မတ် ၈၊ ၂၀၁၅
M-Media
– အဓိကမီဒီယာတွေက များသောအားဖြင့် ဖော်ပြကြတဲ့ အစ္စလာမ်နဲ့ပတ်သက်ပြီး မှားယွင်းတဲ့အယူအဆတွေကို ချေဖျက်ဖို့နဲ့ တစ်ကမ္ဘာလုံးက ဘီလီယံနဲ့ချီတဲ့ မွတ်စလင်တွေ ကျင့်သုံးနေကြတဲ့ အစ္စလာမ့်တန်ဖိုးတွေကို ဖော်ပြဖို့အတွက် 3D အန်နီမေးရှင်း ကာတွန်းစီးရီးတစ်ခုကို အမေရိကန်မှာ မကြာခင် ထုတ်လွှင့်တော့မှာ ဖြစ်ပါတယ်။
Buraaq လို့ အမည်ပေးထားတဲ့ အဲဒီ ကာတွန်းရုပ်ရှင်ဟာ ၂၀၁၁ ခုနှစ်က ထုတ်ဝေခဲ့တဲ့ Buraaq ရုပ်ပြစာအုပ်ရဲ့ ပုံစံအသစ်ဖြစ်ပြီး အမှန်တရား၊ တရားမျှတမှုနဲ့ လွတ်မြောက်မှုတို့အတွက် ရပ်တည်ဆောင်ရွက်ပေးတဲ့ သူရဲကောင်းတစ်ယောက်ရဲ့ လှုပ်ရှားဆောင်ရွက်မှုတွေကို ပုံဖော်ဖန်တီးထားတာ ဖြစ်ပါတယ်။
“ပြီးခဲ့တဲ့ နှစ်အနည်းငယ်အတွင်းမှာ ကမ္ဘာ့အဓိက မီဒီယာဖျော်ဖြေရေးတွေမှာ အစ္စလာမ်ရဲ့ သရုပ်သကန်နဲ့ပတ်သက်လို့ အပြုသဘောဆောင်တာတွေ မတွေ့ရဘူးဆိုတာကို ကျွန်တော်တို့ စတင်တွေ့ခဲ့ရပါတယ်။ ရုပ်ရှင်၊ တီဗီစီးရီး၊ စာအုပ်နဲ့ ရုပ်ပြစာအုပ်တွေ လုပ်ကြပါ။ အထူးသဖြင့် ၉/၁၁ အပြီး အဓိကမီဒီယာတွေမှာ မွတ်စလင်တွေကို အဖျက်ဘက်ကပဲ ဖော်ပြနေကြပါတယ်” လို့ ဒီ ကာတွန်းရုပ်ရှင်ကိုထုတ်လုပ်တဲ့ SplitMoonArts အဖွဲ့က သူတိုရဲ့ ၀ဘ်ဆိုက်မှာ ဖော်ပြထားပါတယ်။
ဒါတင်မကသေးဘဲ မွတ်စလင်တွေအနေနဲ့ မိမိတို့ရဲ့ အနုပညာစွမ်းရည်တွေကို အသုံးပြုပြီး မွတ်စလင်လူငယ်တွေအတွက် အတုယူစရာ၊ လေးစားအားကျလောက်စရာတွေကို ဖန်တီးထုတ်လုပ်ပေးကြဖို့လည်း ဒီအဖွဲ့က ထည့်သွင်းတိုက်တွန်းခဲ့ပါတယ်။
အမေရိကန်မွတ်စလင်တွေဖြစ်ကြတဲ့ အနုပညာရှင် အဒီလ် အင်မ်တီယာဇ်နဲ့ စာရေးဆရာ ကာမီလ် အင်မ်တီယာဇ်တို့ ပူးပေါင်းတည်ထောင်ထားတဲ့ SplitMoonArts က ထုတ်လုပ်ခဲ့တဲ့ ဒီ Buraaq ရုပ်ပြစာအုပ်ဟာ အစ္စလာမ်ရဲ့ အပြုသဘောဆောင်တဲ့ လက္ခဏာတွေကို မီးမောင်းထိုးပြဖို့အတွက် ရည်ရွယ်တာဖြစ်ပါတယ်။
အခု ဒီ အန်နီမေးရှင်းကာတွန်းကလည်း အစ္စလာမ်ရဲ့ စစ်မှန်တဲ့သွန်သင်ချက်တွေကို ပြန်လည်ထုတ်ဖော်ဖို့နဲ့ သူတို့ရဲ့ ကိုယ်ပိုင်ဇာတ်လမ်းတွေကို 3D အန်နီမေးရှင်းအနေနဲ့ ရုပ်ပြစာအုပ်အနေနဲ့ ဖော်ပြဖို့ ဖြစ်တယ်လို့ သူတို့က ဆိုပါတယ်။
“ကျွန်တော်တို့ရဲ့ အန္တိမ ရည်ရွယ်ချက်ကတော့ အလ္လာဟ်အရှင်မြတ်အလိုတော်နဲ့ ဒီ BURAAQ ဇာတ်လမ်းကို
တီဗီပိတ်ကားမှာ ကြည့်ရဖို့ပါပဲ”
ဒီဇာတ်လမ်းထဲက ဇာတ်ကောင်ကတော့ နိုဗာဆိုတဲ့ မြို့လေးမှာနေပြီး ဘာသာတရားကိုင်းရှိုင်းတဲ့ အဘ်ဒွလ်လာဆိုတဲ့ မွတ်စလင်လူငယ်လေးတစ်ယောက် ဖြစ်ပါတယ်။ ဒီလူငယ်လေးဟာ ဆန်းကျယ်မှုနဲ့ စွန့်စားမှုတွေပေါင်းစပ်ပြီး မတရားမှုတွေကို တိုက်ဖျက်ဖို့၊ အပြစ်မဲ့သူတွေကို ကယ်တင်ဖို့ သူ့ရဲ့စွမ်းအားကို အသုံးပြုပုံတွေကို စိတ်ဝင်စားဖွယ် ကြည့်ရှုခံစားရမှာ ဖြစ်ပါတယ်။
“ကျွန်တော်တို့ဟာ ယုံမှားသံသယတွေရဲ့အဝေးမှာနေရတာကို ကြိက်ပါတယ်။ ပြီးတော့ ရှင်းလင်းပြီး အပြုသဘောဆောင်ကာ လေးစားအားကျဖွယ်ကောင်းတဲ့ သတင်းစကားတွေကို ပေးချင်ပါတယ်။ ကျွန်တော်တို့ရဲ့ ကိုယ်ပိုင် ဇာတ်လမ်းတွေကို ပြောဖို့ အချိန်ရောက်ပါပြီ” လို့ SplitMoonArts အဖွဲ့က ဆိုပါတယ်။
အရည်အသွေးမြင့် ဒီ 3D အန်နီမေးရှင်း ကာတွန်းဇာတ်လမ်းကို ထုတ်လုပ်ဖို့အတွက် ကန်ဒေါ်လာ ၂ သိန်းလောက် ကုန်ကျခဲ့ပြီး ဒီကုန်ကျစားရိတ်ကို ရဖို့အတွက် သူတို့ တော်တော်လေးကြိုးစားခဲ့ရတယ်လို့လည်း ပြောခဲ့ပါတယ်။
“အိပ်မက်တွေ အမှန်တစ်ကယ်ဖြစ်လာအောင် ကျွန်တော်တို့ အတူတကွ လုပ်ဆောင်နိုင်ခဲ့ပါတယ်”
Ref: Onislam
