Blog

ဧပြီ ၂၈၊ ၂၀၂၁
M-Media

-အလုပ်လုပ်ဖို့ တရားမဝင် ဝင်ရောက်လာတဲ့ မြန်မာနိုင်ငံသား ၆၀ ကို မနေ့က ဖမ်းဆီးရမိခဲ့တယ်လို့ ထိုင်းအာဏာပိုင်တွေက ပြောပါတယ်။

မြန်မာနိုင်ငံနဲ့ ကပ်နေတဲ့ ကချန်ဘူရီပြည်နယ်က တောထဲမှာ ၄၈ ဦး နဲ့ ၁၂ ဦးပါဝင်တဲ့ အဖွဲ့နှစ်ခုကို သီးခြားဆီ မိခဲ့တာပါ။ တော်တော်များများက ထားဝယ်မြို့ကနေ ၇ ရက်ခရီးလမ်းလျှောက်ကာ ထိုင်းထဲကို ဝင်ရောက်လာခဲ့တာလို့ ဆိုပါတယ်။ ဖမ်းဆီးရမိတဲ့သူတွေထဲမှာ မော်လမြိုင်ကလူတွေလည်း ပါဝင်ပါတယ်။

တစ်ယောက်ကို ဘတ် ၁၃၀၀၀ ကနေ ၂၀၀၀၀ အထိ ပေးခဲ့ရပြီး နာခွန်ပါသွန်၊ ရက်ချာဘူရီ၊ စမွတ်ဆာခွန်နဲ့ ဘန်ကောက်တို့မှာ အလုပ်ရမယ်ဆိုပြီး ပွဲစားတွေက ခေါ်လာတာဖြစ်ပါတယ်။

ဖမ်းဆီးရမိသူတွေကို ကျန်းမာရေးစစ်ဆေးကာ ခရိုင်ရဲတပ်ဖွဲ့ထံ လွှဲပေးခဲ့ပြီး တရား၀င်ဝင်ရောက်မှု၊ အရေးပေါ်အမိန့်နဲ့ ကပ်ရောဂါထိန်းချုပ်ရေး ဥပဒေ ချိုးဖောက်မှုတွေနဲ့ တရားစွဲဆိုထားတယ်လို့ ထိုင်းအာဏာပိုင်တွေက ထုတ်ပြန်ပါတယ်။

မြန်မာနိုင်ငံမှာ မတည်ငြိမ်မှုတွေ ဖြစ်နေတာကြောင့် ပြီးခဲ့တဲ့ သီတင်းပတ်တွေအတွင်း ထိုင်းနိုင်ငံထဲကို ၀င်ရောက်ခိုလှုံရသူတွေ၊ အလုပ်အကိုင် သွားရောက်ရှာဖွေသူတွေ မြင့်တက်လာတာ ဖြစ်ပါတယ်။

Ref: Bangkok Post

ဧပြီ ၂၇၊ ၂၀၂၁
M-Media

-စစ်ကောင်စီက ပြည်သူတွေအပေါ် ဆိုးဆိုးရွားရွား အကြမ်းဖက်မှုအတွက် တုန်လှုပ်ခြောက်ခြားမိတယ်လို့ အမေရိကန်သမ္မတဟောင်း ဘာရက်အိုဘားမားက ပြောကြားလိုက်ပါတယ်။

အိုဘားမားဟာ သူအာဏာရှိစဉ်က စီးပွားရေးပိတ်ဆို့မှုတွေကို ဖြေလျော့ပေးကာ မြန်မာနိုင်ငံရဲ့ ဒီမိုကရေစီ အသွင်ကူးပြောင်းမှုကို အားပေးခဲ့သူပါ။

မနေ့ကထုတ်ပြန်တဲ့ ကြေငြာချက်မှာတော့ မြန်မာ့အရေးမှာ စစ်ခေါင်းဆောင်တွေအပေါ် ဖိအားပေးအရေးယူတဲ့ ဘိုင်ဒန်အစိုးရနဲ့ အခြားတိုင်းပြည်တွေရဲ့ ကြိုးပမ်းအားထုတ်မှုတွေကို ထောက်ခံတယ်လို့ ဖော်ပြထားပါတယ်။

“၁၀ စုနှစ်တစ်ခုလောက် လွတ်လပ်ခွင့်ရပြီးနောက်ပိုင်း စစ်တပ်က သူတို့အလိုကျဖြစ်ဖို့ တရားမဝင် ရက်စက်စက် လုပ်ဆောင်နေတာကို ပြည်သူတွေက လုံး၀လက်ခံဘူးဆိုတာ ရှင်းပါတယ်။ ကမ္ဘာကြီးကလည်း လက်မခံသင့်ပါဘူး”

လူသတ်အစိုးရကို ပြည်သူလူထုက ဆန့်ကျင်တာကြောင့် မတည်ငြိမ်မှုတွေ၊ လူသားချင်းစာနာထောက်ထားမှုဆိုင်ရာ ပြဿနာတွေ ပိုဖြစ်လာပြီး၊ ကျရှုံးနိုင်ငံဖြစ်မယ့်အန္တရာယ် ရှိတယ်ဆိုတာ အိမ်နီးချင်းနိုင်ငံတွေက သိဖို့လိုအပ်တယ်လို့လည်း အိုဘားမားက ထည့်သွင်း​ပြောဆိုခဲ့ပါတယ်။

ဒီမိုကရေစီအနာဂတ်ကိုရဖို့ ကြိုးပမ်းကြသူတွေအနေနဲ့ တိုင်းရင်းသားတွေ၊ လူနည်းစုတွေအားလုံးနဲ့ ပူးပေါင်းကာ ဆက်လက်ဆောင်ရွက်သွားကြဖို့လည်း သူက တိုက်တွန်းပြောဆိုခဲ့ပါတယ်။

“အမှောင်ကျတဲ့ကာလပါ။ မြန်မာပြည်သူ တော်တော်များများရဲ့ စည်းလုံးမှု၊ ကြံ့ကြံ့ခံရင်ဆိုင်နိုင်မှုနဲ့ ဒီမိုကရေစီတန်ဖိုးတွေအပေါ် အလေးထားမှုကို မြင်ရတဲ့အတွက် ကျွန်တော် လေးစားအားကျမိပါတယ်။ အနာဂတ်မြန်မာနိုင်ငံအတွက် ​မျှော်လင့်ချက်ဟာ ပြည်သူလူထုရဲ့ဆန္ဒကို အလေးထားတဲ့ ခေါင်းဆောင်တွေကနေတစ်ဆင့်သာ ပေါ်ထွက်လာမယ်ဆိုတာကို ပြသနေတာလည်း ဖြစ်ပါတယ်”

Ref: CNA

ဧပြီ ၂၆၊ ၂၀၂၁
M-Media

-အာဏာသိမ်း စစ်ကောင်စီဥက္ကဌ ဗိုလ်ချုပ်မှူးကြီး မင်းအောင်လှိုင်ဟာ ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ ကိုယ်စားလှယ် ခရစ္စတင်း ရှာရ်နာ ဘာဂီနာနဲ့ ဂျကာတာမှာ တွေ့ဆုံခဲ့တယ်လို့ အာဆီယံ သံအမတ်တွေက အတည်ပြုပါတယ်။

စစ်ကောင်စီဥက္ကဌဟာ စနေနေ့ကပြုလုပ်တဲ့ အာဆီယံထိပ်သီးအစည်းအဝေးကို တက်ရောက်စဉ်မှာ ဘာဂီနာနဲ့ သီးခြားတွေ့ဆုံခဲ့တာ ဖြစ်ပါတယ်။

တွေ့ဆုံစဉ်အတွင်း ဖေဖော်ဝါရီလ အာဏာသိမ်းမှုနဲ့ပတ်သက်လို့ စစ်ကောင်စီဥက္ကဌက ကာကွယ်ပြောဆိုခဲ့ပြီး နိုဝင်ဘာရွေးကောက်ပွဲမှာ မဲမသမာမှုတွေ အမြောက်အများရှိတယ်လို့ ဘာဂီနာကို ပြောကြာခဲ့ပါတယ်။

ဘာဂီနာက မြန်မာနိုင်ငံကို လာရောက်ခွင့်ရဖို့ တောင်းဆိုခဲ့ပေမယ့် ဗိုလ်ချုပ်မှူးကြီးမင်းအောင်လှိုင်က တိတိကျကျ အဖြေမပေးခဲ့ဘူးလို့ ဆိုပါတယ်။

ဒီကိစ္စနဲ့ပတ်သက်ပြီး Nikkei Asia ရဲ့ မေးမြန်းမှုကို ဖြေကြားဖို့ ဘာဂီနာက ငြင်းဆန်ပါတယ်။

ဘာဂီနာဟာ စင်ကာပူ၊ အင်ဒိုနီးရှား၊ မလေးရှား နိုင်ငံခြားရေးဝန်ကြီးတွေနဲ့လည်း ဂျကာတာမှာတွေ့ဆုံခဲ့ပြီး နောက်ပိုင်းမှာ ထိုင်းနိုင်ငံကို ပြန်သွားခဲ့ပါတယ်။ သူမဟာ ထိုင်းနိုင်ငံမှာ ​ဆက်ရှိနေမှာဖြစ်ပြီး မြန်မာ့အရေး ဖြေရှင်းဖို့အတွက် လာမယ့်ရက်တွေမှာ ဆွေးနွေးမှုတွေ လုပ်ဖို့ ရှိနေပါတယ်။

စစ်ကောင်စီဥက္ကဌ ဘာဂီနာနဲ့ တွေ့ဆုံခဲ့မှုအတွက် အားရကျေနပ်တယ်လို့ အာဆီယံတာဝန်ရှိသူတွေက ပြောပါတယ်။ အာဆီယံထိပ်သီးအစည်းအဝေး တက်ရောက်ဖို့ စစ်ကောင်စီဥက္ကဌကို ဖိတ်ကြားတာဟာ လူ ၇၀၀ ကျော်သတ်ထားတဲ့ အာဏာသိမ်းအစိုးရကို အသိအမှတ်ပြုသလိုမျိုး ဖြစ်နေတယ်ဆိုတဲ့ ဝေဖန်မှုတွေကိုလည်း အာဆီယံသံတမန်မတွေက ပယ်ချခဲ့ပါတယ်။

Ref : Nikkei Asia