Blog

မေ ၁၊ ၂၀၂၁
M-Media

-မြန်မာနိုင်ငံမှာ ဘာသာလူမျိုးပေါင်းစုံ မကြုံစဖူး စည်းလုံးညီညွတ်လာတာကြောင့် စစ်ခေါင်းဆောင်တွေဟာ အာဏာစုစည်းဖို့ ခက်ခဲနေတယ်လို့ ကုလအတွင်းရေးမှူးရဲ့ မြန်မာနိုင်ငံဆိုင်ရာ အထူးကိုယ်စားလှယ် ခရစ္စတင်း ရှာရ်နာ ဘာဂီနာက ပြောကြားလိုက်ပါတယ်။

အင်ဒိုနီးရှားနိုင်ငံ ဂျကာတာမှာလုပ်ခဲ့တဲ့ မြန်မာ့အရေး အာဆီယံ ထိပ်သီးအစည်းအ၀ေးမှာ စစ်ကောင်စီဥက္ကဌအပါအ၀င် အာဆီယံ ခေါင်းဆောင်တွေနဲ့ တွေ့ဆုံဆွေးနွေးမှုအကြောင်း အစီရင်ခံစာကို မနေ့က ကုလသမဂ္ဂ လုံခြုံရးကောင်စီ အထူးအစည်းအ၀ေးမှာ ဘာဂီနာက တင်သွင်းခဲ့ပါတယ်။

ဘာဂီနာဟာ စစ်ကောင်စီအကြီးအကဲ ဗိုလ်ချုပ်မှူးကြီးမင်းအောင်လှိုင်နဲ့ ဂျကာတာမှာ တွေ့ဆုံခဲ့ပြီး မြန်မာနိုင်ငံကို ၀င်ခွင့်ရရေး တောင်းဆိုခဲ့ပေမယ့် ငြင်းပယ်ခံခဲ့ရတယ်လို့ ဆိုပါတယ်။
ဖေဖော်၀ါရီ ၁ ရက်နေ့ စစ်တပ်ကအာဏာသိမ်းပြီးနောက်ပိုင်း မတည်ငြိမ်မှုတွေကြောင့် ပြည်တွင်းမှာ အနည်းဆုံး လူ ၂ သောင်းလောက် အိုးအိမ်စွန့်ခွာ ထွက်ပြေးခဲ့ရပြီး အိမ်နီးချင်းနိုင်ငံတွေကို ထွက်ပြေးရသူ အရေအတွက်ကတော့ တစ်သောင်းနီးပါး ရှိတယ်လို့ ဘာဂီနာက ပြောပါတယ်။

ပြည်သူအားလုံးရဲ့ ညီညွတ်မှုကြောင့် စစ်ခေါင်းဆောင်တွေဟာ အခုအချိန်အထိ အာဏာကို တည်ဆောက်လို့မရသေးဘူးလို့လဲ သူမက ထည့်သွင်းပြောဆိုခဲ့ပါတယ်။

“ဒီမိုကရေစီကို မျှော်လင့်တောင့်တတဲ့ ဘုံရပ်တည်ချက်ကြောင့် ဘာသာမတူသူတွေ၊ လူမျိုးမတူသူတွေ၊ လူ့အဖွဲ့အစည်းပေါင်းစုံက မြန်မာပြည်သူတွေအားလုံးဟာ အရင်က မရှိခဲ့ဘူးတဲ့ပုံစံမျိုးနဲ့ စည်းလုံးညီညွတ်လာခဲ့ကြပါတယ်။ ဒီလို စည်းလုံးညီညွတ်မှု အားကောင်းလာတာကြောင့် စစ်တပ်ဟာ အာဏာကို စုစည်းဖို့၊ အာဏာသိမ်းမှုကို တည်ငြိမ်အောင်လုပ်ဖို့မှာ မမျှော်လင့်တဲ့ အခက်အခဲတွေကို ကြုံနေရပါတယ်”

ဘာဂီနာဟာ မြန်မာ့အရေး ဖြေရှင်းနိုင်ဖို့အတွက် ထိုင်းနိုင်ငံကို ပြီးခဲ့တဲ့လကတည်းက ရောက်ရှိနေတာဖြစ်ပါတယ်။

Ref: The Straits Times

ဧပြီ ၃၀၊ ၂၀၂၁
M-Media

-ကိုဗစ်ကပ်ရောဂါနဲ့ နိုင်ငံရေးမတည်ငြိမ်မှုတွေကြောင့် လာမယ့်နှစ်ရောက်ရင် မြန်မာနိုင်ငံမှာ လူဦးရေရဲ့ထက်ဝက်လောက် ဆင်းရဲမွဲတွေမှု သတ်မှတ်ချက်အောက်ကို ရောက်ရှိလာနိုင်တယ်လို့ ကုလသမဂ္ဂက သတိပေးလိုက်ပါတယ်။

ကိုဗစ်ကူးစက်မှုကြောင့် မြန်မာနိုင်ငံရဲ့ စီးပွားရေး ကျဆင်းနေရာကနေ ဖေဖော်ဝါရီ ၁ ရက်နေ့ စစ်တပ်က အာဏာသိမ်းလိုက်ပြီးတဲ့နောက် ဖြစ်ပေါ်လာတဲ့ နိုင်ငံရေး မတည်ငြိမ်မှုတွေ၊ စစ်ကောင်စီရဲ့ ပြည်သူအပေါ်အကြမ်းဖက်မှုတွေ၊ ပိတ်ဆို့မှုတွေကြောင့် နိုင်ငံရဲ့ စီးပွားရေးအခြေအနေဟာ ပြိုလဲလုနီးပါး ဖြစ်လာတာ ဖြစ်ပါတယ်။

ကုလသမဂ္ဂ စားနပ်ရိက္ခာအဖွဲ့ UNDP က၂၀၂၂ အစောပိုင်းရောက်ရင် မြန်မာနိုင်ငံက လူ ဦးရေ ထက်ဝက်နီးပါးဖြစ်တဲ့ ၂၅ သန်းလောက် ဆင်းရဲမွဲတွေမှု သတ်မှတ်ချက်အောက်မှာ နေထိုင်ရလိမ့်မယ်လို့ ဒီကနေ့ထုတ်ပြန်တဲ့ အစီရင်ခံစာမှာ ဖော်ပြထားပါတယ်။

လက်ရှိဖြစ်ပွားနေတဲ့ ပြဿနာတွေကြောင့် တိုင်းပြည်ရဲ့အခြေအနေဟာ ၂၀၀၅ ခုနှစ်တုန်းကပုံစံအထိ ပြန်ရောက်သွားနိုင်တယ်လို့ UNDP တာဝန်ရှိသူ အာချင် စတိုင်နာက ပြောကြားခဲ့ပါတယ်။ ၂၀၀၅ ခုနှစ်တုန်းကလည်း မြန်မာနိုင်ငံရဲ့ လူဦးရေ ထက်ဝက်လောက်ဟာ ဆင်းရဲမွဲတွေမှု သတ်မှတ်ချက်အောက်မှာ နေထိုင်ခဲ့ရတာ ဖြစ်ပါတယ်။

“လည်ပတ်နေတဲ့ ဒီမိုကရက်တစ် အသင်းအဖွဲ့တွေ မရှိဘူးဆိုရင် မျိုးဆက်တစ်ခုအတွင်း မမြင်ခဲ့ရဘဲ ရှောင်လွှဲလို့ရနိုင်တဲ့ ဆင်းရဲမွဲတေမှု အခြေအနေအဆီ ဝမ်းနည်းဖွယ် ပြန်ရောက်သွားတာမျိုးကို မြန်မာနိုင်ငံက ရင်ဆိုင်ရမှာပါ”

ကုလသမဂ္ဂ လူသားချင်းစာနာထောက်ထားမှုဆိုင်ရာအဖွဲ့ OCHA ကလည်း စစ်အာဏာသိမ်းမှုနောက်ပိုင်း ဖြစ်ပေါ်လာတဲ့ မတည်ငြိမ်မှုတွေကြောင့် ကုန်စျေးနှုန်းတွေ တက်လာခဲ့ပြီး လာမယ့်သီတင်းပတ်တွေအတွင်း လူ ၃ သန်းလောက် စားနပ်ရိက္ခာပြတ်လတ်မှုကို ကြုံတွေ့ရနိုင်တယ်လို့ ပြီးခဲ့တဲ့တစ်ပတ်မှာ သတိပေးခဲ့ပါတယ်။

Ref: Asia Times

ဧပြီ ၃၀၊ ၂၀၂၁
M-Media

-မြန်မာနိုင်ငံမှာ ဒီမိုကရေစီ ပြန်လည်ထွန်းကားရေးအတွက် သက်ဆိုင်တဲ့ အဖွဲ့အစည်းတွေအားလုံးကို ကူညီထောက်ပံ့ပေးသွားဖို့ အဆင်သင့်ရှိနေတယ်လို ဥရောပသမဂ္ဂက ဒီကနေ့မှာ ပြောကြားလိုက်ပါတယ်။

မြန်မာ့အရေးနဲ့ပတ်သက်ပြီး အာဆီယံထိပ်သီးအစည်းအဝေးကို ပြီးခဲ့တဲ့တစ်ပတ်က ကျင်းပခဲ့ပြီး အကြမ်းဖက်မှု ချက်ခြင်းရပ်တန့်ရေးအပါအဝင် အချက် ၅ ချက်ကို မြန်မာအာဏာသိမ်းစစ်ခေါင်းဆောင်နဲ့ သဘောတူညီချက် ရခဲ့တယ်လို့ ထုတ်ပြန်ပါတယ်။

ဒီကနေ့ ဥရောပ သမဂ္ဂ နိုင်ငံခြားရေးဆိုင်ရာ အကြီးအကဲရဲ့ ထုတ်ပြန်ချက်မှာ မြန်မာ့အရေး အာဆီယံရဲ့ ကြိုးပမ်းမှုကို ထောက်ခံအားပေးတယ်လို့ ဖော်ပြထားပါတယ်။

“မြန်မာနိုင်ငံ ဒီမိုကရေစီလမ်းကြောင်းပေါ် ပြန်ရောက်ရေး အဓိကကျတဲ့ သက်ဆိုင်သူတွေအားလုံးနဲ့ အပြုသဘောဆောင်တဲ့ ဆွေးနွေးမှုကို အာဆီယံက ဆောင်ရွက်ရာမှာ ဥရောပသမဂ္ဂက ကူညီဖို့ အဆင်သင့်ရှိနေပါတယ်”

Ref: Reuters