက်နေတဲ့ အကြမ်းဖက်အဖွဲ့အစည်းတွေ ဖြစ်ပါတယ်။ ဒါတွေဟာ အစ္စလာမ်ရဲ့ အခြေခံစည်းမျဉ်းနဲ့ တမန်တော်မြတ်ကြီးရဲ့ သွန်သင်မှုကို ချိုးဖောက်တာ ဖြစ်ပါတယ်” ဟု Muslims Against Terror organization အဖွဲ့မှ မတ်လ ၁၈ ရက်နေ့တွင် ၎င်းတို့အဖွဲ့၏ ၀ဘ်ဆိုက်၌ ဖော်ပြထားသော ကြေညာချက်တွင် ရေးသားထားသည်။
ထို့ပြင် ဘိုကိုဟရမ်၊ IS နှင့် အလ်ကိုင်းဒါးတို့ကဲ့သို့ အစွန်းရောက်အဖွဲ့များက ဆောင်ရွက်သော ရက်စက်ကြမ်းကြုတ်မှုများကိုလည်း ထိုအဖွဲ့က ရှုတ်ချခဲ့သည်။
“IS၊ ဘိုကိုဟရမ် အဲဒီလိုအဖွဲ့တွေက အစ္စလာမ်နဲ့ ဘာမှ မဆိုင်ပါဘူး။ နောက်ပြီး ရှရီအာဥပဒေနဲ့ လူသားချင်း စာနာထောက်ထားမှုဆိုင်ရာ ဥပဒေတွေအရ သည်းခံလို့မရတဲ့၊ အဲဒီဥပဒေတွေကို ချိုးဖောက်တဲ့ ရာဇ၀တ်မှုတွေကို ကျူးလွန်နေပါတယ်။ အဲဒီရာဇ၀တ်မှုတွေက မူဆိုးလ်မှာရှိတဲ့ ခရစ်ယာန်တွေကို ထိခိုက်စေတယ်။ ယာဇီဒီတွေ၊ ကာ့ဒ်တွေနဲ့ အခြားအယူဝါဒတွေ၊ ပြီးတော့ အရှေ့အလယ်ပိုင်း၊ မြောက်အာဖရိကနဲ့ အနောက်အာဖရိကတွေက ပြည်သူတွေကိုလည်း ထိခိုက်စေပါတယ်။ ကျွန်တော်တို့အနေနဲ့ သူတို့ကို လုံးဝဥဿုံ ရှုတ်ချပြီး မွတ်စလင်အားလုံးကလည်း ဒီအဖွဲ့တွေကို ရှုတ်ချဖို့ တိုက်တွန်းပါတယ်” ဟု အဆိုပါ ကြေညာချက်တွင် ထည့်သွင်းဖော်ပြထားပြီး ထို့အဖွဲ့များအား စစ်ကြေညာမှုအတွင်း ၀င်ရောက်ပါဝင်ကြရန်လည်း တိုက်တွန်းခဲ့သည်။
အဆိုပါ ကြေညာချက်မှာ IS အဖွဲ့က ဘိုကိုဟရမ်၏ ပူးပေါင်းမှုကို လက်ခံပြီးနောက်ပိုင်း ပေါ်ထွက်လာခြင်းလည်း ဖြစ်သည်။ ထိုသို့ပူးပေါင်းမှုမှာ အာဖရိကနိုင်ငံများက အမြစ်ပြုတ်တိုက်ဖျက်ရေး ကြိုးပမ်းနေစဉ်အတွင်း ဘိုကိုဟရမ်၏ ၀ါဒဖြန့်သည့်လုပ်ရပ်ဟု Muslims Against Terror အဖွဲ့က ဆိုသည်။
ထို့ပြင် အစ္စလာမ်မှာ ငြိမ်းချမ်းရေး၊ ချစ်ခြင်းမေတ္တာတို့၏ သာသနာဖြစ်ပြီး အလ္လာဟ်အရှင်မြတ်၏ အလိုတော်အတိုင်း နာခံဆောက်တည်သည့် အယူဝါဒဖြစ်ကြောင်း၊ အစ္စလာမ်မှာ အကြမ်းဖက်လုပ်ရပ်ကို လုံးဝ ဆန့်ကျင်ပယ်ချကြောင်း ထိုအဖွဲ့က ထည့်သွင်းပြောကြားခဲ့သည်။
အဆိုပါ အကြမ်းဖက်အဖွဲ့များကို တွန်းလှန်နေသည့် အီရတ်၊ အီရန်၊ ဆီးရီးယား၊ နိုက်ဂျီးရီးယား စသည့်နိုင်ငံများမှ အစိုးရများအား အားပေးထောက်ခံရန်နှင့် ပဋိပက္ခဖြစ်ပွားနေသော ဒေသများမှ ပြည်သူများကို ကူညီရန်လည်း Muslims Against Terror အဖွဲ့က နိုင်ငံတကာကို မေတ္တာရပ်ခံခဲ့သည်။
“ကျွန်တော်တို့ Muslims Against Terror အဖွဲ့နဲ့ ကမ္ဘာတစ်ဝှမ်းက အခြားသော မွတ်စလင်ညီနောင်တွေဟာ အကြမ်းဖက်ဝါဒကို ပုံစံအားလုံးနဲ့တွန်းလှန်ဖို့ စိတ်ပိုင်းဖြတ်ထားပါတယ်။ အစ္စလာမ်ဆိုတာ အလယ်အလတ်လမ်းစဉ်ပါ။ ဒါနဲ့သွေဖည်တဲ့ အယူအဆတွေ ဘယ်နေရာကပဲ ထွက်လာထွက်လာ ကျွန်တော်တို့ ရင်ဆိုင်သွားမှာပါ။ အစ္စလာမ်ဆိုတာ မတူကွဲပြားမှုကိုလက်ခံတဲ့ ခန္တီတရားရှိတဲ့ အယူဝါဒပါပဲ” ဟု ကြေညာချက် နိဂုံးပိုင်းတွင် ဖော်ပြခဲ့သည်။
ဘိုကိုဟရမ်မှာ နိုက်ဂျီးရီးယားမြောက်ပိုင်းတွင် အစ္စလာမ့်ဥပဒေကို ပြဌာန်းမည်ဟုဆိုကာ လွန်ခဲ့သည့် ၆ နှစ်ခန့်မှစ၍ လက်နက်ကိုင် တိုက်ခိုက်လာခဲ့ခြင်းဖြစ်ပြီး အပြစ်မဲ့ပြည်သူ အများအပြား သေဆုံးခဲ့ကြရသည်။
လက်ရှိအချိန်တွင် နိုက်ဂျီးရီးယားနှင့် အိမ်နီးချင်းနိုင်ငံများဖြစ်သည့် ချဒ်၊ နစ်ဂါး၊ ကင်မရွန်းနိုင်ငံများမှ တပ်များ ပူးပေါင်းကာ ဘိုကိုဟရမ်အခြေစိုက်သည့် နေရာများကို ထိုးစစ်ဆင်မှုများ ပြုလုပ်နေသည်။
Ref: Onislam
