လူမှုအကျိုးပြုလုပ်ငန်းများ လုပ်ဆောင်နေသည့် သြစတေးလျ မွတ်စလင်အမျိုးသမီး လူ့အခွင့်အရေး ဂုဏ်ထူးဆောင်ဆု ရရှိ
သြဂုတ် ၈ ၊ ၂၀၁၄
M-Media
– အမျိုးသမီးများ၏ စွမ်းရည်မြှင့်တင်ပေးမှုနှင့် မတူညီသော ယဉ်ကျေးမှုများအကြား သဟဇာတဖြစ်ရေးတို့ကို ၂၅ နှစ်တိုင်တိုင် မဆုတ်မနစ် ဆောင်ရွက်ခဲ့သော သြစတေးလျ မွတ်စလင်အမျိုးသမီးတစ်ဦးမှာ ၂၀၁၄ ခုနှစ် နယူးဆောက်ဝေးလ် လူ့အခွင့်အရေး ဂုဏ်ထူးဆောင်ဆု New South Wales Human Rights Award ကို ရရှိခဲ့သည်ဟု သိရသည်။
ဆုရရှိခဲ့သူမှာ မွတ်စလင်အမျိုးသမီး အသင်းမှ အမှုဆောင်အရာရှိ ကရာယမ် အဘ်ဒို ဖြစ်ပြီး ဂုဏ်ထူးဆောင် ရွှေတံဆိပ်ဆုနှင့် ဆုတော်ငွေ ကန်ဒေါ်လာ ၅၀၀၀ ရရှိခဲ့သည်။
ဆုချီးမြှင့်ပွဲကို နယူးဆောက်ဝေးလ်ပြည်နယ် ပါလီမန်တွင် သြဂုတ်လ ၆ ရက် ဗုဒ္ဓဟူးနေ့က ကျင်းပပြုလုပ်ခဲ့ပြီး အခမ်းအနားသို့ နိုင်ငံသားဖြစ်မှုနှင့် လူ့အဖွဲ့အစည်းဆိုင်ရာ ၀န်ကြီး ဗစ်တာ ဒိုမီနယ်လို၊ ပြည်ထောင်စု လူမျိုးရေးခွဲခြားမှုဆိုင်ရာ မဟာမင်းကြီး ဒေါက်တာ တင်မ် ဆောက်ဖိုမက်အိန်း၊ ၂၀၁၃ ခုနှစ်က အဆိုပါဆုကို ရရှိခဲ့သည့် သြစတေးလျ တိုင်းရင်းသား ပညာရေးဖောင်ဒေးရှင်းမှ အန်ဒရူး ပန်ဖိုးလ်ဒ်၊ ပြည်နယ် ပါလီမန်အမတ်များနှင့် အခြား ဧည့်သည်တော်များ တက်ရောက်ခဲ့ကြသည်။
“နယူးဆောက်ဝေးလ်က လူ့အခွင့်အရေး တိုးတက်မှုတွေအတွက် အဓိပ္ပါယ်ပြည့်ဝပြီး ရေရှည် အကျိုးရှိတဲ့ ကူညီမှုတွေကို အသိအမှတ်ပြုတဲ့အနေနဲ့ ဒီဆုကို ချီးမြှင့်ခဲ့တာပါ။ ကရာယမ် အဘ်ဒိုဟာ ဒီဆုနဲ့ အထိုက်တန်းဆုံးသူပါပဲ” ဟု ဒိုမီနယ်လိုက ၎င်း၏ Facebook စာမျက်နှာတွင် ကြာသာပတေးနေ့က ရေးသားခဲ့သည်။
လက်ဘနွန်နွယ်ဖွား ကရာယမ် အဘ်ဒိုမှာ မိသားစု၏ ချုပ်နှောင်မှုမှ လွတ်မြောက်လာသူများနှင့် အိမ်တွင်း နှိပ်စက်ညှင်းပန်းမှုဒဏ် ခံစားရသည့် အမျိုးသမီးများအတွက် မွတ်စလင်အမျိုးသမီး အထောက်အကူပြု စင်တာကို ထူထောင်ခဲ့သူဖြစ်သည်။ ထို့ကြောင့် ၂၀၀၈ ခုနှစ်တွင် Order of Australia ဂုဏ်ထူးဆောင်ဆုကို ရရှိခဲ့သည်။
အမျိုးသမီးငယ်များအား စွမ်းရည်မြှင့်တင်ပေးခြင်းနှင့် လူ့အဖွဲ့အစည်းများအကြား သဟဇာတဖြစ်ရေး ဆောင်ရွက်ရာတွင် ၂၅ နှစ်ကြာနှစ်မြှုပ်ခဲ့သည့် အဘ်ဒိုအား ဒိုမီနယ်လိုက ချီးကျူးခဲ့သည်။
“သူမဟာ ကျော်ကြားတဲ့ ခေါင်းဆောင်တစ်ဦးလည်းဖြစ်ပါတယ် အမျိုးသမီးငယ်တွေကို စွမ်းရည်မြှင့်တင်ပေးဖို့နဲ့ မတူညီတဲ့ ယဉ်ကျေးမှုတွေအကြားမှာ သဟဇာတဖြစ်ဖို့ သူမဟာ လွန်ခဲ့တဲ့ ၂၅ နှစ်လုံးလုံး မမောနိုင် မပန်းနိုင် ဆောင်ရွက်ခဲ့တာပါ။ တစ်ဦးနဲ့တစ်ဦး နားလည်မှု၊ သည်းခံမှုတွေကို ဖြစ်ထွန်းစေတဲ့ ဘာသာပေါင်းစုံ ဆွေးနွေးမှုတွေကို ကူညီဖို့ နယူးဆောက်ဝေးလ်က အခြား ဘာသာရေးခေါင်းဆောင်တွေနဲ့ ပူးပေါင်း ဆောင်ရွက်ရာမှာလည်း သူဟာ အဓိကအခန်းကဏ္ဍက ပါဝင်ခဲ့ပါသေးတယ်။ ပြီးခဲ့တဲ့နှစ်တွေမှာ ကာရာယမ် အဘ်ဒိုဟာ သွင်ပြင်လက္ခဏာကိုကြည့်ပြီး ဆက်ဆံခြင်း၊ အမျိုးသမီး လိင်အင်္ဂါဖြတ်တောက်ခြင်း၊ လူကုန်ကူးခြင်းနဲ့ အရွယ်မရောက်သေးသူတွေကို အတင်းအဓမ္မလက်ထပ်ခြင်း စတဲ့ ရှုပ်ထွေးတဲ့ ကိစ္စတွေအတွက် ပညာပေး လုပ်ငန်းတွေကိုလည်း အောင်အောင်မြင်မြင် ဆောင်ရွက်ခဲ့ပါတယ်” ဟု ဒိုမီနယ်လိုက ဆိုသည်။
New South Wales Human Rights Award ဆုကို နယ်ပယ်ပေါင်းစုံမှာ ပညာရှင်များဖြင့် ဖွဲ့စည်းထားသည့် အကဲဖြတ်ရေးအဖွဲ့က ရွေးချယ်ခဲ့ခြင်းဖြစ်သည်။
အဆိုပါဆုကို ရရှိခဲ့သည့် အဘ်ဒိုမှာ လူ့အခွင့်အရေး သံတမန်အဖြစ် ၁၂ လတိတိ ဆောင်ရွက်ရမည်ဖြစ်ကြောင်း၊ လူအဖွဲ့အစည်း ဆက်ဆံရေး ကော်မရှင်မှတစ်ဆင့် အခမ်းအနားများ၊ ကျောင်းများနှင့် အစည်းအဝေးများတွင် လူ့အခွင့်အရေး ဆိုင်ရာများကို မြှင့်တင်ပေးရန် ဆောင်ရွက်မည်ဖြစ်ပြီး နယူးဆောက်ဝေးလ် အစိုးရအနေဖြင့် သူမအား ကူညီရသည့်အတွက် ဂုဏ်ယူရမည်ဖြစ်ကြောင်း ဒိုမီနယ်လိုက ထပ်လောင်းပြောကြားခဲ့သည်။
အစ္စလာမ်သာသနာမှာ သြစတေးလျသို့ လွန်ခဲ့သည့် နှစ်ပေါင်း ၂၀၀ ကျော်ကတည်းက ရောက်ရှိလာခဲ့ခြင်းဖြစ်ပြီး နိုင်ငံလူဦးရေ သန်း ၂၀ ၏ ၁.၇ ရာခိုင်နှုန်းမှာ အစ္စလာမ်ဘာသာဝင်များဖြစ်ကြကာ ခရစ်ယာန်ပြီးနောက် အစ္စလာမ်မှာ ဒုတိယ ကိုးကွယ်မှုအများဆုံး အယူဝါဒဖြစ်သည်။
