အောက်တိုဘာ ၂၆၊ ၂၀၁၄
M-Media
သတင်း/ဓါတ်ပုံ- မိုးစက်
ရန်ကုန်။ ။ အလွတ်တန်းသတင်းထောက် ကိုအောင်ကျော်နိုင် (ခ) ကိုပါကြီး သေဆုံးခဲ့ရသည့် ကိစ္စနှင့်ပတ်သက်၍ အမှုမှန်ပေါ်ပေါက်ရေးအတွက် အရပ်ဘက်လူအဖွဲ့အစည်းတွေ စုပေါင်းပြီး မနေ့က ညနေမှာ ရန်ကုန်မြို့ မြို့တော်ခန်းမရှေ့မှာ ဆန္ဒပြခဲ့ကြပါတယ်။
ကိုအောင်ကျော်နိုင် (ခ) ကိုပါကြီး သေဆုံးခဲ့ရသည့် ကိစ္စနှင့်ပတ်သက်၍ အပြစ်ကျူးလွန်တဲ့သူတွေကို ဖော်ထုတ်ခြင်းဟာ နိုင်ငံတော်ရဲ့အပြောင်းအလဲကို စေတနာရှိရှိ ပြောင်းလဲနေတယ်ဆိုတာကို သက်သေပြရာရောက်ပါလိမ့်မယ် ဟု ၈၈ မျိုးဆက်ကျောင်းသားခေါင်းဆောင်တစ်ဦးဖြစ်သူ ဦးကိုကိုကြီးက ဆန္ဒထုတ်ဖော်ပွဲမှာ ပြောပါတယ်။
၈၈ မျိုးဆက်ကျောင်းသားခေါင်းဆောင် ဦးကိုကိုကြီးသည် ယနေ့ ရန်ကုန်မြို့ မြို့တော်ခန်းမရှေ့တွင် ကျင်းပပြုလုပ်သော သတင်းထောက် ကိုအောင်နိုင်ကျော် (ခ) ကိုပါကြီး သတ်ဖြတ်ခံရမှုတွင် အမှန်ပေါ်ပေါက်ရေး တောင်းဆိုပွဲတွင် ယခုကဲ့သို့ ဆိုလိုက်ခြင်းဖြစ်သည်။
“တရားဥပဒေရဲ့အကာအကွယ် နိုင်ငံတော်ရဲ့အကာအကွယ်ကို ကိုပါကြီး မရခဲ့ပါဘူး။ လစဉ် သမ္မတကြီးက မိဘပြည်သူများခင်ဗျာလို့ ပြောနေပေမယ့်လည်း အဲ့လိုပြောနေတဲ့အချိန်မှာ ဥပဒေမဲ့ပြည်သူတွေ သတ်ဖြတ်ခြင်း ခံနေရတယ်။ အဲဒီလိုကျူးလွန်သူတွေကို အရေးယူပေးဖို့ သမ္မတကြီးကို ဦးတိုက်ပြီး တောင်းဆိုလိုက်ပါတယ်။
အပြစ်ကျူးလွန်တဲ့ သူတွေကို ဖော်ထုတ်ခြင်းဟာ နိုင်ငံတော်ရဲ့အပြောင်းအလဲကို စေတနာ ရှိရှိ ပြောင်းလဲနေတယ်ဆိုတာကို သက်သေပြရာရောက် ပါလ်ိမ့်မယ်” ဟု ဦးကိုကိုကြီးက ဆက်လက်ပြောဆိုခဲ့သည်။
၈၈ မျိုးဆက်ကျောင်းသားခေါင်းဆောင်တစ်ဦးဖြစ်သူ ကိုမင်းကိုနိုင်ကလည်း ကိုပါကြီးအတွက် လွတ်လပ်တဲ့ စုံစမ်းစစ်ဆေးရေး ကော်မရှင် တစ်ရပ်ကိုဖွဲ့စည်းပေးပြီး ၎င်းတို့မှ ယင်းအဖွဲ့၏ စစ်ဆေးမှုကို အချိန်ပြည့်စောင့်ကြည့်နေနိုင် ခွင့်ပေးနိုင်ရ ပါမည်ဖြစ်ကြောင်း ပြောခဲ့သည်။
“ကျွန်တော်တို့တိုင်းပြည်မှာ တာဝန်ယူမှု တာဝန်ခံမှုတွေ မရှိတော့ပါဘူး။ လက်နက်ကိုင်ထားတဲ့သူတွေက လက်နက်မရှိတဲ့ အပြစ်မဲ့တဲ့ပြည်သူတွေကို လက်နက်အားကိုးနဲ့နှိပ်စက်လိုက်ရင် ငါတို့ကို ဘယ်တရားဥပေဒကမှ အရေးယူလို့မရဘူးဆိုတဲ့ အသိသူတို့ဆီမှာရှိနေကြတယ်။ လက်နက်ရှိသူတွေက လက်နက်မရှိသူတွေကို အနိုင်ကျင့်နေကြတဲ့ တောရိုင်းဥပဒေကြီးပါ” ဟု ကိုမင်းကိုနိုင်က ၎င်း၏သဘောထားကို ဆက်လက်ပြောဆိုခဲ့သည်။
ယင်း စုဝေးပွဲတွင် ဒီမိုကရစ်တစ်အင်အားစု ၄၉ ဖွဲ့မှ စုပေါင်းသဘောထား တစ်ရပ် ထုတ်ပြန်ချက်တစ်စောင်ကို ထုတ်ပြန်ခဲ့သည်။ ယင်းထုတ်ပြန်ချက်တွင် အလွတ်တန်းသတင်းထောက် ကိုအောင်ကျော်နိုင် (ခ) ကိုပါကြီး သေဆုံးခဲ့ရသည့် ကိစ္စနှင့်ပတ်သက်၍ လွတ်လပ်ပြီး ကျွမ်းကျင်သော ပညာရှင်များပါသည့် စုံစမ်းစစ်ဆေးရေး ကော်မရှင် ဖွဲ့စည်းပေးရန်နှင့် ကျူးလွန်သောသူများအား တရားဥပဒေနှင့်အညီ အရေးယူဆောင်ရွက်ပေးရန် ယင်းအဖွဲ့အစည်းမှ ကြေငြာခဲ့သည်။
သတင်းထောက်ကိုအောင်နိုင်ကျော် (ခ) ကိုပါကြီး သတ်ဖြတ်ခံရမှုတွင် အမှန်ပေါ်ပေါက်ရေး တောင်းဆိုပွဲတွင် ၈၈ မျိုးဆက်ကျောင်းသားများနှင့်အတူ အရပ်ဖက်အဖွဲ့အစည်းများ၊ ပြည်သူများမှ ကြွေးကြော်သံများဖြင့် ပါဝင်ခဲ့ကြသည်။
အလွတ်တန်းသတင်းထောက် ကိုအောင်ကျော်နိုင် (ခ) ကိုပါကြီးသည် မွန်ပြည်နယ်၊ ကျိုက်မရောမြို့နယ် ကလိုင်းကနိုင်ကျေးရွာနှင့် ရွှေဝါချောင်ကျေးရွာများတွင် ဖြစ်ပွားခဲ့သော အစိုးရတပ်နှင့် ကလို့ထူးဘော စစ်ဗျူဟာတပ်(KKO) အကြား တိုက်ပွဲဖြစ်ပွားမှုကို သတင်းသွားယူခဲ့စဉ် စက်တင်ဘာ (၃၀) ရက်နေ့က ဖမ်းဆီးခံခဲ့ရခြင်းဖြစ်ပါတယ်။
ကာကွယ်ရေးဝန်ကြီးဌာနရဲ့ သတင်းထုတ်ပြန်ချက်မှာတော့ ကိုပါကြီးဟာ KKO တပ်မှ ပြန်ကြားရေး တာဝန်ခံ ဗိုလ်ကြိးအဆင့်ရှိသူ ဖြစ်ကြောင်းနှင့် ဖမ်းဆီးထားစဉ် လက်နက်လုပြိး ထွက်ပြေးသောကြောင့် အစောင့် တပ်သားမှ ပစ်ခတ်ဖမ်းဆီးစဉ် သေဆုံးသွားကြောင်း ထုတ်ပြန်ထားပါတယ်။
