ဧပြီ ၂၁၊ ၂၀၂၁
M-Media
-ဖေဖော်၀ါရီ ၁ ရက် စစ်တပ်က အာဏာသိမ်းပြီးနောက်ပိုင်း မြန်မာနိုင်ငံက ကြေးနီအပါအ၀င် ဓာတ်သတ္ထုတွေ တရုတ်ဖက်ကို တူးဖော်တင်ပို့မှုဟာ လအလိုက် ၂ ဆအထိ မြင့်တက်လာတယ်လို့ ကိန်းဂဏန်းတွေအရ သိရပါတယ်။
မတ်လအတွင်း သန့်စင်ပြီးကြေးနီ ၁၁၀၀၁ တန် တရုတ်ဖက်ကို တင်ပို့ခဲ့ပြီး ဖေဖော်၀ါရီလကထက်စာရင် ၁၂၀ ရာခိုင်နှုန်း မြင့်တက်လာကာ ပြီးခဲ့တဲ့နှစ် မတ်လက တင်ပို့မှုနဲ့ ယှဥ်ကြည့်ရင် ၃၇.၆ ရာခိုင်နှုန်း တက်လာတာ ဖြစ်ပါတယ်။
မြန်မာနိုင်ငံက ကြေးနီစီမံကိန်းနှစ်ခုကို တရုတ်အစိုးရပိုင် Wanbao Mining ကုမ္ပဏီက မြန်မာစစ်တပ်ပိုင် ဧရာမစီးပွားရေးလုပ်ငန်းဖြစ်တဲ့ မြန်မာ့စီးပွားရေးဦးပိုင် ကုမ္ပဏီလီမိတက် (MEHL) နဲ့ ပူးပေါင်းလုပ်ကိုင်တာဖြစ်ပါတယ်။ အဲဒီအထဲက လက်ပံတောင်း ကြေးနီစီမံကိန်းကို လတ်တလော မငြိမ်မသက်မှုတွကြောင့် ရပ်ဆိုင်းထားတယ်လို့ တရုတ်နိုင်ငံပိုင် သတင်းစာ China Daily က ဖော်ပြပါတယ်။
မတ်လအတွင်း သံဖြူထုတ်လုပ်တဲ့ ဓာတ်သတ္ထုကုန်ကြမ်း မြန်မာနိုင်ငံကနေ တရုတ်ကိုတင်ပို့မှုဟာ ၁၈၁၆၃ တန် ရှိခဲ့ပြီး ဖေဖော်၀ါရီလကထက် ၁၂၀ ရာခိုင်နှုန်း မြင့်တက်ခဲ့ပါတယ်။ ကမ္ဘာ့စျေးကွက်မှာ တန်ဖိုးမြင့်တဲ့ မြေရှားသတ္ထု တင်ပို့မှုက မတ်လမှာ ၂၄၁၄ တန် ရှိခဲ့ပြီး ဖေဖော်၀ါရီလကထက် ၅၅.၇ ရာခိုင်နှုန်း မြင့်တက်ခဲ့တာ ဖြစ်ပါတယ်။
တရုတ်နိုင်ငံက လိုအပ်တဲ့ မြေရှားသတ္ထုပမာဏရဲ့ ထက်၀က်လောက်ကို မြန်မာနိုင်ငံကနေ တင်သွင်းနေရတာ ဖြစ်ပါတယ်။ မတ်လမှာ ပို့ဆောင်မှုအခက်အခဲ ရှိခဲ့တယ်လို့ တရုတ်ကွန်မြူနစ်ပါတီ အာဘော်သတင်းစာ Global Times က ဖော်ပြခဲ့ပေမယ့် တကယ့်လက်တွေ့မှာ ဒီလို မဟုတ်ဘူးလို့ ရိုက်တာသတင်းဌာနက ဖော်ထုတ်ခဲ့ပါတယ်။
စတီးထုတ်လုပ်ရာမှာ ကုန်ကြမ်းအဖြစ် အသုံးပြုတဲ့ Nickel Pig Iron (NPI) တရုတ်နိုင်ငံကို တင်ပို့မှုဟာ မတ်လက ၂၉၈ တန် ရှိခဲ့ပြီး ဖေဖော်၀ါရီလနဲ့ယှဥ်ရင် ၉၀ ရာခိုင်နှုန်း ကျဆင်းသွားပါတယ်။
တရုတ်ကုမ္ပဏီတွေဖြစ်တဲ့ Nonferrous Metal Mining Group နဲ့ Taiyuan Iron & Steel (Tisco) တို့ဟာ မြန်မာနိုင်ငံမြောက်ပိုင်း စစ်ကိုင်းတိုင်းဒေသကြီးမှာရှိတဲ့ တကောင်းတောင် နီကယ်စီမံကိန်းကို လုပ်ကိုင်နေပြီး တစ်နှစ်ကို NPI ၈၅၀၀၀ လောက် ထုတ်ယူနေတာ ဖြစ်ပါတယ်။
Ref: Reuters
