ဒီဇင်ဘာ ၃၀၊ ၂၀၁၃
M-Media
လက်ဘနွန် စစ်တပ်အတွက် ဆော်ဒီထောက်ပံ့
– နိုင်ငံရှိ စစ်တပ်၏ စွမ်းရည်များ ပိုမိုအားကောင်းစေရန်အတွက် ဆော်ဒီအာရေဗျနိုင်ငံမှ ကန်ဒေါ်လာ သန်းသုံးထောင် ပေးအပ်ခဲ့သည်ဟု လက်ဘနွန်သမ္မတ မိုက်ကယ် ဆူလေမန်က ပြောကြားခဲ့သည်။ ထိုကဲ့သို့ ထောက်ပံ့မှုမှာ လက်ဘနွန်စစ်တပ်အတွက် နိုင်ငံရပ်ခြားမှ အကြီးဆုံးထောက်ပံ့မှုဖြစ်ပြီး ယခင် ဘဏ္ဍာရေးဝန်ကြီးဟောင်း မိုဟာမက် ချာတာ လုပ်ကြံခံရပြီးနောက်ပိုင်း ပေးအပ်ခဲ့ခြင်းလည်းဖြစ်သည်။
လက်ဘနွန် သမ္မတကမူ ထိုငွေများဖြင့် ပြင်သစ်မှ စစ်လက်နက်ပစ္စည်းများ ၀ယ်ယူမည်ဟု ပြောဆိုခဲ့သည်။ ဆော်ဒီအာရေဗျနိုင်ငံသို့ အလည်အပတ်ခရီး ရောက်ရှိနေသည့် ပြင်သစ် သမ္မတ ဟော်လန်ဒေးကလည်း လက်ဘနွန်က လက်နက်ဝယ်ယူရန် ကမ်းလမ်းလာပါက ရောင်းချမည်ဟု ဆော်ဒီဘုရင် အဗ္ဗဒူလာအားပြောကြားခဲ့သည်။
___________________
တောင်ပိုင်းဆူဒန်တွင်ဖြစ်ပွားနေသော အကြမ်းဖက်သူများ တရားဥပေဒရှေ့မှောက်ခေါ်မည်ဟု ဘန်ကီမွန်းပြောကြား
– တောင်ဆူဒန်နိုင်ငံအတွင်း ဖြစ်ပွားနေသည့် အကြမ်းဖက်မှုများအား ဖန်တီး နေသူများနှင့် လူ့အခွင့်အရေး ချိုးဖောက်နေသူများကို တရားဥပဒေ ရှေ့မှောက်သို့ ခေါ်ဆောင်လာမည်ဟု ကုလသမဂ္ဂ အထွေထွေ အတွင်းရေးမှူးချုပ် ဘန်ကီမွန်က စနေနေ့က ထုတ်ပြန်သော ကုလသမဂ္ဂ၏ ကြေညာချက်တွင် ပြောကြားထားသည်။
ထို့ပြင် ထိုကြေညာချက်၌ တောင်ဆူဒန်နိုင်ငံအတွင်း ဖြစ်ပွားနေသောအကြမ်းဖက်မှုများအား ချက်ခြင်းရပ်တန့်ရမည်ဟု ဖော်ပြထားပြီး၊ ဘန်ကီမွန် ကလည်း တိုင်းပြည်အတွင်းရှိနေသည့် ပြည်သူများ၏ အခွင့်အရေးများနှင့် လုံခြုံရေးကို တာဝန်ယူပေးရန် အစိုးရအား တိုက်တွန်းခဲ့သည်။
တောင်ဆူဒန်နိုင်ငံသမ္မတ ဆာဗာလ် ကီရ် အာထောက်ခံသူများနှင့် ဒုတိယ သမ္မတ ရီက်မာချာအားထောက်ခံသူများအကြားဖြစ်ပွားနေသည့် ပဋိပက္ခ များမှာ ဒီဇင်ဘာ ၁၅ ရက်နေ့က စတင်ခဲ့ပြီး ပြည်တွင်းစစ်အသွင်သို့ ကူးပြောင်းလာနေကာ နိုင်ငံတစ်ဝှမ်းတွင်လည်း လူ့အခွင့်အရေး ချိုးဖောက် မှုများ အကြမ်းဖက်မှုများ တိုးမြှင့်လာနေသည်။
___________________________
ဗီယက်နမ်တွင် ကျောင်းသား (၇) ဦးရေနစ်သေဆုံး
– ဗီယက်နမ်နိုင်ငံ တောင်ပိုင်း Binh Duong ပြည်နယ် Dau Tieng ခရိုင်ရှိ အလယ်တန်ကျောင်းတစ်ခုမှ ကျောင်းသား ၇ ဦးမှာ ယမန်နေ့က မြို့တော်ဟိုချီမင်းတောင်ဘက်တွင် Can Gio ကမ်းခြေတွင် ရေနစ်သေဆုံးခဲ့သည်ဟု သိရသည်။ ယမန်နေ့ နေ့လည်ကဖြစ်ပွားခဲ့ခြင်းဖြစ်ပြီး အသက် ၁၃ နှစ်မှ ၁၅ နှစ်ရှိ အဆိုပါကလေးငယ်များမှာ ကျောင်းမှစီစဉ်သည့် ခရီးစဉ်တစ်ခုကြောင့် ထိုကမ်းခြေသို့ လာရောက်ခဲ့ခြင်းဖြစ်သည်။ ကမ်းခြေတွင် စုစုပေါင်း ကျောင်းသား ၁၂ ဦးမှာ ရေကူးနေခဲ့ပြီး ထို ၇ ဦးမှာ ကြီးမားသော လှိုင်းလုံးများဖြင့် ပါသွားခဲ့ပြီး ၎င်းတို့၏ အလောင်းများအား ယနေ့နံနက်တွင် ဆယ်ယူရရှိခဲ့သည်။
___________________________
ဆွစ်ဇာလန်မှာ ကမ္ဘာလူငယ် ကင်းထောက်ရုံး မလေးရှားသို့ ပြောင်းရွှေမည်။
– ဆွစ်ဇာလန်နိုင်ငံ ဂျီနီဗာမြို့တွင် ရုံးစိုက်ထားသည့် ကမ္ဘာ့ကင်းထောက်လှုပ်ရှားမှုအဖွဲ့ WOSM အား လာမည့်နှစ်တွင် မလေးရှားနိုင်ငံ ကွာလာလမ်ပူမြို့သို့ ပြောင်းရွှေ့တော့မည်ဟု မလေးရှား သတင်းအေဂျင်စီ Bernama က ယမန်နေ့က ဖော်ပြခဲ့သည်။ မလေးရှားတွင် ရုံးစိုက်ရန် အဖွဲ့ဝင်နိုင်ငံ ၁၈၆ နိုင်ငံစလုံးက တညီတစ်ညွတ်တည်း သဘောတူညီခဲ့ခြင်းဖြစ်သည်ဟု မလေးရှား ကင်းထောက် အကြီးအကဲ ဆာဖီဆာလေက ပြောကြားခဲ့သည်။
WOSM ၏ ရည်ရွယ်ချက်မှာ အသင်း၏ ဥပဒေများနှင့် ကတိက၀တ်များကို အခြေခံကာ လူငယ်များ၏ ပညာရေးကို ကူညီရန်၊ တစ်ဦးချင်း ပြည့်ဝသော ပြည်သူများရှိသည့် ပိုမိုကောင်းမွန်သော ကမ္ဘာတစ်ခု တည်ဆောက်ရန်နှင့် လူ့အဖွဲ့အစည်းတွင် လူငယ်များ၏ ကူညီဆောင်ရွက်မှု အခန်းကဏ္ဍ တိုးမြှင့်လာစေရန် ဖြစ်သည်။
___________________________
အလ်ဆာဗေဒိုးရှိ မီးတောင် တခု လှုပ်ရှားမှုဖြစ်
– လက်တင်အမေရိကနိုင်ငံတစ်ခုဖြစ်သည့် အလ်ဆာဗေဒိုးရှိ Chaparrastique မီးတောင်တစ်ခုမှာ ယမန်နေ့နံနက်စောစောပိုင်းက လှုပ်ရှားမှုများဖြစ်ပွားခဲ့ပြီး ပြာများ၊ မီးခိုးများ ပန်းထွက်ခဲ့သည်ဟု သိရသည်။ အမြင့်ပေ ၂၁၃၀ မီတာ ရှိသည့် ထိုမီးတောင်မှာ နိုင်ငံအတွင်းရှိ ရှင်သန်နေသော မီးတောင်ရှစ်ခုထဲမှ တစ်ခုဖြစ်သည်။ ထိုကဲ့သို့ မီးတောင်လှုပ်ခတ်မှုကြောင့် မီးတောင်နှင့် ၃ ကီလိုမီတာအတွင်းရှိ ပြည်သူများအား အရေးပေါ်ရွှေ့ပြောင်းများပြုလုပ်ပေးခဲ့ပြီး ထိုဒေသတစ်ဝိုက်အား အ၀ါရောင်အဆင့် သတိပေးချက် ကြေညာ ထားကြောင်း ပြည်သူ့ကာကွယ်ရေး အေဂျင်စီက သတင်းထုတ်ပြန်ခဲ့သည်။
