ဩဂုတ် ၆၊ ၂၀၂၁
M-Media
-မြန်မာနိုင်ငံက နိုင်ငံရေးပြဿနာကို ဖြေရှင်းဖို့အတွက် အာဆီယံအထူးကိုယ်စားလှယ်တစ်ဦး ခန့်အပ်ခဲ့ပေမယ့် အဲဒီအပေါ်မှာ လက်တွေ့မကျတဲ့ မျှော်လင့်ချက်တွေ မထားဖို့ စင်ကာပူနိုင်ငံခြားရေးဝန်ကြီး ဗီဗီယံ ဘာလာကရစ်ရှ်နန်က ပြောကြားလိုက်ပါတယ်။
အာဆီယံဟာ ဘရူနိုင်းနိုင်ငံ ဒုတိယနိုင်ငံခြားရေးဝန်ကြီး အရ်ဝမ်ယူစွဖ်ကို မြန်မာနိုင်ငံဆိုင်ရာ အာဆီယံကိုယ်စားလှယ်အဖြစ် ဗုဒ္ဓဟူးနေ့က ခန့်အပ်ခဲ့ပါတယ်။ ဒါဟာ ဧပြီလက အာဆီယံထိပ်သီးအစည်းအဝေးမှာ မြန်မာ့အရေးဖြေရှင်းဖို့ သဘောတူညီခဲ့တဲ့ အချက်တွေထဲက တစ်ခု ဖြစ်ပါတယ်။
စင်ကာပူနိုင်ငံခြားရေးဝန်ကြီး ဘာလာကရစ်ရှ်နန်က အာရ်ဝမ်ယူစွဖ်တစ်ယောက် မြန်မာ့နိုင်ငံရေးနယ်ပယ်က သက်ဆိုင်သူတွေအားလုံးနဲ့ တွေ့ခွင့် ရ၊ မရဟာ အဓိကမေးခွန်း ဖြစ်နေတယ်လို့ အာဆီယံနိုင်ငံခြားရေးဝန်ကြီးတွေရဲ့ တစ်ပတ်တာ အစည်းအဝေးအပြီး ဒီကနေ့ညနေပိုင်းကလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။
“နိုင်ငံရေးအရ အဖြေရှာမှုဟာ အရေးပါပေမယ့် ခက်ခဲပြီး ဆွေးနွေးညှိနှိုင်းမှုတွေကလည်း အချိန်ကြာပါလိမ့်မယ်။ လက်တွေ့မကျတဲ့ အချိန်သတ်မှတ်ချက်မျိုးကို ကျွန်တော် ရှောင်ချင်တယ်။ အချိန်တော့ပေးရမှာပါ”
စင်ကာပူဟာ လက်ရှိ မြန်မာ့နိုင်ငံရေးနယ်ပယ်က အားလုံးနဲ့ ထိတွေ့ဆက်ဆံနေတယ်လို့ ဘာလာကရစ်ရှ်နန်က ထည့်သွင်းပြောဆိုခဲ့ပြီး အသေးစိတ်ကိုတော့ ထပ်မပြောပါဘူး။
“နိုင်ငံတစ်နိုင်ငံမှာ ပြည်ပက ဝင်ရောက်စွက်ဖက်မှု မရှိရဘူးဆိုတာ စင်ကာပူက ခိုင်ခိုင်မာမာ ယုံကြည်ပါတယ်။ နိုင်ငံတစ်ခုရဲ့ အလုံးစုံသောကံကြမ္မာဟာ ပြည်သူတွေရဲ့လက်ထဲမှာပဲ ရှိပါတယ်”
၂၀၂၀ နိုဝင်ဘာက ဒီမိုကရေစီနည်းကျ ရွေးကောက်တင်မြှောက်ခံရတဲ့ အစိုးရကို ဖြုတ်ချပြီး စစ်တပ်က အာဏာသိမ်းခဲ့တဲ့ ဖေဖော်ဝါရီ ၁ ရက်နေ့နောက်ပိုင်း မြန်မာနိုင်ငံမှာ ဖြစ်ပေါ်နေတဲ့ အခြေအနေတွေကို ထိထိရောက်ရောက် မဖြေရှင်းနိုင်မှုအတွက် အာဆီယံဟာ ပြစ်တင်ပြောဆိုခံနေရတာပါ။
အာဆီယံအထူးကိုယ်စားလှယ် အရ်ဝမ်ယူစွဖ်ဟာ စက်တင်ဘာလမှာ မြန်မာ့အရေး ဖြစ်ပေါ်တိုးတက်မှုတွေကို အာဆီယံအဖွဲ့ထံ အစီရင်ခံရမှာ ဖြစ်ပါတယ်။
စင်ကာပူနိုင်ငံခြားရေးဝန်ကြီးကတော့ အထူးကိုယ်စားလှယ်ခန့်အပ်မှုဟာ မြန်မာ့နိုင်ငံရေးနယ်ပယ်က သက်ဆိုင်သူတွေအားလုံးနဲ့ တွေ့ဆုံပြီး မျှတတဲ့ကြားဝင်စေ့စပ်သူအဖြစ် နိုင်ငံရေးဆွေးနွေးမှုတွေလုပ်နိုင်အောင် တိုက်တွန်းအားပေး၊ စီစဉ်ဖို့ ဖြစ်တယ်လို့ ထည့်သွင်းပြောဆိုခဲ့ပါတယ်။
“ဒါဟာ ကြီးမားတဲ့ စမ်းသပ်မှုကြီးပါ။ အရ်ဝမ်အနေနဲ့ သက်ဆိုင်သူအားလုံးနဲ့ တွေ့နိုင်ပါ့မလားဆိုတာလည်း ရှိပါသေးတယ်”
Ref: Straits Times
