Blog

ဖေဖော်ဝါရီ ၃၊ ၂၀၁၄
M-Media

– သြစတေးလျရှိ West Australian(WA) ပြည်နယ်တွင် ပြဋ္ဌာန်းထားသည့် ငါးမန်းများ သုတ်သင်ရေး ပေါ်လစီအား ဆန့်ကျင်သော ဆန္ဒပြပွဲများကို သြစတေးလျနိုင်ငံတစ်ဝှမ်းတွင် ပြုလုပ်ခဲ့ကြသည်ဟု သိရသည်။

နိုင်ငံတစ်ဝှမ်း စနေနေ့က ပြုလုပ်ခဲ့သည့် ဆန္ဒပြပွဲများတွင် လူထောင်ပေါင်းများစွာပါဝင်ခဲ့ပြီး WA ပြည်နယ်အစိုးရ၏ ထိုပေါ်လစီမှာ အရာရောက်ခြင်း မရှိဟု ဝေဖန်ခဲ့ကြသည်။ WA ပြည်နယ်အစိုးရ၏ ထိုပေါ်လစီကို ဆန့်ကျင်သည့် ဆန္ဒပြပွဲများကို အဒီလိုင်ဒီ၊ မဲလ်ဘုန်း၊ ဟိုဘတ်၊ ကိုတက်စ်လို၊ ပါ့က်သ် နှင့် ဘရူမ်း စသည့် သြစတေးလျရှိမြို့ကြီးများအပါဝင် နယူးဇီလန်နှင့် တောင်အာဖရိက နိုင်ငံတို့တွင်လည်း ပြုလုပ်ခဲ့ကြသည်။

လွန်ခဲ့သည့် ၂ နှစ်ခန့်မှစ၍ ပြည်နယ်အတွင်း လူကြိုက်များသည့် ကမ်းခြေများတွင် ငါးမန်းများတိုက်ခိုက်မှု မြင့်မားလာသောကြောင့် ငါးမန်းများအား ဖမ်းဆီးသုတ်သင်ရေး ဥပဒေကို ပြီးခဲ့သည့် ဇန်န၀ါရီလက ပြဋ္ဌာန်းခဲ့ခြင်းဖြစ်သည်။

ထိုဥပဒေအား ဘတ်စဲလ်တန်မြို့ရှိ Old Dunsborough ကမ်းခြေတွင် အစမ်းသဘောဖြင့် စတင်ခဲ့ပြီးနောက် ထိုကဲ့သို့ ဆန္ဒပြမှုများ ဖြစ်ပွား ခဲ့ခြင်းလည်း ဖြစ်သည်။ အစမ်းကာလအား ဧပြီ ၃၀ ရက်နေ့အထိ သတ်မှတ်ထားပြီး အစိုးရက သြစေတေးလျ ဒေါ်လာ ၁၆၅၃၇၀ အား ထောက်ပံ့ပေးထားသည်ဟု သိရသည်။

Ref : Xinhua

ဖေဖော်ဝါရီ ၃၊ ၂၀၁၄
M-Media

– ပါလက်စတိုင်း အာဏာပိုင်များနှင့် ငြိမ်းချမ်းရေးဆွေးနွေးပွဲ အဆုံးမသတ်နိုင်ပါက အစ္စရေးအနေဖြင့် နိုင်ငံတကာ၏ သပိတ်မှောက်မှုကို ခံစားရလိမ့် မည်ဟု အမေရိကန်နိုင်ငံခြားရေး ၀န်ကြီး ဂျွန်ကယ်ရီက သတိပေးပြောကြားခဲ့သည်။

ဖေဖော်ဝါရီ ၁ ရက် စနေနေ့က ဂျာမနီနိုင်ငံ မြူးနစ်မြို့တွင် ပြုလုပ်ခဲ့သည့် လုံခြုံရေးဆိုင်ရာ ညီလာခံတွင် ကယ်ရီက ပြောကြားခဲ့ခြင်းဖြစ်ပြီး ပါလက်စတိုင်းပိုင်နက်အတွင်းသို့ ကျူးကျော်ကာ အစ္စရေးက အိမ်ရာများ ဆောက်လုပ်နေခြင်းကိုလည်း ပြစ်တင်ဝေဖန်ခဲ့သည်။

“အစ္စရေးအတွက် အလောင်းအစားက ကြီးမားလှပါတယ်။ (ပါလက်စတိုင်းပိုင်နက်မှာ) အိမ်ရာတွေတိုးချဲ့ဆောက်လုပ်နေတာတွေနဲ့ ပက်သက်ပြီး လူတွေက ဆတ်ဆတ်ထိမခံဖြစ်နေကြပါပြီ။ သပိတ်မှောက်ဖို့နဲ့ အခြားသောပုံစံတွေနဲ့(တုန့်ပြန်ဖို့) ပြောဆိုနေပါတယ်” ဟု ကယ်ရီက ပြောကြားခဲ့သည်။

ထိုမှတ်ချက်နှင့် ပက်သက်၍ အစ္စရေးဘက်မှ ဒေါသတကြီးတုံ့ပြန်ခဲ့ပြီး အစ္စရေးအပေါ် ပိတ်ဆို့မှုများပြုလုပ်ရန်အတွက် ဂျူးဆန့်ကျင်ရေး အားထုတ်မှုအား ထောက်ခံပေးသူအဖြစ် ဂျွန်ကယ်ရီအား စွပ်စွဲခဲ့သည်။ထို့ပြင် ဂါဇာကမ်းမြောင်ဒေသအား သိမ်းပိုက်မည်ဟုလည်း ခြိမ်းခြောက် ပြောဆိုခဲ့သည်။

ပါလက်စတိုင်းတို့၏ အခွင့်အရေးများကို ချိုးဖောက်မှုကြောင့် နိုင်ငံတကာ ပိတ်ဆို့မှုပြုလုပ်ရေး၊ သပိတ်မှောက်ရေးအဖွဲ့ BDS က အစ္စရေးအပေါ် ပိတ်ဆို့မှုများပြုလုပ်ရေးလှုပ်ရှားမှုမှာ လွန်ခဲ့သည့် လအနည်းငယ်က စတင် အရှိန်ရလာခဲ့သည်။ ၂၀၁၃ ခုနှစ် ဧပြီလတွင် အမေရိကန်အခြေစိုက် အာရှ-အမေရိကန်လေ့လာရေးအသင်းက အစ္စရေးပေါ် ပထမဆုံးအကြိမ် ပညာရေးဆိုင်ရာ သပိတ်မှောက်မှု ပြုလုပ်ခဲ့ပြီး၊ ဒီဇင်ဘာလတွင် အမေရိကန်ရှိ ပါမောက္ခများ ပါဝင်သည့် အမေရိကန်လေ့လာရေးအသင်း ASA က အစ္စရေးတက္ကသိုလ်များအား သပိတ်မှောက်ခဲ့ကြသည်။

ထို့ပြင် ၁၉၆၇ ခု စစ်ပွဲအပြီးကစ၍ အစ္စရေးအား ပေးအပ်နေသည့် ထောက်ပံ့ကြေးများအား ယခုနှစ် ဇန်န၀ါရီ ၁ ရက်နေ့တွင် ဥရောပသမဂ္ဂမှ ရပ်တန့်ခဲ့သည်။ ပါလက်စတိုင်းနယ်မြေအတွင်း အိမ်ရာများဆောက်လုပ်မှုကို ဆန့်ကျင်သည့် အနေဖြင့် နယ်သာလန်၊ ဆွီဒင်နှင့် နော်ဝေ စသည့်နိုင်ငံများမှ အချို့သော ကုမ္ပဏီများကလည်း အစ္စရေးနှင့် ဆက်သွယ်လုပ်ဆောင်မှုများအားလုံးကို ရပ်တန့်ခဲ့သည်ဟု သိရသည်။

Ref : Press TV

ဖေဖော်ဝါရီ ၃၊ ၂၀၁၄
M-Media

– နေအိမ်ရှိ တီဗီတစ်လုံးပြုတ်ကျရာမှ ကလေးငယ်တစ်ဦး သေဆုံးမှုတစ်ခု မလေးရှားနိုင်ငံ ပီနန်ရှိ မြို့တစ်မြို့တွင် ဖြစ်ပွားခဲ့သည်ဟု သိရသည်။

Prai မြို့တွင် ဖေဖော်ဝါရီ ၁-ရက်နေ့ ညကိုးနာရီခန့်က နေအိမ်ရှိ မိသားစုဝင်များ တရုတ်နှစ်ကူးအတွက် စုပေါင်း ဓာတ်ပုံရိုက်နေကြစဉ် ၂၉ လက်မ တီဗီမှာ အသက် ၃ နှစ်အရွယ် Chew Hui Zhen အပေါ်သို့ ပြုတ်ကျခဲ့ခြင်းဖြစ်သည်။

အခင်းဖြစ်ပွားစဉ် ကလေးငယ်၏ဖခင်နှင့် ထိုင်းနိုင်ငံသား မိခင် ၂ ဦးစလုံး နေအိမ်တွင် ရှိနေကြပြီး၊ အခင်းဖြစ်ပွားပြီးနောက် အဆိုပါ သမီးငယ်ကို Seberang Jaya ဆေးရုံးသို့ ပို့ဆောင်ခဲ့သော်လည်း အသက်အား ကယ်တင်နိုင်ခဲ့ခြင်းမရှိဘဲ သေဆုံးခဲ့သည်။

ထို့နောက်ဆေးရုံမှရဲ့တပ်ဖွဲ့အား အကြောင်းကြားခဲ့သော်လည်း ရဲတပ်ဖွဲ့က ထိုဖြစ်စဉ်မှာ ရုတ်တရက် သေဆုံးခဲ့ခြင်းဖြစ်ပြီး ရာဇ၀တ်မှုမဟုတ်ဟု ပြောကြားခဲ့သည်။

Ref: Thestar