Blog

အောက်တိုဘာ ၁၄၊ ၂၀၂၁
M-Media

-အခုလနှောင်းပိုင်းမှာ ကျင်းပပြုလုပ်မယ့် အာဆီယံ ထိပ်သီးအစည်းအ၀ေးမှာ မြန်မာအဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို တက်ရောက်ခွင့်မပေးရေးကိစ္စအတွက် အဖွဲ့၀င်နိုင်ငံတွေ မနက်ဖြန်ကျရင် အစည်းအ၀ေးလုပ်ဖို့ ရှိနေပါတယ်။

ဧပြီလ ထိပ်သီးအစည်းအ၀ေးမှာ ရရှိခဲ့တဲ့ သသောတူညီချက်အတိုင်း အာဆီယံအထူးကိုယ်စားလှယ်ရဲ့ တောင်းဆိုမှုကို မလိုက်လျောရင် အခုလ ထိပ်သီးအစည်းအ၀ေး တက်ရောက်ခွင့် ပိတ်ပင်တာမျိုး လုပ်နိုင်တယ်လို့ မလေးရှားက ပြီးခဲ့တဲ့တစ်ပတ်မှာ ထုတ်ပြောခဲ့ပါတယ်။

ဖိလစ်ပိုင်နိုင်ငံခြားရေး၀န်ကြီး သီယိုဒိုရို လိုစင်ကလည်း စစ်ကောင်စီအကြီးအကဲကို အစည်းအ၀ေး တက်ရောက်ခွင့် မပြုသင့်ဘူးလို့ ဒီကနေ့မနက်မှာ ပြောကြားလိုက်ပါတယ်။

ဒီကိစ္စအတွက် မနက်ဖြန်မှာ အာဆီယံအဖွဲ့၀င်နိုင်ငံတွေ အွန်လိုင်းကတစ်ဆင့် ဆွေးနွေးမှာဖြစ်ပြီး ဒါဟာ ရုတ်တရက်ပေါ်လာတဲ့ အစည်းအ၀ေးလည်း ဖြစ်ပါတယ်။

မြန်မာနိုင်ငံဆိုင်ရာ အာဆီယံအထူးကိုယ်စားလှယ် အရီ၀မ်ယူစွဖ်ဟာ သူ့ရဲ့ မြန်မာနိုင်ငံခရီးစဥ်မှာ ဖမ်းဆီးထိန်းသိမ်းခံထားရတဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည် အပါအ၀င် မြန်မာ့နိုင်ငံရေးအသိုင်းအ၀ိုင်းက သက်ဆိုင်သူအားလုံးနဲ့ တွေ့ဆုံကာ ကြား၀င်ညှိနှိုင်းခွင့်ရဖို့ စစ်ကောင်စီကို တောင်းဆိုထားတာပါ။

စစ်ကောင်စီဖက်က ဒါကိုခွင့်မပြုပါဘူး။ စစ်ကောင်စီပြောခွင့်ရပုဂ္ဂိုလ် ဗိုလ်ချုပ်ဇော်မင်းထွန်းက ဒေါ်အောင်ဆန်းစုကြည်ဟာ ရာဇ၀တ်မှုနဲ့ တရားစွဲခံနေရတဲ့အတွက် တွေ့ခွင့်ပြုမှာ မဟုတ်ဘူးလို့ မနေ့က ထုတ်ပြောပါတယ်။

အာဆီယံ ထိပ်သီးအစည်းအ၀ေးကို အောက်တိုဘာ ၂၆ ရက်နေ့ကနေ ၂၈ ရက်နေ့အထိ ကျင်းပမှာဖြစ်ပြီး၊ မြန်မာအာဏာသိမ်းခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို မဖိတ်ဖို့ အဖွဲ့၀င်နိုင်ငံတစ်ချို့က အသေးစိတ် ဆွေးနွေးခဲ့ကြောင်း မြန်မာနိုင်ငံဆိုင်ရာ အာဆီယံအထူးကိုယ်စားလှယ် အရီ၀ပ်ယူစွဖ်ရဲ့ရုံးက ပြီးခဲ့တဲ့တစ်ပတ်မှာ အတည်ပြုခဲ့ပါတယ်။ မနက်ဖြန်အစည်းအ၀ေးနဲ့ပတ်သက်လို့တော့ မှတ်ချက်ပေးဖို့ ငြင်းပါတယ်။

အရီ၀မ်က သူဟာ မြန်မာနိုင်ငံက နိုင်ငံရေးပါတီတစ်ချို့နဲ့ ဆွေးနွေးမှုတွေ လုပ်ဆောင်ခဲ့ကြောင်း အခုတစ်ပတ်အစောပိုင်းမှာ ထုတ်ပြောခဲ့ပါတယ်။

Ref: Reuters

အောက်တိုဘာ ၁၄၊ ၂၀၂၁
M-Media

-ကမ္ဘာ့ထိပ်တန်း စီးကရက်ကုမ္ပဏီတစ်ခုဖြစ်တဲ့ British American Tobacco (BAT) ဟာ မြန်မာနိုင်ငံမှာရှိတဲ့ သူတို့ရဲ့ လုပ်ငန်းအားလုံးကို ရပ်ဆိုင်းကာ အခုနှစ်ကုန်ပိုင်းမှာ ထွက်ခွာတော့မယ်လို့ ကြေငြာလိုက်ပါတယ်။

ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာရှိတဲ့ နိုင်ငံခြား ရင်းနှီးမြှုပ်နှံမှု လုပ်ငန်းတွေ တစ်ခုပြီးတစ်ခု ထွက်ခွာနေတာပါ။ BAT ဟာ London၊ Lucky Strike နဲ့ Kent တို့လို စီးကရက်တွေကို ပြည်တွင်းမှာ ထုတ်လုပ်ဖြန့်ဖြူးနေတာ ဖြစ်ပါတယ်။

ကုမ္ပဏီလည်ပတ်မှုနဲ့ပတ်သက်ပြီး ရိုက်တာသတင်းဌာနက မေးမြန်းရာမှာ မြန်မာနိုင်ငံအတွင်း စီးပွားရေးလုပ်ငန်းတွေရဲ့ ရေရှည်အလားအလာနဲ့ အာမခံချက်ရှိမှုတွေကို အသေအချာ လေ့လာဆန်းစစ်ခဲ့ပြီးတဲ့နောက် ထွက်ခွာဖို့ ဆုံးဖြတ်ချက် ချခဲ့တာဖြစ်တယ်လို့ BAT က ပြောပါတယ်။

“အခြားသော နိုင်ငံတကာလုပ်ငန်းတွေလိုပဲ ကမ္ဘာတစ်ဝှမ်း လုပ်ငန်းလည်ပတ်နိုင်မှုနဲ့ပတ်သက်ပြီး ကျွန်တော်တို့ လေ့လာတွက်ချက်မှုတွေ အဆက်မပြတ် လုပ်ဆောင်နေပါတယ်။ မြန်မာနိုင်ငံမှာ ရေရှည် လည်ပတ်နိုင်မလား၊ စီးပွားရေးအာမခံချက်ရှိမလားဆိုတာတွေကို လေ့လာတွက်ချက်ပြီးတဲ့နောက် လုပ်ငန်းအားလုံးရပ်ပြီးတိုင်းပြည်ကနေထွက်ခွာဖို့ ဆုံးဖြတ်ခဲ့တာ ဖြစ်ပါတယ်”

DAT ဟာ အရင် စစ်အာဏာရှင်လက်ထက်ကလည်း မြန်မာနိုင်ငံကနေ ထွက်ခွာဖူးပြီး ၂၀၁၃ ခုနှစ်ရောက်မှ ပြန်လည်ဝင်ရောက်လာတာဖြစ်ပါတယ်။ အခုတစ်ခေါက် ထွက်ခွာရခြင်းအတွက် အသေးစိတ်အချက်အလက်တွေကို ထုတ်ပြန်ခြင်းမရှိပါဘူး။

မြန်မာနိုင်ငံမှာ စစ်တပ်က အာဏာသိမ်းပြီးတဲ့နောက် စီးပွားရေး အကြီးအကျယ် ကျဆင်းသွားပြီး၊ မြန်မာကျပ်ငွေတန်ဖိုးလည်း ၆၀ ရာခိုင်နှုန်းလောက် ကျဆင်းသွားပါတယ်။

Ref: Reuters