ရခိုင်ပြည်နယ်ရှိ ရိုဟင်ဂျာဒုက္ခသည်ကလေးများ၏ ပန်းချီလက်ရာများအား ပြသရောင်းချ
ဒီဇင်ဘာ ၂၉၊ ၂၀၁၄
M-Media
မိုးဇက်
ရန်ကုန်။ ။ ရခိုင်ပြည်နယ် စစ်တွေမြို့ရှိ ရိုဟင်ဂျာ ဒုက္ခသည်စခန်းများမှ ကလေးငယ်များ ကိုယ်တိုင် ရေးဆွဲထားသော ပန်းချီကားချပ်များ၊ ကလေးငယ်များ၏ ဘ၀ကို ဖော်ကြူးထားသည့် ဓာတ်ပုံများ၊ ပို့စ်ကဒ်များ၊ အင်္ကျီများနှင့် ပြက္ခဒိန်များကို ပြသကာ ရောင်းချသည့် ပန်းချီပြပွဲတစ်ခုကို ရန်ကုန်မြို့ ၃၅ လမ်း River Ayeyerwaddy Gallery တွင် ဒီဇင်ဘာလ ၂၈ ရက် တနင်္ဂနွေနေ့ က ပြုလုပ်ခဲ့သည်ဟု သိရသည်။
အဆိုပါ ပြပွဲကို ဒုက္ခသည် ကလေးများ၏ စိတ်ခံစားမှုများအား လူအများ သိရှိ၊ နားလည် ခံစားတတ်စေရန်နှင့် အဆိုပါ ဒုက္ခသည်ကလေးများ၏ အလွန်ချို့တဲ့သော ဘ၀များအတွက် အထောက်အပံ့ပေးနိုင်ရေး ရန်ပုံငွေရရှိရန်တို့အတွက် ရည်ရွယ်ပြုလုပ်ခြင်းဖြစ်သည်ဟု ဆိုသည်။
“ဒီပုံလေးတွေက သူတို့ရဲ့စိတ်ခံစားချက်တွေ၊ သူတို့ရဲ့အကြောင်းအရာတွေကို သူတို့ကိုယ်တိုင် စိတ်ကူးစိတ်သန်းလေးတွေ နဲ့ရေးဆွဲထားတဲ့ ပန်းချီကားတွေဖြစ်ပါတယ်” ဟု ယင်းပြပွဲကို စီစဉ်သူတစ်ဦးက ပြောကြားခဲ့သည်။
ကလေးငယ်များရေးဆွဲထားသော အဆိုပါ ပန်းချီကားတစ်ချပ်၏ ဈေးနှုန်းကို ၁၀၀၀၀ ကျပ်မှ စတင်သတ်မှတ်ထားပြီး ပန်းချီကားပေါင်း ၁၀၀ ကျော်ကို ပြခန်းတွင် ပြသထားသည်။
စစ်တွေမြို့ရှိ ဒုက္ခသည်စခန်းများတွင် ကလေးငယ်ပေါင်း ၈၀၀၀၀ ကျော် ရှိနေပြီး ကလေးငယ်များ အနေဖြင့် ပညာရေး၊ ကျန်းမာရေးထောက်ပံ့မှုများ ကို အဓိက လိုအပ်နေသည်ဟု သိရသည်။ ယင်းကလေးငယ်များအတွက် လူမှုကယ်ဆယ်ရေး အဖွဲ့အစည်းများမှ ကျန်းမာရေးအသိပညာပေးခြင်းများ၊ စိတ်ဓာတ်ပိုင်းဆိုင်ရာ မြှင့်တင်ပေးမှု တို့ကိုလည်း ဆောင်ရွက်ပေးလျက်ရှိနေသည်။
စစ်တွေရှိ ဒုက္ခသည်စခန်းများတွင် ကလေးငယ်များ၏ လိုအပ်ချက်များကို ကူညီဖြည့်ဆည်းပေးနေ သူ ကိုစိုင်းဟန်ထိုက် (အပေအတေအကိတ်လေး) က အဆိုပါ ကလေးငယ်များနှင့် ပတ်သက်ပြီး “ကျွန်တော်ကတော့ စခန်းတစ်ခုချင်းဆီက ကလေးငယ်တွေကို သူတို့ပျော်ရွှင်မှုတွေ ရလာအောင် ပြိုင်ပွဲတွေ၊ ကျန်းမာရေးနဲ့ပတ်သက်ပြီး အာဟာရကျွေးတာမျိုးတွေကို တတ်နိုင်သလောက် လုပ်ပေးနေပါတယ်။ ကလေးတွေရဲ့ စိတ်အခြေအနေတွေ ကလည်း တိုးတက်လာပါတယ်။ ကျွန်တော့်ကိုလည်း သူတို့တွေ ယုံကြည်မှုအပြည့် ရှိကြပါတယ်။ မွတ်စလင် ၁ သိန်းကျော်ရှိတဲ့နေရာမှာ ကျွန်တော့်လို ဗုဒ္ဓဘာသာဝင် တစ်ယောက်တည်းနေပေ မယ့်လည်း ကျွန်တော်အခုချိန်ထိ အန္တရာယ် တစ်စုံတစ်ရာ မရှိခဲ့ပါဘူး။ ရှေ့ဆက်လည်း ကလေးငယ်တွေအတွက် တတ်နိုင်သလောက်လုပ်သွားမှာပါ” ဟု ၎င်း၏ ခံစားချက်ကို ဖွင့်ဟခဲ့သည်။
ယခုကဲ့သို့ ပန်းချီကားများ၊ အလှဓာတ်ပုံများ၊ အင်္ကျီနှင့် ပြက္ခဒိန်များကို ရန်ပုံငွေအဖြစ် ရောင်းချသည့် ပွဲတော်ကို ယခင်ကလည်း တစ်ကြိမ်ပြုလုပ်ခဲ့ဖူးပြီး စုစုပေါင်း ရန်ပုံငွေ ၃၆ သိန်းကျော်မျှ ရရှိခဲ့ကြောင်း သိရသည်။
