ဇွန် ၂၇၊ ၂၀၂၁
M-Media
-စစ်ကောင်စီတပ်တွေရဲ့ ဖမ်းဆီးထိန်းသိမ်းမှုအတွင်း ရိုက်နှက်နှိပ်စက်ခံခဲ့ရတယ်လို့ ကမာရွတ်မီဒီယာ အယ်ဒီတာချုပ် ကိုနသန်မောင်က ဖွင့်ဟ ပြောကြားလိုက်ပါတယ်။
အမေရိကန်နိုင်ငံသား ကိုနသန်မောင်ဟာ မတ်လ ၉ ရက်နေ့က စစ်ကောင်စီတပ်တွေရဲ့ ဖမ်းဆီးခြင်းကို ခံခဲ့ရပြီး ဇွန်လ ၁၅ ရက်နေ့မှာ လွတ်မြောက်လာခဲ့တာ ဖြစ်ပါတယ်။
သူ့ကို ထိန်းသိမ်းပြီး စစ်ကြောရေးလုပ်စဉ်အတွင်းမှာ ရိုက်နှက်နှိပ်စက်တာတွေ ရှိတယ်လို့ ကိုနသန်မောင်က ပြောပါတယ်။
“ပထမ ၃၊ ၄ ရက်က အဆိုးဆုံးပါ။ အကြိမ်ပေါင်းများစွာ ပါးရိုက်ခံရတယ်၊ အထိုးခံရတယ်။ ကျွန်တော်ဘာပဲပြောပြော သူတို့ ကျွန်တော့်ကို ရိုက်တယ်။ လက်နှစ်ဖက်စလုံးသုံးပြီး ကျွန်တော့်ကို နပန်တွေကျင်းပါတယ်”
ပါးရိုးကိုထိုးတာ၊ ပုခုံးကိုထိုးတာတွေလည်း လုပ်ခဲ့ပြီး မတ်တပ်ရပ်ခွင့်မပေးသလို ခြေထောက်တွေယောင်ကိုင်းလာတဲ့အတွက် လှုပ်လို့တောင်မရဘူးလို့ ကိုနသန်မောင်က ထည့်သွင်းပြောဆိုခဲ့ပါတယ်။
သူနဲ့အတူ ဖမ်းဆီးခံခဲ့ရတဲ့ ဂျာနယ်လစ် ဟန်သာငြိမ်းဟာ သူ့ထက်ပိုပြီး ညှင်းပမ်းနှိပ်စက်ခံခဲ့ရတယ်လို့လည်း ဆိုပါတယ်။ ဟန်သာငြိမ်းဟာ အခုအချိန်အထိ မလွတ်မြောက်သေးပါဘူး။
“ကျွန်တော့်လက်ကို နောက်ပြန်လက်ထိပ်ခတ်ထားတယ်။ မျက်လုံးကို အဝတ်နဲ့စည်းပြီး အပေါ်ကနေ နောက်ထပ် အဝတ်တစ်ခုနဲ့ ထပ်အုပ်ထားတယ်။ ၃၊ ၄ ရက်လောက် ကျွန်တော့်ကို အိပ်ဖို့မပေးပါဘူး။ တောက်လျှောက် စစ်ကြောရေးလုပ်တယ်။ အိပ်ချိန်မရပါဘူး”
သူ့ကို အမေရိကန်နိုင်ငံသားလို့သိသွားချိန် ၄ ရက်မြောက်မှာ ရိုက်တာနှက်တာတွေ မလုပ်တော့ဘူးလို့ ကိုနသန်မောင်က ပြောကြားခဲ့ပါတယ်။
စစ်ကြောရေးအတွင်းမှာ ဆိုးဆိုးရွားရွား ညှင်းပမ်းနှိပ်စက်ခံရတဲ့ အခြားသူတွေကို တွေ့ခဲ့တယ်လို့လည်း သူက ဆိုပါတယ်။
“တစ်ချို့လူတွေဆို ကျွန်တော်တို့ထက်ပိုပြီး ညှင်းပမ်းနှိပ်စက်ခံရတယ်။ ကျွန်တော့်အခန်းမှာ ကျွန်တော်နဲ့အတူနေတဲ့ နောက်တစ်ယောက်ရှိပါတယ်။ သူရဲ့ခန္ဓာကိုယ်တစ်ခုလုံး ဖူးယောင်ဒဏ်ရာတွေအပြည့်ပဲ။ လက်ထိပ်ခတ်ထားတဲ့ လက်ကို စားပွဲပေါ်တင်ပြီး အဲဒီလက်ကို ရိုက်ကြတာ။ အရိုးတော့မကြိုးပေမယ့် ဆိုးဆိုးရွားရွား ဒဏ်ရာရပြီး အသားတွေတောင် လန်သွားတယ်”
သူဖမ်းဆီးခံရပြီးနောက်ပိုင်း ကမာရွတ်မီဒီယာ ရပ်သွားပေမယ့် မကြာခင် ပြန်လည် လည်ပတ်သွားမယ်လို့ ကိုနသန်မောင်က ထည့်သွင်းပြောဆိုခဲ့ပါတယ်။
ဒီကိစ္စနဲ့ပတ်သက်ပြီး စစ်ကောင်စီဖက်က ထုတ်ပြန်တာမျိုး မရှိသေးပါဘူး။ ဖမ်းဆီးမှုတွေ၊ စစ်ကြောမှုတွေကို ဥပဒေအတိုင်းပဲ ဆောင်ရွက်တာလို့ စစ်ကောင်စီက အရင်တုန်းက ထုတ်ပြန်ထားပါတယ်။
Ref: Reuters
