ဇန်နဝါရီ ၂၊ ၂၀၁၄
M-Media
A.N.Lay
ရန်ကုန် ။ ။ ကျဆုံး နိုင်ငံရေးအကျဉ်းသားများအား ဂုဏ်ပြုပွဲအခမ်းအနား (ပထမ)အကြိမ်ကို ထိုင်းနိုင်ငံအခြေစိုက် နိုင်ငံရေး အကျဉ်းသားများ ကူညီစောင့်ရှောက်ရေးအသင်း AAPP နှင့် နိုင်ငံရေးအကျဉ်းသားဟောင်း များအဖွဲ့က ပူးပေါင်း၍ ရန်ကုန်မြို့ ဗဟန်းမြို့နယ် တော်ဝင်နှင်းဆီခန်းမ၌ ယနေ့နေ့လည် ၁း၀၀-နာရီမှ ၃း၃၀-နာရီအထိ ပြုလုပ်ခဲ့ပါတယ်။
၎င်းအခမ်းအနားတွင် ကျဆုံး နိုင်ငံရေးအကျဉ်းသားများအား ဂုဏ်ပြုသောအားဖြင့် တစ်မိနစ် ငြိမ်၍ဂုဏ်ပြုခဲ့ကြပြီးနောက် ဂုဏ်ပြုပွဲကျင်းပရခြင်း၏ ရည်ရွယ်ချက်မှာ ဒီမိုကရေစီအောင်ပွဲအတွက် အသက်ကို ပဓာနမထားပဲ တိုက်ပွဲဝင်ခဲ့ကြသည့် နိုင်ငံရေးအကျဉ်းသားများကို ဂုဏ်ပြုခြင်းဖြစ်ကြောင်း (FPPS)၏ အတွင်းရေးမှူးကိုသက်နိုင်က ပြောကြားခဲ့ပါတယ်။
“ယခုပွဲဟာ ၈၈အရေးတော်ပုံနှင့် စစ်ကြောရေးစခန်းမှာ ကျဆုံးခဲ့သည့် နိုင်ငံရေးသမားများကို ဂုဏ်ပြုသည့်ပွဲဖြစ်ပါတယ်။ ၈၈-ခု စစ်အစိုးရက အာဏာသိမ်းပြီးတဲ့နောက်ပိုင်းမှာ ကျွန်တော်တို့မြန်မာနိုင်ငံမှာ လူဖမ်းပွဲကြီးအကြီးအကျယ် ကျင်းပခဲ့ပါတယ်။ အဲ့ဒီမှာ နိုင်ငံရေးသမား ၁၇၅-ဦးနှင့် လူမသိသူမသိ ပျောက်ဆုံးသွားသည့် နိုင်ငံရေးသမား ၁၅ ဦးရှိပါတယ်။ ဖမ်းခံရပြီး ထောင်ထဲမှာ သေဆုံးသွားသည့်နိုင်ငံရေးအကျဉ်းသားများနှင့် ဒီမိုကရေစီ အောင်ပွဲအတွက် အသက်ကိုပင် ဂရုမစိုက်ဘဲ ကျဆုံးခဲ့ရသည့် နိုင်ငံရေးအကျဉ်းသားများကိုဂုဏ်ပြုသောအားဖြင် ဤအခမ်းအနားကို ကျင်းပရခြင်း ဖြစ်ပါတယ်လို့” အခမ်းအနားကျင်းပရခြင်း ရည်ရွယ်ချက်ကိုပြောကြားခဲ့ပါတယ်။
ဆက်လက်ပြီး NLD ပါတီ၏ ခေါင်းဆောင်တစ်ဦးဖြစ်သည့် ဦးတင်ဦးမှလည်း ကျဆုံးသွားသည့် ရဲဘော်များ၏ ကိုယ်ကျိုးစွန့်ခဲ့ပုံ၊ သူတို့၏ ဘဝပေးဆပ် ခဲ့ပုံများ၊ ရဲဘော်များ၏ မိသားစုများထဲကသော်လည်းကောင်း၊ ထောင်အတွင်းမှာ လွတ်မြောက်လာသူများသော်လည်းကောင်း ယခုအချိန် ရောက်လာ ခြင်းမှာ အင်မတန်မှ ကံကောင်း၍သာ ညှင်းပန်းနှိပ်စက်မှုအောက်မှာ အသက်လုပြီး ထွက်လာရပြီး၊ ကျဆုံးသွားသည့်မိသားစုတွေအတွက် စုပေါင်းပြီး မိမိတို့ တက်စွမ်းသမျှထောက်ပံ့မှု သိရသည့်အတွက် ၀မ်းသာကြောင်း၊ ကျဆုံးသွားသည့် ရဲဘော်များအတွက် ၀မ်းနည်းသော်လည်း ယုံကြည် ချက်ကြောင့် အသက်စွန့်သွားသည့်အတွက် ဂုဏ်ယူကြောင်းပြောကြားပြီး ကျဆုံးသွားသည့်ရဲဘော်များ၏ မိသားစုဝင်များအား အားပေးဂုဏ်ပြုစကား ပြောကြားခဲ့ပါတယ်။
သတင်းစာဆရာကြီး ဟံသာဝတီ ဦးဝင်းတင်က “ကျဆုံးသွားသည့်နိုင်ငံရေးအကျဉ်းသားတွေဟာ အသက်တောင်စွန့်ပြီးတော့ တိုင်းပြည်အကျိုး အတွက်၊ လူ့အခွင့်အရေးအတွက် အသက်စွန့်ပြီးကြိုးပမ်းသွားသည့်အတွက် ကျွန်တော်အင်မတန်မှ ဂုဏ်ယူပြီး လေးစားလို့ ယခုပွဲကို တက်ရောက် ရခြင်း ဖြစ်ပါတယ်။ ကျွန်တော်အထူးပြောချင်တာက နိုင်ငံရေးအကျဉ်းသားတွေရဲ့မိသားစုတွေပါ။ သူတို့ဟာ ကိုယ့်ရဲ့ သား၊ သမီး၊ သို့ ခင်ပွန်း၊ ဆွေမျိုးထဲက တစ်ဦးဦး ထောင်ကျနေတာတောင် တစ်ယောက်ကိုတစ်ယောက်အားပေးရင်းနဲ့ ဒီနေ့ဒီအချိန်ထိရောက်လာကြတာပါ။ ဒါကြောင့်
မိသားစုတွေသာ အသိဆုံးပါ ။ နိုင်ငံရေးအကျဉ်းသားတွေရဲ့ဘဝ ဘယ်လောက်ကြမ်းတမ်းလည်း ဆိုတာကို မိသားစုတွေသာ အသိဆုံးပါ။ နောက်တစ်ခုက ပုဒ်မတွေပါ၊ ဆွဲတုန်းကတော့ ရာဇဝတ်မှုနဲ့ ဆွဲတယ်။ ထောက်လှမ်းရေးနဲ့ စစ်ကြောရေးတွေလုပ်ပြီးတော့ တပ်ချင်တဲ့ပုဒ်မ တပ်ပြီး နိုင်ငံရေးအကျဉ်းသားလုပ်တော့တာပါပဲ။ အဲဒီမှာ အဖမ်းခံရပြီးတော့ ထောင်ထဲမှာ ကျဆုံးသွားတဲ့လူတွေအတွက် ကျွန်တော်အင်မတန်မှ စိတ်မကောင်း ဖြစ်မိပါတယ်။ နောက် ယခုလို ကျဆုံးနိုင်ငံရေးအကျဉ်းသားဂုဏ်ပြုပွဲမှာ တက်ရောက်ခွင့်ရပြီး ဂုဏ်ပြုစကားပြောကြားခွင့်ရတဲ့အတွက်လည်း ကျွန်တော် အင်မတန်မှ ဂုဏ်ယူမိပါတယ်ဟု”ပြောကြားခဲ့ပါတယ်။
၎င်းအခမ်းအနားသို့ ဒေါ်အောင်ဆန်းစုကြည်ပေးပို့သည့်သဝဏ်လွှာကို ကျဆုံးနိုင်ငံရေးအကျဉ်းသား ဦးမင်းသစ်၏ သမီးဖြစ်သူ မဝေဝေနှင်းက ဖတ်ကြားခဲ့ပြီး၊ ဂုဏ်ပြုစကားများကို ဟံသာဝတီ ဦးဝင်းတင်၊ ဦးတင်ဦးနှင့် ၈၈-မျိုးဆက် ကျောင်းသားခေါင်းဆောင်များဖြစ်သည့် ဦးမင်းကိုနိုင်၊ ဦးကိုကိုကြီးတို့မှ ဂုဏ်ပြုစကားပြောကြားခဲ့ပြီးနောက် ကျဆုံး၊ နိုင်ငံရေးအကျဉ်းသားများ၏ ကိုယ်စား မိသားစုဝင်များကို ဂုဏ်ပြုလွှာများပေးအပ်ခဲ့ကြ ပါတယ်။
