Blog

အောက်တိုဘာ ၂၃၊ ၂၀၂၁
M-Media

-မြန်မာနိုင်ငံမြောက်ပိုင်းမှာ စစ်ကောင်စီတပ်တွေ အင်အားစုစည်း ပြင်ဆင်နေတာကြောင့် လူ့အခွင့်အရေး ချိုးဖောက်မှုတွေ ဆိုးဆိုးရွားရွားမှုတွေ ဖြစ်လာမယ့်အန္တရာယ်ရှိနေတာကို ကုလသမဂ္ဂက သတိပေးလိုက်ပါတယ်။

ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ မတည်ငြိမ်မှုတွေ ဖြစ်လာပြီး လက်နက်ကိုင်တော်လှန်ရေးတစ်ရပ်လည်း ပေါ်ပေါက်လာပါတယ်။ အာဏာသိမ်းစစ်ကောင်စီတပ်ရဲ့အကြမ်းဖက်နှိမ်နှင်းမှုကြောင့် နိုင်ငံတစ်ဝှမ်း သေဆုံးသူအရေအတွက် ၁၁၀၀ ကျော်သွားပြီး ထောင်နဲ့ချီ အကျဉ်းချ ခံထားရပါတယ်။

ချင်းပြည်နယ်၊ မကွေးတိုင်းနဲ့ စစ်ကိုင်းတိုင်းက လက်နက်ကိုင် တော်လှန်ရေးအဖွဲ့တွေကို ရှင်းလင်းဖို့ စစ်ကောင်စီက ထောင်နဲ့ချီတဲ့တပ်တွေကို ပြင်ဆင်နေပြီး ရက်စက်တယ်လို့ နာမည်ဆိုးနဲ့ ကျော်ကြားတဲ့ တပ်မှူးနှစ်ဦးကို ကွပ်ကဲဖို့ တာဝန်ပေးထားပါတယ်။ စစ်ဆင်ရေး မကြာခင် စတင်မယ်လို့လည်း သတင်းတွေ ကျယ်ကျယ်ပြန့်ပြန့် ထွက်နေပါတယ်။

မြန်မာနိုင်ငံလူ့အခွင့်အရေးဆိုင်ရာ ကုသမဂ္ဂ အထူးကိုယ်စားလှယ် တွမ်အန်ဒရူးက စစ်တပ်ရဲ့ ရက်စက်ကြမ်းကြုတ်မှုတွေကို ပိုမိုမြင်တွေ့လာရနိုင်တယ်လို့ မနေ့က သတိပေးခဲ့ပါတယ်။

“ရက်စက်ကြမ်းကြုတ်တဲ့ ရာဇဝတ်မှုတွေ ပိုမိုဖြစ်လာနိုင်မှုအတွက် အဲဒီဒေသက မြန်မာပြည်သူတွေ ပြင်ဆင်ထားသလို ကျွန်တော်တို့အားလုံးလည်း ပြင်ဆင်ထားသင့်ပါတယ်။ ကျွန်တော့်တွက်ကိန်း မှားပါစေလို့သာ မျှော်လင့်ပါတယ်”

တပ်တွေစုစည်းပြီး လက်နက်ကြီးတွေပါ နိုင်ငံမြောက်ဖက်ရွှေ့ထားတယ်ဆိုတဲ့သတင်းတွေ ရထားကြောင်း၊ အရင်က တွေ့ရှိချက်တွေကိုကြည့်ရင် အာဏာသိမ်းစစ်ကောင်စီဟာ လူသားထုအပေါ် ကျူးလွန်တဲ့ ရာဇဝတ်မှုတွေ၊ စစ်ရာဇတ်မှုတွေကို ကျူးလွန်တယ်ဆိုတာ တွေ့ရကြောင်း အန်ဒရူးက ထည့်သွင်းပြောဆိုခဲ့ပါတယ်။

“အခုနည်းလမ်းတွေဟာ ရခိုင်ပြည်နယ်က ရိုဟင်ဂျာတွေကို လူမျိုးတုန်းသတ်ဖြတ်လိုတဲ့ ရည်ရွယ်ချက်တဲ့ တိုက်ခိုက်မှုတွေ ၂၀၁၆၊ ၂၀၁၇ ခုနှစ်မှာ မကျူးလွန်ခင် ပြင်ဆင်တဲ့ နည်းလမ်းတွေနဲ့ တော်တော်လေး သွားဆင်နေပါတယ်”

စစ်ကောင်စီကို ငွေကြေး၊ လက်နက်တွေ ထောက်ပံ့တာမလုပ်ဖို့၊ သူတို့လိုချင်နေတဲ့ အသိအမှတ်ပြုမှုတွေ မပေးဖို့ အန်ဒရူးက နိုင်ငံတကာအသိုင်းအ၀ိုင်း တိုက်တွန်းခဲ့သလို၊ ဖမ်းထားတဲ့သူတစ်ချို့ကို အခုတစ်ပတ်အစောပိုင်းက ပြန်လွှတ်ပေးတာဟာ နိုင်ငံတကာရဲ့ဖိအားတွေ ထိရောက်တယ်ဆိုတာ ပြသနေတာဖြစ်ကြောင်းလည်း သူက ဆိုပါတယ်။

Ref: The Guardian

အောက်တိုဘာ ၂၁၊ ၂၀၂၁
M-Media

-မြန်မာစစ်ခေါင်းဆောင်ကို ထိပ်သီးအစည်းအဝေး တက်ခွင့်မပေးတဲ့ ဆုံးဖြတ်ချက်ဟာ သိသာထိရောက်ပေမယ့်၊ အာဏာသိမ်းပြီး မြန်မာနိုင်ငံမှာ ဖြစ်ပေါ်လာတဲ့အခြေအနေတွေကို ဖြေရှင်းရေးမှာ အာဆီယံက အခုထက်ပိုပြီးလုပ်ဖို့ လိုအပ်နေသေးတယ်လို့ အမေရိကန် အစိုးရ တာဝန်ရှိသူတစ်ဦးက မနေ့မှာ ပြောကြားလိုက်ပါတယ်။

အခုနှစ် အာဆီယံ ထိပ်သီးအစည်းအဝေးကို အောက်တိုဘာ ၂၆ ရက်နေ့က ၂၈ ရက်နေ့အထိ ကျင်းပမှာပါ။ မြန်မာနိုင်ငံက မတည်ငြိမ်မှုတွေ ဖြေရှင်းရေးမှာ အာဆီယံရဲ့ အကြံပြုချက်တွေကို လိုက်နာဆောက်ရွက်ခြင်းမရှိတာ၊ အာဆီယံအထူးကိုယ်စားလှယ်နဲ့ ပူးပေါင်းဆောင်ရွက်မှု မရှိတာကြောင့် အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို အစည်းအဝေး မဖိတ်ကြားဘူးလို့ အာဆီယံက ပြီးခဲ့တဲ့တစ်ပတ်မှာ ထုတ်ပြန်ပါတယ်။

“ဒါဟာ သိသာတဲ့ ခြေလှမ်းပါ။ ပွင့်ပွင့်လင်းလင်းပြောရရင် ဒါမျိုးက မလုံလောက်သေးဘူးလို့ ကျွန်တော်တို့ ယုံကြည်ပါတယ်။ အာဏာသိမ်းပြီးနောက် မြန်မာနိုင်ငံမှာ ဖြစ်နေတဲ့ စိန်ခေါ်မှုတွေ၊ အာဏာသိမ်းမှုကြောင့် မြန်မာပြည်သူတွေ ခံစားနေရတဲ့ မကြုံစဖူး အခက်အခဲတွေကို ဖြေရှင်းရေးမှာ ပိုပြီး ကျယ်ပြန့်ထိရောက်တဲ့ ကြိုးပမ်းအားထုတ်မှုမျိုး လိုအပ်တယ်လို့ ကျွန်တော် ထင်ပါတယ်” လို့ အိမ်ဖြူတော် နိုင်ငံတော်လုံခြုံရေးကောင်စီက အရှေ့အာရှနှင့် သမုဒ္ဒရာပိုင်းဒေသ အကြီးတန်းဒါရိုက်တာ အဒ်ဂါ့ ကာဂန်က တတ်သိပညာရှင်များအဖွဲ့ Center for Strategic and International Studies က လုပ်တဲ့ အခမ်းအနားတစ်ခုမှာ ပြောကြားခဲ့ပါတယ်။

ဘယ်လိုလုပ်ဆောင်သင့်လဲဆိုတာမျိုး အသေးစိတ်ကိုတော့ သူက မပြောပါဘူး။

မြန်မာနိုင်ငံက ရင်ဆိုင်နေရတဲ့ ပြဿနာတွေကို ဖြေရှင်းရာမှာ အာဆီယံနိုင်ငံတွေနဲ့ ပြင်ပက မိတ်ဖက်နိုင်ငံတွေ ပူးပေါင်းဆောင်ရွက်ဖို့ လိုအပ်ကြောင်းလည်း ကာဂန်က ထည့်သွင်းပြောဆိုခဲ့ပါတယ်။

“မြန်မာပြဿနာဟာ သူ့ဟာသူ ဖြေရှင်းလို့ ပြီးသွားမယ့် ပြဿနာမျိုး မဟုတ်ပါဘူး။ ဒီကိစ္စအတွက် ဒေသတွင်းမှာ စိတ်ပျက်မှုတွေ၊ စိုးရိမ်စိတ်တွေ တိုးလာတယ်ဆိုတာ ထင်ရှားတယ်။ မြန်မာနိုင်ငံမှာ အုပ်ချုပ်ရေးယန္တရားက သိသိသာသာကို အားလျော့လာတယ်။ မြန်မာပြည်သူတွေကလည်း မကြုံစဖူးစိန်ခေါ်မှုတွေကို ခံစားနေရပါတယ်”

အမေရိကန်အစိုးရအကြံပေး ဒဲရစ် ခိုလက်ဦးဆောင်တဲ့ ​ကိုယ်စားလှယ်အဖွဲ့တစ်ခုလည်း အာဆီယံဒေသကို ရောက်ရှိနေပြီး အဖွဲ့ဝင်နိုင်ငံတစ်ချို့နဲ့ တွေ့ဆုံကာ မြန်မာ့အရေးဖြေရှင်းဖို့ ဆွေးနွေးခဲ့ကြပါတယ်။

စင်ကာပူဘဏ္ဍာရေးဝန်ကြီးဌာန တာဝန်ရှိသူ ဟိုဟာရှင်နဲ့ မနေ့ကတွေ့ဆုံရာမှာ မြန်မာစစ်ကောင်စီ​ နိုင်ငံရပ်ခြားက ငွေကြေးရယူဖို့ ကြိုးစားမှုကို ကန့်သတ်မယ့် နည်းလမ်းတွေအကြောင်း ဆွေးနွေးခဲ့တယ်လို့ ခိုလက်က Twitter စာမျက်နှာမှာ ရေးပါတယ်။

မနေ့က ထိုင်းနိုင်ငံကိုသွားရောက်ပြီး ထိုင်းနိုင်ငံခြားရေးဝန်ကြီးနဲ့ တွေ့ဆုံရာမှာ ခိုလက်တို့အဖွဲ့ဟာ မြန်မာနိုင်ငံက ပြဿနာတွေ ဖြေရှင်းရေး၊ စစ်တပ်က အာဏာသိမ်းပြီးနောက်ပိုင်း မြန်မာပြည်သူတွေ ရင်ဆိုင်လာရတဲ့ လူသားချင်း စာနာထောက်ထားမှုဆိုင်ရာ ပြဿနာတွေအတွက် ကူညီထောက်ပံ့ရေး ဆွေးနွေးခဲ့ကြပါတယ်။

Ref: Reuters