Blog

လက်ဝှေ့ကျော် မိုဟာမက်အလီနှင့် ပြိုင်ဘက် လစ္စတန်တို့၏ လက်အိတ် ပေါင် ၆ သိန်းကျော် လေလံရ

ဖေဖော်ဝါရီ ၂၅၊ ၂၀၁၅
M-Media

– ၁၉၆၅ ခုနှစ် ဟဲဗီးဝိတ်ချန်ပီယံလုပွဲတွင် လက်ဝှေ့ကျော် မိုဟာမက်အလီနှင့် ပြိုင်ဘက် ဆန်နီလစ္စတန်တို့ ၀တ်ဆင်ခဲ့သည့် လက်အိတ်များကို လေလံပစ်ခဲ့ရာ စတာလင်ပေါင် ၆ သိန်းကျော် ရရှိခဲ့သည်ဟု သိရသည်။

ဒါးလက်စ်အခြေစိုက် Heritage Auctions လေလံအဖွဲ့မှ ပြီးခဲ့သည့် စနေနေ့တွင် နယူးယောက်မြို့၌ လေလံပစ်ခဲ့ခြင်းဖြစ်ပြီး အမည်မဖော်လိုသူတစ်ဦးက ၀ယ်ယူခဲ့သည်ဟုဆိုသည်။

မိုဟာမက်အလီနှင့် လစ္စတန်တို့၏ အဆိုပါပွဲမှာ ၁၉၆၅ မေလ ၂၅ ရက်နေ့တွင် အမေရိကန်ပြည်ထောင်စုလီဝစ္စတန်မြို့၌ ကျင်းပပြုလုပ်ခဲ့ခြင်းဖြစ်ပြီး ပထမအချီမှာပင် နာမည်ကျော် တစ္ဆေလက်သီးဖြင့် မိုဟာမက်အလီက အနိုင်ရရှိခဲ့သည်။ ထိုပွဲမှာ မိုဟာမက်အလီ အစ္စလာမ်သာသနာကို ပြောင်းလဲသက်ဝင်ခဲ့ပြီးနောက် ပထမဆုံး ထိုးသတ်ခဲ့သည့် ပွဲလည်းဖြစ်ပြီး တစ်နှစ်အရင်က သရဖူလွှဲပေးခဲ့ရသည့် အရှုံးကို မကျေနပ်သည့် လစ္စတန်၏ မကျေပွဲလည်းဖြစ်သည်။

ထိုပြိုင်ပွဲပြီးနောက် ၎င်းတို့နှစ်ဦး၏ လက်အိတ်ကို မိန်းမြို့လက်ဝှေ့ဆိုင်ရာ မဟာမင်းကြီး ဂျော့ဂ်ျ ရူဆိုက သိမ်းထားခဲ့သည်။ ထို့နောက် ရူဆိုထံမှ ကယ်လယ်ဖိုးနီးယားရှိ ရှေးဟောင်းပစ္စည်းစုဆောင်သူတစ်ဦးက ၀ယ်ယူခဲ့ခြင်းဖြစ်ပြီး ယခုကဲ့သို့ လေလံတင်ခဲ့ခြင်းဖြစ်သည်။

၎င်းတို့၏နှစ်ဦး ၁၉၆၄ ခုနှစ်က ထိုးသတ်ခဲ့သည့်ပွဲမှ လက်အိတ်များကို ပြီးခဲ့သည့်နှစ်တွင် Heritage Auctions ကပင် လေလံတင်ခဲ့ပြီး ပေါင် ၅၄၄၃၀၀ ရရှိခဲ့သည်။ ၎င်းတို့နှစ်ဦး ထိုးသတ်ခဲ့သည့် နှစ် ၃၀ မြောက်အဖြစ် ၁၉၉၅ ခုနှစ်က ပြုလုပ်ခဲ့သော အခမ်းအနားတွင် အလီမှာ ထိုလက်အိတ်များတွင် လက်မှတ်ရေးထိုးပေးခဲ့သည်။ လစ္စတန်ကမူ ၁၉၇၀ ပြည့်နှစ်က ကွယ်လွန်ခဲ့သည်။

Ref: dailymail

February 25, 2015
IS အန္တရာယ်ကို မလျှော့သောဇွဲဖြင့် တွန်းလှန်နေကြသော အီရတ်မှ ယာဇီဒီ လူမျိုးများ

ဖေဖော်ဝါရီ ၂၅ ၊ ၂၀၁၅
M-Media

– သူမတို့၏ အိမ်ဟုခေါ်သော ရွှံ့တဲလေးမှ ခေါင်းကိုငုံ့ကာ ဘာရီတန် ဆိုဇာတစ်ယောက် အပြင်သို့ သွက်သွက်လေးထွက်လာခဲ့သည်။ အသက် ၁၈ နှစ်အရွယ်သာရှိသေးသည့် သူမက ပခုံးသိုင်းလွယ်ထားသော ကာလာရှင်ကော့ဗ် ရိုင်ဖယ်ကို လက်မှ လွတ်မကျရန် တင်းတင်း ကျပ်ကျပ်လေး ဆုပ်ကိုင်ထားသည်။ အဆိုပါရိုင်ဖယ်မှာ လွန်ခဲ့သည့် ၃ လက ဆင်ဂျာကာကွယ်ရေးတပ်ဖွဲ့ YBS မှ ပေးထားခြင်းဖြစ်သည်ဟု သူမက ဆိုလေသည်။ ထိုအချိန်မှစ၍ ဆိုဇာတစ်ယောက် အသိနှင့် သတိ မလွတ်ခဲ့တော့။

ဆင်ဂျာတောင်ကုန်းတွင် အခြေဆိုက်သော ယာဇီဒီပြည်သူ့စစ် ၆၀၀ ရှိသည့် YBS တပ်ဖွဲ့တွင် စေတနာ့ဝန်ထမ်းအဖြစ် ၀င်ရောက် တိုက်ခိုက်ရခြင်းမှာ မိမိ၏ ခံစားချက်ကို ထိန်းချုပ်လာနိုင်သည်ဟု ဆိုဇာက ဆိုလေသည်။ နိုင်နီဗဟ် ပြည်နယ်ရှိ ဆင်ဂျာဒေသကို ISIL အဖွဲ့က သိမ်းပိုက်ခဲ့သည့် ပြီးခဲ့သည့်နှစ် သြဂုတ်လကတည်းက သိန်းနှင့်ချီသော ယာဇီဒီလူမျိုးများမှာ အိုးအိမ်စွန့်ခွာ ထွက်ပြေးခဲ့ရသည်။

“ကျွန်မဟာ သားကောင် မဟုတ်တော့ပါဘူး။ ယာဇီဒီလူမျိုးတွေအပေါ် ကျရောက်ခဲ့တဲ့ ဒီဘေးအန္တရာယ်က ကျွန်မတို့ကို အားအင်တွေ ပိုရှိစေခဲ့ပါတယ်။ အခုတော့ ကျွန်မတို့ဟာ ဘယ်သူအကူအညီမှ မလိုအပ်တော့ဘူးဆိုတာ သိခဲ့ပါပြီ။ ဘာ့ကြောင့်လည်းဆိုတော့ ကျွန်မတို့ ကိုယ့်ခြေထောက်ပေါ် ရပ်တည်နိုင်နေပြီလေ” ဟု ဆိုဇာက ဆိုလေသည်။

အီရတ်နိုင်ငံ၏ တိုင်းရင်းသားလူမျိုးတစ်မျိုးဖြစ်သည့် ယာဇီဒီလူမျိုးများမှာ ဇိုရိုအက်စတာဝါဒကို အခြေပြုသော မက်ဆိုပိုတေးမီးယားမှ ရှေးဟောင်း အယူဝါဒကို ယုံကြည်ကိုးကွယ်ကြသူများဖြစ်သည်။ ISIL ကတော့ ၎င်းတို့အား “မကောင်းဆိုးဝါးကို ကိုးကွယ်သူများ” ဟု သတ်မှတ်ကာ ပစ်မှတ်ထား တိုက်ခိုက်ခဲ့ကြသည်။

ISIL ၎င်းတို့ဒေသအား ၀င်ရောက်တိုက်ခိုက်ခဲ့သည့် ပထမဆုံးနေ့မှာပင် ဆိုဇာနှင့်သူမ၏ မိသားစုမှာ အခြားသော ယာဇီဒီလူမျိုး ထောင်ပေါင်းများစွာနှင့် အတူ ဆင်ဂျာတောင်ပေါ်သို့ ထွက်ပြေးခဲ့သည်။ ဒေသတွင်းမှ ကာ့ဒ်တပ်ဖွဲ့ဝင်များက ကာကွယ်ခဲ့ကြသော်လည်း အင်အား မမျှသောကြောင့် နောက်ပိုင်းတွင် ပြန်ဆုတ်ခဲ့ရပြီး ယာဇီဒီလူမျိုးများကတော့ ကာကွယ်ပေးမည့်သူမရှိ ဖြစ်ခဲ့ရသည်။

မိမိတို့ ကာကွယ်ရေးအတွက် ပြင်ပအင်အားတစ်ခုတည်းကိုသာ အားမကိုးရန် ဆုံးဖြတ်ခဲ့ပြီးသည့်နောက်တွင်တော့ ဆင်ဂျာတောင်ကုန်းရှိ ယာဇီဒီပြည်သူများက ၎င်းတို့၏ ကိုယ်ပိုင် ကာကွယ်ရေးတပ်ဖွဲ့ကို စတင်ဖွဲ့စည်းခဲ့သည်။ YBS တိုက်ခိုက်ရေးသမာများမှာ ဆီးရီးယားမြောက်ပိုင်း ကာ့ဒ်ပြည်သူ့စစ် တပ်ဖွဲ့ဖြစ်သော ပြည်သူကာကွယ်ရေးတပ် YPG၊ တူရကီဘက်မှ ကာ့ဒ်အလုပ်သမားပါတီ PKK တပ်ဖွဲ့များနှင့်အတူ လေ့ကျင်ခဲ့ကြသည်။

ဆင်ဂျာတောင်ကုန်းတစ်ဝိုက်ရှိ တဲငယ်လေးများတွင် ယာဇီဒီလူမျိုး ၁၀၀၀၀ ခန့်မှာ နေထိုင်နေရပြီး ISIL က ထိန်းချုပ်ထားသော ဒေသများကို စီး၍ မြင်နေရသည်။ ၎င်းတို့ထဲမှ ရော့ဂ်ဟာ ဟာဘာဘီဆိုသည့် တပ်ဖွဲ့ဝင်တစ်ယောက်က ဆင်ဂျာဒေသရှိ သူ၏မိသာစုတဲမှ မီးခိုများ အလိပ်လိုက်တက် သွားသည်ကို စောင့်ကြည့်နေသည်။ တောင်အောက်ခြေမှ ပေါက်ကွဲသံကြီး ကလည်း ပဲ့တင်ထပ်သွားသည်။ သို့သော်လည်း ထိုပေါက်ကွဲမှုက ၎င်းတို့ကို မတုန်လှုပ်စေတော့။ ထိုအရာမျိုးမှာ ပုံမှန်ဖြစ်သွားပြီဟု ဟာဘာဘီက ဆိုလေသည်။

ဆင်ဂျာတောင်ကုန်းအောက်ပိုင်းရှိ လမ်းများတွင် တိုက်ခိုက်မှုများ မရှိသည့်အခါ သူနှင့် သူ၏ YBS တပ်ဖွဲ့ဝင်များက တောင်ကုန်း တစ်ဝိုက်တွင် ကင်းလှည့်စောင့်ကြပ်ကြသည်ဟု ဟာဘာဘီက ပြောသည်။

“သူတို့ (ISIL) တွေဟာ အရိုင်းအစိုင်းတွေပါ။ ကားဗုံးခွဲတာမျိုး၊ အသေခံတိုက်ခိုက်တာမျိုးကို မှီခိုနေကြပါတယ်” ဟု ၎င်းက ထပ်လောင်းပြောကြားခဲ့သည်။

YBS တပ်ဖွဲ့ဝင်များမှာ နည်းလမ်းတကျဖွဲ့စည်းထားသည့် အဖွဲ့အစည်းမျိုးမဟုတ်။ အဆီအငေါ်မတည့်သည့် စစ်ဘက်ဆိုင်ရာဝတ်စုံနှင့် ပစ္စည်းကိရိယာများ ၀တ်ဆင်ထားသော လူငယ်အမျိုးသမီးများနှင့် အမျိုးသားများမှာ တဲတစ်ခုမှတစ်ခုသို့ ရွေ့လျား သွားလာနေကြသည်။ လက်နက်ခဲယမ်းထည့်ထားသော ခါးပတ်ကို ခန္ဓာကိုယ်တွင် ပတ်ထားသည့် လူငယ်တစ်ယောက်က ရေပုံးများကို တဲအတွင်းသို့ သယ်လာပြီး စက်သေနက်တစ်လက်ကိုလည်း ကျောတွင်လွယ်ထားသည်။

YBS မှ လူငယ်တိုက်ခိုက်ရေးသမားများမှာ ယာဇီဒီ ဒီမိုကရက်တစ်လှုပ်ရှားမှု TEVDA ၏ ခေါင်းဆောင် စအီးဒ် ဟာဆန်၏ လမ်းညွှန်မှုအောက်တွင် အဆိုပါ တဲများ၌ စုးစည်းနေထိုင်နေရခြင်း ဖြစ်သည်း YBS ပြည်သူ့စစ်များအား TEVDA မှပင် စပွန်ဆာပေးထား၏။

စအီးဒ်ကိုယ်တိုင်မှာလည်း ထောင်ကုန်းပေါ်တွင် နေသူဖြစ်ပြီး YBS မှာ အီရတ်ရှိ ယာဇီဒီလူ့အဖွဲ့အစည်းအတွက် ပိုမိုကောင်းမွန်သော အနာဂတ်ဆီသို့ လျှောက်လှမ်းရန် ပထမဆုံးခြေလှမ်းပင်ဖြစ်သည်ဟု ၎င်းက ယုံကြည်နေသည်။ ယာဇီဒီပြည်သူများအနေဖြင့် ၎င်းတို့၏ ကိုယ်ပိုင်အစိုးရ လိုအပ်သည်ဟု စအီးဒ်ကဆိုပြီး YBS ကာကွယ်ရေးတပ်ဖွဲ့နှင့်အတူ ဆင်ဂျာရှိ ယာဇီဒီကိုယ်ပိုင်အုပ်ချုပ်ခွင့်ရဒေသ အတွက် တောင်းဆိုထားသည်။

“ကျွန်တော်တို့ ယာဇီဒီဒေသ လိုချင်ပါတယ်။ ပြီးတော့ အဲဒီဒေသကို ကာကွယ်ပေးမယ့် YBS တပ်ဖွဲ့ကိုလည်း လိုချင်ပါတယ်။ YBS နဲ့ပတ်သက်လို့ အခု ကျွန်တော်တို့ စဉ်စားနေတာက ဒီအဖွဲ့ ဒီထက်ပိုကြီးလာဖို့ပါ။ ဒီမှာရှိတဲ့လူအကုန်လုံးက အနာဂတ်မှာ ယာဇီဒီလူမျိုးတွေနဲ့ ဆင်ဂျာဒေသကို ကာကွယ်ဖို့ ဒီမှာ ရှိပါလိမ့်မယ်။ ဒီမြေနဲ့ ကျွန်တော်တို့ရဲ့ အယူဝါဒကို ကာကွယ်ဖို့ ကျွန်တော်တို့ စစ်တပ်တစ်တပ် လိုချင်ပါတယ်” ဟု စအီးဒ်က ဆိုလေသည်။

ဗီယင်နာတက္ကသိုလ်မှ ပါမောက္ခတစ်ဦးဖြစ်သူ သောမက်စ် ရှမစ်ဒင်ဂါ၏ အဆိုအရ ယာဇီဒီ ကိုယ်ပိုင်အုပ်ချုပ်ခွင့်ရဒေသ ဖြစ်ပေါ်လာရေး လှုပ်ရှားမှုက ISIL အား တန်ပြန်တိုက်ခိုက်ခြင်းနှင့် ပြီးခဲ့သည့်နှစ် သြဂုတ်လက ကာ့ဒ်တပ်ဖွဲ့များ ဆင်ဂျာဒေသအား စွန့်ခွာသွားပြီးနောက်ပိုင်း ပိုအားကောင်းလာသည်ဟု ဆိုသည်။

“ယာဇီဒီကိုယ်ပိုင်အုပ်ချုပ်ခွင့်ရဒေသ ကိစ္စနဲ့ပတ်သက်လို့ ယာဇီဒီလူ့အဖွဲ့အစည်းအတွင်းမှာ မတူညီရဲ့ သဘောထား အမြောက်အများ ရှိနေပါတယ်။ ဒါပေမယ့် ထင်ရှားတာတစ်ခုကတော့ သြဂုတ်လကတည်းက ယာဇီဒီလူမျိုး တော်တေ်ာများများဟာ ကာ့ဒ်တွေနဲ့ ပိုပြီးကွာဟသွားပြီလို့ ယူဆခဲ့ကြပါတယ်။ ပြီးတော့ ကာ့ဒ်ဒေသ အစိုးရအဖွဲ့နဲ့အတူ ဒါမှတ်ဟုတ် အီရတ်ရဲ့ နယ်နမိတ်ကခွဲထွက်ပြီး သီးခြား ကိုယ်ပိုင်အုပ်ချုပ်ခွင့်ရ ဒေသကို ထူထောင်ချင်ခဲ့ကြပါတယ်” ဟု ရှမစ်ဒင်ဂါက ပြောကြားခဲ့သည်။

YBS တပ်ဖွဲ့ တည်ရှိနေခြင်းက ယာဇီဒီလူ့အဖွဲ့အစည်းအား ကာကွယ်နိုင်ရေး ခြေလှမ်းတစ်ရပ်ဖြစ်သည်ဟု ရှမစ်ဒင်ဂါက ထည့်သွင်းပြောကြား ခဲ့ပြီး ကိုယ်ပိုင်အုပ်ချုပ်ခွင့်ရဒေသအတွက်လည်း အရေးပါသည့် ခြေလှမ်းဟု ဆိုခဲ့သည်။ ဟာဘာဘီကတော့ ထိုမျှော်လင့်ချက် အမှန်တကယ်ဖြစ်လာရေးအတွက် ရင်ဆိုင်သွားရန် ဆန္ဒရှိသည်ဟု ဆိုလေသည်။

“အရင်ကတော့ ကျွန်တော်ဟာ ကျောင်းသားပါ။ ဒါပေမယ့် အခုတော့ တိုက်ခိုက်ရေးသမားတစ်ယောက် ဖြစ်နေပါပြီ။ ဒါမျိုးဖြစ်လာမယ်လို့ စိတ်တောင် မကူးခဲ့ပါဘူး။ ဒါပေမယ့် ကျွန်တော်တို့လူမျိုးတွေ လိုအပ်သမျှ ကာလပတ်လုံး တိုက်ခိုက်ရေးသမားတစ်ယောက်အနေနဲ့ ဆက်ရှိသွားမှာပါ”

Ref: aljazeera
လေးမောင် ဘာသာပြန်သည်။

February 25, 2015
အလ်ရှာဘတ်၏ ခြိမ်းခြောက်မှု အမေရိကန်ရှိ ဆိုမာလီလူ့အဖွဲ့အစည်း ရှုတ်ချ

ဖေဖော်ဝါရီ ၂၅၊ ၂၀၁၅
M-Media

– မွတ်စလင်များအား ကိုယ်စားပြုခြင်းမရှိသည့် ဆိုမာလီမှ အလ်ရှာဘတ်အဖွဲ့ကို ငြင်းပယ်လျက် ၎င်းအဖွဲ့၏ ဥရောပနှင့် အမေရိကန်ရှော့ပင်းမောလ်များကို တိုက်ခိုက်မည်ဟု ခြိမ်းခြောက်ပြောဆိုမှုများအား အမေရိကန်ပြည်ထောင်စု မင်နီဆိုတာရှိ ဆိုမာလီအမေရိကန်အသိုင်းအ၀ိုင်းနှင့် မွတ်စလင်အသိုင်းအ၀ိုင်းတို့က ရှုတ်ချပြောဆိုလိုက်သည်။

“မင်နီဆိုတာနဲ့ အမေရိကန်အားလုံးရဲ့ ဘေးအန္တရာယ်ကင်းရှင်းရေးနဲ့ လုံခြုံရေးဟာ ဆိုမာလီအမေရိကန်တွေအတွက် အရေးအကြီးဆုံး ကိစ္စတစ်ခု ဖြစ်ပါတယ်။ ကျွန်တော်တို့အနေနဲ့ အကြမ်းဖက်မှုပုံစံအားလုံး၊ အကြမ်းဖက်ခြိမ်းခြောက်မှုအားလုံးကို ရှုတ်ချပြီး၊ ဒီလိုတိုက်ခိုက်မှုမျိုး ပြုလုပ်မယ့် ဒါမှမဟုတ် ဒီလို ခြိမ်းခြောက်မှုမျိုးပြုလုပ်တဲ့ ဘယ်လိုအဖွဲ့မျိုးကိုမဆို ကျွန်တော်တို့ ငြင်းပယ်ပါတယ်။ ဘာသာရေး ဒါမှမဟုတ် နိုင်ငံရေး အစွန်းရောက်မှုကို နှိမ်နှင်းရာမှာ ရှေ့တန်းကရှိနေဖို့လည်း စိတ်ပိုင်းဖြတ်ထားပါတယ်” ဟု
မင်နီဆိုတာ ဆိုမာလီ မွတ်စလင်လူ့အဖွဲ့အစည်းမှ ထုတ်ပြန်သော ကြေညာချက်တွင် ဖော်ပြထားသည်။

အဆိုပါကြေညာချက်မှာ အလ်ရှာဘတ်အဖွဲ့က အနောက်နိုင်ငံများမှ ရှော့ပင်းမောလ်များအား တိုက်ခိုက်ရန် တိုက်တွန်းသည့် ၇၅ မိနစ်ကြာ ဗီဒီယို ထွက်ရှိပြီးနောက်ပိုင်း ထုတ်ပြန်ခဲ့ခြင်းလည်းဖြစ်သည်။

အလ်ရှာဘတ်၏ အဆိုပါဗီဒီယိုတွင် ရှော့ပင်းမောလ်များ၏ အမည်များ အထူးသဖြင့် မင်နီဆိုတာပြည်နယ် ဘလူမင်တန်ရှိ Mall of America ၏ အမည်ကိုလည်း ဖော်ပြထားပြီး လူပေါင်း ၆၀ ကျော် သေဆုံးခဲ့သော ကင်ညာနိုင်ငံ နိုင်ရိုဘီရှိ ရှော့ပင်းမောလ် တိုက်ခိုက်မှုမှာလည်း ၎င်းတို့၏ လက်ချက်ဖြစ်သည်ဟု ၀န်ခံခဲ့သည်။

အဆိုပါဗီဒီယို ထွက်ပေါ်လာပြီးနောက်ပိုင်းတွင် အမေရိကန်မွတ်စလင်ခေါင်းဆောင်များနှင့် ဆိုမာလီလူ့အဖွဲ့အစည်းများက ဒေသအတွင်းရှိ ရှေ့ဆောင်အီမာမ်များနှင့် တွေ့ဆုံခဲ့ပြီး အဆိုပါ ခြိမ်းခြောက်မှုကို ရှုတ်ချခဲ့ကြသည်။

“ကျွန်တော်တို့ သတိဝိရိယနဲ့ ရှိနေမှာဖြစ်ပြီး ကြောက်ရွံ့မှု ဒါမှမဟုတ် ထိတ်လန့်မှုတွေ ပြန့်နှံ့ဖို့ဆိုတဲ့ အကြမ်းဖက်အုပ်စုရဲ့ ရည်ရွယ်ချက်ကို ကျွန်တော်တို့ လုံးဝ ခွင့်ပြုသွားမှာ မဟုတ်ပါဘူး။ နောက်ပြီး အမုန်းတရားတွေ၊ မလိုမုန်းထားမှုတွေနဲ့ လူ့အဖွဲ့အစည်းတစ်ခုလုံးကို သံသယဖြစ်မှုတွေ တိုးလာဖို့ ဥပါတယ်တံမျဉ်တစ်ခုအဖြစ် အသုံးချနေခြင်းကနေလည်း ကျွန်တော်တို့ တားဆီးရပါမယ်။ နိုင်ငံတစ်နိုင်ငံအနေနဲ့ဆိုရရင် ကျွန်တော်တို့ဟာ ပိုမိုပြင်ဆင်ထားပြီး ကျွန်တော်တို့ရဲ့ လူ့အဖွဲ့အစည်းတွေ
လုံခြုံရေးအတွက် အတူတကွဆောင်ရွက်ရာမှာ ပိုပြီးတော့ ပေါင်းစည်းမှုရှိပါတယ်” ဟု အမေရိကန်-အစ္စလာမ် ဆက်ဆံရေးအသင်း၏ မင်နီဆိုတာ အဖွဲ့ခွဲမှ ထုတ်ပြန်သော ကြေညာချက်တွင် ဖော်ပြထားသည်။

မင်နီဆိုတာမှာ အမေရိကန်တွင် ဆိုမာလီပြောင်းရွှေ့အခြေချသူ အများအပြားရှိသည့် နေရာလည်းဖြစ်သည်။ ပြီခဲ့သည့် ရက်အနည်းငယ်အရင်က အမေရိကန်ဘဏ်များအနေဖြင့် ဆိုမာလီဘဏ်များသို့ ငွေကြေးလွှဲပြောင်းမှု ကိုင်တွယ်နေခြင်းအား ရပ်ဆိုင်းရန် အမေရိကန်အစိုးရက အမိန့်ထုတ်ခဲ့သည်။

အမေရိကန်အစိုးရကမူ ထိုကဲ့သို့ ဆောင်ရွက်ခြင်းမှာ အရှေ့အာဖရိကနိုင်ငံများတွင် တည်ရှိသော အကြမ်းဖက်အဖွဲ့အစည်းများအား ရန်ပုံငွေထောက်ပံ့နေမှုများကို ရပ်တန့်ရန် ဆောင်ရွက်ခြင်းဟု ပြောကြားခဲ့သည်။

အစ္စလာမ်မဟုတ်

အလ်ရှာဘတ်၏ အဆိုပါခြိမ်းခြောက်မှုက အစ္စလာမ်နှင့် မည်သို့မှ သက်ဆိုင်ခြင်းမရှိဟု မွတ်စလင်ခေါင်းဆောင်များက အတည်ပြုပြောဆိုခဲ့သည်။

“အခုအချိန်မှာ ကျွန်တော်တို့ လူ့အဖွဲ့အစည်း ကြောက်ရွံ့မှု ဒါမှမဟုတ် ထိတ်လန့်မှုတွေ ဖြစ်စေပြီး ဒီအကြမ်းဖက်အဖွဲ့တွေ အနိုင်မရစေချင်ပါဘူး။ ကျွန်တော်တို့လူ့အဖွဲ့အစည်းအားလုံး အတူတကွစုပေါင်းပြီး ဒီအဖွဲ့အစည်းတွေဟာ ဘယ်လိုအယူဝါဒ၊ ဘယ်လိုအုပ်စုကိုမှ ကိုယ်စားမပြုဘူးဆိုတာကို အသိအမှတ်ပြုဖို့ အရေးကြီးပါတယ်” ဟု အမေရိကန်-အစ္စလာမ် ဆက်ဆံရေးကောင်စီ မင်နီဆိုတာ ဌာနခွဲမှ အမှုဆောင်ဒါရိုက်တာဖြစ်သူ ဂျေလာနီဟူစိန်က ပြောကြားခဲ့သည်။

မင်နီဆိုတာရှိ ဆိုမာလီအသင်း၏ အမှုဆောင်ဒါရိုက်တာဖြစ်သူ မိုဟာမက်နူးရ်ကလည်း မိမိအနေဖြင့် Mall of America ကို မိသားစုဖြင့် ပုံမှန်သွားရောက်လေ့ရှိပြီး မိသားစုကိုလည်း နိုးနိုးကြားကြားရှိနေရန် တိုက်တွန်းထားသော်လည်း မကြောက်ရွံ့ရန် အားပေးထားသည်ဟုဆိုသည်။ ထို့ပြင် နူးရ်က မိမိတို့လူ့အဖွဲ့အစည်းမှာ ကြံ့ကြံ့ခံနိုင်ပြီး၊ ပိုမိုအားကောင်းလာစေရန် အာရုံစိုက်သွားမည်ဖြစ်ကာ နိုင်ငံရေးအစွန်းရောက်မှုကိုလည်း ပူးပေါင်း ဆန့်ကျင်သွားမည်ဟု ထည့်သွင်းပြောကြားခဲ့သည်။

“အလ်ရှာဘတ်ဆိုတဲ့အဖွဲ့ဟာ ကျွန်တော်တို့ကို ကိုယ်စားမပြုပါဘူး။ သူတို့ဟာ ကြောက်ရွံ့မှုတွေ ဖန်တီးဖို့ ကြိုးစားနေတာဖြစ်ပြီး သူတို့တစ်ပန်းသာအောင် လူ့အဖွဲ့အစည်းကို ခွဲထုတ်နေတာပါ။ Mall of America ဘေးကင်းရေးဟာ ကျွန်တော်တို့ရဲ့ ဘေးကင်းရေးပါပဲ။ ” ဟု နူးရ်က ထပ်လောင်းပြောကြားခဲ့သည်။

အဆိုပါ ရှော့ပင်းမောလ်ကို ပုံမှန်သွားနေသည့် မိမိတို့မိသားစုမှာ အလ်ရှာဘတ်၏ ခြိမ်းခြောက်မှုကြောင့် ရပ်တန့်သွားမည်မဟုတ်ဘဲ သွားမြဲသွားနေမည်ဖြစ်ကြောင်း အလ်ရှာဘတ်၏ အကြောက်တရား ထည့်သွင်းပေးသည့်နည်းလမ်းအောက်သို့ ရောက်မသွားစေရန် လူတိုင်းကို တိုက်တွန်းထားကြောင်း ၎င်းက ဆိုသည်။

Ref: onislam

February 25, 2015
သဘာဝကိုအန်တုရင်း ရှုံးနိမ့်ခဲ့ရသူ (သို့) မိုက်ကယ်ဂျက်ဆင်

ဖေဖော်ဝါရီ ၂၄ ၊ ၂၀၁၅
M-Media

ကမ္ဘာကျော်အဆိုတော်ဖြစ်ပြီး ပေါ့ဂီတရဲ့ ဖခင်ကြီးလို့ တင်စားကြတဲ့ မိုက်ကယ်ဂျက်ဆင်ရဲ့ ကျော်ကြားမှုနောက်ကွယ်မှာ စိတ်ဝင်စားစရာ အကြောင်းအရာတွေ ရှိနေပါတယ်။ အသားမည်းမည်း နှုတ်ခမ်းထူထူ၊ နှာခေါင်းကြီးကြီးနဲ့ လူမည်းလူငယ်တစ်ယောက် နတ်ရေကန်ထဲ ဆင်းလိုက်သည့်အလား နှစ်အနည်းငယ်အတွင်းမှာ ပုံပန်းသွင်ပြင် လုံးဝပြောင်းလဲသွားတဲ့အတွက် လူတိုင်းက အံ့အားသင့်ခဲ့ရပါတယ်။

သူ့ရဲ့ ပုံပန်းသွင်ပြင်ပြောင်းလဲမှုဟာ အမေရိကန် နာမည်ကြီးအဆိုတော်၊ ရုပ်ရှင်မင်းသမီးနဲ့ တေးရေး ဒိုင်ယာနာရို့စ်နဲ့ တူချင်တာကြောင့်လို့ သူ့ရဲ့ မိတ်ဆွေတစ်ချို့က ဆိုကြပြီး တစ်ချို့ကတော့ ဖခင်ကိုမုန်းတာကြောင့် ဖခင်နဲ့တူတဲ့ သူ့ရဲ့ ပုံပန်းသွင်ပြင်ကို ပြောင်းလဲလိုက်တာလို့ ပြောကြပါတယ်။
အသားအရေ၊ နှာခေါင်း၊ နှုတ်ခမ်း၊ မျက်ခုံး၊ ပါး၊ မေးစေ့ စတဲ့နေရာတွေ ကို သူလိုချင်တဲ့ ပုံစံအတိုင်းဖြစ်အောင် ငွေတွေသောက်သောက်လဲ အကုန်ခံကာ အစားထိုးခွဲစိတ်တာတွေ လုပ်ခဲ့ပါတယ်။ ဒါပေမယ့် ဂီတလောကကို တစ်ခေတ်ဆန်းစေခဲ့တဲ့ မိုက်ကယ်ဂျက်ဆင် တစ်ယောက် ပုံပန်းသွင်ပြင်ပြောင်းလဲတဲ့နေရာမှာတော့ အောင်မြင်မှု မရခဲ့ပါဘူး

ခွဲစိတ်မှုပေါင်း ၁၀၀ ကျော်ပြုလုပ်ပြီးတဲ့ နောက်ဆုံးမှာတော့ မသေသပ်တဲ့ ခွဲစိတ်မှုတွေနဲ့ ဆေးထိုးမှုတွေကြောင့် ပျက်ဆီးသွားတဲ့ နှာခေါင်းကို ပြုပြင်ဖို့အတွက် မိုက်ကယ်ဟာ စိတ်ပျက်စွာနဲ့ ကြိုးစားခဲ့ရပါတယ်။

သူစိတ်ကူးထားတဲ့ ပုံပန်းသွင်ပြင်ရဖို့ နှစ်ပေါင်း ၃၀ လောက် ကြိုစားခဲ့ပေမယ့်လည်း မိုက်ကယ်ဂျက်ဆင်ဟာ ကော်စမက်တစ် ဆာဂျရီကြောင့် ဘေးတွေ့ခဲ့သူ တစ်ဦးသာ ဖြစ်ခဲ့ပါတယ်။

သူ့ရဲ့ ခန္ဓာကိုယ်ခွဲစိတ်မှုနဲ့ပတ်သက်တဲ့ မှတ်တမ်းရုပ်ရှင်တစ်ခုမှာ မိုက်ကယ်က သူဟာ ပထမဦးဆုံး နှာခေါင်း ခွဲစိတ်စဉ်တုန်းက အရမ်းတုန်လှုပ်ခဲ့ပြီး အမဖြစ်သူ လာတိုယာကို သူ့အတွက် အရင်အစမ်းသပ်ခံပေးဖို့ သွေးဆောင်ခဲ့သေးတယ်လို့ ဖွင့်ဟခဲ့ပါတယ်။

အသက် ၅၈ နှစ်အရွယ်ရှိပြီဖြစ်တဲ့ လာတိုယာက ဒါနဲ့ပတ်သက်ပြီး ဒီလိုပြောပါတယ်။

“သူက နှာခေါင်းကို ပြင်ချင်တယ်.. ပြီးတော့ ကျွန်မကို ‘ဘယ်လိုထင်လဲ’ လို့ တစ်မေးတည်းမေးနေတယ်။ ကျွန်မက – ‘မိုက်ကယ် – ဒါကို နင်တကယ်လုပ်ချင်ရင် နင်စိတ်ချမ်းသာလိမ့်မယ်။ လုပ်လိုက်စမ်းပါ’ လို့ ပြောခဲ့တယ်။ သူက ကျွန်မကို ‘အစ်မက ကျွန်တော့်အတွက် အစမ်းသပ်ခံပေးပါလား။ အစ်မနှာခေါင်းအရင်ပြင်ကြည့်ပြီး ဘယ်လိုပုံစံဖြစ်မလဲဆိုတာ ကျွန်တော်ကြည့်မယ်လေ။ နာမလားလို့ပေါ့’ လို့ ပြန်ပြောခဲ့တယ်”

လာတိုယာ နှာခေါင်းပြင်တာကို စိတ်တိုင်းကျသွားတဲ့ မိုက်ကယ်တစ်ယောက် ၁၉၇၉ ခုနှစ်မှာ သူ့ရဲ့ နှာခေါင်းကို ပြုပြင်ခဲ့ပါတယ်။

နောက်ထပ် ၇ နှစ်အကြာမှာတော့ မိုက်ကယ်ဟာ ပလက်စတစ်ဆာဂျရီကို ခုံမင်သူဖြစ်တဲ့ သူ့ရဲ့သူငယ်ချင်း ဟောလီးဝုဒ် ဆံပင်ပညာရှင် စတီဗ် အာရ်ဟာ့ဒ်ကို မေးစေ့မှာ အချိုင့်ရာဖြစ်အောင် ခွဲစိတ်ဖို့ သွေးဆောင်ခဲ့ပါတယ်။

အာရ်ဟာ့ဒ်က သူ့အနေနဲ့ ကာ့က်ဒေါက်ဂလပ်စ်လိုမျိုး ယောက်ျားပီသတဲ့သူရဲ့ မေးစေ့ကို လိုချင်တယ်လို့ မိုက်ကယ်ရဲ့ ခွဲစိတ်ဆရာဝန်ကို ပြောခဲ့ပါတယ်။ အာရ်ဟာ့ဒ်ရဲ့ မေးစေ့အသစ်ကိုမြင်ပြီးတဲ့နောက်မှာတော့ မိုက်ကယ်ဟာ အဲဒီလို မေးစေ့မျိုးရဖို့ အကြိမ်ပေါင်းများစွာ ခွဲစိတ်မှုတွေ ပြုလုပ်ခဲ့ပါတယ်။

ခွဲစိတ်မှုလုပ်ဖို့ စောစောပိုင်းမှာ တုန်လှုပ်ခဲ့ပေမယ့် မိုက်ကယ်ဂျက်ဆင်ဟာ အသားအရေ ချောမွတ်နုပျိုအောင်ဆေးထိုးတာ၊ အရေပြားအရောင်ချွတ်တာ၊ ပါးအစားထိုးတာနဲ့ ထူထဲတဲ့နှုတ်ခမ်းကို ပြုပြင်တာတွေလည်း လုပ်ခဲ့ပါသေးတယ်။ ဒါတင်မကသေးဘဲ သူ့ရဲ့ ကြီးမားတဲ့နှာခေါင်းကို ပြုပြင်ခဲ့ပြီး အဲဒီပြုပြင်မှုကြောင့် အသက်ရှူရ ခက်ခဲလာပါတော့တယ်။

ခန္ဓာကိုယ် မူမမှန်မှုကို ကုသပေးတဲ့ ကျွမ်းကျင်ဆရာဝန် ဒေါက်တာ အီဒါ ဂေါ်ဘစ်က မိုက်ကယ်ဂျက်ဆင်ရဲ့ မူမမှန်တော့တဲ့ ပုံပန်းသွင်ပြင်ကိုကြည့်ပြီး မိုက်ကယ်ဟာ သူ့ရဲခန္ဓာကိုယ်ပုံပန်းသွင်ပြင်ကို ပြုပြင်ဖို့ အကြိမ် ၁၀၀ လောက် ခွဲစိတ်မှုတွေကို ပြုလုပ်ခဲ့တယ်လို့ ဆိုခဲ့ပါတယ်။

နောက်ဆုံးမှာတော့ မိုက်ကယ်ဂျက်ဆင်ရဲ့ မူလ ပုံပန်းသွင်ပြင်နဲ့ သူ့အမျိုးအနွယ်ရဲ့ပုံရိပ်ဟာလည်း လုံးဝ ပျောက်ပျက်သွားခဲ့ပါတော့တယ်။

မှတ်တမ်းရုပ်ရှင်ရဲ့နောက်ဆုံးမှာ မိုက်ကယ်ရဲ့ မူလပုံပန်းသွင်ပြင်ကို ကွန်ပျူတာနဲ့ တွက်ချက်ပြီး ယခုအချိန်မှာ ဘယ်လိုပုံစံမျိုးရှိနေမလဲဆိုတဲ့ဓာတ်ပုံကို ပြတဲ့အခါမှာတော့ မိုက်ကယ်တစ်ယောက် သူ့ရဲ့ပုံပန်းသွင်ပြင်ကို မပြင်ခဲ့ဘူးဆိုရင် အခုအချိန်မှာ တည်ကြည်တဲ့မျက်နှာထား၊ နွေးထွေးတဲ့အပြုံးနဲ့ ဆွဲဆောင်မှုရှိတဲ့ လူမည်းတစ်ယောက် ဖြစ်နေနိုင်မှာပါပဲ……..

– ၁၉၇၇ – အသက် ၁၉ နှစ်သာရှိသေးတဲ့ မိုက်ကယ်ဂျက်ဆင်တစ်ယောက် အဲဒီအချိန် အမေရိကန်မှာ နာမည်ကျော်နေတဲ့ အဆိုတော်အဖွဲ့ Jackson 5 နဲ့အတူ ဂီတကြယ်ပွင့်ဖြစ်လာပြီး တစ်ကိုယ်တော်ဖျော်ဖြေမှုကို စတင်ဖန်တီးတော့မယ့် အချိန်လည်းဖြစ်ပါတယ်။ ဒါပေမယ့် တစ်ချိန်တည်းမှာပဲ မိုက်ကယ်ဟာ သူ့ရဲ့ ပုံပန်းသွင်ပြင်နဲ့ ပတ်သက်လို့လည်း စိတ်ပျက်စ ပြုလာခဲ့ပါတယ်။ ဒါနဲ့ပတ်သက်ပြီး သူက “ကျွန်တော့်မှာ ၀က်ခြံတွေ ဆိုးဆိုးဝါးဝါးထွက်နေပြီး ကျွန်တော် သိပ်ရှက်ပါတယ်။ ကျွန်တော် နေ့တိုင်း မျက်ရည်ကျရပါတယ်” လို့ နောက်ပိုင်းမှာ ဖွင့်ဟခဲ့ပါတယ်။ တကယ်တော့ ဒီဝေဒနာဟာ မိုက်ကယ်ရဲ့ မျက်နှာတစ်ခုလုံးကို ဖုံးလွှမ်းသွားပါတယ်။ အမဖြစ်သူ လာတိုယာက မိုက်ကယ်ဟာ သူ့ရဲ့ နှာခေါင်းအတွက်လည်း သောကရောက်နေကာ “သိပ်ကြီးနေ တယ်။ ဒါကို ပြင်ချင်တယ်” ဆိုပြီး ပြောခဲ့တယ်လို့ ဖွင့်ဟခဲ့ပါတယ်။

၁၉၇၉ – အသက် ၂၀ ရှိပြီး ယုံကြည်မှုပိုရှိလာတဲ့ မိုက်ကယ်ဂျက်ဆင်ဟာ သူ့ရဲ့နှာခေါင်းအသစ်ကို ပြသခဲ့ပြီးပိုသေးတဲ့နှာခေါင်းကို လိုချင်တယ်လို့လည်း ရှက်ရှက်နဲ့ဝန်ခံခဲ့ပါတယ်။ အကလေ့ကျင့်နေတုန်း ပြုတ်ကျပြီး နှာခေါင်းရိုးကျိုးသွား ခဲ့တဲ့နောက်မှာ နှာခေါင်းသေးအောင် ခွဲစိတ်ခဲ့တာပါလို့ သူက ပြောခဲ့ပါသေးတယ်။ပထမအကြိမ် ခွဲစိတ်ထားတဲ့နှာခေါင်းကို အနေအထားပြင်ဖို့ ဒုတိယအကြိမ်ခွဲစိတ်ပေးခဲ့တဲ့ ဒေါက်တာ စတီဗင် ဟော့ဖ်လင်းကတော့ မိုက်ကယ်ဟာ အသက်ရှုရခက်လာတာကြောင့် ပထမအကြိမ်ခွဲစိတ်ခဲ့တဲ့ နှာခေါင်းအတွက် သိပ်မကြိုက်ဘူးလို့ ပြောခဲ့ပါတယ်။

၁၉၈၃ – ဒီနှစ်မှာတော့ သူ့ရဲ့ အရောင်းရဆုံး အလ်ဘမ်ဖြစ်တဲ့ Thriller ကို ဖြန့်ချီတဲ့နှစ်ပါပဲ။ တစ်ချိန်တည်းမှာပဲ မိုက်ကယ်ဟာ သူ့ရဲ့ အာဖရိက ပုံပန်းသွင်ပြင်ကို ဖျောက်ဖို့ ကြိုးစားလာပြီး အသားဖြူမိတ်ကပ်ကို စပြီး လိမ်းလာခဲ့ပါတယ်။ သူ့ရဲ့နှာခေါင်းကလည်း ပိုသေးသွာပြီး၊ ပါးကို အစားထိုးတာတွေလည်း ပြုလုပ်ခဲ့ပါတယ်။ ဒီလိုပြောင်းလဲမှုနဲ့ပတ်သက်လို့ တုံ့ပြန်မှုတွေကို မိုက်ကယ်က နှစ်သက်ခဲ့ပြီး နောက်တစ်နှစ်မှာပဲ နှာခေါင်းကို တတိယအကြိမ်မြောက် ခွဲစိတ်ပြုပြင်ခဲ့ပြန်ပါတယ်။ ဒါတင်မကသေးဘဲ ပါးကို နေရာပိုများများ အစားထိုးခဲ့ပြီး ထူထဲတဲ့ မျက်ခုံးကိုလည်း သေးသွယ်အောင် ပြုလုပ်ခဲ့ကာ ပိုနေတဲ့အသားတွေကိုလည်း ဖယ်ထုတ်ခဲ့ပါတယ်။

၁၉၉၁ – အသက် ၃၃ နှစ်ရှိပြီဖြစ်တဲ့ မိုက်ကယ်ဟာ သိုသိပ်စွာနေလာခဲ့ပါတယ်။ နှာခေါင်းခွဲစိတ်ပြုပြင်မှု ၄ ကြိမ်နဲ့ ၅ ကြိမ်မြောက် ပြုလုပ်ခဲ့အပြီးမှာတော့ မိုက်ကယ်ရဲ့ နှာခေါင်းပေါက်တွေဟာ တြိဂံပုံစံဖြစ်လာပါတယ်။ (၁၉၉၂ ခုနှစ်မှာတော့ မသေသပ်တဲ့ ခွဲစိတ်မှုကြောင့် သူ့ရဲ့ နှာခေါင်းဟာ ပုံပျက်ခဲ့ပြီး နှာနုအတု တပ်ခဲ့ရပါတယ်) သူ့ရဲ့မေးစေ့မှာ အချိုင့်တစ်ခုဖြစ်လာခဲ့ပြီး အဲဒီမေးရိုးကို ကြီးဖို့အတွက် မေးရိုးအစားထိုးကုသမှုကို ပြုလုပ်ခဲ့ပါတယ်။ ဒီအချိန်မှာတော့ မိုက်ကယ်ရဲ့ တစ်ကိုယ်လုံးဟာ ပိုဖြူလာပြီး သူက အရေးပြားအရောင် လွင့်သွားခြင်းရဲ့ ရလဒ်လို့ ဆိုပါတယ်။

၁၉၉၅ – အသက် ၃၇ နှစ်အရွယ်ရှိလာတဲ့ မိုက်ကယ်ရဲ့ အသားတွေဟာ အရေပြားဆရာဝန်ပေးတဲ့ အရောက်ချွတ်ဆေးတွေသုံးတာ၊ မိတ်ကပ်တွေကို အလွန်အကျွံလိမ်းတာကြောင့် တော်တော်လေဖြူးဖွေးလာခဲ့ပြီး ဆံပင်အတုလည်း တပ်ခဲ့ပါတယ်။ သူငယ်ချင်းဖြစ်သူ ယူရီ ဂဲလ်လာက ဘာကြောင့် ပုံပန်းသွင်ပြင်ပြောင်းတာလည်းလို့ မေးတဲ့အခါ မိုက်ကယ်က “ငါ့အဖေနဲ့တူတာ ငါမကြိုက်ဘူး” လို့ ပြန်ဖြေခဲ့ပါသတဲ့။ ဒီနှစ်မှာပဲ မိုက်ကယ်ဟာ လီစာ မာရီ ပရက်စလေနဲ့ လက်ထပ်ခဲ့ပြီး နောက်တစ်နှစ်မှာ ခွာပြဲခဲ့ပါတယ်။

၂၀၀၂ – မသေသပ်တဲ့ ခွဲစိတ်မှုကြောင့် နှာခေါင်းကနေ အရည်တွေကျပြီး ပါးစပ်ထဲ ရောက်ရောက်လာတာကို တားဆီဖို့အတွက် မိုက်ကယ်ဟာ ဒီနှစ်ပိုင်းအတွင်း နှာခေါင်းမှာ ပလာစတာကို တစ်ချိန်လုံး ကပ်ထားခဲ့ရပါတယ်။ နာမည်ကျော် ခန္ဓာကိုယ်ခွဲစိတ်ဆရာဝန် ဒေါက်တာ ပါမယ်လာ လစ်ပ်ကင်က “နှာခေါင်းက ဆက်ထားတဲ့အရိုး ဒါမှမဟုတ် အစားထိုးထားတဲ့အသားတွေက ရွေ့လာတာကြောင့် သူ့ရဲ့အရေပြားမှာ အပေါက်ဖြစ်လာတာမျိုး ဖြစ်ကောင်းဖြစ်နိုင်ပါတယ်။ ကျွန်တော်တို့ဆေးပညာမှာတော့ ဒါဟာ ပြုပြင်လို့မရတော့တဲ့ အခြေအနေ end-stage လို့ ခေါ်ပါတယ်” လို့ မိုက်ကယ်ရဲ့နှာခေါင်းနဲ့ပတ်သက်ပြီး မှတ်ချက်ပြုခဲ့ပါတယ်။

၂၀၀၃ – သူ့ရဲ့တတိယမြောက် ကလေး ဘလန့်ကတ်ကို မွေးပြီးတဲ့အချိန်မှာတော့ မိုက်ကယ်ရဲ့ မျက်နှာပေါက်ဟာ မိန်းမဆန်လာခဲ့ပါတယ်။ မာတင်ဘရှီးရ်ဆိုသူ ရိုက်ကူးတဲ့ မှတ်တမ်းရုပ်ရှင်မှာ မိုက်ကယ်က “ကျွန်တော့်ရဲ့ မျက်နှာကို ပလက်စတင်ဆာဂျရီ မလုပ်ဖူးပါဘူး။ နှာခေါင်းကိုပဲလုပ်တာပါ။ အဲဒီလိုလုပ်လိုက်တဲ့အတွက် အသက်ရှူရတာ ပိုကောင်းလာပြီး နုတ်အမြင့်တွေကို ဆိုနိုင်သွားပါတယ်။ ကျွန်တော်အမှန်ကိုပြောနေတာပါ။ ကျွန်တော့်မျက်နှာကို ဆာဂျရီမလုပ်ခဲ့ပါဘူး” လို့ ဆိုပြီး စင်ပေါ်မှာ မျက်နှာဖုံးဝတ်ရတာကို ပိုနှစ်သက်တယ်လို့ သူက ထည့်ပြောခဲ့ပါတယ်။

၂၀၀၉ – အသက် ၅၀ အရွယ် မိုက်ကယ်ဂျက်ဆင်ဟာ ပေါင် သန်း ၃၅၀ လောက်အကြွေးတင်ခဲ့ပါတယ်။ အဲဒီအချိန်မှာ သူဟာ This Is It အမည်နဲ့ ကမ္ဘာလှည့်ဖျော်ဖြေပွဲလုပ်မယ်လို့ အံ့အားသင့်ဖွယ် ကြေညာခဲ့ပါတယ်။ သူ့ရဲ့ သူငယ်ချင်းဖြစ်သူ ဒေါတာအလန်က “ဒီအချိန်မှာ သူ့ရဲ့နှာခေါင်းဟာ အရမ်းကို သေးနေပါပြီ။ သာမန်မဟုတ်ဘူးလို့ ကျွန်တော်ထင်တာကြောင့် နှာခေါင်းကို ပြန်ဖာပေးခဲ့ပါတယ်” လို့ ပြောခဲ့ပါတယ်။ မိုက်ကယ်ရဲ့ မျက်နှာကို ပြန်လည်ပုံဖော်ဖို့ နားရွက်က တစ်ရှူးကိုလည်း ဖြတ်ယူသုံးစွဲခဲ့ရပါတယ်။ ကမ္ဘာလှည့်ဖျော်ဖြေပွဲမစခင် ဇွန်လမှာပဲ မိုက်ကယ်ဟာ နှလုံးရပ်ပြီး သေဆုံးခဲ့ပါတယ်။ အိပ်ပျော်အောင်ပေးတဲ့ အိပ်ဆေး လွန်သွားတာကြောင့်လို့ စစ်ဆေးမှုများအရ သိရပါတယ

ဒီပုံကတော့ တကယ်လို့ မိုက်ကယ်ဂျက်ဆင်သာ သူ့ရဲ့ ပုံပန်းသွင်ပြင်ကို မပြင်ခဲ့ဘူးဆိုရင် ကနေ့ရှိနေမယ့် အနေအထားကို ကွန်ပျူတာနဲ့ ပုံဖော်ထားတာ ဖြစ်ပါတယ်။

February 24, 2015
နိုင်ငံတကာ သတင်းတို (ဖေဖော်ဝါရီ ၂၄၊ ၂၀၁၅)

ဖေဖော်ဝါရီ ၂၄၊ ၂၀၁၅
M-Media

– IS အဖွဲ့မှာ လက်ဘနွန်ရှိ နယ်မြေများကို သိမ်းပိုက်ကာ အီမရိတ်နိုင်ငံထူထောင်ရန် စီစဉ်နေပြီး လက်ဘနွန်မြို့တော် ဘေရွတ်တွင်လည်း အသေခံဗုံးခွဲတိုက်ခိုက်မှုများ ပြုလုပ်ရန် အစီအစဉ်ရှိနေသည်ဟု လက်ဘနွန် သတင်းစာများက ယနေ့တွင် ဖော်ပြခဲ့သည်။

– မိမိတို့၏ လက်နက်ကြီးများကို ရှေ့တန်းစစ်မျက်နှာမှ ဖေဖော်ဝါရီ ၂၄ ရက်(ယနေ့)တွင် ဆုတ်ခွာသွားမည်ဖြစ်ပြီး OSCE အဖွဲ့၏ ကြီးကြပ်မှုအောက်တွင် ပွင့်လင်းမြင်သာစွာ ဆောင်ရွက်သွားမည်ဟု ယူကရိန်းခွဲထွက်ရေးသမားများက လွတ်လပ်သောနိုင်ငံဟု
ကြေညာထားသော ဒွန်ညက်မြို့ ကာကွယ်ရေးဝန်ကြီးဌာနမှ ပြောကြားခဲ့သည်။

– ဂျီနီဗာတွင် သုံးရက်ကြာ ပြုလုပ်ခဲ့သည့် အင်အားကြီးနိုင်ငံများနှင့် အီရန်တို့၏ နျူကလီးယားအရေး ဆွေးနွေးမှုမှာ အပြုသဘောဆောင်ပြီး အကျိုးဖြစ်ထွန်းခဲ့သည်ဟု အီရန်နိုင်ငံခြားရေးဝန်ကြီး မိုဟာမက် ဂျာဗက် ဇာရစ်ဖ်က ပြောကြားခဲ့သည်။

– ထိုင်းနိုင်ငံ ကော့စမွီကျွန်းတွင် မြန်မာနိုင်ငံသား အမျိုးသမီးငယ်တစ်ဦး ယမန်နေ့က သတ်ဖြတ်ခြင်းခံခဲ့ရပြီး ၎င်းအားတစ်ဖက်သတ်ကြိုက်နေသည့် မြန်မာနိုင်ငံသား လိင်တူချစ်သူ အမျိုးသမီးက ငွေပေး၍ လည်ပင်းညှစ်သတ်ခိုင်းခဲ့ခြင်းဖြစ်ပြီး သံသယရှိသူကလည်း ရဲတပ်ဖွဲ့ထံ ဖြောင့်ချက်ပေးခဲ့ကြောင်း ထိုင်းမီဒီယာများတွင် ဖော်ပြခဲ့သည်။

– ဆီးရီးယားနိုင်ငံမြောက်ပိုင်း ခရစ်ယာန်တစ်ရွာမှ ရွာသား အနည်းဆုံး ၉၀ ခန့်ကို IS အဖွဲ့က ယနေ့တွင် ပြန်ပေးဆွဲသွားသည်ဟု လန်ဒန်အခြေစိုက် ဆီးရီးယားအရေး စောင့်ကြည့်နေသည့်အဖွဲ့က ပြောကြားလိုက်သည်။

– အရင်းရှင်စနစ်က ဆင်းရဲမွဲတေမှုနှင့် ငတ်မွတ်မှုကို ဖြစ်စေသည်ဟု ဂျာမန်ပြည်သူ ၃ ပုံ ၁ ပုံခန့်က ယုံကြည်နေပြီး အများစုကမူ စီးပွားရေးစနစ်တွင် ဒီမိုကရေစီမှာ မဖြစ်နိုင်ကြောင်း ပြောကြားခဲ့သည်ဟု ဘာလင်တက္ကသိုလ်တစ်ခုမှ စစ်တမ်းကောက်ယူမှုက ဆိုသည်။

– ဘာစီလိုနာဆင်ခြေဖုံးရှိ မောင့်မီလို ပြိုင်ကားကွင်းတွင် ယမန်နေ့က အမောင်းလေ့ကျင့်နေသည့် မက္ကလာရင် ပြိုင်ကားအသင်းမှ နာမည်ကြီး ကားမောင်းသမား အလွန်ဆိုမှာ နံရံကို ၀င်တိုက်မိသောကြောင့် ဆေးရုံသို့ ရဟတ်ယာဉ်ဖြင့် ပို့ဆောင်ခဲ့ရသည်။ သို့သော်လည်း မည်သည့် ပြင်းထန်သောဒဏ်ရာမှ ရရှိခြင်း မရှိခဲ့ဘဲ မတော်တဆဖြစ်မှုမှာလည်း လေတိုက်မှုကြောင့်
ဖြစ်ပွားရခြင်းဖြစ်သည်ဟု ဆိုသည်။

Ref: news agencies

February 24, 2015