မတ် ၁၂ ၊ ၂၀၁၅
M-Media
– အစ္စလာမ်ဘာသာဝင်တွေ လွယ်ကူစွာ ၀တ်ပြုနိုင်ဖို့အတွက် စင်္ကာပူအရှေ့ပိုင်း လူအများဆုံးနေထိုင်ရာ Tampines North ဘက်မှာ ဗလီဝတ်ကျောင်းတော်အသစ်တစ်လုံး တည်ဆောက်သွားမယ်လို့ မွတ်စလင်ရေးရာဝန်ကြီး ဒေါက်တာ ယာကွဘ် အီဗရာဟင်က ဒီကနေ့မှာ ပြောကြားလိုက်ပါတယ်။
“Tampines North ကို အဓိကလူနေထိုင်ရာအဖြစ် တည်ဆောက်နေခြင်းနဲ့အတူ အဲဒီမှာ ဗလီဝတ်ကျောင်းတော်တစ်လုံး တည်ဆောက်သွားမယ်ဆိုတာကို ဝမ်းသာလှိုက်လှဲစွာနဲ့ ကြေငြာလိုပါတယ်။ အဲဒီ ဗလီဝတ်ကျောင်းတော်မှာ Tampines North ၊ အဲဒီနားက Pasir Ris နဲ့ နေရာနှစ်ခုလုံးက စက်မှုဇုန်မှာရှိတဲ့ နေထိုင်သူအသစ်တွေ ၀တ်ပြုနိုင်ပါလိမ့်မယ်” လို ဒေါက်တာ ယာကွဘ်က ကော်မတီဆွေးနွေးပွဲမှာ ပြောကြားလိုက်တာ ဖြစ်ပါတယ်။
ဒီဗလီဝတ်ကျောင်းအသစ်ဆောက်လုပ်တာကို အဲဒီဒေသမှာ ရှိတဲ့ နေထိုင်သူအရေအတွက်၊ ၀တ်ပြုရာနေရာ အခြေအနေတို့နဲ့ ချိန်ဆ ဆောင်ရွက်သွားမှာဖြစ်တယ်လို့လည်း သူက ဆိုပါတယ်။
အခုအချိန်မှာတော့ စင်ကာပူ အရှေ့ခြမ်းမှာရှိတဲ့ ပြည်သူတွေ ၀တ်ပြုနိုင်ဖို့အတွက် ၀တ်ပြုသူ ၄၅၀၀ လောက်ဆံ့တဲ့ Al Ansar ဗလီဝတ်ကျောင်းတော်ကို လာမယ့်လမှာ ဖွင့်လှစ်နိုင်မှာ ဖြစ်ပါတယ်။ အဲဒီဗလီဝတ်ကျောင်းတော်မှာ မူလက လူပေါင်း ၁၀၀၀ လောက်သာ ၀တ်ပြုနိုင်တာဖြစ်ပြီး အခုလက်ရှိမှာ တိုးချဲ့မှုတွေ ပြုလုပ်နေတာဖြစ်ပါတယ်။
.
Tampines ဒေသမှာရှိတဲ့ Darul Ghufran ဗလီဝတ်ကျောင်းတော်ကိုလည်း လူပေါင်း ၁၀၀၀ ထပ်မံဝတ်ပြုနိုင်ဖို့အတွက် ၂၀၁၆ မှာ အဆင့်မြှင့်တင်မှုတွေ ပြုလုပ်မှာဖြစ်ပြီး Pasir Ris မှာရှိတဲ့ Al Istighfar ဗလီဝတ်ကျောင်းတော်ကိုလည်း တိုးချဲ့ဖို့အစီအစဉ်နဲ့အတူ သုံးသပ်မှုတွေပြုလုပ်နေပြီး နည်းပညာဆိုင်ရာ အသေးစိတ်အချက်အလက်တွေကိုလည်း သတ်မှတ်ထားပြီးဖြစ်တယ်လို့ ဒေါက်တ ယာကွဘ်က ထည့်သွင်းပြောကြားခဲ့ပါတယ်။
.
Punggol က Al Islah ဗလီဝတ်ကျောင်းတော်ကို အခုနှစ် ရမ်ဇာန်ဥပုသ်လနဲ့ ဟာရီရာယာ (အီဒွဒ်ဖိသီရ်ပွဲတော်) အမီ ဖွင့်လှစ်နိုင်မှာဖြစ်ပြီး Jurong West က Maarof ဗလီဝတ်ကျောင်းတော်နဲ့ Woodlands က Yusof Ishak ဗလီဝတ်ကျောင်းတော်တွေ အတွက် အဆင့်မြှင့်တင် တိုးချဲ့မှုတွေကိုလည်း မကြားသေးခင်ကစလို့ ပြုလုပ်နေတယ်လို့ ဒေါက်တာ ယာကွဘ်က ထပ်လောင်း ပြောကြားခဲ့ပါတယ်။ အဆင့်မြှင့်တင်မှုတွေပြုလုပ်နေတဲ့ ဒီဗလီဝတ် ကျောင်းတော် ၃ လုံးဟာ ၀တ်ပြုသူ ၁၃၀၀၀ လောက်အတွက် နေရာပေးနိုင်မှာဖြစ်ပါတယ်။
ပြီးခဲ့တဲ့ ၆ နှစ်တာ ကာလအတွင်းမှာ စင်ကာပူမှာရှိတဲ့ စုစုပေါင်း ဗလီဝတ်ကျောင်းတော် ၉ လုံးကို အဆင့်မြှင့်တင် တိုးချဲ့နိုင်ခဲ့ပြီး ဒီနှစ်နှောင်းပိုင်းမှာ နောက်ထပ် ၅ လုံးကို အဆင့်မြှင့်တင်ဖို့ အစီအစဉ်ရှိနေပါတယ်။
“ကျွန်တော်တို့ရဲ့ ဗလီဝတ်ကျောင်းတော်တွေဟာ ကျွန်တော်တို့လူ့အဖွဲ့အစည်းရဲ့ ဘာသာရေးနဲ့ ဆက်နွယ်တဲ့ဘ၀အတွက် အဓိကဆုံချက်ပါပဲ။ ကျွန်တော်တို့ရဲ့ ဗလီဝတ်ကျောင်းတော်တွေဟာ ၀တ်ပြုဖို့နဲ့ ဘာသာရေး အသိပညာ သင်ကြားပို့ချဖို့အတွက် လုံခြုံပြီး အကျိုးသက်ရောက်ကာ မြေတောင်မြှောက်ပေးတဲ့နေရာတွေ အသေအချာဖြစ်လာဖို့ ကျွန်တော်တို့ စိတ်ပိုင်းဖြတ်ထားပါတယ်” လို့ နိဂုံးချုပ်အနေနဲ့ ဒေါက်တာ ယာကွဘ်က ပြောကြားခဲ့ပါတယ်။
ref:- CNA/es
